يسألونك

• يسألونك عن اللحوم .. قل تاني مش ح تضوقوها إلا من ضحية لضحية
• يسألونك عن بيت الوزير الملياري قل : مش خلاس السمسار إستلم أتعابو ؟ (يبقى الفلم إنتهى)
• يسألونك عن إقرار الذمة .. قل (هى وينا الذمة البيعملوا ليها إقرار) ؟!
• يسألونك عن حظر النشر في جرائم وفضائح الفساد .. قل (بيعتمدو على الزهايمر وكده)
• يسألونك عن غسيل الاموال .. قل : نخنا قادرين نغسل هدومنا
• يسألونك عن المدينة الرياضية .. قل (بالله ليه إنتو فاكرين؟)

• يسألونك عن المؤتمر العام قل : لو أشتريتو بي قروشو مكنات غسيل كلي مش كان أفيد !
• يسألونك عن الدولار قل : يرفعوهو وينزلوهو على كيفهم
* يسألونك عن العدل قل : بنسمع بيهو بس
* يسألونك عن الشريعة .. قل (هي وينا؟)
* يسألونك عن التعدي عل الساحات في الأحياء قل : والله ما فضلوا فيها ميدان
*يسألونك عن الدهب قل : هو أنحنا شوفنا دهب ؟
* يسألونك عن البترول قل : راجع الدهب
* يسالونك عن شيخ الواتس قل : نسأل الله السلامة
* يسألونك عن شيخ حسن قل : تااااني عايز يدخل الحلبه !!
* يسالونك عن هي لله : والله نسوها جنس نسية !!
* يسألونك عن المخدرات قل : أصبحت متوفرة اكثر من الخبز
* يسألونك عن الزواج : قل أضحي لمن إستطاع إليه سبيلا
* يسألونك عن (حلاتو) قل : يوم معانا و 600 يوم في (لندن)
* يسألونك عن قيقم وشنان ومين ما عارف قل : إلى مزبلة التاريخ
* يسألونك عن المتعافي قل : أحرف لاعب أنتجته الملاعب
* يسألونك عن الرشوة قل : ما عندناش رشوة بأنارة أنها الجريمة الوحيده التي تخلو منها مضابط الشرطة !
* يسالونك ضرائب الدواء قل : عشان يرجعوها للمواطن في شكل شنو بالله؟
* يسألونك عن أموال (حسبو نسوان) المسروقه قل : ده عند مرا واااحدة بس
* يسالونك عن أبناء المسؤولين قل : واحد عاطل فيهم مافي
* يسألونك عن بيع بيت السودان في لندن قل : يااا دوبك قالو ح يعملو فيهو تحقيق !
* يسألونك عن بنات المسؤولين قل : واحده عانس فيهم مافي
* يسألونك عن بيوت المسؤولين قل : البره وللا الجوه
* يسألونك عن التجنيب قل : هو نوع من أنواع الجنابة
* يسألونك عن تعدد الزيجات .. قل هو عمل يقوم به (المؤمنين) الصالحين من أجل تقليص نسبة العنوسة زى ما بيقولوا (بس قاعدين يعزلوا البنات الصغار وسمحات)
* يسألونك عن الشفافية .. قل هى لباس يظهر العورات .. (وطبعن إظهار العورة حرام يا جماعة )
* يسألونك عن الفساد .. قل هو آفة تعانى منها معظم الدول ما عدا السودان (عشان الوازع الديني وكده)
* يسألونك عن الغلاء .. قل هو أن يساوي مرتبك خمسة كيلو لحمة (وهى قيمة الحد الأدنى للأجور)
* يسألونك عن تقرير المراجع العام .. قل (يعنى شنو ما قاعدين نقراهو كل عام)
* يسالونك عن الصرافات .. قل (ياتا الفى البنوك وللا الفى البيوت؟)
* يسألونك عن الإغتراب .. قل هو مشروع لتسمين الحكومة وإفقار المغترب
* يسألونك عن الأعياد .. قل أصبحت بعبعاً يهدد المواطنين
* يسالونك عن حملة الدكتوراة في بلادنا … قل (إنهم أصبحو أكثر من الباعة الجائلين على شارات المرور)
* يسألونك عن التكالب على منصب الوالي قل : فيها أيه الناس عايزه تختف أقصد تخدم
* يسألونك عن هيئة الحج والعمرة.. قل (هي إستثمار في شعيرة دينية وده حراااام)
* يسألونك عن الموت الأكلينيكى .. قل (دى الحالة الأنحنا فيها دى) !!!
* يسألونك عن خط هثرو *الخرطوم .. قل (هههههه مش قالوا ح يرجعوهو أول وبعدين يشوفو الباعو منو)!
كسرة :
* يسألونك عن الحل .. قل : يحلنا الحلا بله

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو)

Advertisements

10 تعليقات

  1. اليوم تصفيات ولا شنو

  2. مبروووكة عليك البرنجية يا ود أونكل سام .. ويا زول حكايتك شنو عجبك الحال وقعدت خلاااص وخليت بلاد ود عم سام ؟؟

    كدي مسعولين من الخير وين باقي أعضاء القمردينة الكانو نشيطين ومشاركين دائمين أمثال جنوبي وود العبيد وبتنا نونا وباقي الشلة

    وفعلاً يا بروف يحلنا الحلا بله !!! .. سلااااام ..

  3. انا قايل الحلا بله مابحلنا لانو بله حلنو كرعينو يعنى جرى ساكت
    لكن تفتكرو الجرى بحلنا من الحاله المايله دى ؟!!!!

  4. هههههه مش قالوا ح يرجعوهو أول وبعدين يشوفو الباعو منو

  5. هو صحى الحلا بلة منو؟ و حلاو كيف؟؟

    1. هوووووووووووووووووووووووووووووى !

  6. ما هي حكاية يحلنا الحلا بله من المهانة والمذلة ؟؟؟؟؟

    كما هو متعارف فى كل انحاء العالم، تضرب الأمثال من أجل توصيل فهم معين، ومعلومة معينة وحكمه معينه .. وقصة يحلنا الحله بله دي قالوا حكاية حقيقية حصلت عندما كان المستعمر الانجليزي يحكم السودان ، وكان قد أصدر أمراً في الجزيرة بمنع الاستحمام فى الترع، وجاء أخوانا بله في يوم من الأيام ودخل الترع’، وعندما رفع رأسه وهو يسبح شاهد الخواجة المفتش واقف وفى يده سوط عنج طويييل !! فسأله الخواجة لماذا دخلت الترعة وإنت عارف إنو ممنوع ؟؟ فقال له بله وقع منى صحن طلس وبدور أمرقو !!! فقال له الخواجه اوكى أمرقو بسرعة .. فغطس بله ولحسن حظه وجد صحن طلس بالفعل واقع فى قاع الترعة فأخرجه فتركه الخواجه يمشي بدون ما يضربو بالسوط .. ثانى يوم جاء محمد أحمد ونزل في الترعة فاذا بالخواجة المفتش واقف فوقو وسأله لماذا نزلت الترعة ؟ فقال له وقع منى صحن طلس داير أطلعو !! فقال له الخواجة يلا طلعو بسرعة !!

    أها قال ليك اخوانا محمد أحمد دا لي يوم الليلة قاعد يغطس ويطلع ويغتس ويطلع بفتش علي الصحن ويقول:

    الليلة ( احلنا الحلا بله . من المهانة والمذلة ) … سلاااام …

    1. هههههههههههههههههههههه ,, وعليكمك السلام ورحمة الله يا حبيب ,,
      كان صحن طلس ما عارف !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: