كاشف (لحم)

تقول الطرفة أنه وفي زمان (البيرة أم جمل) كان هنالك (فريق مراجعة) ذاهب لإحدى الولايات مسافر على إحدي القاطرات ولما دخل القطار إلى إحدي المدن المشهورة بكثرة (باراتها) آنذاك وقد بدأ الليل يرخي سدوله طلب (رئيس الفريق) من أحد العمال أن يذهب إلى سوق تلك المدينة ويأتي لهم بأصناف من الخمر من بينها شراب يسمي (الشيري) وقد حدد له نوعية الشيري (بالإسم) وقد كانت له عدة أسماء وأنواع (شيري أبو بت) ، شيري (أبو تراكتر) ، شيري ابوكديس شيري أبو أيه مش عارف ، فلما وصل صاحبنا إلى (البار) ، قام بشراء كل ما طلب منه إلا أنه نسي نوعية الشيري فطفق (ينحت في مخو) وهو خائف من توبيخ (رئيسه) إن عاد بدونه وأخيراً هداه تفكيره أن النوع المطلوب هو شيري (أبوحمامة) فخاطب صاحب البار :

– عندكم شيري أبو (حمامة)
فرد عليه صاحب البار :
– أبو حمامة (راكة) وللا أبو حمامة (طايرة) !!!
هذا هو حال العبد لله وقد جاءته الفكرة أن يبحث عن جهاز (كاشف للحم) Meat Detector بعد أن تكاثرت علينا (اللحوم) والهموم وقد جاءت الفكرة من أن (الخواجات ديل) ما خلو ليهم حاجه ما أخترعوها ،
وعلى الرغم من أن الفكرة تبدو سازجه وخيالية بعض الشئ ، إلا أنو ولدهشتي بعد أن (قوقلت) الموضوع قد وجدت أنواعاً من كواشف اللحم ، كاشف (نوعيه) اللحم المقلي ، كاشف نوعية اللحم المشوي , (كاشف نوعية اللحم (النيئ) ، وكاشف للجميع (راكي وطائر) !!
نعم فقد طور المهندسون اليريطانيون بمعهد أبحاث الأغذية بالتعاون مع شركة أكسفورد للأجهزة Oxford Instruments and the Institute of Food Research جهازاً يمكنه تحديد نوع اللحم (فوراً) ، حمير، أرانب ، حصين ، بقر ، خنزير وذلك من خلال فحص الأنسجة والدهون والأحماض الموجوده باللحم والتي ينفرد بها كل كائن !
وقد صرح (مستر بول) مدير المبيعات بالشركة بان الميزة الكبرى لهذا الجهاز الذي تم إختراعه أنه يوفر مبلغ 500 جنيه إسترليني هي قيمة رسوم فحص DNA اللحوم لمعرفة نوعيتها كما أنه يوفر الوقت الذي تستغرقه نتيجة الفحص !
ما عليك أيها المواطن إلا أن تقوم بشراء هذا الجهاز الذي يشبه إلى حد كبير جهاز (الموبايل) وتقوم تعمل ليهو تنصيب (( et-up ليتناسب (والهيصة اللنحنا فيها) ، وتدلف إلى القائمة الرئيسه لتختار (الكل) في شاشة نوعية اللحوم التي تود إكتشافها لتشمل كافة الحيوانات ذات (الكدر) وذات (الظلف) ، والزواحف والقوارض !
ثم إلى خيارات (نوعية الطبخ) ، مشوي ، مقلي، مسلوق ؟ قم بإختيار الكل (الظروف ما معروفه) ، ثم شاشة (حالة الحيوان عند الذبح) والتي تظهر عليها خيارات ، حي، ميت، بطلع في الروح ، قم بإختيار الكل (مع إنو حي دي فيها كلام) ، ثم تدلف إلى خيارات التنبيه فتختار (رنة على حسب لحم الحيوان)، طلع لحم كلب (الجهاز يعوعي) ، طلع حمار (الجهاز يهنق) وهكذا ! ولا تنسي أن تختار خيار (إظهار الصورة) والذي تم وضعه (للناس السمعهم تقيل شوية) ، فأختيارك لهذا (الأوبشن) يعطيك ميزة أظهار صورة الحيوان (المذبوح) على الشاشة بمجرد توجيه الجهاز نحو اللحم !
بعد أن تقوم عزيزي المواطن بتهيئة و(بتسطيب) الجهاز يمكنك تجربته وذلك بدخولك لأي مطعم (شعبي) :
– (وإنتا تنش في الضبان) : بالله لو سمحتا عاوز ليا (طلب ) بتاع (كباب بالطوة) !!
– (الجرسون) وااااحد كبااااب بالطووة وصلحوووو
بعد عشرة دقايق يقوم (الجرسون) بوضح صحن (الالمنيوم) الممتلئ باللحم أمامك ، قم (برااااحة) بإستخراج الجهاز من جيبك .. أضغط على زر التشغيل .. إنتظر برهه حتي يكون في وضع الإستعداد .. (خلي أعصابك قوية) ثم وجهه نحو الصحن !!
– الجهاز يصدر اصواتاً (غريبة) .. الشاشة (تولع وتطفي) .. ورسالة باللون الأحمر
– هذا الحيوان غير موجود في سجلاتنا !!!

كسرة :
وح نسمع تاني : بالله سلفني (كاشف اللحم) بتاعك أمشي أتعشى وأرجعو ليك !!

إنتبه :
يوجد واو (جديد) وكده !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو)+و

36 تعليق

  1. برنجيييييييييييييية

    1. مبروك .. تلخمني بي خالتي طيبة وتجي هنا !!

      1. خالتي طيبة أريتها خالة السرور عشرة منها وكان السودان الفضل أصبح حالو غير !
        هي نسيت ! ………..الله يبارك فيك

      2. طيبة منو يا هنايين !!؟
        طاااااااااااااااخ

  2. مبروووكة عليك يا مندهش ( الله لا أدهشك ) قول آااامين .. سلاااام ..

    1. جمعاً يا ابو أحمد فبالرغم من أنني مندهش من قبل
      إلا أن إختراع البروف زاد دهشتي

  3. سلام ، ولك التحية والتقدير الأستاذ/ الفاتح جبرا ، ودا الفضل بس مع الوضع الحاصل دا ، والثقة إتعدمت فعلاً في اي لحوم في السوق

  4. اختراعك ما بناباهو إلا مقدمتك شحتااااافه وبلدنا برد ,,,

  5. إعتقد يا بروف أن انا وأنت وكل محمد أحمد وكل الشعب الفضل ما عندنا مشكلة في الاكل وما عندنا قشة مرة بناكل جميع أنواع اللحوم حتى لو كانت ديناصورات ولكن المشكلة عند من تغيرت نوعية غذاؤه وأكلو الكافيار وسكنو القصور وإمتطو الفارهات من الحديد والفارهات من النساء …. بالجد ندعوهم لإستيراد وإستعمال هذا الجهاز لأن صحتهم غالية علينا جداً

    1. هسي الجهاز ده ما بساعدنا في معرفة حقيقة المسئولين ديل !؟ اقلوا نعرفم متحولين من شنو …

  6. لكن ( الكشف ) دا ما ممكن يتم يا بروف إلا يكون في شبكة بتاعة “WIFI” في المطعم وعندك الكود، أو تستعمل بيانات الهاتف لو عندك رصيد ، ودا كوولو صعب .!!. غايتو ما عندك حل غير تطفي النور وتتوكل على الله وتقول الدعاء المأثور :
    ” بسم الله الذي لا يضر مع إسمه شيء في الأرض ولا في السماء وهو السميع العليم” ولن يضرك بأذن الله تعالى ، ولو كانت الوجبة بالنهار تأكل وأنت مغمض وساكت سااااي والله المستعان .. سلاااام ..

  7. يا جنوبي اممممممم !! إنتا مالك ومال الحاجات الفي المقدمات دي بتعرفا من وييين وشفتها متيييين ؟؟
    ما تسيبك من الحاجات دي الله يصلحك ويهديك قول آااامين .. سلاااام ..

    1. هههههههههه
      آآآآآآآآآآآآآمين
      ما بعرفا الا زكرتني السودان زمان .. زمن اكل المطاعم احسن من اكل البيت زمن السندوتشات .. لسان ومخ وبيض وبيض بالبيض كباب حلة كباب طوه وكمونية وجقاجق ولحمة بالفرن ولحمة شية ولحمة نيّة .. وتاكل وانت متطمّمممممن .. يلا يعني ح ناكل زمنا وزمن غيرنا !؟ يا حليلك يا السودان !!
      اها هسي الجكة دي وقفت وين ؟ يعني بقر ميت ولا حمير !!؟ شان نحدد ناكل ولا ما ناكل .. غايتو كان بقر ميت ما بعمل شئ شان زمااان في اندايات العباسية كان بيعملوا الاقاشي من الغنم والبقرالميتات و ولاااااا بسوي ليهم شئ ! ولا آآآ شان المريسة ! خلاص كان بقي بقر ميت رجعوها لينا الغبشه المُدرة للبول منظفة للمسالك ..

  8. والله حقو الزول يتاجر بي كاشف اللحم دا و يابخت من نفّع و إستنفع زي فلم كاشف الدهب. حسي من البروف نزّل مقالو دا يكون 0الأخوان) زماااان شحنوا ليهم شحنة و جاية في السكّة و ابقى راجل قول عاوز تشحن إنت كمان يقولوا ليك (لا لا دا مافي في سجلات الإستيراد)!!!!!!!! و بي كدا “، أبشروا حتضمنوا إنو لحم (الحمير و البقر الميت و الما ميت و لحم الحيوان الغير موجود في سجلاتنا) حيكون فلم مستمر عشان (أخونا ) شاحن الشحنة دا ينفع ناس بيتو و يربي عيالو (من المرتين)!!!!ما قلنا ليك يا بروف يوم بتعوّق ليك زول!

  9. هههههههه يا نونا … ما دام الحكاية فيها (مرتين) ما تشوفوا لينا أن وصاحبي جنوبي دا واااحدة تانية معاكم … سلاااام …

    1. لا لا جنوبي انا ما بشوف ليهو ، حأشوف لشمباتي كيةً في مرتو الماشايفا شغلا دي ههههههه هييي اختوني بهظر ساي النسوان ديل ما عندهم يمة ارحميني في الكلام دا.. لكن رأيكم شنو فيي فكرة التجارة دي؟ و الله في واحد شغال في الun من ماجابو فلم الكرتون بتاع اليويو داك من دربو مشي شحن ليهو كونتينر يويوهات بي تراب القروش و وزعهم على الدكاكين ، و طبعا الشفع عندنا يعجبوك قال ليك لما الراجل اتهجم

      1. ههههههههه
        امانه ما شافت شغلها صاح .. امبارح دق علي وصوته واااطي .. كان من الحمام كان من البلكونه ما عارف !! واختصرني سريع سريع … دقيت علي المندهش حكيت ليهو قال لي مرتو هنا معاهو مرتو هنا !! نان انا جنوبية !؟

      2. واطى ياااااااااااااااااااااا ….. !؟
        غلطان انا القلت الحقك قبل تغرق !
        اصبروا لى انت والمطموس وخالتكم طيبة كمان !

    2. هييييييي انا في الواحدة زااتا بقت زي خافض الحرارة .. عند اللزوم .

      1. الله يخزي شيطانك يا جنوبي ، ما قلنا بلاااااش من الكلام دا !! إنتا ناسي إنو معانا (أخواتن) ؟؟ مالك داير تودينا في 60 داهية ههههه .. ويا بتي يا نونا صدقيني ما فهمت من كلامك إلا حاجة بسييطة !! إنتي بتتكلمي chinees ولا شنو ؟؟

  10. اخخخخخ يا زمن ,,
    اكلونا لحوم الحيوانات وعاملونا كالحيوانات !
    والله عالم الحيوانات منو فينا !
    اتفوووووووووووووووووووووو

    1. يا ود أمي من يوم بنوا برج الفاتح بقينا ما فارزين ده من ده ! كوووولنا بقينا بره !

      1. طيب شيل دا من دا يرتاح دا عن دا !!

  11. الكسره دي زي لحم الحمار بتاع الجزاره يكوروك جحش لبن جحش صغير والجايات كلاب سااااااااكت

  12. دي غلوتية يا دكتور شمباتي !!! فهمنا ليها ، وأنا متأكد جنوبي زاااتو ما فاهم حادجة .. سلاااام ..

    1. هو قاصد نشيل الحيوانات الحاكمننا ديل ونرجعهم جنينة الحيوانات إلا يا ربي نافع ده حنوديهو وين أصلي ما شفت لي قفص عقارب في الجنينة !!

      1. كويس شاااااطر يا جنوبي أهو بقيت أحسن مني فهمت !! بس ما تنسى إنو في قفاصة بتاعة دبايب بدل العقارب في الجنينة .. سلاااام ..

      2. ما عشان احسن منك يا نانو , بس انا وشمباتي من طينة وااحدة معجونة بموية بلاعات وانت طينتك معجونة بموية ( النقاع ) صاااااااااافيه …
        شمباتي ( لسان ممدود تعقبه غمزة )

      3. غمزك الضراك يا حاقد !
        انا معجون بموية ورد ,,
        احححححححححححح

  13. قصة قصيرة
    يُقال انه في زمن النبي سليمان جاء طير الي بركة ليشرب الماء ولكنه شاهد اطفال بالقرب من البركة , انتظر حتي غادر الاطفال وابتعدوا عن البركة , وبالصدفة جاء رجل وقور ذو لحية , فقال الطير في نفسه هذا رجل وقور ولا يمكن ان يؤذيني فنزل الي البركة ليشرب الماء . رمي الرجل الطير بحجر افقأت عين الطير , فذهب الطير الي سليمان شاكياً , استدعي سليمان الرجل واصدر حكمه بفقء عين الرجل ولكن الطير اعترض وقال لسليمان : إن عين الرجل لم تؤذيني بل اللحية التي خدعتني لذا اطالب بقص لحيته عقوبة حتي لا يخدع بها غيري !!! ( منقول من الواتس )
    .
    .
    .
    هو اتاري ديل من زمن سليمان !!؟
    هسي نحنا يانا الطير موجودين والرجل ذو اللحية موجود بس ويييينو سليمان الينتفا ليهو !؟

    1. كدي حاول الشفع الكانو بلعبو ديك

    2. أها شفتا يا جنوبي !!؟؟
      أنا ما قلت ليك أسأل عمنا نانو أبو أحمد قبل ما تكتب قصتك دي !!
      طلعت القصة ماسورة !

  14. تسلم أخوي جنوبي ، إسم الله عليكم إنت وأخونا دكتور شمباتي ، ويا سيدي إنتو الخير والبركة والقمردينة بيكم منورة وإنتو الأثنين فاكهتها اللذيذة المتجددة ..
    بالنسبة لقصة الطائر والرجل الملتحي (أبو دقن) مع سيدنا سليمان عليه السلام ، فهذه من الإسرائيليات المكذوبة والتي لا ينبغي تداولها وتشبيه زمن هؤلاء الأوغاد بعهد ذلك النبي الكريم . ألا هل بلغت اللهم فأشهد .. سلااااام

    1. يعني مصادفه سااااكت !!؟ سبحان الله .. وانا قايلا حقيقية وشمباتي قايلا حقيقية والمندهش وفلاديمير قايلنها حقيقية وزكي جمعه قايلا حقيقية ! مين زكي جمعه ده !!؟
      تعرف يا نانو ياخوي طالما ديل قاعدين انا خايف كللللل الاسرائيليات تبقي مفصلة تفصيل ويتشابه علينا البقر ..
      شكرا للتوضيح وما عدمناك ان شاء الله ..

      1. وأنا كمان يا جنوبي بسألك مين زكي جمعه دا ؟ المهم في الأمر طالما إنو المسألة بدخل فيها سيرة نبي من أنبياء الله ، فلا بد من التحقق من الخبر أولاً قبلما ينقلها الإنسان عبر وسائل التواصل الإجتماعي والتي أصبحت كتيرة ومسيخة (زي الهم في القلب) وتنقل الغس والسمين ، والصدق والكذب والذي أضحى هو الغالب !!
        جعلنا الله وإياكم هداة مهتدين ، وعلمنا ما ينفعنا ، ونفعنا بما علمنا إنه ولي ذلك والقادر عليه .. سلاااام ..

  15. ديل ناس والليييييييييييله فيها كتاب دين (قصة شنطة المدرسه)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: