كم فنجان زيت؟

يقر العبدلله ويعترف بأنه شخص (مازوخي) والمازوخية أو الماسوشية عند علماء النفس هي الحصول على المتعة عند تلقي التعذيب فالماسوشي هو شخص يعشق تعذيب نفسه وهو خلاف ” السادي ” الذي يعشق تعذيب الاخرين ويستمتع بذلك .
وحب تعذيب النفس كما يقول العلماء يتخذ أشكالا وصورً مختلفة وكما بقية الأمراض الأخرى فهو يمر بمراحل متنوعة فيبدأ (علي خفيف) حتى (يتمكن) من الزول .

لم أكن أعلم بإصابتي بهذا المرض إلا بعد أن لاحظت لبعض التصرفات التي أقوم بها من حين لآخر .. فمثلاً أكون (سايق العربية) ومعي الأولاد فجأة ينبعث من إحدى إذاعات )الأف أم (صوت فنان (يهنق) بأغنية من النوع (العاوز ليهوأعصاب) فتمتد يد (المدام) لتغيير المحطة إلا أنني أطلب منها أن تبقي على هذا (الفتاك) ليكمل الأغنية عشان يطلع عين (أبو اهلنا) وكده !
ولعل من أكثر الأمثلة التي تدل على إصابتي بهذا المرض هو بقائي متسمراً أمام التلفاز حوالى الساعة ونصف أشاهد ما يعرف (بمباراة الغمة) حيث لا مهارات فردية ولا زوجية ولا جماعية ولا تاكتيك ولا خطط ولا يحزنون (دافوري ساااكت) أما اللياقة فمعدومة من أساسو بفضل السجائر وبقية السينات ! (عشان ما تمشوا بعيد .. سهر – سعوط – وكده) ، وهل هنالك شعور أجمل من مشاهدتك للمهاجم (عوض كورنر) وهو يجد نفسه (في خط ستة) منفرداً بالمرمي فيرسل الكرة لتصطدم بإحدى عارضات (كشافة الملعب)؟
إزداد يقيني بأن إصابتي بهذا المرض في أطوارها الأخيرة إذ وجدت نفسي هذه الأيام أعكف على قراءة سيرة السلف الصالح مقارناً بها سيرة (الخلف الحالي) من حكامنا ومسؤولينا وإليكم آخر ما قمت بقراءته عشان تتأكدوا من (مازوخيتي) بنفسكم ..
الحكاية عن الخليفة عمر بن عبد العزيز ذلك الخليفة ذو المكانة السامقة في تاريخنا الإسلامي على الرغم من أنه لم يحكم سوى سنتين وكم شهر كده قضاها خليفة للمسلمين (يعني نص دورة إنتخابية) مما يؤكد بأن القادة والزعماء يدخلون التاريخ بأعمالهم التي تغير تاريخ أمتهم لا بالسنوات التي عاشوها في دست الحكم وقد دخل عمر بن عبد العزيز التاريخ (رغم قصر فترة حكمه).بأعماله العظيمة وإدارته العادلة للدولة حتي أصبحت بلاد المسلمين في عهده (حاجة تانية)
يلا عزيزي القارئ (خلوني أتعذب) ونتعذب كوووولنا لنقرأ معاً تعامل هذا الخليفة الورع مع المال العام إذ يقول الكتاب الذي بين يدي:
( جاء البريد ذات ليلة إلى هذا الخليفة فأشعل السراج ليقرأ الرسائل، ويسأل رجل البريد عن أحوال المسلمين في بلده، ولمّا انتهى من كلّ هذا أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة)
بالله شوفوا .. لم يشأ هذا الخليفة (المسؤول) أن يعتدي على أموال المسلمين ولو بأخذ (شوية) زيت يستضيء بها وينير بها (منزله) الخاصّ !
نعم يا عزيزي القارئ .. قراءة التاريخ الإسلامي (الآن) ومقارنته بما يحدث في دولة (المشروع الحضاري) تعد نوعاً من الإستمتاع (بتعذيب النفس) وإستمرار (العبدلله) في قراء سيرة السلف الصالح من أمثال هذا الخليفة تعني إنو(المازوخية) إتمكنت منو شديد !!
كسرة :
جاء في الأخبار بأن قيادات بالوطني تتهم والي ولاية النيل الأبيض (الشنبلي) بتبديد 9 (مليارات) جنيه (بالقديم) … دي هسه تعمل ليها كم فنجان زيت !!!
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) !

26 تعليق

    1. معااااااااااااااااكم

    2. هسي انت كان ما مازوخي الله امركك ومرقك هنااااك تاني بتفتش اخبار السودان ماااالك !!

  1. هو إنتا يا ود أونكل سام ما عندك لا شغله ولا مشغله بس قاعد مستنيها كدي !!! على العموم مبروووكة عليك .. سلاااام ..

  2. بي ويييين يا ود شمباتي الفرقة كبييييرة 10 دقائق بالتمام والكمال !!! .. سلاااام ..

    1. ههههههههههههههههههههه , سلبطة بس ,,
      كوزنة وكدة

  3. انا ممكن اكمل شغلتى بى فنجان الزيت دا او بدونو ! عادى

  4. هههههههههههههههههه ………… كان كدي معلييييش تستاهلها …. !! !… سلااااام …

  5. بعد الحساب يابروف لقيناها بتعمل ليها اييييييييييييييييييييييييييييييييك فنجانا لاغير

  6. صحي مازوخي !! انت البوديك تقرأ سيرة عمر بن عبد العزيز شنو ؟ ما تقرأ سيرة الحجاج بن يوسف !!
    اووول مرة اعرف مازوخي دي .. الليلة اقشر بيها قشرة ..

    1. هههههههههههههههههههه ,, قشرت لكن فلاديمير المسيخ طيرها ليك فى راسك !
      تجى نتمازخ ؟؟؟
      وى وى وى

  7. منتظرنك تكتب لينا عن موضوع مشروع الجزيرة والبترول الحايم تحتو وكده

  8. القاعده العامة تقول أن الخطان المتوازيان ﻻ يلتقيان
    والامثله على ذلك :
    1-خطى السكه الحديد
    2-الانقاذ والحكم الرشيد
    ……………
    هيييييييييكااااااااا
    الحصه انتهت

    1. محاضرة مختصرة ومفيدة يا مندهش (الله لا أدهشك) !!! وخير الكلام ما قل ودل هههههههه .. سلاااام ..

  9. الشنبلي دا كوز (قصدي تور) وكترت سكاكينو! هو حمّضا شديييد وريحتو فاااحت و الجماعة الأيامات دي هااايجيين نظام إنتخابات و كدا و دايرين ليهم ضبيحة فداء (نظام نزيهين وكدا) و أي كوز يتهابل وما يلعبا صحا يدوهو كرت أحمر . و الله أننا آسفة يا بروف لكن إكتشفت إصابتي بالمرض لإدماني على قراءة مدونتك دي . إهييييء كر عليّ يا بت أمي ، أعفى لي يا بروف لكن المرض دا بكتل؟

  10. هيييييييي اسمعوا الكلام سمممممممممح ! ناس البرلمان حلفوا وقسموا قالوا الاكل المستورد بيسبب السرطان وقالوا ليكم اكلوا الويكة والكسرة بس !!
    التقول الشعب قعد ياكل غيرم !! هي الويكة زاااتا بقت ما لايوقه بعد شفنا لايقتكم دي ..
    وحات الله ناس البرلمان بقوا زي حريم الجزُر نفسسسسس مواضيعن وهن شايلات خضارن .. وحات الله رجلة عثمان امس كان سمحة خلاص وحات الله الجيلي جاب ليهو جنس طلح انتي يا هنايا بت ناس عشة طهروها ؟

    1. هههههههههه حاجٌة قديمة يا جنوبي
      ووووب علي انت مغترب من زمن نسوان الجزر

      1. ههههههه وين يا دفعه ..
        الله يسألك حريم الجزر بقن يأرخوا بيهن !!؟ يعني زي سنة قومة البحر ؟ ههههه
        نحمد الله لي يوم الليلة في حلتنا في جزر وفي حريم جزر الحاجة الوحييييدة المافي هو كلب الجزر ! هو في شئ بترمي تاني !! كبير اخوانه زااااتو ناس البيرقر والهوت دوق جوهوا فييييي رقبتو … مخير الله
        نفسي في تبش بالشطة .

    2. هي الويكـة مالا يا جنوبي ما سمحة بلحيييل وطاااعمة ومفيدة طبياً كمان ، بالمناسبة الإمريكان إكتشفوا أنو البامية (الويكة حقتنا دي) بتعالج عدة أمراض !! وقاموا صنعوها وعملوها حبوب وموجودة الآن بالصيدليات في أمريكا وأوروبا بأسم (OKRA) ولو قوقلتها بتلقاها !! لو ممكن أخوانا الدكاترة د. طارق ود العبيد ود. شمباتي يفتونا عنها .. وكمان معانا زميل كان السكري بتاعوا ما بنزل من 400/450 مع إنو بستعمل أنسولين وحبوب !! ووصفوا ليهو البامية 5 حبات بالليل يقطع الرأس والدنب بدون ما يقشرها وينقعا في موية صحة دافية للصباح ويشرب مويتها على الريق قاس بعد إسبوع لقى السكري بتاعوا نزل لـ 170. يا سبحان الله ..

      جاء في الحديث عن أبي هريرة رضي الله عنه أن رسول الله صلى الله عليه وسلم قال: (ما أنزل الله داء إلا أنزل له شفاء)؛ رواه البخاري .. وعَنْ أَبِي الدَّرْدَاءِ رضي الله عنه قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ :
      ( إِنَّ اللَّهَ أَنْزَلَ الدَّاءَ وَالدَّوَاءَ ، وَجَعَلَ لِكُلِّ دَاءٍ دَوَاءً ، فَتَدَاوَوْا وَلا تَدَاوَوْا بِحَرَامٍ) صححه الألباني في “صحيح الجامع” 1762 ..

      فعليكم بالويكة يا ناس القمردينة ويا أيها الشعب السوداني الفضل ، وخليكم من كلام جنوبي دا !! .. سلاااام ..

      1. يا نانو قبل خمسة ستة شهور شوال الويكة كان بي سبعمية ألف ( بالقديم )
        السكري ماااا نزل من الويكة ! السكري قال الزول ده فِقِر خلااااص وبقي ياكل الويكة وقال اخير نمرق منه نشوفلنا زول مرتااااااح بياكل اكل سمح .. هههههههه
        ايوا الدواء ده انت وريتني ليهو قبل ده ..
        اما فوائد الويكة انا حكيت ليك بتعمل معاي شنو !

  11. لكن ما قلتوا لينا الزيت كان نوعو شنو ( سمسم ولا فول ولا زيتون …. ولا اولين )
    شلنا شوقنا وراجعين بيهو يا المندهش
    تلاتة بنات ماشات حلوات زي الوردات

  12. اه ما هم ناس المشروع الحضاري ديل ما سمعو بالكلام دا

  13. ديل يا بروف بطفو اللمبة لما يجي شغل خاص بالدولة .. عشان المواطن ما يلم فيهم …
    مش حكاية (سعادتو في اجتماع، لما يجي نقول ليهو منو) دي طفية اللمبة من شغل الدولة ذااااتا … يمهل ولا يهمل ..
    وليكم يوم يا أولاد الهرمة ؟؟

    المازوخية التهرد المصارين كانت أمس في بنامج المحطة الوسطى .. الشافع صلاح المرضي الما مؤدب القاعد مع العلماء .. وبقرر مشروع الجزيرة فيهو فايدة ولا لا ؟؟؟

    أنا مش جاتني مازوخية … جاتني غريرينة في العصب السابع وأنا شايفو بغالط في دز تاج السر مصطفى وبروف عبد الله .. دا زول مؤلم ألم ما طبيعي ياخ !!!!!!!!

    1. اتالمت وين ياهناى !!!؟

      1. في مصراني المازوخي الأعور من العليه !!!

  14. Dear Ustaz Gabra,
    Pls, keep send your topic messages, as I missed them for three weeks,
    Best regards,
    Bashir Dafalla

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: