الحل : بنك الفساد

جاء في الأخبار عن الشروع في تكوين (منظومة) لمحاربة الفساد لتنضم إلى أختيها (آليه) و(مفوضية) حتى يكونو (تلاته في وش العدو) ، ولأن قصة مكافحة ومحاربة الفساد دي من الواضح أنها قد أضحت (عصية على الإصلاح والمحاسبة) وأن مصير هذه (المنظومة) سوف يكون مصير (شقيقتيها) فالعبد لله عندو ليكم (حل) يرضي جميع الأطراف الثلاثة الحكومة والشعب والمفسدين .. بس طولو بالكم عليا شوية !

الفكرة ببساطة شديدة إنو طالما قروشنا دى بقت في خبر كان والحكومة ما قاادرة تعمل حاجة عشان ترجعا لينا وفي نفس الوكت (خايفة) من ردة فعل المواطن إزاء هذا (الطناش) المريب وفي ذات الوقت الناس اللهطو أموال الشعب خايفين من )النهاية المحتومة) وكمان برضو في نفس الوكت الشعب عاوز قروشو وكده .. أها في ظل المعادلة الصعبة دى العبدلله عندو حل ممكن يخارج كل الأطراف .
الفكرة يا سادتي هي أن نقوم بإنشاء بنك يسمى بنك الفساد الإستثماري وهو بنك (البنك الواااحد) ده تطرح (أسهمو للمفسدين فقط) يكون رأس ماله من القروش الملهوطة وكل (فاسد) يعطى أسهماُ حسب لهطه ، علي أن تمنح نسبة 95% من الأرباح للشعب الفضل أما الخمسة في المية فتوزع للاهطين تقديراً لإعادتهم للقروش اللهطوها !
(1) البداية هي تقديم أقرارات (ذمة فاسدة) ليسجل عليها كل من طالت يده المال العام قيمة ما قام (بلهطه) موضحاً إجمالي نوع العملة وكميتها ومكانها في (البنوك وللا في البيوت)؟ كما يوضح على ذات الإقرار الأصول الثابتة التى شيدت من مال (اللهط) والتى قام بتسجيلها بإسمه أو بإسم أحد أقربائه أو إسم (جحافل) النسوان الذين على ذمته أو الذين (سرحهم بإحسان) ويشكل ذلك الفلل والشقق والعمارات و (الفنادق) و (الأبراج) التي توجد داخل السودان أو خارجه ، ماليزيا ، مدينة النخيل ، إلخ .. علي أن يتضمن ذلك عمولات السماسرة (الملحوهم) والما (ملحوهم) !
(2) تجمع كل إقرارات الذمم الفاسدة ويطلب من أصحابها الحضور لأداء القسم (تاااااني) والذى نصة :
أقسم بالله العظيم وكتابه الكريم أن أعيد لهذا (الشعب الفضل) كل الأموال التى أخذتها بغير وجه حق والله علي ما أقول شهيد .
(3) يتم إعطاء من قاموا بأداء القسم مهلة شهر لإعادة ما أخذوه من أموال وتنشأ من اجل ذلك جهاز يسمى (جهاز التحلل من الفساد)
(4) تقوم المفوضية بالإعلان عبر الصحف اليومية عن عطاء بيع الأصول (الملهوطة) من فلل وعمارات وخلافه ويضاف ثمنها إلى (الكاش) لتصبح الحصيلة هى رأسمال البنك .
(5) وكعادة البنوك فإن مجلس إدارة البنك سوف يتكون من أكبر المساهمين (الهبارين) بحسبان أنهم اكثر الأشخاص الذين لديهم (أسهم فاسدة) أما الجمعية العمومية فإنها تتكون من بقية الذين أدوا القسم (تاااني) .
الخلاصة :
هذه الفكرة لو تم تطبيقها فسوف تكون غير مسبوقة على الإطلاق وسوف تقوم كا الدول المعانا في ذيل قائمة الشفافية بتطبيقها .. فمن ناحية سوف يطمئن لاهطو أموال الشعب الفضل بانهم قد تحللو من هذه الأموال الحرام يوم لا ينفع لا مال ولا بنون ولا (غاز مسيل للدموع) وذلك بعد أن يصبح رأس مال بنك الفساد الإستثماري ملكاً للشعب الفضل ومن ثم يزول عنهم الخوف من أى محاسبات مستقبلية (ما القروش ورجعوها) ، وفي نفس الوكت كمان عندهم 5% من الأرباح حلال بلال (أقصد فساد بلال) نتيجة إعادتهم للأموال التى لهطوها ! وفي نفس الوكت فإن هذه الفكرة تعفي الحكومة (السادة دى بي طينة ودي بي عجينة) من مسألة تقديم هؤلاء الذين (فوق القانون) إلى منصات القضاء كما أن الشعب الفضل في ذات الوكت سوف تعود إليه ما نهبت منه من أموال فيستطيع بعد ذلك أن يقوم بتشغيل مراكز غسيل الكلي الواقفة عشان كم مليون ، ودعم المستشفيات (اللحقت أمات طه).. وتقديم وجبات الفطور للتلاميذ الذين لا يجدونها وزيادة معاش المعاشيين الذى لا يساوى أكتر من خمسة كيلو لحمة وحاجات كتيرة تااانى !
ويبدأ بنك الفساد الإستثماري في مباشرة اعماله بالفرع الرئيس وكل فروعه في السودان الفضل مستعيناً في جذب الجمهور بعدة أعلانات إذاعية وتلفزيونية :
إعلان (1) :
– عزيزي المواطن عزيزتي المواطنة .. بنك (الفساد الإستثماري) يقدم لكم أرقي الخدمات البنكية التى تستمد روحها من (الشريعة والدين) .. صوت جهوري .. أموالك في أيدٍ متوضئة أمينة !
إعلان (2)
– يا نفيسة إنتى لسه بتختى قروشك في الدولاب؟
– ومال يا عواطف عاوزاني أوديها وين؟
– أجي إنتي ما سمعتي بي بنك الفساد الإستثماري ؟
– والله الفساد (سمعتا بيهو) وفات أضاني لكن التانين ديل ما سمعتا بيهم !
– بنك الفساد الإستثماري ده بنك جديد .. والله قالوا ليكي قبل ما تختي قروشك يدوكي الأرباح !
– صوت جهورى : مع بنك الفساد الإستثماري أموالك في حرز لعين (أقصد أمين) !
كسرة:
بعد عام )لو فضل فيها عام) : ميننشيت في الصحف اليومية : (فساد في بنك الفساد الإستثماري) !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو)

Advertisements

11 تعليق

  1. ياناس خليتو ولا شنو

  2. بشغلونا في بنك الفساد دا ولا برضو ليهو ناسو

  3. برنجييييييييييييييييية

  4. ابدعت. وفيت و كفيت و حليت المشكلة. الله يديك العافية و يرفع البلاء.

  5. أجمل شي الكسرة. ههههه لكن يا بروف دا التحلل ذاااااتو لكن بس مقنّن. و فعلاً فكرة جميلة ممكن كنا نستفيد منها لكن بس الشي الأكيد و ال100 % حييحصل هو الكسرة بتاعتك دي و ةنضطر تعمل ليك كسرات (ملف بنك الفساد) و الواوات تكتر ، و بدل (ماسورة ) يقولوا ليك فلان ما طلع (بنك فساد )ساي! و نضطر نعمل مفوضية و آلية و لحمية لبنك الفساد و يطلع المدير ود خالة عمة أكبر فاسد (قصدي مساهم ) في البنك , الخ الخ . و الشعب ما يلقى النيم عشان ياكلو ! و جيفتو (قصدي نعشو) ما فيهو مكان لإبرة تندقّ! و نحاول نقول الروب ما نقدر! ما خلاص بقى ما في حلّ زي ماقال زميلنا و كان مشتكي لي من ورم في بطنو ، وانا بأهظر معاهو قلت ليهو (أُكُل حلال ) قال لي (هي لكن نلقى و ين الحلال دا) هههه صدق والله

  6. البروف العزيز
    الفكرة ليست بعيدة عن الهيئة الوطنية لمكافحة الفساد – بالسعودية – والتي بلغ حجم الأمول التى تم إيداعها في حساب “إبراء الذمة”، طبقًا لآخر الإحصاءات الصادرة 266 مليون ريالً بواقع 32 ألف عملية إيداع.
    حساب “إبراء الذمة” الذي أنشأته السعودية عام 2006، يتاح عبره المجال لإيداع الأموال ممن اختلسوها بطرق مختلفة، ويتم الإيداع بدون أي أي تفاصيل من المودع ولو حتى إسمه وتسعى الهيئة “نزاهة” حاليا إلى طرح نظام التشهير بالفاسدين في وسائل الإعلام بعد صدور الأحكام القضائية ضدهم حتى يكونوا عظة وعبرة لغيرهم

  7. قالوا واحد حرامي وضميره زي أنبه كده ! قام اتصل علي شيخ وقال ليهو يا شيخ انا كان راس مالي 5 مليون وبعد داك بقيت شغال لا بفرز حرام من حلال وهسي راس مالي 100 مليون وداير اتحلل من القروش الحرام دي اعمل شنو ؟
    الشيخ قال ليهو : تحتفظ بالـ 5 مليون حقتك وتتصدق بالـ 95 مليون الزيادة .. داك طوالي قال للشيخ : يا شيخ انت مجنون ؟!!!
    القاعدة يا استاذ الفاتح انو الناس تعمل حاجات زي دي للشئ الشاذ فيبقي نحنا نعمل آلية دعم الاصلاح .. بنك الاستقامة .. معاونة الثراء الحلال .. وحاجات زي دي يعني ! الحاجات المهددة بالانقراض دي .
    خمسة سنين تاااااااااااااااااااني !!
    بعدها كمان نعمل بنك فساد الفساد ..

  8. يا بعاتي وبت السودان يا حليلكم راحت عليكم البرنجية ، أخدها ود الحكومة الساعة 10:25 ص (وإنتوا نائيمييين) !!
    ما تتصلبتوا ساااكت !!!…
    والفساد دا ما داير ليهو بنك واااحد في الخرتوم بس .. دا لازم يكون المقر الرئيسي في الخرتوم، وبعدين في كل ولاية يكون عندو فرع عشان يستوعب رأس المال الكبييير اللا ليهو أول ولا آخر في البلد كلها ، شمالها وجنوبها (يا حليل الجنوب) ، شرقها وغربها دا لو ما إنفصلوا برضو !!!! ما تقولوا علي متشائم .. وبعدين لو جات محاكمات بعدما تنقلب حاتكون زي بتاعة حسني وجماعتو الطلعوهم زي الشعرة من العجين والراجل الإفتح خشموووو !!!

  9. افسدنى وزيد فسادى ,, امكن ضميرى يرتااااااح ,,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: