الشبكة طاشة

عندما كانت الخدمة المدنية خدمة مدنية لم يكن بإستطاعة اي موظف ان يقوم بمطالعة الجريدة أثناء ساعات العمل الرسمية ولو حصل وقام رئيسه بضبطه بالثابتة (قيامتو قامت) وأقل ما يمكن أن يتعرض له هو التوبيخ ومحاضرة في الإنضباط وإنو الوقت للعمل مش لقراية الجرائد .

وجاء عصر الهاتف النقال (الموبايل) والذي تحول بفعل شركات البرامجيات إلى جهاز حاسب آلي مصغّر يحمل كل البرامج، وعلى رأسها برامج التواصل الإجتماعي ذات الإمكانات التقنية الهائلة الشئ الذي جعل إستخدام الهاتف النقال (الموبايل) متفشياً من قبل الموظفين في اروقة الدوائر الحكومية في كل قطاعتها، حيث اصبح غالبية الموظفين العاملين في تلك القطاعات لا يستطيعون الاستغناء عنه
تمشي أي شباك أي مكتب أي تلاقي الموظف او الموظفة ماسك الموبايل و(السبابة) شغالة طالعه ونازلة تمسح بالطول والعرض على شاشة الموبايل ،هذا (المنظر) غير المسؤول ربما عايشه كل منا حين اضطرته الظروف إلى الذهاب الى مصلحة حكومية أو مؤسسة ما، ما أن تطلب من الموظف النظر بأوراق معينه لإنهائها، حتي يأتيك الرد بكلمتين «دقيقة بس» هذا الرد الذي يشير إلى انشغاله لكن الطامة الكبرى حين يكون صاحبنا مستغرقا في الحديث مع شخص آخر عبر الموبايل في أمر لا علاقة له بطبيعة العمل المكلف به!
وتكون مشكلتك مشكلة إذا كان سبب الانشغال هو مطالعة خبر ما أو الرد على صديق أرسل للتو رسالة على برنامج «واتس آب» أو غيره من برامج التواصل الاجتماعي الشهيرة أو لمتابعة آخر تقاليع الموضة عبر الانستجرام وخلافه بالنسبة لبناتنا الموظفات .
العبد لله يعتقد أن العروض المغرية التي تقدمها الشركات المختلفة سواء في ما يتعلق بالدقائق المجانية أو غيرها من الخدمات تعد واحدة من اسباب تنامي هذه الظاهرة بالإضافة إلى (البطالة المقنعة) التي تعاني منها مكاتبنا حيث يتكدس عدد كبير من الموظفين في مكتب واحد لأداء مهمة يمكن أن يقوم بها موظف واحد و(طبعن) علاوة على التسيب وعدم المراقبه من قبل رؤساء المكاتب .
في كل البلاد المتقدمة نجد ان الوقت للعمل فقط وهنالك ساعة للراحة وتناول الطعام يمكن للشخص أن يتحدث خلالها مع من يشاء ولكن عندنا (الموضوع مختلف) فالموظف عندنا يا (في الفطور) يا (في الصلاة) يا (مع الموبايل) وفي غير هذه الأوقات (فالشبكة طاشة وكده) !
من المؤكد ان وجود الموبايل مع الشخص في مكان العمل امر مهم فربما كان هنالك شيئاً طارئاً أو رسالة هامة يجب ان تبلغ له كمرض شخص او تعرضه لحادث وما إلى ذلك ولكن بالمقابل يجب ان لا يساء إستخدام هذا الجهاز بهذا الشكل الذي نراه الآن في المؤسسات والدوائر الحكومية .
مناسبة هذا المقال أن للعبدلله مراجعة باحدي (الدوائر) لدي إحدي الموظفات التي كانت منهمكة تماما في الحديث مع صديقتها :

– دي طريقة قديمة يا (سلمي) والله أوريكي ماسك يبيض ليكي بشرتك في دقيقة
– ………………………………………………………………………..
– شفتي تجيبي ليكي معلقة بودرة جونسون
– ……………………………………………………………………….
– آآيا بدرة جونسون بتاعت الأطفال الواااحدة دي
– ………………………………………………………………………
– وتجيبي معاها معلقة موية ورد ومعلقة لبن ومعلقة دقيق ابيض ونص ليمونة وتخلطيهم وتمسحيهم في وشك .. وبعد 20 دقيقة تشطفيهم بي موية دافية
– ……………………………………………………………………

– خيار شنووو .. والله ده عملتو حنان جارتنا لمن انا ما عرفتها
– …………………………………………………………………………………
– إنتي بس أعملي الماسك القلتو ليك ده وقولي (حفية قالت)
وبعد أن إنتهت (الست حفية) من برنامج (أناقتك يا سيدتي) وإنتبهت لوجودي قامت بوضع الموبايل علي المكتب وهي تبتسم قائلة :
– الشبكة طاشة يا استاذ !!

كسرة :

مش بالله الآنسة (حفية) بااالغت ؟

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و

Advertisements

17 تعليق

    1. بالبركة يا بت البلد ،، و have a nice week end

    2. إن شاء الله تبقي ليكي ماسك ,,, هههههههههه
      مبروك

  1. هو هسي في مكاتب الحكومة في حاجة اسمها باشكاتب ورئيس قسم ؟!!
    يا حليل الزمن داك , ايضاح ولفت نظر وانذار !! والمدير ذااااتو يكون حاكيها من الدرجة الخامسة ولا السادسة لحدي ما يبقي مدير والباشكاتب يحكها من الدرجه 14 عشان كده كان بكونوا عارفين كل صغيرة وكبيرة ومن حجم الشغل بعرفوا منو الشغال ومنو القاعد ساكت ! هسي المدير يعينوه في مصلحة يكون عمره ما سمع بيها ذاتو واووول شوفتو ليها يوم جاء يمسك مدير !!!
    حفية ما قالت ليها بمسحو بالليل ولا بالنهار ؟ وان شاء الله حفيه بعد تنظيرا ده يكون وشها بتصبّح ؟

  2. يا بت السودان 10 ايام وانزل ليك علي البلد ، جنوبي دا ما شادي الحيل ،، مبروك ،،

  3. حقيقة يا استاذنا زي ما ذكرت واكتر الخدمة المدنية اقيم عزائها زمان وكفنها هسة شكلو الدود اكلو البركة فينا….. يا استاذ جبرا كدا شوفوا لينا حل نحنا الموظفين الجدد المخدوعين بمشروع توظيف الخريجين الاخترعتوا الحكومة واللي هسه ما لاقي تمويل مناسب خصوصا ناس الولايات يعني بإختصار دي عطالة مقننة يعني لزوم اهو الخريجين ووظفناهم تاني الفضل شنو؟

  4. ما براك قلتها يا بروف ، حفية ( آنسة ) و الشبكة طاشة!! اها شن العمل؟؟؟ يا هو جنس دا!! بس ما بفورني الا دايرات يبقن بُيُض كووولهن شكيتكم علي الله يا الرجال أكان فتغنوا للون الأبيض!!! كان في زفاف و البنات ما شاء الله جمال و أناقة ، و شقيق صديقتي يبحث عن عروس فناداها و قال ليها: شايفة البنات ديييلاك، امشي شوفي لي واحدة منهن و اوووعك تجئ تقولي لي ديييك أخلاقا سمحة! ما سألتك من أخلاقا!!! هههههههه ( يعني ارتبطت عندهم الجملة دي بشناة الخلقة ) هههههه
    – البروف ما شاء الله حفظ الوصفة كوللها ( أوعى تكون نسيت لينا شي تم قلبنا كمان ، لانلم في وشنا لا وش حفية) هه
    – يا للإ يا شباب حفية آنسة و مرتاااحة ( دا زمن بختوا ليهو موية ورد و لبن و دقيق في الوش؟)
    – بعد دا كووولو انا خائفة الشبكة تكون طشّت من حفية دي!ههه

    1. كما شبكتها طاشة توصف قدر دا لمن البروف يحفظ الوصفة غايتو ماقصرت معانا

  5. حاج احمد السلاوى | رد

    يا الفاتح .. هسه زاااااتو فى موظف بيكون قاعد فى مكتبو؟؟ كويس انك لقيت ليك موظفة قاعدة فى محلها ولو بالغلط ..
    ياخ تمشى فى كل شوارع العاصمة الساعة 9 أو 10 أو 11 صباحاً تلاقى الشوارع دى مليانة خلق .. جايين من وين وماشين ما تعرف زاااتو ..

  6. الست حفيه دي إن شاء الله تبقى ليها بي توبه بعد ماتلقى خبرها لافي في النت والجرائد.. وعجبتني والله يابروف

  7. الوطني : ما جينا نأكل الناس ونجيب الكهرباء والزلط وإنما لترسيخ مبادئنا ……………..!!
    – غندور
    لا نريد حزبا متسلطا
    نريد حزبا نعبد الله من خلاله
    ……….
    ……….
    بالله عليكم في طششان شبكة أكتر من كدة ؟؟؟!!!!!!!!!!!!

    1. يا شباب انتو بمناسبه الطششان ده اخونا الغلباوي اخبارو ليه مقطوعه والله بالي مشغول عليه كتير
      إنشاء الله نسمع عنو كل خير
      قولوا اامين

    2. هذى دعائم دعوة قدسية ,,, كتب الخلود لها مدى الازمان ,,,
      الله غايتنا وهل من غاية , اسمى وارقى من رضا الرحمن ,,,,

      1. لكن با قيلك يا شمباتي ديل هم اصحاب الدعوة القدسية
        غايتو هم قالوا ما لدنيا قد عملنا نحن للدين فداء ،،، لا للسلطة ولا للجاه هي لله ،،، هي لله
        و عشان كلامك السمح ده نخليهم لي الله و حسيبهم ربهم

      2. وبالمناسبة دي
        عمر بن عبد العزيز ( رضي الله عنه ) أنجب أحد عشر ولدا ً وترك ثمانية عشر دينارا ً ، كُفّنَ بخمسة دنانير ، واشتُريَ له قبر بأربعة دنانير وَوزّع الباقي على أبنائه.
        وقد سأل الناس عمر بن عبدالعزيز وهو على فراش الموت : ماذا تركت لأبنائك يا عمر ؟ قال : تركت لهم تقوى الله ، فإن كانوا صالحين فالله تعالى يتولى الصالحين ، وإن كانوا غير ذلك فلن أترك لهم ما يعينهم على معصية الله تعالى

      3. هووووووووووى ,,
        ما تسيبهم عشانى ,,, اقبض فى خناقهم لما يطلعوا الروح ,, اوووووح

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: