نادي الأسرة والمخابرات

ميدان عبدالمنعم والذي يقع بالخرطوم 3 هذا الميدان يعد رمزاً في تاريخ الخلرطوم عامة وخاصة بالنسبة سكان ومواطني الخرطوم 3 ، كان يقام في هذا الميدان المولد النبوي سنوياً وتجري فيه مباريات كرة القدم التي تشهدها جماهير غفيرة كل عصر كما كان مركزاً للشباب والكبار حيث يلتقون في قهوة (عم حامد) يتناولون شاي اللبن (المقنن) والقهوة (المظبطة) ويتبادلون الأخبار والقصص الطريفة والنكات ثم بعد ذلك يذهبون إلى سينما الخرطوم جنوب (الدور الأول) خاصة إذا كان الفلم (كاوبوي) او هندي (لشامي كابور) .. للأسف سينما الخرطوم جنوب أصبحت في خبر كان !

للأسف تحول هذا الموقع التاريخي الذي إرتبطت به ذكريات الكثيرين من سكان المنطقة إلى ما يسمى بنادي الاسرة وقد إستبشر المواطنون خيراً بذلك التحويل خاصة بعد ان تم تنجيله وأدخلت فيه بعض النشاطات الرياضية كصالة تنس الطاولة وصالة البلياردو وملاعب التنس الارضي والإسكواش كما اصبحت تقام فيه المعارض الثقافية والأسواق الخيرية واصبحت الاسر تأتي من كل حدب وصوب مع أطفالها يحملون معهم (ترامس الشاي) والقهوة والكيك يفترشون ابسطتهم الارض وهم يروحون عن أنفسهم بينما أطفالهم يلعبون أمامهم في أمن وامان ، كما كان النادي يستغل من قبل الطلاب للمذاكرة ومراجعة الدروس أفراداً ومجموعات يشرحون لبعضهم البعض في جو هادي لا يتركون أماكنهم إلا عند سماع الآذان حيث يذهبون لأداء الفريضة في جامع عبدالمنعم المقابل للنادي .
(فجأتن) ودون سابق إنذار فوجئ رواد النادي بقفل كل الأبواب وتم منع الأسر من الدخول أو حتى مجرد الإقتراب من ابواب النادي وتم وضع لافتة في وسط النادي كتب عليها (ميدان الخرطوم الوطنى تحت إشراف جهاز الأمن والمخابرات) كل الأنشطة الرياضية والثقافية السابق ذكرها توقفت تماماً وإختفت منذ سنين عديدة وأصبحت في خبر كان وأصبحت الأماكن كلها جافة صباحا مظلمة غامضة مساءاً .
تم إستقطاع الجزء الجنوبي الغربي من النادي وأقيمت فيه صالة مغلقة للحفلات بإسم (صالة إسكاي) تؤجر للراغبين (بالشئ الفلاني) لليلة الواحدة ، كما تم إستغلال الجزء الجنوبي الشرقي كمكتب لوزارة الشباب والرياضة بعد ان إختفت الرياضة من النادي وضاع الشباب والما عاجبو يشرب من البحر ويضرب راسو بالحيط .
ما حملني للتطرق لهذا الموضوع هو ما حدث معي هذا الصباح بعد صلاة الفجر في جامع عبدالمنعم محمد رحمة الله عليه والمجاور للنادي ، ذهبت مع ابنائي للرياضة الصباحية وكانت بنتي معي بدأنا الدوران حول النادي وأنا أتحسر على الزمن الجميل ، طلبت مني إبنتي أن نكمل الجكة والسويدي داخل النادي وكانت إجابتي لها ، أن ذلم متعذر إذ أن كل الأبواب مغلقة بالجنازير لكنها قالت لي (يا بابا في واحد هناك قاعد يتريض) وبالفعل لمحت أحد الشباب يتمرن يبدو انه يتبع لجهاز الأمن والمخابرات ، سالته بكل أدب (يا شاب ممكن تفتح لينا الباب نحنا عايزين برضو نتمرن) كانت إجابته صادمة إذ قال لي (الشارع واسع ما شايفو وللا شنو؟)
أستاذنا الفاتح جبرا .. والله العظيم هذه الإجابة قد نزلت علي كالصاعقة وأثرت في نفسي أيما أثر خاصة وأولادي معي ، وقد سألني اصغرهم سناً (يا بابا إشمعنا هو يتمرن ونحنا لا) !!
يا أهل السلطة الرابعه أنتم من نرفع لكم شكوانا بعد الله سبحانه وتعالى حتى توصلوها (للجماعة ديل) .. أن رفقاً بأسر الخرطوم 3 وما جاورها .. نحنا يا جماعة الخير لا عندنا في بيوتنا حدائق بي نوافير لا عندنا مراجيح لأطفالنا (ذيكم) .. بالله رجعوا لينا نادينا عشان راسنا مقطوع وما عارفين نمشي وين !!
د. صابر محمد حسن
من مواليد الخرطوم 3

كسرة :
من اجل مئات الأسر نلتمس من السيد مدير جهاز الأمن والمخابرات إعادة (نادي الاسرة) إلى ما كان عليه وإزالة كل التعديات التي لحقت به … عشان أحسن ليكم الناس دي (تتنفس) وللا شنووو؟
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و+و

Advertisements

15 تعليق

      1. Welcome يا بت السودان ،، مش زى بعض الناس يقفلوا بابهم بالجنزير و يقولوا للناس جكوا ببرة….

    1. انقليزي ده يا ود روسيا وبت السودان ؟؟

      1. دة انجليزى معرب بالروسى !!

  1. مقهورين و ساكتين | رد

    كل عام وانتم بخير
    مامشكلة امن ومخابرات وطني مش بخدموا البلد برضو
    طيب اعملوا ليهم واحد تاني

  2. خُد ام الحسين اتنفخت !!
    يا بروف ويا صابر ،، لزوم تجيبو اسم النادي ده شنو هسع ؟؟!!
    سمعت تحت تحت قالوا باقي واطاتو عاوزين يبيعوها اراضي إستثمارية !!
    أها جُكًو تاني !!

  3. اتحدثوا بالافرنجي ،، خلوا ( الفلفسة ) ،، مبروك يا ود بوتن ..

    1. الله يبارك فى عمرك يا اونكل سام – بس رايك شنو فى الفلفسة دى ؟؟ تفانين و حركة فى شكل وردة على الطاير كدة !!

  4. بروف جبرا حياك الله ومتعك بالعافية
    هي بقت على نادي الاسرة بس – فضل شنو ولا خلو شنو عشان يخلو نادي الاسرة – يا امنجي وترتاح يا …………. طيارتك قامت

    د.صابر محمد الحسن دا ما يكون محافظ بنك السودان السابق او الاسبق المعروف بلدينا زاتو ؟؟؟؟ لو ياهو زاتو بالله هو ساكن في الخرطوم تلاتة ياخسارة و 1000 خسارة كنت بشيل اوراقي وافتش في الوظيفة قالو لي بيشغل الدناقلة بس ما لقيتلو درب رغم انو في واحد من حوالين حلتو قالي ماتتعب نفسك وانا كنت قايلو ساكن حي المطار ولا المنشية ولا …………….

    يا خسارة والف خسارة نادي الاسرة الكان وكان وكاااااااااااااااااااااااااااااااااااااااان

    الله يصبركم يا اهلى الافاضل الزاد شوقي ليهم – نقول نرجع الاجازة لمن تقرب الاجازة يجي واحد راجع من اجازتو يسب ويلعن نغير راينا

    وكلو كوم وجرجرة شهادة الميلاد الكان بيطلع يوم ولادة الطفل من المستشفى وربطو بنا بالسجل المدنى وجرجرة السجلات كووووووووووووووووووووم تاني !!!!!!!!!!!!!!!!!!!

  5. نحن الامنجية كدة العايزنو ما بندبا ليهو بنشيلو حمرة عين

  6. الله يستر بيوتنا يا دكتور

  7. إلحاقاً لواواتك يا بروف ……….
    نهنئكم ونهنئ أنفسنا وعموم الشعب الفضل
    بإحراز الخطوط الجوية السودانية للمركز قبل الطيش
    حيث ﻧﺸﺮﺕ ﻣﺠﻠﺔ ﺑﻴﺰﻧﻴﺲ ﺍﻧﺴﺎﻳﺪﺭ ﻗﺎﺋﻤﺔ ﺍﺳﻮﺃ ٢٠ ﺧﻄﻮﻁ ﻃﻴﺮﺍﻥ ﻓﻲ ﺍﻟﻌﺎﻟﻢ ,,
    ﻭﻗﺪ ﺟﺎﺀﺕ ﺳﻮﺩﺍﻧﻴﺮ ﻓﻲ ﺍﻟﻤﺮﺗﺒﺔ ﺍﻟﺜﺎﻧﻴﺔ ﺣﻴﺚ ﺍﺣﺘﻠﺖ ﺍﻟﺨﻄﻮﻁ ﺍﻟﺠﻮﻳﺔ ﺍﻟﺘﺮﻛﻤﺴﺘﺎﻧﻴﺔ ﺍﻟﻤﺮﺗﺒﺔ ﺍﻻﻭﻟﻰ ,,
    ﻭﺫﻛﺮﺕ ﺍﻟﻤﺠﻠﺔ ﺍﻥ ﺳﻮﺩﺍﻧﻴﺮ ﻣﻤﻨﻮﻋﺔ ﻣﻦ ﺍﻟﺘﺤﻠﻴﻖ ﻓﻲ ﺍﺟﻮﺍﺀ ﺍﻻﺗﺤﺎﺩ ﺍﻻﻭﺭﺑﻲ ﻟﻌﺪﻡ ﻣﻄﺎﺑﻘﺔ ﺳﺮﺑﻬﺎ ﻟﻤﻘﺎييس ﺍﻟﺴﻼﻣﺔ ﺍﻟﺪﻭﻟﻴﺔ
    كسرة 1..
    يا أخوانا نحن لمتين في المركز القبل الأخير ده عاوز نفرح شوية ونحتل المركز الطيش ” الطيش عند الله بعيش ”
    كسرة 2 ….
    أجمل نكتة هي ما جاء في التقرير أن سودانير ( لعدم مطابقة سربها ) وهم الغبيانين ما عارفين إنو أباطنا والنجم وما عندنا فرد طيارة
    كسرة 3 …
    خط هيثرو !ّ!ّ!ّ!ّ!ّ

  8. أنا واحد من الناس الخشو سينما الخرطوم 3 أكثر من مرة و ميدان عبد المنعم أو نادي الاسرة , بصراحة ما عارف ليه تم أغلاق الميدان ده الاشاعات كثيرة لكن الظاهر أنه الكيزان ديل عندهم بعد نظر وبقوا أصلوا ما بعمل ليك ميدان الناس تخش فيهو ملح ساي
    خوفاً من ميدان تحرير سوداني , الناس ديل بس تخصصوا في تعذيب الناس و تشتيتهم أي حته الناس تتجمع فيها بيقفلوها .. يا يعكروا صفوها بشكل أو بأخر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: