ولا شبهة

ضحك العبدلله حتى بانت نواجزه ثم إستلقي على ظهرة وهو (يرفس) مقهقهاً وهو يطلع على خبر إنتقاد رئيس لجنة العمل والإدارة والمظالم العامة بالمجلس الوطني الهادي محمد علي لتقرير منظمة الشفافية العالمية والذي وضع السودان في ذيل الدول الأكثر فساداً .. ماذا قال الرجل .. الرجل قال بأنهم لم يسمعوا (كنواب طبعن) بأن هنالك مجرد شبهة أو تهمة عن فساد في البلاد !

وللسادة القراء (غير الناطقين بها) نقول تفريقاً بين (الكلمتين) ان (التهمة) يقصد بها (الفساد) الذي يتم إتهام مرتكبه (عديييل كده) لوجود حيثيات تكفي لتوجيه الإتهام والمضي إلى المحكمة كقضية ا(الأقطان) مثلاً والتي تم تداولها داخل (برلمان العضو المحترم) … أما الشبهة فلنترك تفسيرها ونعطي لها مثالاً جلياً واضحاً وهو ذلك الوزير الذي صرح قبل عام ونصف على صفحات الصحف بانه (ذي حلاتنا) يستدين الالف والألفين بينما قام بشراء منزل قبل شهور بما يعادل (مليوني دولار) ولولا أنه قد قام (بملح) السمسار لما ذهبت بخبره الركبان !!
ولعل العضو المحترم لم يذكر (التحلل) بحسبانه (جنس ثالث) أي لا تهمة ولا شبهه ، كما أنه لم يذكر (الفساد المعلق ) كبيع خط هيثرو وغض النظر عن (واواتنا) التحت دي بحسبان ان (الخط) لم يوضع (كمعروضات) بعد سبع سنوات من بيعه بأبخس الأثمان دون أن يورد ثمنه لحكومة السودان !!
لم يسمع النائب المحترم (وأقرانه) عن وجود شبهة أو تهمة فساد على الرغم من أن الفساد (عملو ليهو )
آلية ومفوضية ثم منظومة ، لم يسمع النائب المحترم (وأقرانه) عن وجود شبهة أو تهمة فساد على الرغم
من أن السيد وزير العدل ومن داخل (برلمان العضو المحترم) قد صرح بأن هنالك شخصيات نافذة قد حاولت التأثير عليه من أجل عرقلة العدالة !!
أي فساد بعد هذا أيها العضو المحترم (وزير تحاول شخصيات نافذه الضغط عليه من أجل عرقلة العدالة) ! ووكت أصلو الحكاية جابت ليها (نكران) فدعني ايها العضو المحترم (أوريك) الفساد وصل وين ولو كنتا عارف مشكلة ولو ما عارف تبقى (مشكلتين) ففي ايدينا وثيقة صادرة من المكتب الرسمي لتسجيلات الأراضي لإنجلترا وويلز
Land Registry , Official land registration service for England and Wales
الوثيقة تحمل الرقم
NGL704504
وهي صادرة في الساعة 13:20:36 بتاريخ 14 سبتمبر 2012
تؤكد بأن بيت السودان بلندن وعنوانه الموضح بالوثيقة هو
31-32 Rutland Gate,London
قد تم بيعه بمبلغ 16.000.000 ستة عشر مليون جنيه إسترليني وأنه قد تم تحويل ملكيته إلى المشتري وهو وكالة عقاريه بجزيرة جيرسي إشترته لحساب أشخاص لم تفصح عنهم وهذه الوكالة إسمها
LAKE FLOWER LIMITED AND BLACK MOUNTAIN PROPERTIES LIMITED
وعنوانها
Elizabeth House, 9 castle street , st. Helier, Jersy , JE4 2QP
وبيت السودان لمن لا يعلمون يقع في القلب الملكي للندن في راتلاند قيت وقد كان قبلة للسودانيين منذ خمسينات القرن الماضي وقد إستضاف الالاف من السودانيين الـذي اموا
بريطانياخلال الستة عقود الماضية وآخرهم المبعوثين لكافــة الجامعات البريطانية والذين كان عنوانهم الرسمي هو (راتلاند قيت) حيث كان مقرا للمحلقية الثقافية ..

من الذي قام بإصدار قرار البيع؟ ولماذا؟ (يعني الدولة مضايقة ليها في قريشات؟) ، وكيف يصدر قرار بتحويل اصول ثابته ملك للشعب الي اموال سائلة تنهب عيني عينك (هو النهب ده شنوووو) والأهم من ده كوووولو (القروش مشت وين) هههههه !!!
وبعد ده كوووولو .. يجيك (برلماني ورئيس لجنة كمان) ويقول ليك (لم نسمع بأن هنالك مجرد شبهة أو تهمة عن فساد في البلاد) .. يااخ الفساد محل ما تقبل .. والله حقو (تتحلل) من كلامك ده !!

كسرة :
في الحالة دي الزول يقول شنووووو؟؟؟ (طبعن : يااا ولد هات الحبوب)
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو)

Advertisements

22 تعليق

    1. مبروك بس التدخين ضار بالصحة

    2. مبروك يا امريكي الغائب

  1. برنجيييييييييية غير مشبوهة

    1. دي الشبهة ذااااتها يا المندهش ،، لك وللجميع تحياتي

    1. خلاص بطلنا السجائر

  2. يسمع الطرش الهادي ود محمد علي ده !! سُب عليهو ..
    هو كون الزول يكون رئيس لجنة في البرلمان ويدوهو مخصصات وزير ده برااااهو ما فساد !!

    1. ما تتهم الناس زوراٍ وبهتاناٍ ساي يا جنوبي ، قال ليك الراجل (نايم) في البرلمان يعني أكيد ماسمع شي!! هم لكن عايشين معانا عشان يسمعوا؟ انا بس خايفة يسمعوا كلام عثمان ميرغني و ينقلوا لينا جلسات السجم دا على الهوا، و الله نص الشعب حيروح في غيبوبة!!! انا غايتو الراجل دا لو كان جنبي كان لطشتو كف ! بس تاني ما عندي ليهو شي

      1. جضّميهو وتُفي ليهو جوووه خشمو واديهو ضربة في كتفو وفكيهو ..

  3. والله يا بروف حقو توزع لينا من حبوبك دي شوية . شكلها هي المخلياك مستحمل الشي دا، انا غايتوما عندي حبوب دغت و لا سكري إلا باقي لي عندي إنفجار الشريان الإستغراشي

  4. ههههههههههههاااااااي
    أحححححححييييي أنا
    أسمعو النكته دي :
    (CNN)- قال حسبو محمد عبد الرحمن، نائب الرئيس السوداني، إن بلاده أرست نظاما إسلاميا في كافة معاملاتها المالية وأصبحت رائدة فيه، مشيرا إلى أن الخرطوم كفلت “نظاما عادلا يضمن لكل الأطراف الاستفادة بدون تضرر أو مخاطر”

    غايتو يا ابوالحسب بالغت عديل كده !!!

    1. حسبو ياتو ؟ العمل صيوان لمن بقوه نائب رئيس ؟!!!
      قالوا لي يوم الليلة مخاصم الما جا بارك ليهو …

      1. ليو حق يزعل يا ود أمي ،، بعد في الكراع بقت في الوش ،، كيسين حلاوة وصندوق بيبسي ،، إستكتروهن عليو ،، ناس ما عندها محاسيس ،، أها إنت مشيت باركت ولا برضو زعلان منك ؟؟

  5. مبروووك يا ود أونكل سام ومعليش يا مندهش ( الله لا أدهشك ) ، ما تتسلبط ساي !! ختفا منك الأمريكي قبل دقيقة وااحدة..
    إنتو عارفين مع أني ما كنت مؤيد لسياسات جعفر نميري (رحمه الله) إلا أنه كان رجلاً عفيفاً شريفاً ، فقد صادف أن كان في لندن عام 1980م وقابل شيخ زايد بن سلطان هناك ، فأهدى له شيخ زايد فيلا رائعة داخل مدينة لندن كهدية شخصيه له ، إلا أن نميري طلب من سفير السودان أن يسجلها باسم حكومة السودان .. تفتكروا لو كان الشئ دا هسا كان حصل شنوووو !!! وهي زااتا أكيييد لحقت أمات طه مع ( بيت السودان المعتدى عليه ) .. الله يرحم الرجال الشرفاء .. سلاااام ..

    1. فرق السماء من الأرض

  6. بكون يابروف ماسمع بى الفساد كان مشغول بى الواتساب ماتزعل بكره يسمع

  7. يسمع فى نفسو انشاءالله قولو امييييييييين

  8. يسمع كيف كان الجلسة كلها نائم او ساكي حقوقه قرف يابروف قرف والله ولا حياه لمن تنادي

  9. احييييييي الكلام حرقني لكن كان قولتو بتودني الشارع

  10. دا (عضو) يستخدم فى حالات العفنة فقط !
    اتفوووووووووووووووووو عليو

  11. وبعد ده كوووولو .. يجيك (برلماني ورئيس لجنة كمان) ويقول ليك (لم نسمع بأن هنالك مجرد شبهة أو تهمة عن فساد في البلاد) .. يااخ الفساد محل ما تقبل .. والله حقو (تتحلل) من كلامك ده

    دي مقتبسة من مقالك يادكتور واعدتها شان عجبتني
    فيك الخير والله – برضو خايف عليهم من عذاب الله ودايرهم اتحللوا
    بالتحل تكة اي فاسد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: