تخمة وحراق روح

الفيروسات ومفردها فيروس Virus) ) هي كائنات صغيرة لا يمكنها التكاثر اٍلا داخل خلايا كائن حي وهي تصيب جميع أنواع الكائنات الحية، من الحيوانات والنباتات وحتى البكتيريا مسببة لمن تصيبه أختلالا في وظائف اعضائه .

ومن هنا جاءت تسمية تلك البرمجيات الصغيرة التي تصيب اجهزة الحاسوب بإختلالات في وظائفها (بالفيروسات) إلا أن شركات البرمجه العالمية لم تقف إزاء هذه المصيبة مكتوفة الايدي بل قامت بإنتاج برامج مضادة لهذه الفيروسات تسمى ِ Antivirusما أن يتم تشغيلها على جهاز الحاسوب حتي تقوم بعملية مسح لكل أماكن الخزين بأنواعها والتعرف على الفيروسات الموجودة وأهلاكها مع إعطاء مستخدم الجهاز قائمة بإسماء الفيروسات التي تم القضاء عليها ..
العبدلله يتخيل ما يمكن ان يحدث لو أن أحدهم قام بإختراع جهاز برنامج Antivirus يقوم المواطن بالمرور خلاله وما أن يطلع (بالجهة التانية) حتي يكون هذا الجهاز قد قام بطباعة لسته لجميع الأمراض التي يعاني منها ..
ولمعرفة الأمراض المشتركة لدي جميع مواطني الشعب الفضل هذه الأيام تحديدا والتي سوف يقوم الجهاز برصدها تابع قراءة هذا المقال ..
• حراق الروح (يا ربي عندو إسم علمي؟) : أي زول روحو محرقاهو .. وأخلاقو في راس نخرتو
• أنيمياء : يعني فقر دم .. هو المواطن ده الما بجيب ليهو فقر الدم شنو؟ شفتو ليكم طعمية فيها (فايتمينات)
• إزدياد معدل دقات القلب : الما بخليهو يدق شديد شنووو؟ كل يوم مخلوع من الأسعار الطالعه دي
• خمة نفس : الما بخم نفسو شنوو؟ من موقف (كركر) لي موقف (بربر) الواحد نفسو ينقطع
• تليف في المخ : الما (بليفو شنوو) كان شغال ذي الكمبيوتر يحسب في الديون ويشيل كل يوم طاقية ده ويلبسا لي ده !
• خمول الكبد : طبعن مفروض يفرز العصارة الصفراء عشان الطعام ينهضم وطالما (أكل مافي) الشغال ليها شنو؟
• الحديث مع الذات : أكيد بي صوت مرتفع .. هو جايب خبر لو مرتفع وللا ما مرتفع ؟
• الطشاش وضعف النظر : من كترت البحلقة في اللحم المعروض في الجزارات
• إنعدام الطاقة : طاقه يجيبا من وين (رطل السكر بي كم؟)
• هشاشة الاسنان والضروس : من عدم الشغل طبعن
• ضمور عضلات الفك : مافيش تمارين وكده
• تصلب عضلات الوجه : من التكشيرة الطوااااالي دي
• الإمساك المزمن : شئ طبيعي وحتمي
• حصوات الكلي : الموية أم طحالب دي
• فقدان الشهية العصبي : ده غير (العادي) لأنو فقدان شهية لعدم تواجد الأكل ذات نفسو
• حمي الضنك : كشئ طبيعي لإلتهاب الجيوب المزمن
• إنخفاض الكليسترول : الكليسترول يجي من وين يا حسرة بدون (عضة)
• تهيج غشاء الأنف : من ريحة الاسواق دي
• إحتباس بولي : العاصمة كووولها ما فيها 4 مراحيض عامة
• الزهايمر : الحالة دي مش تعمل خرف مبكر .. دي تعمل أرتخاء في الصمام الميترالي
• طمام : (التحلل) ده براهو ما بيطمم البطن

كسرة :
لو قمنا بفحص مسؤول بواسطة هذا الجهاز فسوف يقوم الجهاز بكتابة مرضين بس … تخمة وحراق روح … طبعن حراق الروح من (التخمة)

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و

Advertisements

35 تعليق

    1. مبروكة يا جنوبى – و No 1 دى للتأكيد و الا شنو؟

      1. دي كيتا لي هنايه !

      2. No.2
        جنوبي حبيبي
        مبروك وسعدنا وعجبنا وسر بالنا ودايماً،، متشارك معاي !

      3. اجى ياااااا الكدة !!؟

    2. ماعرفت تحسد اﻷ تحسدني انا المسكينة والله كان بتجيني في بكاني وانا نايمة لكن أن شاءالله ماتتهنأ بيها ولا تنيها

      1. هههههههههههههههههه

      2. ههههههههههههههههههههههه ,, مسكنى منكم الشهر الحرام دا !

  1. تخمه وحراق روح دي علي وزن بشتنه ورقاد واطه يا جبرا ؟!! هههه
    نحنا دايرين لينا رئيس يكون ( أنتي فايروس ) ,,

    1. انتاية ولاقلت شنو !!؟

      1. هي من قِل البدلات يا شمبه ؟!! كمان دار تجيب لينا راتب 6 شهور بدل طلح ؟!

  2. ولزوم اللفة دي كوووولها شنو يا بروف ؟
    أنا بشوف الحل انو يخترعو لينا جهاز Antivirus يفرز الناس الناس الكويسين ينور باللون الأخضر والناس الكعبين ينور باللون الأحمر و لما يطلع كوز يتم تدميره في التو واللحظه زي النكته المتداولة بتاعت صاحبنا بتاع الفيران المجننو في البيت رسل لي ولدو في أمريكا يشوف ليه حل ولدو رسل ليه فار صغير بشتغل بالبطارية
    الزول قام مشغل الفار الامريكي علي طول الفار الامريكي جمع ليك فيران البيت وفيران الجيران والحله كلها وطلع بيهم الخلاء وانفجر فيهم وقتلهم جميعا وارتاح كل أهل البلد من الفئران بعدها أرسل الوالد لولده في أمريكا متسائلا
    ناسك ديل ممكن يرسلوا لينا كوز صغير

    1. ههههههههه
      الفار الكوز الصغير البلمهم طلبوا ناس تانين يا حبيب قساي ما شايف هسي قاعدين يتلموا من كل بلاد الدنيا ويجوا عندنا ؟!! الله يستر بس من الانفجار !!

  3. اخخخخخخخ يا بلد ,,
    وانا الليلة حراق روحى شاط فى القنصلية فى جدة ,,
    عمك راجل كبير فى سنو بكل صفاقة قال لى : انت بتقول كلام عشوائى وما مسئول !
    والله لو ما كبر سنو كان (اتحللت) من كل ما احمل من رفث فى وشو ,, وكان اتوترت ليهم توتر العصبى الما بعرفوهو !
    تف يا كوز تف ….

    1. ههههههاي كنت تتحلل ساي يا أبيض اللون ,,, كرعينك خاويات كأنك في تانى دور !!!
      وسلامتك من التوتر العصبي يااااا انت
      لكن السبب شنو الخلاهو طلع من أطوارو ؟؟ مااافي دخان بدون نار !!!

      1. المندهش..
        ههههههههههههههههههههههههههه ,, ايحاءتك واضحة ومكشوفة ! طاااااااخ
        بعدين قول لى : اسمر اللون ,, خمرى اللون ,, كاكاوى اللون ,, احححححححححححححححح..
        جنوبى…
        هوووووووووووووووووى ,, زمالة واحدة ماف !هيييييق

    2. كان تقول ليهو انا زميل وزير الصحة بتاع ولاية كسلا ,,,
      طواااالي كان خلّص ليك ورقك

    3. يا دكتوووور .. بينى وبينك بس .. إنت قلت ليهو شنو ؟؟

  4. مبروووكة يا جنوبي البرنجية .. ما رديت لي بخصوص وزير صحة كسلا !! هل هو فعلاً الوزير ؟؟
    عشان أنا عندي كلام تاني لو أكدت لي إنو دا الوزير زاتتتتو بدمو ولحمو !!! يعني ما Photoshop … سلااااام …

    1. في نفي من بعضهم وتأكيد من البعض وفي الحالة دي افضل نصدق ناس النفي ,,,

      1. هههههههههههههههههههههااااى ,,
        من خاف سلم !

      2. الشينة منكورة !!!
        لكن كان وزير ولا ما وزير ,,, جابا كبيرة وما تشبه إلا زول يكون وزير ولا والي ولا ……….. وزير هههههههههه

      3. انت قايل شغلتي بيهو انو وزير ولا غفير ؟!! انا وجعنّي كترة الاصناف والبزار ده !

  5. اها يا جنوبي انا نازل علي البلد تاني تشمها قدحه وتسمعها مدحه

    1. انا ما اجزت ! ما حدثوك ؟!! 24 ساعة مقابل الكيبورد ,

      1. في ديّ صدقت !!
        شوف عين ما حدسوني بيهو ههههههههههه

      2. شفتو وين آآ دا !؟

      3. شفتو في العصريه
        بي جزمتو البمبيه
        أشّر بسم ليا .. وكر كر كر كر
        إتراقطن كِرعيا ….
        يشوفك التمساح الحايم في شارع النيل انت آآآآ المسنوح !

      4. هههههههههههههههههههههااااو ,,,
        امشوا بص ابورجيلة عشان تعرف البزار سمح !
        وسى يا بدوى سى

    1. ههههههههههههههه ,,
      مبسوط منك انا

      1. صاحبك بقي بتاع سبارس ههههههههههههه
        انت يا امريكي ما تجي محلها عديييل يمكن نخمس ليك بدل تلم من الواطه !!

  6. أخوي ود العم سااام – برنجيتك دي كانت طاشة شبكة ولا شنو ؟؟؟ الناس برنجو من أمبارح الضهر !!!

  7. ياجماعة انا عندى صديق شغال فى كسلا فى مرفق حكوم
    ى وبشغل منصب كبير واكد لى
    انو الزول دا ياهو ذااااااتو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: