إتصرفوا وكده

تنبيه : هذا المقال تم نشره قبل عامين وكان وقتها الطماطم 10 ألف والآن 25 ألف وكيلو اللحم الضان 40 الف والآن 80 ألف .. فتأمل
___________________________________________________________
عزيزي المواطن مهدود الدخل .. أو بالأصح (معدوم) الدخل .. لا عليك أن صار كيلو الطماطم 10 ألف أو البصلة الوااحدة ألف او كيلو اللحم الضان 40 الف .. أو رطل الزيت بالشي الفلاني لا عليك إن إرتفعت أسعار السلع الأساسية والما أساسية (كمان) فهنالك الكثير من الحلول والابتكارات التي عكف العبدلله على وضعها وتقديمها لك في كتاب بعنوان ( فن التدبير في الواقع المرير) ها أنذا أقتطف لكم بعضاً منها وأؤكد لكم أن من شأنها أن تعينكم على البقاء أحياء (حتي اليوم الثامن من الشهر) والباقي (إتصرفو وكده)

(1) التوم :
التجهيز : يتم دق الثوم ناعماً ووضعه داخل علبة مصمته لعدة أيام
طريقة الإستخدام : تفتخ علبة الثوم أمام فوهة (الحلة) لتنداح منها رائحته على الملاح مباشرة
تحذير : يجب أن تكون العلبه موجهة لفوهة الحلة بدرجة حاده حتي لا يندلق الثوم داخل الحلة والميزانية تبوظ

تنبية :
بعد الإستخدام تأكد من أقفال العلبة بشكل محكم حتى لا يتسرب (غاز الثوم) من العلبة
وتكون الطبخة الجاية من غير توم !

(2) البصل :
التجهيز : يتم إزالة طبقة خارجية وااااحده عن البصلة ، بإستخدام إبرة وخيط قم بإدخال الإبرة في منتصف البصلة واجعل الخيط يتدلي منها ، قم بعمل خرم صغير في منتصف غطاء الحلة
طريقة الإستخدام : إدخل طرف الخيط داخل الخرم الذى في غطاء الحلة ثم أعقده لتصبح البصلة متدلية داخل الحلة ثم قم بقفل الحلة بإحكام حتى تتسبك رائحة البصلة مع محتويات الحلة .
تحذير : تأكد من أن البصلة المتدلية لا تلامس محتويات الحلة حتي لا (تتهربد) مع المحتويات وحقك يروح
تنبية : بعد إكتمال الطهي تأكد من فك الخيط ووضع البصلة داخل علبة وتأكد من أقفالها جيداً حتى تتمكن من استخدامها طوال الشهر .

معجون الاسنان (3)

– أمسك المعجون باليد اليسري بعد أن تقوم بفتحة
-أمسك الفرشاة بيدك اليمنى
-قم بتمرير رأس الفرشاة على فتحة صباع المعجون لمدة 20 ثانية
-(تسوك على بركة الله)
– تنبيه ؛ لا تنسي أن تغسل الفرشاة بعد الإستخدام للتخلص من بقايا المعجون (ههههه) !!

(4) الأحذية :

– قم بإحضار (جوز) من قارورة مياه معدنية فارغة (موبايل) للذين يرتدون مقاس 39-41 أو(فاميلي سايز) لمن مقاساتهم أكبر
– قم بواسطة المقص بقطع الجزء المسلوب الذي يلي رأس القارورة
– قم بقطع القارورة طولياً إلى نصفين متساويين على مقاسك
– أقلب نص القارورة المفتوح إلى أعلى ثم ضع رجلك داخلها بعد ربطها بخيط قوى ويلا أكسح على بركة الله
– لو الواطة سخنت يمكنك وضع (قطعة قماش قديم) كأرضية تحت الرجل مباشرة وكان المسألة (سخنت أكتر) يمكنك رش بعض الماء عليه للتبريد وكده !

تحذير :

تأكد من وضع الحذاء في مكان آمن عند دخولك إلى المسجد حتى لا يسرق !

(5) العلاج :

– توجه إلى التيمان وقم شراء الآتي وضعه في صيدليتك العائلية :
– شوية زيت سمسم+حبة قرض+حبة كمون+شوية عسل+شوية حبة سوداء +شوية حرجل
– لا تنس أن تسأل (العشاب) عن طرق الإستعمال والجرعات وبلاش تسألو عن (الأعراض الجانبية) لأنها مش ح تكون أسوأ من النحنا فيهو ده

(6) المواصلات :

-تعلن شركة (كداري ولا نقوم سداري) عن وصول حمير جميع المقاسات والموديلات صنعت وصممت لتلائم أجواء السودان وذلك بالمواصفات التالية :

– إقتصادية في إستهلاك الغذاء (قصب برسيم عيش ناشف أبو سبعين أبو مليون أبو أي حاجة في أي حتة(- – مدربة على تفادي الحفر والطبات الماليه البلد
– قوة 10 عجلة (دبل) مقاس 26 (ما تخاف بتطلع الكبري عادي(
– دفع رباعي وتعشيقة متعددة المهام (أضان شمال يمين ، إشارات جنب ، ضنب خلف(

تنبيه :
توجد إكسسوارات (كاتم صوت) و(بامبرز) عشان بتاعين (النفايات) وكده
أيها المواطن سارع بإقتناء حمارك الآن عشان الجماعة لو شموا الخبر ده ح يمنعوا إستيراد الحمير إلا (موديل السنة) و ح يعملو ليكم رسوم (فرق موديل) وكده ..

كسرة :
نشتري حمير ليه؟ ما نحنا أهو ما شاء الله حمير (فل أوبشن) وبنتحمل ده كوووولو !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

Advertisements

29 تعليق

    1. برنجيتكم مسييييييخه .. بالله تشاركك بت ما بتخجل !!

      1. هوي يا جنوبي انقرع ،، البت دي هي الام والأخت والزوجة ،، لكن برضو كدي شوف الترتيب !! سلامة نظرك ،،

      2. فعلا انقرع وما تدخل بين البصلة وقشرتها أو تبارك وتسكت

      3. بالله بعد كلام البروف الفوق ده في واحد عنده نفس لي برنجية

  1. حاجة تمخول شوف كلمة تمخول دي أصدق تقيم للشئ الحاصل ده

    مرسل من الهاتف المحمول Samsung

  2. إنصرفي ..
    يا دقن يا دنية .. يا كعبى يا ردية
    يا تافهي يا حرامية .. عرضتك اللدية
    انصرفي يا ما تخافى الله
    وتب دبيتك بالله
    النبى طلق ناقتو ولحق رفاقتو
    بعد ما كانت كسيرى بقت جبيرى
    أخرجى يابيضه زى الشحمه ( ناس الطيب مصطفي وغازي ) وياسوده زى الفحمه ( ناس علي عثمان واسحق فضل الله ) أخرجي
    قهرناهم بالقاهر والنبى الطاهر
    بخرناك من عين عمتك بت جد أبوك
    ومن عين العزبه البتقد العتبه
    عين الراجل فيها مناجل
    وعين المرا فيها الترة
    وعين الفتاة تقد الواطة
    وعين الصبى شرا غبى
    عين الجار احر من النار
    وعين المزاح أحر من السلاح
    وعين الضيف احر من السيف
    وعين العجوز القنفزوز
    البتفك الريق فى طرف الفريق
    اخرجى من بلدنا ، عين العجوز الكافوت اللافوت القاعدة غرب البيوت ، عين من فكر وذكر فيها الفلفل الضكر ،
    ويا دقن يا دنية يا تافهة يا حرامية
    يا مقطوعة الذرية
    انصرفي خصمتك بي تقيه .. كان فيه وفي البقية ..
    إنصرفي إنصرفي………
    إنصرفوا وكده ..

    1. الفينا دا يا جنوبي دا ما عين، دا يا كافي البلا إلا كان دافننو في مثلث برمودا! أشي سكتنا تب داماااا ظنيتو عين دا شيتا تاني

    2. لااااااااااااااااااا !!
      قهرتك بالقاهر والنبى الطاهر يا ساحر ,,
      دا شنو آآآ جنوبى !؟؟
      لقيتك مدستر ومجنتر ,,,
      بى برهانك وتعلى بيانك ,,
      تعفا وترضا ,,,,

      1. مسكين ما رم بياضو بخورو شالو الهوا ساكت ههههههههههههههههههههه

    3. ابيييييييييييييييييييييييييت يا جنوبي ما بنصرف قاعده في لحمكم ومصرانكم والماعاجبو يقيرركبو

    4. نونا .. انتي قايلانا يانا نحنا ؟! نحنا بقينا ماااا نحنا .. اااااااخ يا شعبا خمدت ثوريتك !!
      شمباتي … وحاتك مشتهي لي ظار حاااار كدي وانزل فوقو
      بت وراق .. يا الوراريق ليكم بصيح عقلي جن بعد كان نصيح .. بياض ؟!! ما كفاكم البياض الشلتو من اماتنا وحبوباتنا كل يوم والتاني راكبات اللواري وماشات علي جدودك ..

    5. كله عرفناهو بس دي غلبتني عدييييييييييييييييييل القنفزوز

  3. لا أظن السودان بهذا القدر من البؤس .. والله نحن في نعمة أحسن من غيرنا .. بالله خد جوله حول العالم ابتداء من حولنا وانتهاء ببلاد العالم الأول شوف الناس بتآكل اي حاجه تزحف – فرنسا / اليابان / الفلبين/ ادغال أفريقيا موائدهم عامره بلحم الخيل والبغال .. القرود .. الثعابين .. الفئران والله شاهدت عبر الفاضئية دوله قريبه جدا منا فئران مشوية ناشفه مرصوصة ذي طوب الكمائن. بروف انت رجل علم ومعرفة ودرايه وخبرة متراكمة .. نحن بنتطلع منكم حملة الدرجات العلمية عرض أوراق علمية مش وصفه لحلة الملاح .. على فكرة كانت شخصيات أفريقية كبيرة تنزل على ضيافة الحكومة في الفندق الكبير أو فندق السودان عندما كانت تقدم لهم الوجبة في الغرفة كانت تطلب من السفرجية الأكل البايت بدلا عن الوجية الطازجة.

  4. زي الحال دا يوم لا كان لا حصل..!!
    08-25-2014 01:11 AM
    نيالا:تقرير :محجوب حسون
    موجة الزيادات العالية في الزيوت والبصل جعلت ربات وأرباب البيوت في حالة يحسدون عليها باعتبارها تمثل أعباءً مالية إضافية وحرمان من أهم مكونات حلة الطبيخ (الزيت والبصل وحتى اللحوم والتي بلغ سعر الربع منها(15 )جنيهاً.
    وقالت الموظفة ميساء محمد آدم لـ(السوداني) إن الغلاء الراهن دفع النساء لاستخدام الحقنة لعيارالزيت بدلاً عن الزجاجة بعد أن وصل سعره (700) جنيه للجركانة وبعضهن يقسمن البصل لشرائح (قطع صغيرة )!! وأكثر من ذلك جعل الرجال يدخلون المطابخ لتقسيم بصل الملاح لزوجاتهن بالحبة بعد أن وصلت ملوة البصل (30) جنيهاً

    1. كان كدي الفاتح ده مكشوف عنه الحجاب .. سمح يا ( الفاتح الغايب ) ما تشوف لينا ( العوير ) ده بقعد كم سنة ,,

  5. بالله تشاركك بت ما بتخجل !! هووووي يا جنوبي هووووي .. البت مالها ؟؟ أنا والله تببب ما برضى في البنات !! مالن البنات ؟؟
    مي ياها أمك، وأختك، ومرتك، وبتك .. ومالن البنات ؟؟ ما زينة البيت، وفاكهة اللمة الأسرية الأسبوعية، وهن البيجيبن القبائل!!

    ومالن البنات ؟؟ ما حلاوااات، وحنينات، ومطيعااات، وشاااطراات، ومدبرات، وفوقن البركة، ومن أسباب دخول الجنة كما قال الرسول صلى الله عليه وسلم لكن بشرط هو : (لو أحسنت تربيتها) ..

    ولعلم الجميع أنا كلامي دا ما عشان مشتهي تكون عندي بت !! فالحمد لله ربي رزقني بمجموعة منهن (ضعف عدد الأولاد)، ورغم كده بحب البنات وبفضلن على الأولاد .. ولله الفضل والمنة بناتي كلهن تفوقن في دراستهن وطلعن مفيدات لأسرهن بصفة خاصة، وللمجتمع بصفة عامة والحمد والشكر لله (أما بنعمة ربك فحدث) .. ولنا عودة للتعليق على موضوع اليوم .. سلاااام ..

    1. ههههههههههههه
      انا طفل انابيب وما متزوج …..

      1. أمك مش أنبوبة؟؟ برضو انتاية ،ههه

      2. هههههههههه
        الله يجازيك يا مسنوحه ,,,

    2. جزاك الله خير حقتنا ما حقتم يا عمنا نانو

      وكيتا في الجنوبي الحقار دا

      1. الرجال ديل اتضاروا فيكي يا بت السودان , ما عرفوا اليقولوا وجو صدروكي وانتي اتحرشتي ليهم هههههههه
        هو انتي زااااتك كان ما فلهمتك وتقعدي تقلبني الكيبورد للانجليزي كان شلتيها يا مفلهمه ,, او علي قول أمي يا مفلحمه

  6. ليكم وحشة يا بروف والحلوين عموم في القمردينة

  7. والله قبل كدة انا قلت الكلام دا، الناس ديل جاديييين و بنفّذوا أفكار البروف طواااالي ، هو قبل كدا طالب بي انه يبق هو مستشار تنفيس و شكلهم كدا حيفكروا في الموضوع. غايتو يا بروف أكان شغلوك النبي فيك واطة في الخرتوم دي ، انا صحححححبتك!

    1. يا نونا أها بدينا الحنك ؟؟ من هسا دايرا تستعملي الفيتامينات بتاعة ( واااااو ) !!!!!
      صدقيني أنا ما كنت قايلك كدا !!! لكن نقول شنو دا الزمن ومصايبو الكل يوم بتتكشف شوية شوية …. سلاااام …

    2. هو البروف زااااتو بيتو في خطر مع اعادة تخطيط ام درمان دي !! والشافو في غرب الحارات ماااا كضّب هههههه

  8. كلكم همكم السودان طيب ما تجو نعمل لينا حزب ليس له علاقة بالسياسة لا من بعيد لا من قريب عاوزين نبني بس واسألوني كيف وبعد خمسين سنة ما بفضل اي عفن في السودان بس يدكم معاي وبرضه كتمت كتمت كتمت

  9. تعليقك في انتظار المراجعة.

    دا ما موضوع حلقة … الموضوع داير مراجعة ليهو شهر ؟؟

    لو كان براجعو المراجع العام والنايب العام والمفتش العام كان خلص …

    أدونا من الآخر …
    مقبول نواصل
    ولا ما مقبول نتطلب الله

    الرزق -زي ما قالوا بتاعين الهايسات- الرزق ابنصات

    سلام

    أب احم سيد الأسم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: