إذا توقف

• إذا توقف العمل بما يعرف بالصراف اللآلي يكون كويس .. (صراف واحد شغال وعشرين ما شغالين)
• إذا توقفت مشاركاتنا الخارجية في كرة القدم ربما نحفظ ماء وجهنا بعد أن اصبحنا ملطشة بين الامم
• إذا توقفت تعيينات الخريجين على (الواسطة) و(حامل هذا الكارت يهمنى أمره) فأعلم أن أمر البلاد لا يهم أحداً
• إذا توقف قضاء المصلحة على الرشوة في دواويننا الحكومية فالإثم (قطع شك) على المرتشي دون الراشي (يعني الناس تعمل شنو؟)

• إذا توقفت (نقة) زوجتك فأعلم انها تعاني من إلتهاب في الحنجرة
• إذا توقفت كشات المرور فسوف يستقيل الجنود (تاني ياكلو سمك عند عوضية وين؟( مع النسبة دي؟
• إذا توقفت الحركة في الطريق وتكدست العربات على الجانبين وتصبب الناس عرقاً وتأخرو عن أعمالهم فده معناتو إنو في (موكب مسئول) نسي (سفنجتو) في البيت !
• إذا توقفت (علوية باغات) عن الغناء فلن تتأثر خريطة السودان الفنية
• إذا توقف المسئولون عن التصريحات إذن لسلمت مرارتنا من الإنفقاع
• إذاتوقفت تقارير النائب العام عن إيراد الإختلاسات والفساد المالي عندها أعلم أننا قد بدانا في تطبيق الشريعة !
• إذا توقفت عربات حمل النفايات عن العمل فالحكاية واااحدة إذ أنها تنفض (نفاياتها) وهى تسير
• إذا توقف التنقيب عن الذهب فلن يحدث أي شئ (هو يعني عامل لينا شنو؟(
• إذا توقف الدعاء بهلاك اليهود والأمريكان يكون كويس عشان برضو فيهم ناس كويسين وكده وإحتمال كمان يكون فيهم امريكان مسلمين !
• إذا توقف السؤال عن ملف خط هيثرو العند النائب العام أو لم يتوقف
تظل الأوراق (حبيسة الأدراج) لنقدمها يوم الموقف العظيم !
• إذا توقف إستيراد العربات قليلاً فلن تتصاعد أختناقات المرور أكثر مما
هو عليه الآن
• إذا توقف ذلك الفنان العجوز عن الغناء (يكون كويس) فحباله الصوتيه قد شارفت على الإنتهاء بعد (الإرتخاء)
• إذا توقفت الجبايات عن الطرق والأسواق فسوف تجد أن اسر كثيرة ما لاقية عيش …(حرام)
• إذا توقف سعر صرف الدولار عند السعر الحالي (أكون طيرة ومباري السيرة)
• إذا توقفت الصحافة الرياضية عن المهاترات والكلام الفاضي (تبيع كيف؟)
• إذا توقفت عربة لشابه تقف في شارع (عبيد ختم) الساعة عشرة بالليل فهذا يعني ان (فضل الظهر) قد إتطور
• إذا توقفت الإعلانات التي تقوم الشركات بصياغتها عبر لهجات مصرية وشامية ومش عارف ايه .. يكون وزير الإعلام شايف شغلو
• إذا توقف سيل الإعلانات الولائية عن إفتتاح منشآات يكون كويس .. توفير قروش .. هي المنشآىت وينا؟ (نقطة بسط) أمن وشنو ما عارف؟
• إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
• إذا توقف (الشيخ حبيساً) عن التعليق على الاحداث يكون كويس لأنو هو الزول الوحيد الفي العالم الما مفروض يفتح خشمو
• إذا توقف (الإمام) برضو يكون أحسن لأنو دخل موسوعة (جينيس) للزمن المخصص لمسك العصاية من النص (بس إنتظروها تسخن وشوفوهو) !
• إذا لم يتوقف (أبوهاشم) عن الصمت يكون احسن عشان ما معقول الزول يكون ساكت خير .. شر
• إذا توقف المسئولون (قليلا) وتريثوا عن التصريح إبان الفواجع لما سمعنا بمصطلحات مثل (دعاء الإيبولا) !! هم ما يصموا خشمهم عليهم
• إذا توقفت لك (حافلة ركاب) حتى تعبر الطريق يجب مراجعة القوى العقلية للسائق
• إذا توقف ضخ مياه الشرب في المواسير أكيد (العلة) تكون في (النيل)
• إذا توقف السودانيون عن أكل (اللحمة) بعد أن وصل كيلو الضان إلى 80 ألف فليهم الف حق !! (مع باقي المكونات يعني الحلة عايزه ليها 200 ألف)

كسرة :
• إذا توقف قلبك عن النبض أكيد تكون سمعتا بتصريح ذلك البرلماني الذي صرح بان الإحترازات لا تمنع إنتشار الأوبئه لأنو (مما كسبت أيدي الناس) …. يا نااااااس ..

• كسرة ثابتة (قديمة)
• أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و
• كسرة ثابتة (جديدة):
• أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) !

Advertisements

21 تعليق

  1. برنجيييييييييات

      1. أجيّ !!!!

    1. مبروك التومات ..

  2. وإذا توقفت البت / تهاني عبد الله وزيرة العلوم والإتصالات عن السفريات الخارجية يكون أحسن!
    وبقروش السفريات دي نشتري كلوروكين للملاريا ،، وسؤال سغمبوتي كده للوزيرة بما انو آخر سفرية كانت لعاصمة أذربيجان عشان يتوسطو لينا ل أوباما ليرضى عنا و يرفع عنا الحظر الإقتصادي ،، اها الجماعة ديل قالوا ليك شنو ح يتوسطو ولا .. لا ..
    بس عاوزين نعرف عشاان نعرف راسنا من رجلينا !ّ!ّ!ّ!ّ

    1. والله ما قلت إلا الصدق و مش سفريات و بس ما في يوم ما بنعدم فيه طلّتها البهية و بالعدم لالالالالالازم تصرّح!!! أنا ما عالفة راجلا حاميها الكلام في البيت و لا شنو؟ كرهتنا عديييل

    2. عاصمة اذربيجان اسمها شنو !!؟

      1. إسمها ( باكو ) والنبي فيك كان تداعيني !!

      2. باكو حرام ؟
        هي العلوم والاتصالات دي زاااتا متين بقوها وزارة ؟ انا خايف بكرة كمان وزارة الثروة يستنسخوا منها كم وزارة ونسمع بي وزارة الاسماك ووزارة الابقار ووزارة الاغنام و .. و ..

      3. اداعيك عشان تمش وين !
        كفاك الانت فيهو ,,
        لوووووووووووووووووووووول

    3. الثروة الحيوانية

  3. اذا توقف البشير عن ترشيح نفسه يكون احسن ( ما عشان هو كعب !! ياخي ملينا من خلقته دي دايرين نشوف رئيس جديد )

    1. أممممممم إذن فلندعم ترشيح ( طه سليمان ) يخربنا تاني ما عندنا غيرو !!

  4. 1- إذا عرفنا غسان وين / حيحصل شنو يعني؟ أفرض في السجن ، قروشنا ويييينا؟
    2- إذا ملينا الصفحة دي واوات هيثرو / حيحصل شنو يعني؟ الخط ويييينو؟
    3- إذا إتكلمنا لما قلنا الروب / حيحصل شنو يعني؟ وييينا هي العصيدة الياكلو بيها الروب؟

  5. مبرووكة ولدنا المندهش ( الله لا يدهشك ) !! أخونا ود بوتين ما تتسلبط ساااي !! ولدنا المندهش سبقك عليها بي 6 دقائق بالتمام والكمال ونحنا شاهدين والسيستم كمان .. ( إذا توقفت كشات المرور فسوف يستقيل الجنود (تاني ياكلو سمك عند عوضية وين) ؟
    ( مع النسبة دي) ؟ الحقيقة الفقرة دي ذكرتني قصة حقيقية حصلت مع واحد مغترب سائق عربية جديدة لنج بلوحات سعودية ، فوقفو بتاع الحركة وأخد ليهو لفة في العربية ما لقى أي حاجة يتسلبط فيها !! قام قال للمغترب يا زول تمشي معاي القسم !! صاحبنا قال لي: “ليه في شنو ؟” العسكري قال لي قاطع إشارة !! المغترب قال لي: ياخي حرام عليك أنا زااتي ما جيت بالإشارة جيت من الزقاق دا
    (بعد الإشارة) .. العسكري مصر يسوقو القسم والمغترب كان مستعجل عندو مواعيد مهمة ، والناس إتلمت ..

    قام المغترب قال ليهم : يا أخوانا ما فيكم ود حلال يفكنا من الزول دا ؟؟؟؟
    فقام العسكري قال ليهو ” جيبك الكبير دا بسوي في شنو ” ههههههههه … سلااااام …

  6. اذ توقف عابر سبيل عن الكتابه نموت من المقصه أدامك الله تاج فوق رؤسنا

  7. إذا توقف الصرف الكثير على الإنتخابات يكون أحسن ، ما أصلو النتيجة معروفة

  8. والله يا استاذ الفاتح انا أواب رحمة الله من مدرسة الموهوبين الثانوية بصراحة عرفتك قبل أسبوعين لانو جابولينا مؤلفاتك في المكتبة المدرسية وما شاء الله الكتب مسموح استلافها وللان انا ما اقدر. استلف تاني لانو الكتب كلها شالوها يعني (من الاخر) انت بقيت (اسطورة) مدرسة الموهوبين ونتمنى نحن ( الطلبة الغلبة) ان نحظي بمكان في مؤلفاتك فنحن ايضا ممكن (نطرشق).

  9. وزير الدفاع قال الحركات المسلحة حشدت قواتا للهجوم علينا وطلب مننا نحنا المواطنين كثرة الدعاء لله عشان ينصرنا !!
    هو لو نحنا دعانا ده فايت ركبتنا كان لليلة انتو قاعدين !!؟
    مااااااالك يا جبرا خليتنا نغالط في نفسنا ونقول يمكن انا الما جيت !! اذا توقف دي وقفتا ما بقت طويييييله

    1. ههههه عشششان تلقاك لابد للبرنجية دي ياجنوبي!ههه تشمها قدحة ، البروف إتأخر و الجمااعة كووولللهم صحوا و لابدين معاك

  10. ههههه عشاااان إنت تلقاك لاااابد للبرنجية دي!هههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: