غناوي اللحمة

تعد مسألة مجاراة الأغاني وتحويل كلماتها إلى (مونولوج) ساخر من ضروب الفكاهة التي إزدهرت لدينا في عقود سابقة فأبناء جيلينا أخالهم يتذكرون جيداً الأغنية التي كان يترنم بها عميد الفن السوداني الراحل أحمد المصطفي ( حياتي حياتي) التي صاغ كلماتها الشاعر الراحل مبارك عبدالوهاب والتي تقول :

حياتي حياتي
أحبك أنتِ كحبي لذاتي
أحبك أنتِ لحبك أنتِ معاني الحياة
سكلتي طريق
طريق محفوف بكلّ محب وكلّ عطوف
نبذت الضيق نزعت الخوف
وقلتي نسير .. نسير ما نقيف
وقلتي ما دام في الدنيا حبّ وعاطفة عميقة في روحنا تدب
وإيد في إيد .. وقلب جنب قلب ليه ما نسعد وليه ما نحب
الدرب السالكاهو والقلب المالكاهوهم قلبي ودربي
وحبك إياهو بطراهو وبرعاهو آه لو ترعي حبي
نحن السعادة أحبابا ونحن الموّدة طلاّبا
والجنّة الليها نتشابى باكر ندق علي بابا
ندق وندق وندق .. والجنة تجيب
لأملنا نشق .. إن شاء الله قريب
وتهلل علينا في قلوبنا الحزينة بشاير السنين
بي غمرة هنانا تتشابك إيدينا يسار في يمين

هذه الأغنية التي قام بتلحينها وأدائها (العميد) تم إفراغ كلماتها وتحويلها إلى منلوج ساخر عن (الحماة) أي (النسيبة) في ستينات القرن الماضي وقد كان يردده أحد نجوم الفكاهة في ذلك العهد غير ان الذاكرة لا تسعف العبدلله في تذكر إسمه (نتذكر شنووو وللا شنووو … وللا شنووو؟)
المنلوح الذي يجاري الأغنية يقول مطلعه :
حماتي حماتي
يا أخت القرنتي
وشك انتي
محتاج لجونتي
جرى منو البعاتي

لزوم هذه المقدمة أنه وبينما كان العبد لله يقوم بتصفح أحد المواقع الإليكترونية إذا به يقف أمام تجربة (حديثة) مماثلة قام فيها احد (المدوناتية) على الشبكة العنكبوتية بتحويل نص شاعرنا الجميل (صلاح حاج سعيد) الذي تغني به الفنان الرائع الراحل (مصطفي سيد أحمد) إلى منلوج يخاطب فيه حبيبته (اللحمة) التي أصبحت عصية على جيبه ، تعالو أولاً نقرأ معاً قصيدة شاعرنا صلاح حاج سعيد يخاطب حبيبته (وبعدين نشوف موضوع اللحمة) :
يقول شاعرنا الجميل :
وبقيت أغني عليك غناوي الحسرة والأسف الطويل
وعشان أجيب ليك الفرح .. رضيان مشيت للمستحيل
ومعاكي لي آخر المدى .. فتيني يا هجعة مواعيدي القبيل
بعتيني لي حضن الأسى .. وسبتيني للحزن النبيل
ومشيت معاك كل الخطاوي الممكنة وبقدر عليها وبعرفا
أوفيت وما قصرت في حقك ولا كانت عرفة غيرك أصادفا
وقدر هواك يجيبني ليك .. جمَع قلوبنا وولفها
وقتين بقيتي معايا في أعماقي في أعماق مشاعري المرهفة
لا منك إبتدت الظروف لا بيك إنتهت الأماني المترفة
ندمان أنا ؟! .. أبداً وحاتك عمري ما عرفت الندم
ما أصلوا حال الدنيا تسرق منية في لحظة عشم
وأنا عندي ليك كان الفرح رغم إحتمالي أساك يا جرح الألم
كان خوفي منك جاي من لهفة خطاك على المواعيد الوهم
وأهو نحن في الآخر سوا باعنا الهوى ماشين على سكة عدم
… وبقيت أغني عليك غناوي الحسرة والأسف الطويل

وها هي عزيزي القارئ القصيدة بعد أن تم تحويلها إلى منلوج ساخر يخاطب فيها الشاعر حبيبته (اللحمة) :

ﺑﻘﻴﺖ ﺍﻏﻨﻲ ﻋﻠﻴﻚ ﻏﻨﺎﻭﻱ ﺍﻟﻜﺴﺮﺓ ﻓﻲ ﺍﻟﺼﺤﻦ ﺍﻟﺘﻘﻴﻞ
ﻭﻋﺸﺎﻥ ﺃﺟﻴﺐ ﻟﻴﻚ ﺍﻟﻠﺤﻢ … ﺭﺿﻴﺎﻥ ﻣﻦ ﺍﻟﺠﺰﺍﺭ ﺃﺷﻴﻞ
ﻭﻣﻌﺎﻙ ﻓﻲ ﺁﺧﺮ ﺍﻟﺸﻬﺮ ﻳﺎ ﻧﺎﻗﺼﺔ ﻣﺎﻫﻴﺘﻲ ﺍﻟﻘﺒﻴﻞ
ﺳﺒﺘﻴﻨﻲ ﻟﻲ ﺣﻀﻦ ﺍﻟﻐﻼ .. ﻭﺑﻌﺘﻴﻨﻲ ﻟﻲ الجزار ﻋﺪﻳﻞ
ﻋﺪﻳﺘﺎ ﻓﻴﻚ ﻛﻞ ﺍﻟﻘﺮﻭﺵ ﺍﻟﻤﻤﻜﻨﺔ ﻭﺑﻘﺪﺭ ﻋﻠﻴﻬﺎ ﻭﺑﺼﺮﻓﺎ
ﻋﺪﻳﺖ ﻭﻣﺎﻗﺼﺮﺕ ﻓﻲ … ﻫﺠﺮﻙ ﻭﻻ ﺻﺮﻓﺔ ﻏﻴﺮﻙ ﻋﺎﺭﻓﺎ
ﻭﻗﺪﺭ ﺟﻔﺎﻙ ﻧﺴﺎﻧﻲ ﻟﻴﻚ … ﻟﻤﻊ ﺟﻴﻮﺑﻨﺎ ﻭﻧﻀﻔﺎ
ﻭﻛﺘﻴﻦ ﺑﻘﻴﺘﻲ ﻣﻌﺎﻧﺎ ﻓﻲ ﺍﻋﻤﺎﻕ ﺑﻄﻮﻧﺎ ﺍﻟﻤﺮﻫﻔﺔ
ﻻﻣﻨﻚ ﺍﺑﺘﺪﺕ ﺍﻟﺼﺤﻮﻥ .. ﻻﺑﻴﻚ ﺍﻧﺘﻬﺖ ﺍﻟﺼﻮﺍﻧﻲ ﺍﻟﻤﺘﺮﻓﺔ
ﺟﻴﻌﺎﻥ ﺃﻧﺎ ﺃﺑﺪﺍ ﻭﺣﺎﺗﻚ … ﻋﻤﺮﻱ ﻣﺎﺿﻘﺖ ﺍﻟﻠﺤﻢ
ﻭﻻ ﻛﺮﺷﻲ ﻓﻲ ﻳﻮﻡ ﺍﺗﻤﻠﺖ ﻋﺎﻳﺶ ﺩﻭﺍﻡ ﺃﻧﺎ ﻓﻲ ﺟﺤﻴﻢ
ﻭﺃﻧﺎ ﻋﻨﺪﻱ ﻟﻴﻚ ﻛﺎﻥ ﺍﻟﺼﺤﻦ .. ﺑﺎﻟﻠﺤﻤﺔ ﻛﻢ ﻗﺎﻟﻮﺍ ﺍﺗﺮﺩﻡ
ﻭﺃﻧﺎ ﺧﻮﻓﻲ ﻣﻦ ﺁﺧﺮ ﺍﻟﺸﻬﺮ ﻳﺼﺒﺢ ﻭﻫﻢ
ﺃﻫﻮ ﻧﺤﻨﺎ ﻭﺍﻟﺮﺍﺗﺐ ﺳﻮﺍ … ﻃﺎﻳﺮﻳﻦ ﻫﻮﺍ
ﻣﺎﺷﻴﻦ ﻋﻠﻲ ﺍﻟﺒﻮﺵ ﺍﻟﺴﺠﻢ…

كسرة :
لو لقيت ليك كلبين بيتشاكلو في (عجورة) ما تندهش …. عاااادي!!!

تنبيه :
يوجد (واو) جديد … (للعلم وكده) !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و

20 تعليق

    1. رغم انو ابوك خصيمي لاكين عجبني لي بت السودان ,,
      مبرووووووووووووووووووك

    2. أدوني عين يا ود الحكومة لكن نسوي شنو الا نقول مبروك

    3. يا جنوبي أبوي عليه رحمة الله ما خصيمك والله ممكن برضو يكون أبوك ، أبوي ما أبو ود نافع وتلك الشرذمة –
      بت السودان حكومتي وسودانك وااااااااحد!

      1. والدك الله يرحمه ويجعلك بارا به في مماته ..
        بس انا قصدت ابوك الانت خاشي بيهو معانا ده ,, الحكووومة

  1. لو لقيت ليك كلبين بتشاكلو في ( عجورة ) قول اعوذ بالله من المؤتمر الوطني اللعين .
    وتهلل علينا في قلوبنا الحزينة بشاير السنين !!!

  2. والله شي يوجه القلب، دا السودان الكان ناسو عينم مالاانه من اللحمة الطعمها غير!؟ والله المغتربين كانوا يشيلوها معاهم في شنطهم من مساخة لحمة برا، يا شماتة ابله ظاظا فينا!

  3. أولاً: مبروك البرنجية لود الحكومة .. ثانياً: والله صدقتي يا بتي يا نونا أنا زي ما قلتي كنت فعلاً قبلما أطلع من البلد بشيل من السودان للأخوان في بلاد المهجر اللحمة ( مش بالكيلو بالخروف كااامل) وكمان معاهو بسطرمة وبفتيك وسجق وباسطة عمك بين من أمدرمان …….. وهلم جرا .. وأنا عارف حا يطلع لي جنوبي يقول لي أنت كنت مع (علي دينار) !! مع إنو رسلتها ليهو في الواتسآب ..

    مين يصدق إنو كنا في الغرب بنشتري الخروف حي يقول بااااااااع (بجنيه واااحد) وعندي زريبة في البيت مساحتها 400 متر أصلو البيت كبير مساحتو ألف متر !! “وكنت أحب السعاية”، فيها خرفان وبقر وغنم وغزلان وجداد وادي ووزين، وما حتصدقوا لو قلت ليكم كانوا بحلو بي منقه بعد الأكل !! كل دا كان أيام السودان بي خيرو لمن الدولار كان بي 33 قرش بس !!!
    آاااااه يا زمااااان يا حليل السودان وأيام السودان !!!!!! … سلاااام …

    1. والله يا عمنا أبو أحمد ما زلت أذكر تلك الأيام في السبعينيات والثمانينيات من القرن الماضي ، كنا بنشتري الخروف بي 7 – 15 جنيه ونطلع بيه رحلة ونحن شباب نأكل لحدي ما نشبع وزي ما قالت أختنا نونا كانت عينا ملانة ، ووالله دا الكان بيميزنا عن الشعوب الأخرى إننا شفنا الخير في بلدنا قبل ما نطلع منها ولله الحمد ، أهو نحن برضو شفنا خيرها مساكين أولادنا ولله الحمد أولاً وأخيراً.

    2. ههههههههه
      انت يا نانو قايلني صغيّر ؟!! انا صحي بيّن ما حضرتو لاكين لحقت قهوة جورج مشرقي في آخر اياما قبل ما يقلبوها بقالة وفي وشها كان في الكشك بتاع توتو كورة , ياخ انا من زمن دركسون العربية يمين والحركة شمال في الخرطوم , بس استمتعت بي باسطة وبسبوسة حلواني علي السيد الكوباني في الخرطوم في ناصية صينية القندول حاجة متعه ! تغسل يدك بالصابون وريحة السمنة ما تتطلع !! وبسيمة شوشه في ام درمان جم بيت ناس عمر الجزلي وكان في محل بهناك شارع الارسالية جمب الضريح اسمه الدانوب كان عنده بسبوسة خطيرة , هسي كان مشيت ام درمان واشتهيت باسطة يا نانو لا تقول لي اولاد سيد مكي ولا العبد الفتح جديد في شارع الوادي ده ! شفت في الملازمين مقابل معهد القرش في ود اسمه قاسم ( بس كأنك حاجز في الخطوط السعودية حضوره بعد الساعه واحده صباحا ) وبعد ده تلقي الناس زي النمل !!
      تأكل الخروف المنقة ياا مفتري !! اريتو حالي حال سعيتك ..

      1. ويا جنوبي كمان النزكرك بي سوق الخرطوم،الزنك كان فيهو اي حاجه قبل ما يكسروهوا وكان بالفعل معلم تاريخي للخرطوم،في كل الدول الشفتها بحتفظوا بالأسواق القديمه فهي تحكي تاريخ الشعوب

  4. نادي الذكرياااااات

    1. نادي الزكريات ياااا إرشيف !! أمانتن فيييي ذمتك دي , انت ما وريتني محل قبر جدنا الفاقدنوا من قبل مية سنة !!
      أصلي ما عافي ليك قروش الزيارة السرقتها من قبره ,,, اها النحدثك , نحنا جايينكم وجايب معانا مكتب المراجع العام ولا بنعرف تحلل ولا بنعرف توسل …
      يا نونا فييي ذمتك ما لبستي من سلوي بوتيك ؟!! العمر ما بظهر من اسلوب الكلام يا بت أمي ..

  5. يا بروف المونولجست هو الراحل بلبل

  6. سلوى بوتيك؟ سجمي دي شنو كمان؟ يطرشني و يعميني! والله لو بأسلوب الكلام كان تقول انا حبوبة لكن ما للدرجة دي انا ماني صغيري لكن كمان ما سلوى بوتيك! من القلتو دا كووووللو غير سوق الزنك ما بعرف شي ، و كمان والله طشاش طشاش ، كان سغااار زمنو. اها ما تنطو فيني احححمدالله بي عيالي لكن سغاااار لسه ههه

    1. ناس سلوى بوتيك قروشي ما ينفعنهم
      مرة زمااانك اشتريت منهم قميص كانو خاتين لمبة كحلية في البترينة وعجبني قميص لونو اخضر زي لون جنوبي ده و بعد دفعت القروش ومشيت البيت لقيت لونو اصفااااااار زي تكسي الخرطوم !!!
      وما يستفاد من هذا الدرس ان
      اللون الكحلي + اللون الاصفر = لون اخضر
      من الزمن داك والمعلومة راااسخة ومتوهطة ومتحكرة في راسي ده

      1. المندهش تتزكر احذية توموشيك ؟!
        كان دعايتا في الراديو بصوت ابو داؤود .. للمرأة العااااملة والرجل الشيك .. تترا تترا تارا احذية توموشيك ..

  7. – أحمد البلال
    (س)
    على اى معيار تم اختيار دكتور غازى فى لجنة 7+7
    (ج)
    – حسن عثمان رزق
    قال عشان عندو انقليزى
    …………………………………. !!!!!!!

    1. ايواااااا ! هي يعني 7+7 دي لمفاوضة البريطانيين !!!
      سمح ما كان يدخلوا إدريس البنا معاهم ! ده الغنا السوداني بغنيهو بالانقليزي وبنفس اللحن كمان ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: