وإتفرج يا ســـلام

عزيزي القارئ لابد لأنك تعلم بما يسمي بالسكن العشوائي وهو أن يقوم احدهم بتسوير مكان في أطراف المدينه ويبني عليه عشوائيا وبوضع اليد (كم أوضه) تأوية وإذا تيسرت له الأمور اكمله منزلاً بكافة المرافق .. ولكن هل نما إلى علمك أن يقوم احدهم بإعلان دولة (عشوائية) عن طريق وضع اليد على مساحة طرفية لإحدي البلدان تبلغ 800 ميل مربع ؟

هذا ما فعله الخواجة الأمريكي (جيرميا هيتون) في الخبر الذي اوردته صحيفة (واشنطن بوست) الأمريكية مؤخراً والقصة كما تقول الصحيفة أن (الخواجة) كان يلعب مع ابنته الصغيرة (أيميلي) ذات الستة اعوام في منزلهما بولاية فيرجينيا في الشتاء الماضي ، قامت الشافعة قالت ليهو (بالأنجليزي طبعن) :
– يا بوي أنا ممكن أكون أميرة حقيقية ؟
– (فأجابها) بالحيل .. تبقي اميرة ونص وعشرة واعمل ليكي مملكة كمان
وكمن يريد أن يبني منزلا عشوائيا على أطراف المدن أخذ الخواجة يبحث في اطراف (الدول) ذات الحدود (الهاملة) حتي يقوم بتحقيق حلم إبنته ، وبعد بحث و(قوقلة شديدة) مستخدماً الإنترنت وجد الخواجة (جيرميا هيتون) ضالته في منطقة (بير طويل) وهي منطقة (سودانية) مساحتها ٢٬٠٦٠ كم² (أكبر من البحرين وسنغافورة معاً ) تقع على الحدود السودانية المصرية !
وطوالي قوم يا الخواجة صمم (علمك) وهو علم أزرق اللون يحمل أربع نجمات (ذهبية) وتاجاً وتلالاً صخرية وأحجز (للشافعة) وأمها واخوانا التلاتة وسافر (مصر) .
في يونيو الماضي حصل هيتون (في القاهرة) على موافقة من الحكومة المصرية للسفر عبر البلاد إلى منطقة بئر طويل ومن هناك بالعربات أقطع ليك 800 ميل في 14ساعة لحدت ما دخلوا (بئر طويل) حيث قام الخواجه بإختيار اعلي مكان وغرس فيه علم مملكته التي اسماها (مملكة شمال السودان) منصباً نفسه ملكاً عليها ومعلنا انها باتت مملكة خاصة به وبابنته الاميرة حيث حظيت القصة بتغطية واسعة من وسائل الاعلام الامريكية والعالمية!
وبعد هذا التنصيب عاد الخواجة إلى مسقط رأسه وقام بتجهيز تاجًا لطفلته ايميلي وأمرها بان تبقيه على رأسها طوال اليوم كما صمم لها سريرًا على شكل قلعة ملكية جميلة قائلا لوكالات الأنباء : ( بمساعدة كاملة من الحكومة المصرية، سافرت لمدة 14 ساعة مخترقا الصحراء المفتوحة إلى أن وصلت إلى بئر طويل وهناك زرعت علما صممه أطفالي وأعلنت ملكيتي لهذه الأرض وبناء على ذلك، فإني أعلن أن هذه المنطقة منذ السادس عشر من يونيو من عام 2014 ستسمى مملكة شمال السودان, المملكة ستكون ملكية ذات سيادة، وسأكون أنا رأس الدولة، وإميلي ابنتي ستكون أميرة حقيقية. ولذلك أطالبكم عندما ترون إميلي أن تخاطبوها بالاسم الرسمي الأميرة إميلي) !!
وبعد عودته لبلده وإعلانه لدولته طفق أصدقائه ومعارفه يسالونه (نظام شمارات) :
– بالله هسه مافي زول إتعرض ليك وللا سألك قال ليك أوراقك وينا؟
– نصيحيت ليك لو عاوز تبني حقو تبني بالطوب الإسمو (النجده) عشان كبير وبسرعة تخلص وما يجو يكسروها ليك
– يا مستر (هيتون) الناس العشوائي ده بيشيلوا ليهم خمسمية متر ألف متر إنتا تشيل ليك 800 ميل مربع لا شك إنك تبالغ
– يا مستر هيتون والله دي مافي زول (خواجة طبعن) عملا .. بالله لو لقيت ليك (قطعه فاضية) ذيها كده كلمنا !!
لم يلتفت مستر (هيتون) إلى حديث اصدقائه المغرض لأنه يعلم انهم (حاسدين) ساي ، فلا أحد منهم يستطيع أن يجد مثل هذه الفرصة (العجيبة) فيقوم بإنشاء (مملكة عشوائية) والظاهر كمان إنو عارف إستحالة (إزالة) السلطات السودانية لمباني هذه المملكة لعلمة بان السلطات (يا دوووبك) تستطيع أن تقوم بإزالة بعض (الكرتون) العشوائي باطراف الخرطوم !
ولك ان تعلم عزيزي القارئ أن (الملك هيتون) كما جاء في بعض الصحف الأوروبية يعتزم توجيه طلب إلى الاتحاد الإفريقي للإعتراف به وبمملكته (العشوائية) ومن ثم (طبعن) الأمم المتحدة ، ولم ينس (الملك هيتون) أن يصرح في إحدي إفاداته بانه مشغول هذه الايام بتصميم (عملة) للمملكة وأن بعض اصدقائه (الموسيقيين) في طريقهم للإنتهاء من تأليف (السلام الجمهوري) …
كسرة :
بختنا ح يكون عندنا نشيدين .. نحن جندالله جند الوطن (حقنا) ونحن جند الله جند الوطن ( بتاع الخواجة) !! وإتفرج يا سلام !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

Advertisements

24 تعليق

    1. أهااا يا جنوبي كدا كييف

      1. مبرووك يا بت السودان … ( مع لوي الخشم وتحريكه والسام بطرف اليد )

  1. انت يا بت السودان ما عندك شغلة ، يا كافي البلا لا عندك عواسة ولا غسيل ،، مبروك

    1. نحن زمن العشوائيات غسيل شنو وعواسة شنو ماتكون حاسدنا كمان زي جنوبي

      1. بعدييين بتجي تقول لي شوف لي معاك حتة في مملكتكم دي ،، تشوميها كدحه وتسمعيها مدحه

  2. اصلا البلد دي مدسترة ولينا 25 سنة منزلنها الظار بي :
    دقوووولك يا بشير شِن قوولك يا بشير
    وبشير زاااتو طلع شيطان ابن كلب وما عندو أييييييي طلبات ولااا دار يمرق !! كدي ننزلا بي :
    يا مرحبا بالخواجه ويا مرحبا الاصلو ما جا
    ويا مرحبا بالخواجه وياااا مرحبا بالخواجه
    تعفوا وترضوا .. تعفوا وترضوا يا اسياد ..
    نونا يا بت هيييي جيبي الجاوري ده , شمباتي جيب البينسون ..
    يعني نحنا الدناقلة حنبقي أبيي الشماليه ؟!!
    يا ربي الخواجات اصحاب الخواجه ده قعد يقولوا عننا شنو هسي ؟!!!

    1. يا مرحبا دبلوماسى يا مرحبا طلبو قاسى !
      بى برهانهم يعلو بيانهم ,, اهل الحضرة والنظرة ,,
      دستوووووووووور

    2. جنوبي هييي اختاني، لا بجيب ليك جاوري لا شتين ، ما لا مملكة شمال السودان؟ حلااااتا لا فيها شق لا طق ، أمريكان أصليين و يا بخت من جاور! و بما أني ام بنات من صباحاً بدد دري خاتة كرسيي الطويييل جنب بير طويل دا لما نشوف آخرتو . و لو الخواجة دا كمان عندو وليدات يكون ما قصر معانا و بناتي هديات و رضيات، والله أني أميلي قصدي حضرة جلالة الأميرة أميلي يشيلوها في عيونن! ( نسو شنو عاد يا خواني جنس سوات أبرار/ مريم ) دي ماا بنقدر نسويها و كايسين للمخارجة ههه.

  3. ههههههههههههههههههههههه ,,, دا هين يا بروف ,,
    الكيزان ما حاكمنها بوضع اليد من 89 ! اشمعنا دا يعنى ؟
    اخخخ يا بلد ….
    لكن على ما اذكر انو فى واحد سبقو عام 1953 فى استراليا ,, داك كمان اعلن فى الصحف المحلية انفرادو بمكان ما ودعا الحكومة الاسترالية للاحتراب معه ,, اها فى اليوم المحدد ما جات فاعلن فوزه وانتصاره الساحق عليها !
    هههههههههههههههههههههههههههههه ,,, تقول لى (هيتون) المسكين دا ؟؟؟

  4. بلدنا ماااااا عندها وجيع ، ان شاء الله كان وليدا صغير من ألب لعبو في النت ديل يحتجّ، طبعا هم ( تحسبو لعب) لكن بعد كأم سنه كدا نشوفوا العلم الماخمج في الامم المتحدة، و تاااني سايكس بيكو وبلفور وهلم جرا! تراهم الفلسطينيين العرب كوولهم قائمين و قاعدين عشانم الا نحن بعدين حي قولوا لينا أنتو تبع الامم الافريقية، و للمصريين يزغرتوا وانا اعيييييط

  5. مقهورين و ساكتين | رد

    القصة دي حقيقية لو حقيقية مافي زول معفي من الجهاد بقى فرض عين ده غصب لبﻻد المسلمين وانت ي جبرا اول زول ﻻنك اعﻻمي ﻻزم بدل تكتب وتسخر تصد وتدحر نحن الحكومة دي لو باعت وقبضت التمن نحن المفروض ندافع عن حقنا

    1. جبرا خليهو ! انت ماشي متين شان نمش معاك ؟!

      1. سوقوني معاكم يا داعش !!

      2. مقهورين و ساكتين

        انا ما مفروص علي الجهاد جهادي الحج والعمرة
        لكن الجهاد بقى بطرق كتيرة ما ضروري نركب عربات ونضربوا رشاش بس ممكن تدافع عن حقك اعﻻميا وتوعي الناس الماعارفة شي دي
        مش كﻻم العلماء في قنااة طيبة جاب خبر الشيعة بالسودان ليه ما نعمل زي كدة مع اﻻخ السرقنا ده

      3. أجي يااااا ولدي !!
        مااالك زي سواق الركشه البتزاوغ من حملات المرور ؟!!

  6. مساء الأمس و في تطور مفاجئ…
    إغلاق المركز الثقافي الإيراني في العاصمة والولايات وطرد الملحق الثقافي على ان يغادر البلاد خلال 72ساعة
    لكن الست الحيكومة ما ورتنا الطرد ده عشان شنو ؟؟؟؟
    هل لاسباب سياسية او دينية او امنية او اقتصادية …
    وبرضو ما مهم !!
    لكن المهم هسع انو عدد الشيعة في البلد دي 12 ألف نفر وطبعا ما طردوهم مع الإيرانيين!! يعني قاعدين في البلد دي
    و بالغين النصاب القانوني عشان يعملو دولة برااااهم وخصوصا انهم في غالبيتهم من شباب الجامعات ،،، يعني دولة شابة متعلمة
    السؤال لازال قائماً الإتناشر ألف ديل حجزو ياتو حتة في السودان الفضل عشان يسوو ليهم مملكة براهم ؟؟؟؟
    للأسف الحتات الناصية كلها اتسكنت وما فضل غير الجخانين !ّ!ّ

    1. أييوووووووووووووووووووووووي يوي يوي
      طبعا يا دهشه انا بستبعد لاسباب دينية دي ! لأنو دينا ده كان قااااعد وهم الجابو لينا الدين الما كنا بنسمع بيهو الا من حكاوي السودانيين الكان بيجوا من العراق وتلقانا فاتحين خشمنا ونسمع في البقولوا , طفايات السجاير جوه المسجد وما عارف يدخل يده جوه جيبه يطلع حجر ويسجد فيهو ولو الامام المعتمد ما جا ما بيصلوا جماعه كل واحد فيهم يصلي براهو وقصص كده زي ألف ليلة وليلة بالله ده دين ده ؟!! هو زاااتم كان ما لو ..ـه زول ما بعرف يختار زوجه صالحة واصحاب صالحين يبقي نبي ويصلح الخلق كيف ؟!!
      حكومتنا دي ما عندها أييييييييي شغلة بالدين ياخوي الا اتعصرت شديييييد
      السعودية كل يوم تزيد القرصة شوية هسي تكدسات الحجاج الفي سواكن دي قالوا الباخره السودانية ( دهب ) تجي محملة من سواكن ولما تصل جدة ناس ميناء جده يوقفوها خارج الميناء بالساعات لحدي ما كل البواخر تجي تفضي حتي يدخلوها وبي كده تتأخر في الرجوع وتجوط الرحلات والحجوزات هناك في سواكن ! ياخي قالوا الاسبوع الفات تزكرة الباخره في سواكن وصلت 3 مليون سوق اسود وتحت تحت في كلام انو السعودية مفكرة تغادر كل السودانيين بس بيدرسوا في الشعب البديل يكون منو وده المأخرم ..
      ال 12 الف شيعي ديل مفروض الشيوخ ديل يسيبوا ناس العرقي والتمباك والسجاير والزنا ديل في خمومم ده ديل ما بيأثروا لأنهم في من زمن الرسول وحتي الواحد فيهم سكرااان وكان جبت سيرة الرسول بقول صلي الله عليه وسلم وكان جبت سيرة ابوبكر وعمر بقول رضي الله عنهم !! ,ديل يخلوهم ويركزوا جهدهم كلهم ويجاهدوا في ال 12 الف ديل ويرجعوهم لحظيرة الدين الصحيح .
      شفت صورة السمؤال خلف الله ببوس كتف واحد من رجال الدين الشيعي وقعدت اربط فترة ظهور الحسينيات في الخرطوم بفترة وزارة السمؤال خلف الله !!

      1. حبشية انتى ما صعبة !!
        اوافقك فى حتة الضغط السعودى والاطرش الاسمو السموأل دا ,,,

  7. أها كده برنجية صاااح 100% يا بت السودان (مبروكة عليكي) كيتن في جنوبي !! وأنت آاااجنوبي هووووي أحسن ليييك إنقرع وأختا بناتي ديل،،، ما عندك شغلة معاهن !!
    أما المركز الثقافي الإيراني فقفلوه بناءاً على عدة عوامل، منها الإحتجاجات والأصوات التي بدأت تتعالى من العلماء والخطباء في المساجد إستنكاراً للمد الشيعي الذي بدأ يتوسع حتى وصل إلي 12 ألف شيعي بين طلاب وطالبات الجامعات .. والعنصر الأهم هو عدم رضا بعض دول مجلس التعاون الخليجي من التقارب السوداني الإيراني .. مما إنعكس سلباً على العلاقات الثنائية معها وبصفة خاصة السعودية والأمارات ..إن شاء الله عقبال ما يقفلوا السفارة كمان قولوا أميييين .. .. سلاام ..

    1. عمنا نانو
      حبنا وتحياتنا لشخصكم الموقر
      بس حكاية العلماء والخطباء الفي المساجد دي ماااا وقعت ليّ
      من زمان وين لما كان العدد 12 او 120 أو 1200 لكن تحصل 12000 وتبدأ الجقلبة !!! وين الرادي محطات ماليها اول ولا آخر وين قنوات التلفزيون 24 ساعة غنا ورقيص !! خليهم يجو ساعة وااااحدة وبالأجر المادي كمان ويقولو شغلة التشيع دي منكورة ودخيلة على الناس مع العلم بأن العلماء والخطباء بياخدو رواتبهم من بيت مال المسلمين !! وسيد بيت مال المسلمين ما خايف من العلماء و لكن هم خايفين على قطع عيشهم !!
      عشان كده نرجح العوامل السياسية وعفييييييييت منك آ السعودية لا تتذلي لا تتدلي

  8. ﺃﻋﺎﺩﺕ ﻣﺠﻠﺔ(ﺍﻓﺮﻳﻘﻴﺎ ﻓﻰ ﺣﻘﺎﺋﻖ

    Africa in Facts)ﺍﻟﺘﺄﻛﻴﺪ ﺑﺎﻥ ﺍﻟﺴﻮﺩﺍﻥ
    ﺛﺎﻧﻰ ﺃﻛﺜﺮ ﺍﻟﺪﻭﻝ ﺍﻻﻓﺮﻳﻘﻴﺔ ﻓﺴﺎﺩﺍً.
    ﻭﻓﻰ ﻋﺪﺩﻫﺎ ﺍﻟﺼﺎﺩﺭ ﺳﺒﺘﻤﺒﺮ2014
    ﺍﻟﻤﻜﺮﺱ ﻟﻠﻔﺴﺎﺩ ﻓﻰ ﺍﻓﺮﻳﻘﻴﺎ ،
    ﺃﻭﺿﺤﺖ ﺍﻟﻤﺠﻠﺔ ﺍﻟﺘﻰ ﺗﺼﺪﺭﻫﺎ
    ﻣﻨﻈﻤﺔ ﺍﻟﺤﻜﻢ ﺍﻟﺮﺍﺷﺪ ﻓﻰ ﺍﻓﺮﻳﻘﻴﺎ ،
    ﺑﻨﺎﺀ ﻋﻠﻰ ﺍﺣﺼﺎﺀﺍﺕ ﻣﻨﻈﻤﺔ ﺍﻟﺸﻔﺎﻓﻴﺔ
    ﺍﻟﺪﻭﻟﻴﺔ ، ﺃﻭﺿﺤﺖ ﺑﺎﻥ ﺍﻟﺴﻮﺩﺍﻥ ﺛﺎﻧﻰ
    ﺃﻛﺜﺮ ﺍﻟﺪﻭﻝ ﻓﺴﺎﺩﺍً ﻓﻰ ﺍﻓﺮﻳﻘﻴﺎ ﺑـ(11)
    ﺩﺭﺟﺔ ، ﺑﻌﺪ ﺍﻟﺼﻮﻣﺎﻝ(8)ﺩﺭﺟﺎﺕ
    .
    .
    ووووووب علينا نحن نجي الأول متين ؟؟؟

    1. هسي ماا نحن الاول ! مُش الاول غايب ؟!!
      يلا اجراااكا نفرح ..

      1. المندهش كلامو صاح، حقو نكلم المنظمة دي تعيد الإحصاءات حقتنا دي! كيف يعني احنا التواني ، والله احنا الاول مشترك ما دايرنها، سكتنا في كوووول شي احنا الطيش في الفساد كمان احنا التواني؟ بقي الا الفساد دا ، الإحنا الاواااايل ولا على كيفم ، كمان علي مستوى العالم كان ما عجبم، و يا جنوبي تراني فرررحانه و عجبني للسودان عقبال أمريكا ! ههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: