جنون كهربائي

عندما دخلت عليه كان في حالة هياج شديد .. يرتدي فنيلة داخلية فقط وسروال طويل .. تبدو عليه علامات الإرهاق وبعض مظاهر الجنون .. كانت الغرفة شبه مظلمة ودرجة حرارتها كما الفرن (مولعة نار) كان يهذي بعبارات غير مفهومة وما أن شاهدني حتى أمسك بتلابيبي قائلاً :
– معقول بس البيحصل ده؟

– قول بسم الله يا (عوض) في شنو؟
– عامل يعني عرفتني هسه؟
– (وقلبي ينفطر حزناً عليه) : كيف يا (عوض) يعني ما أعرفك؟ كدي انتا حاول روق وأهدأ شوية
– (وهو يشد شعر راسه) : أنا ما (عوض) … أنا ما (عوض) .. أنا طيره ومباري السيرة (ثم ينظر لي في غضب) .. طيرة ومباري شنوووو؟
– (في خوف) : ومباري السيرة
– ما أن أكملت له عبارته حتي أخذ يقوم بحركات راقصة ويعرض كأنه في سيرة حقيقية حيث اخذ (ينقز) ويهز رافعاً يده اليمني لأعلي كمن يمسك بعصاة يرفعها تارة ويخفضها أخري وهو يضرب الأرض برجله بقوة ثم فجأة يتوقف ثم ينظر للأفق ويلتفت محركاً رأسه يمنة ويسرى وكانه يخاطب أحد الحشود المليونية .. هنا قاطعته قائلاً :
– يا (عوض) ياخي الظاهر إنتا متوتر شوية .. أجيب ليك كباية ليمون ؟
– أنا ما عاوز ليمون .. ما عاوز ليمون .. أنا عاوز كهرباء
– لكن يا (عوض) كهرباء يدوك ساااي كده .. ما لازم أول نقابل دكتور نفساني
لم يابه (عوض) لحديثي أذ أنني إعتقدت أنه يقصد الكهرباء البيدوها للعيانين في الراس لمن يعانون من الإضطرابات العصبية لولا أنه توقف مرة أخري وهو ينظر للأفق و(يكشف) ويلتفت محركاً رأسه يمنة ويسرى وكانه يخاطب أحد الحشود المليونية ثم يصيح بأعلى صوته:
– ايها الشعب السوداني الفضل .. سوف يكون العام القادم هو آخر أعوام إنقطاع الإمداد الكهربائي وسوف تنعمون بإذن الله بإمداد كهربائي مستقر وتودعون إلى غير رجعة القطوعات المبرمجة وغير المبرمجة .. فالآن الآن أيها الشعب السوداني الفضل قد إكتمل إنشاء أكبر سد في أفريقيا والقارات المجاورة .. (وهو ينظر للجماهير المتوهمة) ويهتف :
– السد السد .. الرد الرد
– السد شنووو؟
– (متوهمأ أن تتم له الجماهير الجمله) .. ثم مواصلاً .. نعم .. كووولكم ح تكتفو من الكهرباء وكمان ح نصدر الفائض للدول المجاورة .. مافيش تاني قطوعات بالمرة ..
ثم اخذ (ينقز) ويهز رافعاً يده اليمني لأعلي كمن يمسك بعصاة يرفعها تارة ويخفضها أخري وهو يضرب الأرض برجله بقوة ثم فجأة يتوقف ثم ينظر للأفق ويلتفت محركاً رأسه يمنة ويسرى ثم فجأة ينخرط في موجة بكاء حار وقد إمتلات الفنيلة الداخلية التي كان يرتديها بالعرق فقام بخلعها ثم (مصرها) وهو يواصل النحيب بصورة جعلتني أخاطبه في شفقة ورثاء :
– ما معقول يا (عوض) البتسويهو في نفسك ده ياخي .. خليني كدي أجيب ليكا موية غسل وشك ده وروق شوية ملعون ياخي ابو الكهرباء على أبو القطوعات ذاااتا
– (في أسي) : بالله انا مش طيرة ومباري السيرة؟ كل سنة وأنا اصدق كلام المسؤولين .. كل سنة يقولو ليا السنة الجاية قطوعات مافي .. والسخانة ظلعت عين أبو أهل الخلفونا و كل سنة نحنا في العذاب ده ؟
– معليش يا (عوض) ما تشيل هم الأمور ح تمشي وأي حاجه ح تتصلح والسنة دي ح تطون آخر سنة تكون فيها قطوعات وكمان آخر سنة الخريف يجي فيها فجأتن بإذن واحد احد
ما أن سمع (عوض) عبارة (السنة دي آخر سنة) حتى أرغى وأزبد وهاج وماج وأخذ يخاطبني مهدداً رافعاً سبابته متوعداً :
– أوعك تقول كده .. أوعك تقول كده
– ليه يا (عوض) ياااخي؟
– قرفنا من الكلام ده .. الكهرباء دي عايزه كم عشان تتصلح .. عايزه كم ؟ خلاس مرارتنا إنفقعت … إنفقعت … إنفقعت .. ثم بدأ فاصلاً من البكاء والنحيب ..
وهنا دخلت عليا زوجتي في الغرفة وصرخت :
– قطعان الكهرباء ده طلع ليكا في راسك .. شنو مطلع فنيلتك وواقف قدام المرايا .. سجم أمي وكمان بتكلم في روحك؟ ألحق شموف ليكا طريقة رسل مقالك بتاع بكرة ..
كسرة :
غايتو أهو مشينا (نت كافيه) لحقنا ليكم المقال !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

Advertisements

24 تعليق

    1. مبروكة البرنجيه يا اخوي امريكي،،انا شفتها قبالك ولكني قعدت اتحسس في فنلتي وفي جسمي كلو خفتا يضربني ماس من كهربت عوض ده،،،هي الكهربا دي مش مدفوع قروشها،وتيب القطع في شنو،،عجايب والله وتيب ما ممكن تكون في حاجه بديله لاستنباط الطاقه يعني مثلا الضفادع لاستنباط الطاقه البشريه وممكن استنبطوا الطاقه الكهربائية من الشمس وكده او من الهوا (معليش هوا مافي وأكسجين ذاتو مافي في المستشفيات)

      1. تسلم اخوي د. عبيد ،، لكن عوض دا عندو جنون كهربائي ولا جنوبي كهربائي

      2. والله اخير ليك تتحسس يا عبيد اخوى ,,, اخخخخخخخ يا بلد

    2. هههههه برنجية دا شنو يا امريكي نحنا برنجنا فيها هناك في الراكوبة الاستاذ اصبح عنده خيانة بنزلها في الراكوبة قبل هنا هنا بقت سبارس ساكت تقبيل المرور

  1. شنو يا الفاتح شغل السُنة ده ؟!!

    1. انت عارف يا جنوبي الجنن عوض شنو الباعوض العرس الضبان وبقى ما بفارقو ليل ولا نهار وح ينتج كائن ما عرفته الازمان يعضيك ويقرصك فى ان ويجيك مرض لاهو ملاريا ولاهو تايفويد ويخليك تزوزي زي السكران لاتعرف حميده من عثمان ولا تعرف القعوى من الضان

      1. خُد !!

      2. انتي في الباعوض العرس الضبان ولآ في الشعب الرقد للكيزان ده !!!

  2. انتو عوض دا ما بالغ الفنيله دي لابسه لشنو ينطلق ساكت ويخلى الهمبريب يضربو بلا كهرباء بلا بطيخ

  3. والله الواحد دمعتو طفرت وقلبو انقبض ,,
    الله لا كسبهم عافية , ولا كسب (عوض الرقاص) عافية ,,
    وربى يشغلهم فى انفسهم ونشوف فيهم العبر وشيلة الخبر ,,
    لك الله يا وطنى الجريح ,,

    1. يا دااب دمعتك طفرت وقلبك إنقبض ؟!! يا قساوتك ياخ ..
      عوض الرقاص ياتو ؟ الواوه ميم وضاءه راء ؟ هسي فييي ذمتك وذمة دكترتك دي , في زول يشرطو ليهو لحمه ويمرقوا الركبة ويغيروها وتاااني يسدوا الجرح ويخيطوا , يقوم في تلاتة يوم بس يمش زي الحصان ؟!! أجي ياخواني هي الناس دي بتخجل من البواسير ليه ؟!! مااا مرض من الله ! زيو زي النزلة بصيب الفتحات التنفسية !!
      لك الله يا وطني الذبيح ,,

      1. ههههههههههههههههههههههههههههههههه ,,,
        هوووووووى انا ما دخلنى فى الفتحات الضيقة دى !
        خلينى فى الشعب الهوائية وما شابه !
        وسووووحى آيييا بالجنبة مووووحى آآيييااااااااااااااا

      2. ههههههههههههههههههههههه
        يلجنوبي انت شايف شمباتي بقى رايق وبزوق من الكلام مفعول المدام بقى يظهر

      3. هههههههههه
        عافي منها وراضي عنها انا ..
        كمان الانتي ما بتعرفيهو كان للساعة اتنين صباحا واتسابنا ده يكورك هسي نحمدو من الساعة حداشر بقي يتخمد , غايتو آخر ظهور ده الله يفتح علي الزول البرمجو ..

      4. بت وراق…
        منو دى ؟ انا دى !؟ برى برى برى من حكم ام تكو ,,, لكن دى مناورات وكدة …

        جنوبى…
        اممممممممممممممم ,, اجى اكهربك ؟؟ امس بس لقيتونى جاى دايخ من جدة !
        احححححححححححححححححححححححح

  4. العجيبة اي طائرة تتخارج من ليبيا يستنهوها في المطار تقول دافعين تذاكر الناس ههههه السفارة هنا في واد والناس في واد والمستقبيلين ومهللين هناك في واد ياخي اقلاها جيبو الطائرات دي مجان الناس هنا ماكلة نيم وكتمت كتمت كتمت

    1. يا أخوي كتمتها في روحك برااااك لينا زمن ننبح فيك ،، الغلبان خلاص كفاك أمرق ،،، الغلبان خلاص كفاك أمرق ،، وإنت سادي دي بي طينة ودي بي عجينة ،، أتاري البشير ما براهو العامل أضان الحامل طرشا !!

      1. اييوووووووى ايوووووووى ,,
        الغلبان طلع حامل ؟؟
        ابشر بالخير

      2. النلفون يا جنوبي سريييع الحالة قاعدة تستفحل

      3. hopeless case يا بت أمي ! ماااااا بتتلحق , بس ساعديها بالدعاء قالوا دعاء المؤمنة لأختها مجاب … مصابا جلل وحات الله …

  5. انتو وين نانو ونونا ؟!! مااااالم جلّونا ؟!!
    هسي الزول كان داير يبقي طيره يا جبرا ووووينا السيرة اليباروها ؟!!

    1. والله انا قاااعدة يا جنوبي و شكراً على سؤالك.( مخلوعة من برنجيتك الفاتت لسة). بس والله بأقصد مرات كدة لأني ( و ما عارفاكم لو بتوافقوني) بأحس كدة إني مدمنة للقمردينة و أنا جني و جن العادة البتستعبد الزول عشان كدة أححححححمدالله لا عندي واتساب لا فيسبوك و الله! لكن برضو ترانا نزووووزي و نجي نتضاير!!!أمس كنت عاوزة أرد للبروف لكن كهربتنا قطعت خمممممسة ساعات في وش العدو! يا قول شبونة أعوذبالله!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: