الإجابة الصحيحة

السؤال الأول : ما هي الصفحات التي يقرؤها المسؤولون في الصحف ؟
1- صفحة الحوادث
2- صفحة السياسة
3- صفحة الفن
4- كل ما ورد أعلاه

الإجابة :
أنا بفتكر يا استاذ الإجابة نمرة أربعة هي الإجابة الصحيحة .. (كل ما ورد أعلاخ) المسؤولون يقرأون كل صفحات الصحف ما عدا (الكسرة الثابتة) و (واوات خط هيثرو) !
السؤال الثاني : يحتاج الخريج إلى كم سنة حتي يتمكن من الزواج؟
1- 16 سنة ضوئية
2- 24 سنة شمسية
3- 12 سنة قمرية
4- كل الإجابات أعلاه غير صحيحة
الإجابة :
الإجابة الرابعة هى الصحيحة وهى أن كل الإجابات أعلاه غير صحيحة لأنو لو قلنا إنو الخريج ده لقى ليهو شغل وكان محظوظ وقدر يعرس أها أولادو الح يجيبهم ديل ياكلو (نيم) طلب الفول بي عشرة ألف (بالقديم) يعني هو ومرتو عاوزين ليهم (3 وجبات يومية ) دي براها مليون وتمنيميه جنيه في الشهر (فوووول بس) !

السؤال الثالث : كيف لوزير أن يشتري منزلاً بإتنين مليون دولار وقبل عام لم يكن يمتلك شيئاً (ذي ما قال)
1- دخل صندوق وادوهو الصرفة الأولي
2- جاءته ليلة القدر
3- وجد مصباح علاء الدين
4- طلع ليهو المارد من الزجاجة
الإجابة :
الإجابه الصحيحة يا أستاذ هى الإجابه رقم واحد .. ح يكون دخل ليهو صندوق النفر (مية دولار) .. وبرضو يعني ما مشكلة .. الصعب شنو يلاقي ليهو (عشرين الف) نفر يدخلو معاهو الصندوق ؟
السؤال الرابع : في أي البلاد يوجد مساعد لرئيس جمهورية يمكث عشرة شهور في الخارج وشهرين في بلاده ؟
1- الصومال
2- السنغال
3- نيبال
4- الأمازون
الإجابة :
أكيد يا أستاذ الإجابة الرابعة ( الأمازووون) دي عايزه ليها كلااام
الإجابه :
كل الإجابات صحيحة يا أستاذ الوزراء والولاة المسئولين مرتباتهم بتكفيهم لحدت آخر الشهر والمواطن (الحاوى) كمان مرتبو بيكفيهو لحدت آخر الشهر … هو لو ما كان (حاوى) بجد يكون مرتبو (ألف جنيه) ومؤجر بى (ألف جنيه) !

السؤال الخامس : أصبحت المستوصفات الخاصة أداة من أدوات ؟
1- الجر
2- الجزم
3- الرفع
4- النصب

الإجابة :
الإجابات كووولها يا أستاذ صحيحة .. ناس المستوصفات الخاصة (يجرو) المريض بالإعلانات .. بروفيسور منو وبروفيسور منو واحدث جهاز لرسم الشنو و(يجزمو) للمريض إنو ح يلاقى رعاية طبية ما حصلت وإنهم لا محالة ح (يرفعو) عنو البلاء والمرض لكن المواطن فى الأخير يكتشف إنو ده (نصب) سااااكت
السؤال السادس : رؤساء الأحزاب السودانية يجب أن يدخلوا إلى أحدي هذه الدور؟
1- دار فلاح
2- دار العجزة
3- دار الوثائق
4- موسوعة جينيس

الإجابة :
دار فلاح دى ما أظن يدخلوها عشان ما عندهم وكت للغناء والكلام ده ومشغولين بمشاكل المواطنين وكمان دار العجزة دى برضو ما أظن لأنو قاعدين يضربو الشواءآت والأطايب وبياكلو أكل نضيف وكمان بيتعالجو بره … ودار الوثائق دي دخولها ما كويس معهاهم عشان تاريخهم غير مشرف لكن (موسوعة جينيس) دى ح يدخلوها بى أوسع أبوابا !! شغالين ستين سنة (ولسه) بس سياسة !!
السؤال السابع : كم تكون الساعة فى الخرطوم إذا كانت الساعة فى (موسكو) الآن هى السابعة مساءاً
1- الثالثة صباحاً
2- الواحدة ظهراً
3- العاشرة مساءاً
4- جميع الإجابات غير صحيحة
الإجابة :
الإجابة رقم أربعة هى الإجابة الصحيحة وهى أن جميع الإجابات غير صحيحة فعندما تكون الساعة هى السابعة مساءا فى موسكويا أستاذ تكون الساعة فى الخرطوم هى السادسة مساءاً بتوقيت (السودان) المحلى وهى الساعة الثالثة مساءاً بتوقيت (قرينتش) أى الساعة السابعة مساءاً بتوقيت (الإنقاذ) والبكور !

السؤال الثامن : أقصر الطرق إلى الموت هى الذهاب إلى أحد هذه الأماكن:
1- المستشفى
2- الإسبتالية
3- المستوصف
4- كل الإجابات صحيحة
الإجابة :
أكيد يا أستاذ (رقم أربعة) .. كل الإجابات صحيحة .. هو كان كل الإجابات ما صحيحة الناس دى كانت (كسرت) على الأردن ذى المطرة (الأعمى شايل المكسر) ما كان قعدت إتعالجت هنا ومشت (أحمد شرفى) !
السؤال التاسع : النائب البرلماني الذي قال بأنهم لم يسمعوا عن تهمة أو شبهة فساد في البلاد هل هو :
1- أخرس
2- أعمى
3- أبكم
4- كل الإجابات خطأ
الإجابة :
الإجابة رقم 4 يا استاذ .. كل الإجابات خطا .. فهو (لا يشم) إذ ان رائحة الفساد أزكمت الأنوف وعلى الرغم من ذلك (بيقول في كلامو ده) !!
السؤال العاشر : لماذا لم يقدم (أبطال) فضيحة (التحلل) إلى القضاء؟
1- لا يوجد حبر
2- لا يوجد ورق
3- لا يوجد عدل
4- كل الإجابات خطأ
الإجابة :
أكيد يا أستاذ الإجابة الصحيحة هي (رقم أربعة) .. كل الإجابات خطأ .. لأنو القانون (قال كلمتو) والجماعة (إتحللو) والموضوع إنتهي .. أيه يعني لمن زول يمارس (الإحتيال) و (التزوير) و (خيانة الأمانة) وإنتحال الشخصية ويشيل ليهو (مليارات) .. هسه يا استاذ بس ورينا مجرد (شبه جنائية) عشان الزول يتحاكم بيها ؟؟

كسرة :
أختار الإجابات وخليك من الكسرات !!
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) !

16 تعليق

  1. برنجياااات برضو تصدقو ؟؟

    1. ما شاء الله مع انو الليلة ما الأربع. مبروك

      1. الله يبارك في عمرك يا نونا ،، و عقبالك الأربعاء الجاية !!

  2. ما شاء الله مع انو الليلة ما الأربع. مبروك

  3. Mr. McDavid Fouad Hassan El-Haj Jr. | رد

    هاهاها قوية منك يا جبرة السودان و ما ادراك ما السودان

  4. السؤال السادس دا يتخيل لي إجابتو (رقم واحد) دار فلاح ، لأنهم فالحين فلاحة شدييدة

  5. مبروووكة يا ود بوتن .. هو البرنجية بقت يا ود بوتين يا ود أونكل سام الحكاية شنو ؟؟ كلها في بلاد برررره ؟؟ يمكن البروف بيكلمن قبلما ينزل البوست !! ههه .. ومالك الليلة يا بتي نونا عسى ما شر !! علقتي نفس التعليق لود بوتن مرتين سلامتك من الخــ……….. الله يجازي الكان السبب … دا كووولو من شمباتي وجنوبي هههههههههههههه .. سلاااام ..

    1. الله يبارك فيك يا ابو احمد ،، و المرة الجاية نتوسط ليك معانا عند البروف يبلغه معانا لمن يجى ينزل البوست ،،

  6. ورورووووووووووووووووووووك ,,
    ابو ناجى سلاااامتك ,, الحاصل شنو !!؟
    هنا فى اجابة من غير سؤال (الإجابه :
    كل الإجابات صحيحة يا أستاذ الوزراء والولاة المسئولين مرتباتهم بتكفيهم لحدت آخر الشهر والمواطن (الحاوى) كمان مرتبو بيكفيهو لحدت آخر الشهر … هو لو ما كان (حاوى) بجد يكون مرتبو (ألف جنيه) ومؤجر بى (ألف جنيه) !) ,,
    يا لطييييييف , العفو والتخفيف ,,

    1. اللبيب بالاجابةِ يسألُ …
      الله ما كريم زي ما بيدي ناس الكترة بيدي ناس البركة

  7. هديتي ليك يا بروف خبر مازوخي ماسوشي مستغرش ، وزير مايتنا الهمام قال إنو تقرير المراجع العام ما فيهو شي دي تناقضات سااااي! يعني أبشروا بالخير ما في فساد ولا في أي شي و القرووش يأخوانا راااقدة إلاّ (متناقضة ساي!!!) و قال أنو رئاسة الجمهوية حتشكل لجنة (حتنبثق منها لجنة) للرد على التقرير و هو عضو فيها (هو شخصياً و هو أحد الذين إنتقد التقرير أداء وزاراتهم)!!! ]أخوانا بصراحة كده ، إنتو غلطانين على الجماعة ديل ، إتحلوا من الإنتو فيه دا يا بروف! أنا غايتو صدقت و آمنت

    1. العيب ما عليهو ! الزول ده قبل كده وقف في نص البرلمان وقال انا زول فاشل ومفروض امش اقعد في بيتنا !؟
      العيب علي الزول البيتصيّد الفاشلين ويجيبهم يعينهم ! بالله خمسة سنين كمان لي شنو !!؟ في شنو الممكن تورينا ليهو ولسه ما وريتنا ؟
      حلوه إلا متناقضة ساي !! دي ..

  8. شمباتي العزيز

    السؤال المحذوف هو:
    ما هي الشريحة التي يكفيها مرتبها حتى نهاية الشهر:
    1- الوزراء
    2- الالولاة
    3- المسؤولين
    4- المواطنين
    الإجابه :
    كل الإجابات صحيحة يا أستاذ الوزراء والولاة المسئولين مرتباتهم بتكفيهم لحدت آخر الشهر والمواطن (الحاوى) كمان مرتبو بيكفيهو لحدت آخر الشهر … هو لو ما كان (حاوى) بجد يكون مرتبو (ألف جنيه) ومؤجر بى (ألف جنيه) !

    والسؤال دا طبعاً عشان يفرقو بيه بين الذين يعلمون والذين لا يعلمون ….. !!!

    1. هههههههههههههههههههههه ,, والله صدقت يا حبيب ,,, وطبعا احنا لا بنعلم لا بنتكلم !
      صم بكم عمى وبس ,,,,

  9. تعالوا ننت ح ب !
    وأشار إلى مطلوبات الترشيح للرئاسة وفقاً للمادة (41/2) من قانون الانتخابات لسنة 2008م المعدل 2011م و 2014م.
    مطلوبات الترشح
    لا يقل عمره عن الأربعين عاماً، وأن يكون ملماً بالقراءة والكتابة، وعدم إدانته في أي جريمة تتعلقة بالأمانة أو الفساد الأخلاقي

    ( هو بالله يعني أي زول بيعرف يفك الخط ممكن يبقي رئيس !؟ يعني ممكن واحد يمش يقدم في مصلحة لوظيفة مراسلة وبنفس ورقه ده يمش لناس الانتخابات يقدم لوظيفة رئيس ؟ )

    ونبه إلى إيداع مبلغ عشرة آلاف جنيه سوداني عند الترشح لمنصب رئيس الجمهورية تأميناً، يعاد المبلغ للمرشح إذا حصل على 10% من الأصوات حداً أدنى، أو إذا سحب ترشيحه في أي وقت قبل 45 يوماً من تاريخ الاقتراع.

    ( دلالة الاصم .. ههههه 10 ألف تكمّل او ترد لمن لم يرسوا عليه المزاد !! الناس ديل ياربي ما بكون عندهم كورلات نضيفه او برادو ؟ )

    1. هههههه عجبتني الدلالة دي!! دا طبعا حيكون الشرط التعجيزي الوحيد للشعب السوداني

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: