(ما) حمير

لعل الخبر الرئيس في الأيام الماضيات هو ضبط شرطة أمن المجتمع بالكلاكلة مصنعاً عشوائياً لتصنيع البيرقر والسجوك من لحوم الأبقار النافقة داخل منزل بمنطقة الكلاكلة جنوبي الخرطوم حيث ألقت الشرطة القبض على ثلاثة أفراد يديرون المصنع، وضبطت كميات كبيرة من اللحوم المصنعة جاهزة للتوزيع .

الخبر تم تداوله على وسائل التواصل الإجتماعي (بالصورة) التي تظهر اللحوم المصنعة في شكل (بيرقر وسجوك وكفتة) وإلى جانبها صورة لشاحنة نصف نقل محملة بالعظام والمخلفات من أقفاص صدرية وخلافه ، وقد جاء في الخبر ان اللحوم هي (لحمير) أعزكم الله !
لكن العميد شرطة الدكتور عامر عبد الرحمن مدير شرطة أمن المجتمع بولاية الخرطوم ننفى نفياً قاطعاً بان تكون اللحوم (المقبوضة) لحوم حمير، حيث أن الصور المتداولة على مواقع التواصل الاجتماعي والواتساب لحوم فاسدة منتهية لأبقار وليست حميراً !
أما مدير دائرة الجنايات بشرطة ولاية الخرطوم اللواء إبراهيم عثمان فقد صرح للمركز السوداني للخدمات الصحفية بأن الكميات المضبوطه تتبع إلى أحد المصانع العاملة في تصنيع اللحوم مبيناُ أن التحريات أثبتت أن إدارة الجودة في المصنع إستبعدت هذه المنتجات وقررت إبادتها لعدم الصلاحية إلا أن أحد العمال وهو المسؤول عن عمليات الإبادة قام ببيعها للمتهم الثاني مقابل 5 جنيهات للكيلو وأنه كان بصدد توزيعها في منطقة جنوب الخرطوم وقد دعا (سعادة اللواء) إلى تحري الدقة في تناول الأخبار المتعلقة بصحة المواطن وعدم تداول الشائعات التي تؤثر على السلامة العامة …
من التصريحين يتضح أن (الشرطة) تريد أن تؤكد للمواطنين أن هذه اللحوم الفاسدة وغير الصالحة للإستهلاك (غير الآدمي ذاتو) هي لحوم لأبقار نافقة وليس (لحمير) كما تم تداوله، حيث أن هذه اللحوم لو كانت (لحوم) حمير سوف تؤثر على السلامة العامة ولكن كونها لحوم أبقار فاسدة وغير صالحة فإن ذلك لا يؤثر على السلامة العامة !!
العبد لله ليس بيطرياً ولكنه على يقين بأن لحوم (الحمير) غير الفاسدة أقل ضرراً من لحوم الأبقار الفاسدة ،
وقد فعلت الشرطة خيراً وهي تقوم بالقبض على هؤلاء المجرمين معدومي الضمير ولكن المشكلة تكمن في أن نسبة الجريمة (المكتشفة) كما يقول علماء الإجرام لا تتجاوز في المتوسط 10% إذ لا يمكن لأي (شرطة) كانت حتي في الدول المتقدمة أن تتواجد في كل مكان خاصة إذا إستصحبنا معنا الإحترازات التي يقوم بها المجرمون !
وهذا بالطبع يؤكد أن هنالك الكثير من معدومي الضمير الذين يقومون بذبح وتسويق لحوم ما أنزل الله بها من سلطان (لو بقت على الحمير كويس) دون أن ينكشف أمرهم ، وغني عن القول أن إنعدام الرقابة على المطاعم والكافتيريات والجزارات تعتبر محفزاً لممارسة هذه الأعمال الإجرامية إذ أن أجهزة الدولة المناط بها هذه الرقابة أضحت أجهزة (جبايات) وتحصيل .. أفتح مطعماً وسوف يأتيك (بتاع الرخصة التجارية) ومن بعدة (الرخصة الطبية للعاملين) ومن بعده (بتاع النفايات) ومن بعده (بتاع العوايد) وبتاع أيه مش عارف … الشخص الوحيد الذي لن يأتي إليك هو المسؤول عن التعرف على صلاحية ونوعية ما تقدمه من طعام وزيوت ولحوم !
الرقابة على الأطعمة معدومة تماااماً رغم جيوش وجحافل العمال والموظفين الذين تعج بهم المحليات ..
ومثل هذا المصنع الذي تم القبض على أصحابه مؤخراً (الله بس عاوز يكشفو) لان المسألة لابد أنها تمت عن طريق الصدفة المحضة لا غير …
لا شك أن تردي الوضع الإقتصادي الذي إنعكس على المواطن قد أدي لوجود مثل هذه (الممارسات) التي لم يألفها أهل السودان (ودي المناظر.. الفلم لسه) وإن لم يكن هنالك من التشريعات التي من شأنها ردع مرتكبي هذه الجرائم الخطيرة والدخيلة على مجتمعنا فسوف تنقرض (الحمير) و (الكلاب) والمواطنين كمان !!
إن إصرار البعض على أن اللحوم التي تم القبض عليها هي لأبقار نافقة يذكرنا بتلك الطرفه التي تقول بان احدهم كلما تزوج واحدة لا يمر وقت قصير حتى يتوفاها الله فقال له صديقه ممازحاً:
– يا ااخ إنتا بتجيب النسوان البموتو ديل من وين؟
ونحن بدورنا نتساءل :
– الناس دي بتجيب الأبقار النافقة دي من وين؟؟

كسرة :

أبقار نافقة .. حمير حية .. كلاب نايمة .. ده مش الموضوع .. الموضوع شوف نحنا كنا وين وبقينا فين؟

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو)

26 تعليق

    1. سلام أبو أحمد ومبروووكة ……. طولة الغيبة

    2. مبرووووك عمنا أبو أحمد ،،،، شوف نحن كنا وين وبقينا فين ؟؟

    3. ولد ده !
      مبروك

    4. مبرووووك يا شيخنا أبو أحمد ولو إنك ما محتاج لبرنجي عشان تكون الأول بنا يمتعنا بي علمك و يبارك ليك فيه

  1. قال ليهو بقيت تشرب العرقي !؟ قال استغفر الله يا حاج والله مريسة ساااااكت .. قال ليهو كان كدي اعفي لي يا ولدي ظلمتك ساااي !!

  2. أها بعد دا ما يجي واحد يسلبط ويقول (برنجية) !! والله يا بروف الحكاية بقت جايطة وما محتملة أبداً .. عشنا وشفنا شيء أبقار نافقه، شيء حمير، شيء كلاب، شيء كدايس، شيء بعشوم !! وحكاية البعشوم دي كلمني بيها واحد من ناس الأمن قال قبضوهم في شرق النيل .. بس الشيء الحييرني كيفن قبضوا (البعاشيم) دي جمع بعشوم وضبحوهم ؟؟ أنا شخصياً حرمت أجيب حاجة للبيت إسمها لحمة أو أي من مشتقاتها مثل السجق والبيرقر والبفتيك …إلخ ، وحتى الجداد زاااتو لو ما بقى حي وضبحوهو قدامي ما بناكلو لا أنا ولا أولادي !! وكمان تووبة لي حبوبة من المطاعم والأكل الجاهز !! بقينا بس عدس وخضار ساااكت ، ولو إنو الخضار زاااتو بقى فيهو إن في السودان .. يعني الواحد يسوي ليهو مزرعة يربي فيها جداد وخرفان ويزرع خضار ( نظام ناأكل مما نزرع ) ..

    الناس ديل لا بخافوا الله ولا من الحاكم ولا بعملوا حساب لأي حاجة !! إذن لا بد من تطبيق حد الحرابة عليهم إمتثالاً لقول الله تعالى بعد أعزذ بالله من الشيطان الرجيم : ( إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلافٍ أَوْ يُنفَوْا مِنَ الأَرْضِ ذَلِكَ لَهُمْ خِزْيٌ فِي الدُّنيَا وَلَهُمْ فِي الآخِرَةِ عَذَابٌ عَظِيمٌ ) [المائدة:33] صدق الله العظيم ..

    ولا بد من وقفة حااازمة معهم وتطبيق عقوبات رااادعة عليهم أقلها (الإعدام) وفي ميدان عاام !! ليكونوا عظة وعبرة لمن يعتبر !! ودي ذكرتني نكتة ” أب سن” لمن كان عضو في محكمة لمحاكمة واحد من أعتى المجرمين .. قالوا نام أثناء الجلسة وما صحا إلا لمن الحاجب قال: (محكمة) إشعاراً بانتهاء الجلسة والمحاكمة !! فبعد ما صحا قال ليهم : ” أها يا جماعة سويتوا ليهو شنوو ” ؟؟
    قالوا ليه : ” أديناهو إعدام ” قال ليهم: ” والله شوووية عليهو كان تزيدوهو ” !! هههههههه … سلاااام …

    1. مليون لايك على تعليقك يا شيخناز اولا ربنا ما وضع الحدود دي ساااكت و إعتباطاً و ما إتدرجت من سجن لي جلد خفيف و رجم و قتل و حد حرابة و غيره إلا لأنو أعلم بضرر كل جريمة مرتكبة و كل واحدة وضع ليها ما يقابلها من عقوبة . و فعلاً لو كانوا معتبرننا ناس كانوا ئاقاموا عليهم حد الحرابة لكن هم بقولوا (ديل ما حمير ساي يعني شن كان أكلوا ليهم شوية جيف (أعزكم الله) الشعب دا و الله يطحن اي شي!!!) ديل يا شيخنا لو كانوا برا كان زمااااااااان ودوهم ورا الشمس و تاني زول وااااحد ما بقرب لي جنس الشي دا! الله في! ( سيبوني يا اخواني النبكي شوية)هئ هئ

  3. يباركو ليكم السمح ود الحكومة والمندهش ( الله لا أدهشك ) ولو أنو كل حاجة بقت تهدش في الزمن دا !! وانت إستنى لي يا جنوبي لمن أفضى ليك !! كنت مشغول شوية الأيام الفاتت فمعذرة على الغيبة من القمردينة وأهو شوية شوية .. سلاااام ..

  4. وجع ,,,,,,,,,,,,

  5. لم أتألم منذ سنين وسنين – رغم كثرة المواضيع المؤلمة والموجعة – كما تألمت جداً جداً جداً اليوم عند قراءتي لذيل موضوعك التساؤلي ( شوف نحنا كنا وين وبقينا فين؟ ) – طبعا ذيل دي مواكبة للموضوع – صحيح كنا وين وبقينا فين … لاحولا و لا قوة الا بالله .. وحسبي الله و نعم الوكيل .. حسبي الله و نعم الوكيل .. حسبي الله و نعم الوكيل ..

    1. اذا كان رب البيت بالدف ضارب فشيمه اهل البيت الرقص
      واذا كان رب البيت راقص فشيمه اهل البيت الانطلاق
      ولا شنو يا الشمباتي

      1. هوووووووووووووووووى ,, انطلاقة لا ,,
        انا برييييييييييييييييييييئ

  6. أهلاً بيك بتي نونا، الله يبارك فيك وفي عمرك وربنا يسعدك دنيا وآخرة .. وجزاك الله خير على الإطراء الذي لا أستحقه، وأسال الله العلي القدير أن يجعلني عند حسن ظنكم مع خالص تحياتي وتقديري للجميع .. سلاااام ..

  7. بتي نونا سلامتك من البكا .. ربنا يفرحك دائماً وأبداً ويصلح حالك وحالنا وحال بلدنا، ويولي علينا من يصلح …
    قولوا آااامين … سلاااام …

  8. مش في مصري قبل كم يوم صرح بأنو أتكلم من كائنات فضائية .. وقالوا ليهو نحنا جايين الأرض .. وقبل ما نجي رسلنا جماعة مننا ساكنين معاكم في الأرض هم (المتحولين) من زواحف وغيرها … حتى إن بينهم رؤساء دول وشخصيات كبيرة مثل بوتين وهيلاري كلنتون … ؟!!

    يا ربي الجماعة بتاعين الفطايس .. وناس حكومتنا ، مسؤولين الهنا، ديل ….. منهم ؟؟؟؟؟

    طيب لو منهم …. الشاطر فيكم يوريني عبد الرحيم محمد حسين دا متحول من شنو ؟

    يمهل ولا يهمل

    1. دا متحول من …….
      استغفر الله العظيم بس …

      1. ده ما بيتحول من ! ده بيحولو منه !!
        مااا تظلموا ككو حليمة الانيس الظريف ! هسي فيييي ذمتك يا نانو يوم واااحد شفن ليك ككو بزّغ في وش زول !؟

  9. متحول من ( ككوحليمة – أبو ريالة مش العادي ) … ههههههههههههههي … سلاااام …

    1. مسكين ككو بن حليمة … يشبهوهو بالهطلة دا ….

      (: (:

  10. يقول الدكتورربحي سعيفان الطبيب البيطري المشهور إن لكل نوع لحوم لوناً خاصاً، فتتميز لحوم البقر بلونها الأحمر الزاهي، والدهن الأصفر، أما اللحم الجاموسي فلونه أحمر مائل للبني ودهنه أبيض، ولحم الماعز والغنم يميل إلي التصاق الشعر به، في حين يختلف لون لحوم الحمير فلونها بني غامق يميل إلي الزرقة ورائحته سيئة وأليافه واضحة بارزة ودهنه قليل ولكنه مختلف عن الدهن العادي، فيميل لونه إلي اللون النحاسي ويكون «مدهنن». ويضيف الدكتور بحي أن هناك اختباراً آخر يمكن لربة المنزل إجراؤه قبل طهو اللحوم للتأكد من عدم كونها لحوم حمير، وهي أن تقوم بتدفئة السكين علي النار وقطع شريحة صغيرة، فإذا تغيرت الرائحة إلي الأسوأ وكانت مختلفة عن الرائحة المعتادة فإنها تكون لحوماً غير صالحة، إلا أن الخطر الحقيقي من أي نوع لحوم ليس في طعمه السييء، وإنما في أضراره، فلو كان الحيوان ميتاً فإن أكل لحومه كارثة – علي حد قوله – لأنه يشتمل علي دم بداخله، وسيتسبب في حدوث أمراض، فضلاً عن مخالفة الشريعة الإسلامية في أكله، ويمكن من خلال تجربة بسيطة معرفة اللحم الميت من خلال قطع جزء بسيط ووضعه في كمية من المياه، فإذا تلوثت المياه بالدم كان اللحم لحيوان ميت، كما أن الحيوان الميت لحمه شديد التماسك. وعن التعرف علي جودة اللحوم المقدمة بالمطاعم، يقول د. ربحي: إمكانية التعرف علي جودة اللحوم المطهية صعبة، إلا أنه كلما زادت التوابل في اللحم زاد الشك في جودة اللحوم، وأن هناك شيئاً يريد الطاهي إخفاءه، وهو ما يحدث في اللانشون الموجود بالسوق، وقد وضع صاحب أحد المصانع كمية من دهن الفراخ وخلطها بكمية قليلة جداً من اللحوم والكثير من التوابل، وكان لهذا اللانشون تأثير صحي خطير علي المدي البعيد. ويشير الدكتور ربحي إلي أن هناك أخطاء شائعة عند الذبح تؤثر علي جودة اللحوم، فمثلاً عند قطع الرقبة أثناء الذبح، تصبح لحوم الذبيحة أكثر قابلية للفساد في وقت سريع، لأن الدم يظل حبيساً داخل اللحم نتيجة توقف القلب فجأة. ومن هذا المنطلق يقدم د. ربحي عدداً من النصائح، منها شراء لحوم من جزار موثوق به والامتناع عن الشراء من جزار لديه كمية لحوم قليلة معلقة عند باب محله، لأن هذا معناه ألا يمكن التعرف علي نوعية الذبيحة، لأن كل ذبيحة لها حجم خاص بها، فالماعز يختلف حجمه عن البقرة، وعلي السيدة أن تراعي عند شرائها لحوماً مستوردة التعرف علي بلد المنشأ لأن هناك بلاداً بها أوبئة ويجب الامتناع عن تناول لحومها.

    1. عاد لكن يا جنوبي إلا نطبع كلامك دا و نشيل الورقة و نحوم الجزر. هههه لأ و كمان زدت لينا شغل البيت ، يعني بدل نطبخ طوالي نقوم نقطع شريحة و نشوف الدم و نعاين للدهن و نشم الريحة (دا كوووللللو بعد مقارنة الألوان أعلاه) ههه غايتو جنس شي!!! غايتو أسهل طريقة نقوم نحن النسوان نعمل الكشات دي و نشتغل شغل الحكومة مررررة واحدة بدل ما نشتغلها 6000 مرة في المطبخ ههه الله يعينا نحن

      1. هههههههههه
        يا نانو و نونا زكرتوني الفاضل سعيد في المسرحية ديك ( اسمها شنو ؟ ) الكاتب الاجابات وما كاتب الاسئلة ! الفول العدس البيض ….
        الحمير هيييييينة اها شوفوا الجديد ده :
        ضبطت الشرطة عدداً من الخنازير في مزرعة بشرق النيل وكانت الشرطة قد تلقت بلاغاً من أحد المواطنين أفاد بأنه شاهد خنازير يقوم بتربيتها أحد الأشخاص في مزرعة ملحقة بمنزله في المنطقة، وبعد التأكد من المعلومة تمت مداهمة المكان وعثرت الشرطة على عدد «71» خنزيراً وتم اقتياد صاحبها إلى قسم شرطة دائرة الاختصاص واتخذت السلطات إجراءات قانونية بالواقعة.
        آخر لحظة
        وود هداية تاااااني داير خمسة سنة !!! الله يهديهو الله يهديهو .. يا يهده ..

  11. إنتي عارفة يا نونا يا بتي، أنا والله بالجد (وفعلن وطبعن) طبعت كلام جنوبي وحا أختو عندي في مذكرة الجوال عشان لمن أمشي السودان وأكون داير أشتري لحمة ( دا لو فكرت أشتري ) !! أفتح المذكرة وأذاكر المكتوب فيها !! وأطبق الكلام على المعروض ولو ما لقيت أي تطابق للمواصفات والمخالفات المذكورة في المذكرة أشتري .. أها رأيك شنو ؟؟؟ .. سلاااام ..

  12. هو الزول كان لقى ليهو لحمه بالهين كان شاف خيارات تانى.. اللحم السمح .. فيهو حق الترحيل وقبانة اللورى ودمغة الجريح وضريبة الدخل ورسوم المسلخ والبيطرى و و و و و و برضوا دايرين سلامة المواطن .حسبنا الله ونعم الوكيل تذكريامن تكنزوتجني هذا المال وتتاجربضعف الناس وجوعهم وحاجتهم.حديث المصطفى عليه وأله الصلاة والسلام(كل جسم نبت من سحت فالنار أولى به ) ..وتذكر قول المولى عز وجل( وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: