الزيتونة للحوم الضأن

إذا كنت تتحدث إلى شاب في سن الزواج وقلت له : والله بنات عمك (حسنين) ديل سمحات جنس سماحة ومؤدبات جنس ادب فأنت في هذه الحالة تدعوه إلى الزواج ما إحداهن دون أن تقول ذلك مباشرة .. هذا بالضبط ما فعله الدكتور مأمون حميدة وزير الصحة وهو يخاطب الشعب السوداني الفضل عبر تعليق له من داخل مجلس تشريعي الخرطوم اوضح فيه بان الضفادع تحتوي على بروتينات ويمكن الاستفادة منها.

والسيد الوزير عطفاً على (مثال) بنات عمنا حسنين السمحات يدعو أفراد الشعب السودان الفضل لتناول (الضفادع) مستفيداً من البروتينات الموجودة بها مع إنه لم يقل ذلك مباشرة .
هذا الشعب الذي يدعوه (حميدة) لإلتهام الضفادع هو ذات الشعب الذي كان (قبل مشروع حميدة الحضاري) يشمئز من أكل (البيض الواحد ده) لزفارته ويسميه (الجنى جداد) بينما لا تخلو موائد مواطنيه البسطاء من الكستليته والريش وشية الجمر والعكو والسنكيت !
هو تعليق يخلو من اللباقة والكياسة وينم عن إستهزاء وسخرية وإزدراء لهذا الشعب الذي إحتمل في صبر بالغ تعليقات بعض المسؤولين المقززة والخادشة لحياء هذا الشعب النبيل الذي (شالوهو اخوان مأمون) لحم وجدعوه (عضم) عارضين عليه في النهاية (أكل القعونج) بينما تمتلئ ثلاجاتهم بأطايب اللحوم باشكالها وأنواعها .
تعليق السيد الوزير ليس هو التعليق الوحيد المسئ إلى هذا الشعب الذي يطلقه أحد الميسورين أقصد المسؤولين فقبله قد صرح وزير مالية سابق أن (أكلو الكسرة) في ما معناتو (شكلكم ده شكل رغيف)؟ كما صرح مسؤول سابق يوماً بان على الشعب التنقل بالحمير في ما معناتة (إنتو شبه عربات)؟ كما خاطب أحد الولاة وهو يري بيوت المواطنين (تسيح) من أثر المياة (إنتو ما تبنو بالطوب والأسمنت والسيخ)؟ !!
لا تستفزك أيها المواطن مثل هذه التصريحات فأنت في حضرة أمثال هؤلاء المسؤولين اصحاب (البيزنس) الذي يدر ألآف (الدولارات يوميا) يمكنك أن تستمع للمدهش المثير .. فربما يخرج علينا في الغد من يدعونا إلى اكل (الصراصير) لأنها تحتوي علي نسبة من الفايتمينات أو (النمل) لأنه يساعد على تقوية الجهاز المناعي للإنسان أو (الضب) لإحتواء لحمه على نسبة عالية من الأحماض الأمينية !
لعل السيد الوزير أراد أن يقول لجموع الشعب الفضل الذين تأثرو بالأمطار والسيول أن الأمطار ليست كووولها (كوارث) وان هذه المستنقعات التي في الأسواق والاحياء فيها رزق قد ساقه الله إليهم ليعوضهم عن البروتين بعد أن صارت لحوم الضان والعجالي في غير متناول العامة .
لا ليست هنالك مشكلة ايها السيد الوزير … فلياكل الناس القعونج ولتأكلو انتم من (الطيبات) .. وليشرب الناس الماء الملوث بالطحالب والفطريات ولتشربوا انتم (مياه معدنية) .. وليركب الناس الحمير ولتركبو انتم (البرادو) وليتعالج الناس في (المصحات) ولتتعالجو أنتم في (المنتجعات) وليبقي (أولاد الناس) دون زواج وليتزوج أبناءكم في (سيده سنهوري) وليتعلم أولاد الناس في المدارس الآيلة للسقوط وليتعلم أبناءكم في المدارس ذات (الروبوت) !!
مل لا تعلمه يا (شيخ مأمون) هو أن أكل الضفادع شرعاً لا يجوز إذ ان الضفادع ليست بحرية (كالأسماك) بل هي برمائية وأكلها وقتلها حرام بدليل أَنَّ طَبِيبًا سَأَلَ النَّبِيَّ صَلَّى اللَّهُ عَلَيْهِ وَسَلَّمَ عَنْ ضِفْدَعٍ يَجْعَلُهَا فِي دَوَاءٍ فَنَهَاهُ النَّبِيُّ صَلَّى اللَّهُ عَلَيْهِ وَسَلَّمَ عَنْ قَتْلِهَا)رواه أبو داود ( 3871 ) ، وصححه الألباني في ” صحيح أبي داود
يعضد ذلك حديث النبي (ص) حيث روى البيهقي عن سهل بن سعد الساعدي أن النبي صلى الله عليه وسلم: نهى عن قتل خمسة: النملة والنحلة والضفدع والصرد والهدد وقد نهى رسول الله صلي الله عليه وسلم عن قتل الضفدع (خليك من أكلها) كما في حديث عَبْدِ الرَّحْمَنِ بْنِ عُثْمَانَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ نَهَى عَنْ قَتْلِ الضِّفْدَعِ . رواه الإمام أحمد وابن ماجة وهو في صحيح الجامع 6970 (يعني الوزيرعاوزنا نخسر الآخرة ذاااتا) !!
كسرة:
علق أحد الظرفاء على تصريح السيد الوزير قائلاً : أعملو حسابكم هسه عمكم حميدة ده يقوم يخلي ليكم لحم الضأن دا لحم مرجعي ويحول ليكم لحم القعونج للأطراف ويفتح ليهو مطعم في نص الخرطوم يسميهو (الزيتونة للحوم الضان) !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

Advertisements

43 تعليق

  1. اذا كان (شيخ الوالى) لايميز بين أية ومثل شعبى فلا تستعجب ان لا يعلم (شيخ مأمون) اذا كان اكل الضفادع حلال ام حرام!!

  2. برنجيه هااامله

    1. قلت ليك حنلعب في دوري الطيش، مبرووووكة

    2. والله ياها !!

    3. مبروكة يا خوي جنوبي وكنتا شايفه الا كنت مشغول برسل حبه جزر وكده وقلنا برضو أحسن من الحمير اقصد القعونج وتحياتي لفلاديمير للمساعده وكذلك المندهش

    4. برنجية بطعم موية المطر

  3. ها يا جنوبي ، مباااالغة يا قول غرزة! تاني الطيش

  4. لاكين مع الجوع الحاصل ده القعوي في خطر والله .. الصينيين الفي الخرطوم تلقيهم هسي زعلانييين منو !!
    هسي عشان نحافظ علي اكبر كمية بروتين يا مامون , احسن نشويه ولا نطبخه ولا نقليه بالزيت ولا سليييقه ؟!!
    الله لا كسبك هجمتنا وهجمت الفعوي اكتر مما هو مهجوم .. قالوا من يوم تصريحك القعوي شغال هزاز ..

    1. انا خاتية فيهو حميضة دا، يا ها عوايدو! بتاع استعراضات على فاضي و مستفز ،لكن خليه في عمايلو دي اليسع الجاي ما حيجلّي

    2. مفيش اي نيران بتتولع في القعونج ام فت فت ساكت ههههههه

  5. هو عارف حاجة للدين يا بروف؟ لو كان يأبه و هو وزير و مسئول امام الله من المواطنين السودانيين ديل هل يسرّه ان يرى الناس تتزاحم بالأكتف و هي ( تلقط) في القعونجات من الميادين و الخيران؟!!! سؤال الله ليهو، منظر سااااكت قدام الناس ما بخجّلو؟؟؟ و الله انا أشك في ان هذا الرجل مريض نفسي يحتاج لعلاج

    1. تشكي شنو يا بت ! هو كان ما مريض نفسي زول وزير يجي يشتغل مقدم برنامج كلللل مهمته يقول أهلن يسعاد ؟!!
      لاكين معزور بِدلو الكتيييرة دي يوريها لينا متين ؟ كافي البلاء لا بفتتح مستشفيات (وفي قفيل المستشفيات طبعا ما بصوروها ) ولااا مركز صحي سااااكت ماف عشان يفتتحه والكاميرا تجي تصورو ..

      1. يا جنوبي , فايت على الناس انو الراجل دا ما بقدم البرنامج عشان خاطر عيونا! واالله انا إنتبهت إلى انه كل زول يقول لي انا ماشي لي دكتور فلان في يستبشرون و بما إني ( بحب حميضة شديدو بما انه سمعة المستشفى و بالذات في التحاليل في الحضيض) فبعمل على إثنائه فبلقاهم يقولوا لي ( لا ياخ ، دكتور شاااطر ما بتشوفيهو في التلفزيون؟؟؟؟؟؟؟؟؟؟؟؟!!!!!) ثم إنتبهت بعد ذلك إلى أن 99% من الدكاترة البستضيفهم هم دكاترة في مستشفياته , يعني دعاية مجااااانية لوجه الله !! حسي دي ما فيها شبهة يا ناس حسبو و محمد هاشم الحكيم؟ و الا الحكاية ما فيها بنطلون و طرحة!

  6. يعني هسي مامون حميدة ده حلل ما حرّمه الله ؟!!
    سمح اليصبر لي كان ما كلمت ليهو .. يا ابو حمزااااااا يا ابو حمزاااا يا ابو حمزة شفت مامون قال وقال وقال …

    1. عاد الليلة انت ونونا تتبختروا وتقدلوا !
      لقيتوها يتيمة ومسكينة !!

      1. عشان تشوف نحنا بنحرر بكانا كيف ! مش زي ناس كده تقول برنجيه وتمش ..

      2. المسكينة ويتيمة دي شنو القعونجة والا القمردينة هههههه القمردينة بي ناسها سلام يا خوي من ارض طاخ طاخ عارفين كذبة ابريل في شهر اغسطس انو الحكومة بترحل السودانيين في ليبيا ههههههه قطعوا تذاكرهم ومشو وهم عاملين ساتر لي مطار زي مطار وادي سيدنا هههه لما وصلوا الخرطوم ناس الحكومة اتصوروا معاهم في التلفزيون تفو عليك حكومة

    2. البيلقى الهبوب بضري عيشو !!
      هي نسيت مبروك البرنجية !

      1. والبلقى الجبخانة يسوي شنو آآآآآآآآآآآآآآآآلمندهش ا خوي

  7. والله ان العين لتدمع وان الجبين ليندى من هاتيك تصريحات وانعدام ادب وحياء مع الشعب !!

  8. مقهورين و ساكتين | رد

    .

  9. في انتظار المزيد من الاستفزازات من الجميع في مختلف المناحي …… إلى أن يقضي الله امرا كان مفعولا

    1. هو الفضل منو ما استفزانا !؟
      حتى الطفل المعجزة وربيع عبدالعاطى ما قصروا فينا …

      1. إهئ إهئ إهي …..
        حننتني !!

      2. انت اطلع من هنا سريع !
        بقت منك جفلة يا انت ,,
        كه كه كه

  10. ههههههه والله ياجماعه للمرة المليون انا ماعارفه هل الجلد بقى ميت ولا الامر استعصى ولا راجين القيامه تقوم

  11. هيئة علماء السودان في إفتاء لها :
    عدم جواز أكل لحوم الضفادع والانتفاع بها كدواء أو غيره مبينة أن الله أباح لحوم البحر حية وميتة، وأضاف (الضفادع ليست بحرية، بل برمائية، وأكلها وقتلها حرام و كل ما نُهي عن قتلة لا يجوز أكله ويشمل ذلك والنمل والنحل والهدهد ). جزاهم الله خيرا على هذه الفتوى بس الله يستر ما تلحق فتوى أبرار – مريم
    عموما وطالما فتحو خشمهم وطبعا دي فرصة لا تعوض ياريت لو يعملوا لينا قائمة بالحلال الناكلو شنو والحرام الماناكلو شنو عشان الحكاية هسع جايطة شي حمير وشي كلاب وشي اسفنجي والحكاية ماشة ضاغطة
    وبالمناسبة انا نسيت اسمها هي هيئة علماء السودان !! ولا هيئة ملهاة السودان !!
    عشان ما بتجي تقول ليها فتوى الا لمن تكون في مصيبة جاية ولا تلهي الناس عن مصيبة جاية برضو هههههههه

  12. في مجاعة 6 – لا أدري هجرية أم ميلاديه – قالوا الناس أكلوا جلد كراب العناقريب ، لا ندري بكره يمكن يقول لينا أكلوا افرازات أنوفكم (المخاط)

  13. في مجاعة سنة 6 – لا أدري هجريه ام ميلاديه – قالوا الناس أكلوا كراب العناقريب، لا أدري بكره يمكن يقولوا لينا أكلوا أفرازات أنوفكم (المخاط)

  14. نحن زاتنا نستاهل الاستفزازات المتواصلة من المسؤلين لأنو عودناهم على السكوت ولو ماكده كان الواحد فيهم احترم بلدو ومنصبو وشعبو. بقينا دائما الحدث المضحك في نظر الجنسيات التانيه ونحن في الغربه. لك من الله ماتستحق يا مأمون حميده ووالله سوف تحاسب على كل مافعلت بهذا الشعب من أقوال وأفعال وأخطاء راح ضحيتها الكثير من أبنائنا.

  15. تصريح غاية في الاستفزاز و الغطرسة , الناس ديل بقوا ما بختوا للشعب ده أي قيمة لكن الشعب يستاهل

  16. (القعونج صحي ولذيذ ومغزي) !!!

    بعد تصريح وزيرنا حقيقة حقو نعزي ** قال لحم القعونج صحي ولذيذ ومغزي
    أفرحي يا ضفادع وليكي حق تعتزي ** بعد القالو زولنـا أمــانة مــا بتتــمــزي
    تصريح الوزير خلى العرق يتنزز ** والعـجــب القعـوي رفـع القزاز وأتعـزز
    من زمن بعيد عائش سعيد ومعزز ** في سيـخ الكــباب باكــر نشوفو مقـزز
    تصريح الوزير تصريح ظريف ومسلي ** تصريحاً عجيب فيهو العجب متجلي
    موضوع القعوي غير مستساغ ومجلي ** نفطر بي قعونجة وبي جرادة نحلي
    الخـــبر الأكـــيد الأدهــــش البــابـوية ** بعـد تصريح وزيرنا المـا بخر المـوية
    صــدقوني البلـد ما بتبقـى فيها قعـوية ** لا ضفدع غليد لا صبرة لا حربوية

    وجاء الخريف فجأتن .. وكل خريف وإنتو طيبين … سلااااام …

  17. يعني ما ممكن تعليقي الفوقو قصيدة ظريفة عن القعوي ينحجز ويقول ليك: ( تعليقك في إنتظار المراجعة) !!! أكثر من نصف ساعة

    هو أصلو شنو حسابات الدوبية بتراجعوا فيها ؟؟؟؟؟ مسيخ زاااتو خلاص بطلنا !!! … سلاااام …

  18. مسيخ زااااتو بطلنا .. ما ممكن ساعتين ويقول لي : تعليقك في انتظار المراجعة !!! ودا كلو عشان نزلت قصيدة هجاء لمامون حميدة عن أكل الضفادع ، خلاص أنا مغادر القروب مع السلامة وتاني مسيخ زااااتو بطلنا … !!!!! سلاااااام …

  19. اطرف تعليق للسودانيين بليبيا الليبيين بقولوا ليهم البشير قنعان منكم هههه

  20. العالم يحيّر وللكريم الشكوي
    كل ما يوم مِحنْ بل كل يوم بي حكوه
    بعد بيع العقارب جات شراية المكوه
    هسي الليلة جات سلطة قعوي بي دكوه

    غايتو من الضحِك ما قِدِر حبست دموعي
    ميزان الضحك جلّ وخرج من طوعي
    الليله الجَدَاد وكتين سِمع موضوعي
    ديكه يغني ساااااي والجَدَادة تعوعي

    انا جاني الخبر بي كم لسان ورواية
    وقِبيض القعوي قالولي اضحي حكاية
    تكشط أي كيس كان حق اعلان ودعاية
    تقصد أي مطعم ويقذوا في الشواية

    كيييف بتقولا يا مامون وبي صوت عالي
    تشكّر في القعوي لا تستحي ولا تبالي
    إن بقي نحنا سايرين بي وراك طوالي !
    بنشوف القعوي مشرور مع العجالي

    يا مامون هوووي قول للغشاوه إنزحّي
    وفتح لي عيونك ولي بصيرتك صحّي
    مادام قُت تب لحم القعويات صحّي
    عندي إنا ليك سُعال .. هسي القعوي مااا يضحّي ؟
    عندي نا ليك سؤال .. هسي القعوي ما يضحي ؟

    ” فياض محمد الحسن عوض “

    1. رائع دائما يا جنوبي باختياراتك اها المظاهرات متين

      1. المظاهرات لامن يقولوا لينا اكلو الضبان ! والله الضبان دي ما نفوتا ليهم !! ههههه
        مظاهرات يعني شنو ؟!!!!

    2. لكل الجميع سلامات
      كدي ياجماعه روقه شويه الموضوع دا عجبني عجب شديد بس انتو اي جديد عندكم مرفوض انظروا للموضوع من زاويه تانيه
      قولوا لب كيييييف صوت القعوى دا عالى كيف وكل زول يقوقى من بيتوا والله مسول واحد يقدر ينوم مافى ونوصل صوتنا ونحن داخل منازلنا من غبر رصاص وموت ولا رايكم شنو

      1. معليش ياجماعه انا بكتب بى الحاسه السادسه النضاره مكسوره والدنيا ليل ابقو انتو شطار وصححو الكلام

      2. اها وكان في قوقاينا ده لم فينا واحد من الما صدقوا ولقوا فتوي زي دي نسو شنو ؟ نقعد نقضي الليل حلف اننا ما قعوي !

  21. (القعونج صحي ولذيذ ومغزي) !!!

    بعد تصريح وزيرنا حقيقة حقو نعزي ** قال لحم القعونج صحي ولذيذ ومغزي
    أفرحي يا ضفادع وليكي حق تعتزي ** بعد القالو زولنـا أمــانة مــا بتتــمــزي
    تصريح الوزير خلى العرق يتنزز ** والعـجــب القعـوي رفـع القزاز وأتعـزز
    من زمن بعيد عائش سعيد ومعزز ** في سيـخ الكــباب باكــر نشوفو مقـزز
    تصريح الوزير تصريح ظريف ومسلي ** تصريحاً عجيب فيهو العجب متجلي
    موضوع القعوي غير مستساغ ومجلي ** نفطر بي قعونجة وبي جرادة نحلي
    الخـــبر الأكـــيد الأدهــــش البــابـوية ** بعـد تصريح وزيرنا المـا بخر المـوية
    صــدقوني البلـد ما بتبقـى فيها قعـوية ** لا ضفدع غليد لا صبرة لا حربوية

    وجاء الخريف فجأتن .. وكل خريف وإنتو طيبين … سلااااام …

    1. (القعونج صحي ولذيذ ومغزي) !!!ما بقينا حقل تجارب بس قبال القعونج دا ما نربي ارانب وناكلها زي اولاد بمبة ما تقول الارنب بس والفيران وحاجات كثيرة كدي القعونج دا نخليهوا في الاخر بعد اولادهم يحكموا اولادنا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: