قايلنا نسينا

كل بلاد الدنيا (والكافرة بصفة خاصة) تمنع الموظفين الحكوميين من الاشتغال بالتجارة بطريقة مباشرة أو غير مباشرة أو الاشتراك في تأسيس الشركات، أو قبول عضوية مجالس إدارتها، أو أي عمل فيها أو في محل تجاري إلا إذا كان معينا من الحكومة معتبرة أن الموظف (المسؤول) يجب أن يترفع عن كل ما يخل بشرف الوظيفة حيث يجب أن يخصص وقت العمل لأداء واجبات وظيفته .
وواحدة من أسباب المنع التي صاغها هولاء المشرعون هو سد الذرائع أمام فساد المسؤولين فما أن تطل أعناق الدراهم (بالصدفة طبعن) ويجد المسؤول أن مطالب بالإجابة على السؤال (من أين لك هذا) حتي يقول ليك : كيييييف ما عارفين أنو أنا شغال في البيزنس !!

يقول اهلنا (السترة والفضيحة متباريات) .. لعلكم أعزائي القراء قد تابعتم على صفحات الصحف مؤخراً الشكوي التي تقدم بها أحد السماسرة يدعى (عبدالجليل علاء الدين) ضد السيد علي محمود عبدالرسول وزير المالية الأسبق مفيداً بان الأخير (ملحو) ولم يعطه حقة القانوني البالغ (مليار جنيه سوداني) المتمثل في عمولتة لقاء شراء منزل لسيادته بحي الرياض بالخرطوم وذلك بمبلغ مليون و(850) ألف دولار ما يعادل (عشرين مليار جنيه سوداني) ، حيث وعد الوزير المواطن بمنحه (5%) عمولة عقب شراء المنزل إلا أن الوزير لم يلتزم بذلك.
وحتى لا يأتينا السيد الوزير مبرراً إمتلاكه لمبلغ (مليوني دولار) ويقول لينا : (ما من اليزنس وكده) نحيله إلى الحوار الذي أجرته معه الصحافية نازك شمام بصحيفة اليوم التالي بتاريخ 12 مارس 2013 يعني قبل سنة ونص (بس) .. (قايلنا نسينا ؟) لنري كيف انه يعاني مثلنا (كما أفاد بذلك) .. الحوار تجدونه هنا
http://www.alrakoba.net/news-action-show-id-126423.htm
س : خمسة أشهر دون عمل.. ماذا كان مصدر رزقك؟
ج : أنشأت ثلاث صيدليات ؛ واحدة في منطقة سوبا، وأخرى في منطقة السلمة، وأخيرة في منطقة الكلاكلة، وكنت أعيش من ريعها، بالإضافة إلى وجود معاش حكومي من الشركة الحكوميّة التي كنت أعمل بها.
س : هل تعمل هذه الصيدليّات حتّى الآن؟
ج : لا.. أغلقت التي في سوبا لأنّها لم تنجح، وبعت صيدليّة السلمة لظروف خاصة.. الوحيدة التي تعمل حتى الآن الموجودة في الكلاكلة، بالقرب من المستشفى التركي.
س : هل تذهب إلى التسوّق؟
ج : أذهب للسوق، ولكن حتى أكون صريحاً؛ ليس كثيراً، فأنا غير مسؤول عن شراء المستلزمات المنزليّة، لأنّو عندي ثلاثة بيوت، لأنّو عملياً لا يمكن أن أذهب إلى سوق الخضار لكي أشتري خضارا لثلاثة بيوت، ولأنّ مسألة الخضار بها مزاج المرأة، وأنا أعطي المرأة حرّيتها في شراء الخضار والطبخ، ولا أتدخّل فيها..
س : هل تعمل على مفاصلة زوجاتك في الميزانيّات عندما يشتكين من زيادة أسعار السلع؟
– هذه غلبة شديدة.. باستمرار يشتكون من السوق والأسعار المرتفعة هذا نقاش يومي.

س : بعد الإجراءات الاقتصاديّة الأخيرة، هل ذهبت إلى السوق؟
ج : أذهب للسوق أحياناً.. ذهبت إلى سوق الخضار، واستطلعت عن أسعار الخضروات. زمان كنت أذهب إلى السوق بصورة مستمرة، أمّا الآن – بسبب المشغوليّات – فليس دائماً، ولكن أسأل زوجاتي عن الحاصل في الأسواق والأسعار حتى أكون على علم، وكثيراً ما يحصل عجز في ميزانيّة الأسرة، ولكن حتى أكون صريحاً فأنا غير الوزارة عضو مجلس إدارة لعدد من المؤسسات، والتي تمنحني مقابلاً مالياً، بالإضافة إلى معاشي الشهري وهو (267) جنيها عندما جاءت المنحة الأولى والثانية أصبح (467) جنيها، وعندي دكان مؤجّر وصيدليّة وأذهب مرات إلى إخواني لأخذ (2) مليون
إنتهت بعض الأسئلة وأجوبتها التي جاءت ضمن ذلك الحوار الذي تم قبل عام ونصف تقريباً يعني قبال سنة ونص وللتلخيص يا سادة يا كرام السيد الوزير بيقول :
– كل إستثماراته أنه يمتلك دكان مؤجر وصيدلية واحدة في الكلاكلة بالقرب من المستشفى التركي يعيش على ريعها بالإضافة إلى معاش حكومي مقداره 467 جنيها من الشركة التي كان يعمل بها .
– لديه تلاته بيوت (ثلاث زوجات) وهن يشتكون من إرتفاع الاسعار
– يقر بأنه كثيراً ما يحدث عجز في ميزانية الأسرة
– مرات بيفلس ويذهب لإخوانه لأخذ 2 مليون (بالقديم طبعن)
السؤال : بعد سنة ونص .. إشترى السيد الوزير منزلا بمبلغ ( 2 مليون دولار) .. كيف إستطاع ذلك .. يمكنك عززيزي القارئ من أختيار الإجابة الصحيحة :
1- كان ذاهباً لأداء صلاة الصبح فركل شيئاً بحذائه فإذا هو مصباح علاء الدين
2- في ما كان يقوم الليل رمضان الماضي إذ جاءته ليلة القدر
3- إقترض من أحدي البنوك 2 مليون دولار ليسددها من معاشه الشهري بقسط 400 جنيه في الشهر لمدة 240 ألف سنة ضوئية
4- أقنعه أحد الشيوخ بقدرته على مضاعفة الفلوس عن طريق الزئبق الأحمر فأعطاه معاشه الشهري فأخذ الشيخ يضاعفه له حتي صار 2 مليون دولار ونفذ المخزون العالمي للزئبق الأحمر !

كسرة :
ما تخاف يا عبدالرسول الحبه ما بتجيك .. هي جات قبل كده لمنو … ؟؟

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و

19 تعليق

    1. برنجية مجيهه
      تستاهلا يا ود بوتين
      بس اعمل حسابك من التالتة بتجيب خبرك !!

      1. مشكووور يا المندهش – و بعدين و لا يهمك,, التالتة بنخمسها ,, عشان تجيب خبرنا نحنا الاتنين !!!

    2. مبروكة (من تحت الضرس)

      1. الله يبارك فيك ,, و عقبالك (من تحت الضرس) !!

    1. الله يبارك فيك يا اونكل سام … جيت البلد للعيد و الا لسة؟؟

  1. هههههههههههههههههههههههه ,, والله شر البلية ما يضحك ,,
    والله والله انى صرت احب واحن واتوق الى العيش فى بلاد الكفار ,,
    حيث لا ظلم ولا اتجار ,,
    ولا عنصرية بغيضة ولا جهوية مقيتة ,,
    خيب الله الحاكم الظالم واعوانه ,,,

  2. يا إخوانا الراجل قال انه (تلقي عرض لشراء المنزل و لكنه لم يشتريه) !! كما قال انه دي حملة تشويه و لغرض سياسي!!! المؤمن صدّيق يا إخوانا الراجل دا برئ حتى تثبت إدانته!! تثبت دي علمها عند الله!!! بعدين ما قال لينا عرضوا عليهو هو بالذات يشتري البيت ليييييييه!؟؟ و بعدين هو ما نكر إنو عندو المبلغ دا ، لكن قال إنو ما إشترى البيت ( و كإنو دا موضوعنا الأساسي !!!!!ً)و قال إنو المحامي الرفع القضية لم يلتق به( ودا ضروري يعني؟؟ حتلتقي بيه قريب إن شاء الله! ) شوف عينا الحت أكلا الدود دي يا علي محمود شوفنا للإنذار ،!! حريف لكن يحاور بالكلام بي هنا و بي هنا التقول مخسمنو، هم يعني جايبين خبر القسم الاقسموهو لما استلموا الوزارات!!؟؟؟؟ بعدين صيدلية شنو البتفتح ليها تلااااته بيوت! الصيدليات الكلها كريمات دي و لا شي تاني؟؟؟ غايتو يا عبد الرسول أرجى الراجيك من الذي لا يظلم عنده احد و هو جالس على كرسي العرش، انت من قال للناس ( ما ضروري تأكلوا كسرة، ) و انت من نظّر بي رفع الدعم و كنت من الأسباب التي أدت لهبّة سبتمبر و التي فقدت فيها أرواح شباب و شابات يا فعين!!! تلقى ان شاء الله في جناك و جنى جناك( دا لو قروش حرام ياخوانا، لانو ممكن جداً الصيدلية تجيب ليهو مبلغ ٢٠ مليار و يدفعها كااااش عملة حرة، عاااادي)

    1. لا هو مشى يشوفو يعنى وما عندو مبلغ قريب من المعروض دا !!؟

  3. انا ماقادر افهم الناس دي مامتخيله انو في حاجه اسمها يوم القيامة وبحاسبو فيهو الناس ولا في شنو بالضبط؟ يعني الواحد ممكن يعمل أي حاجه في سبيل إنو يعيش رفاهية مؤقته على حساب إنو يعيش جحيم مؤبد؟ لالا بكونو ماعارفين كلام زي ده

  4. ود عبدالرسول ده شيعي؟ – لأنه من اسمه ده امكن يكون شيعي – ولو كان كده امكن اقول كده لأنو الناس ديل دفيعين ودي بتحلو …
    وكان ما حلتو ممكن اقول بعد المالية مشى ولقى حجر دهب وزنه 2طن
    وكان ما حلتو اسردب ساااااكت الحبة ما بتجيهو اصلو ناس المؤتمر ديل دعوتهم مقبولة وعندهم سر فأغشيناهم فهم لايبصرون
    وكان ده كلو ما نفع ممكن اقول بنشغل قروش الحزب نتاجر بيها
    وكان ما نفع اقول دي قروش اخو البشير وقاعد اتاجر بيها
    ولا اي واحد من ناسهم الاغنياء – اصلهم ناس الانقاذ لما استلموا كانت عينهم مليانه
    والله بكتب وقلبي مولع نار على حال البلد
    اللهم كل من خان الامانه افضحه في الدنيا قبل الاخرة كي يكون عبرة لغيره وحفظا لمال المساكين من ابناء شعبي

  5. أريتو حالي بعد الحال من بيت إجار لبيت باتنين مليون دولار
    وإنتو
    “يجيكم سعد بت عيدروس اللقوها تعوس وصبحت عروس”

    عليكم الله شوفو محن ود عبد الرسول ده !!!! ……………..

    إجزخانة و معاش يا مفتري يا حرامي

    إبليس قاعد متمحن !ّ!ّ!ّ!ّ!ّ!ّ!ّ!

    1. على الجزيمة ابليس زاااتو اتحير فى ناسنا ديل !!!

    2. اجزخانة وبالكيزان وسخانة ,,,
      أفييييييييييييييييييييييييي

  6. الناس دي كل شيء عندها لله (فاهمين كدى هم) يعني هم بطبقو في السنة مثلا التعدد سنة
    وان الله يحب ان يرى اثر النعمة في عبده وده برضو فهم
    وانك ان تذر ورثتك اغنياء خير من ان تذرهم عالة يسالون الناس اعطوهم او منعوهم
    وبعدين بالنسبة لمصدر المال يا بروف ممكن اقولو ليك نحن دخلنا في تجارة والخليفة ابوبكر كان خليفة وتاجر يعني نخلي سنة ابوبكر ونتابع الخواجات
    مش قلت ليكم كل شيء لله

  7. ياجماعة كلامكم دا كلو ما بحل مشكلة …. التعليقات دي بتكون تنفيس ساكت لا بتودي ولا بتجيب ولا في مسؤول بقراها!!!دحين آجماعة أخير الناس تفتش ليها لي حل عملي ..يوم القيامة دا كل زول ببقى في رقبتو حتى نحنا ديل البنطقطق في مفاتيح الأجهزة دي الله يخارجنا بالسلامة (يوم يفر المرء من أخيه..)…مطلوب حلول عملية للشعب الفضل بس..والجاي في الطريق…ناس 50 و60 سنة ديل ما عندهم مشكلة الكم سنة دي بعيشوها بأي طريقة (أجدادهم كانوا عايشين كيف قبل سنة ستة؟!!)…

  8. الطايوق ,, للغة هو مادة بيضاء تُستعمل في العواسه ,,
    اصطلاحاً ما يُدهن به الصاج قبل العواسه ,,
    وعلمياً هو نخاع العظم الذي ينتج الدم !
    القرقريبه ,, هي أداه لتشتيت العجين يُمنةً ويساراً ,,
    واصطلاحاً هي تشبه جهاز المغتربين باعتبار ان المواطنون ( عجين ) !
    …..
    مْـن يمسك بقرقريبة الوطن حالياً ؟؟
    دقونا دق العيش ,,
    طحنونا كالدقيق ,,
    خمرونا كالعجين ,,
    وعاسونا كالكسره ,,
    وكومونا گــ گمية من الــ(طرقات ) …
    كثرة العواسه من طاقم الرياسه قضت علي ( الطايوق ) …
    بلادنا تعاني من مشكلة في النمو ,,
    طبياً السودان لديه (Bone Marrow depression)
    گمٓل نخاع العظم ،، نفد الطايوق !
    لگن لم تنتهي العواسه …
    الأخ وزير الكسره , حينما نفد الطايوق و لم يجد كسره أصبح محتاراً لايجد مايعوسه فأكل السمسار !!!

    كسرة : ( الطرقه ) هي مفرد الكسره !
    مقال للحبيب الصديق / د.عاصم بكرى

  9. وين للبيع السريع يا بروف؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: