شـــــيوخ برادو

إلى وقت قريب كنت أعتقد أن الإنسان إذا أراد أن يكون (شيخ لاحق) ولديه )حيران) وتابعين ومريدين فإن أولى صفاته هي البعد عن زخرف الدنيا والزهد فى (ملذاتها) وقد عاصر ابناء جيلنا عندما كانو صغارا هذه النوعية من (الشيوخ الاتقياء) ، اذكر أننى عندما كنت صغيرا كان كثيرا ما تنتابنى حالات من الصداع المؤلم فكانت (والدتى) عليها رحمة الله (تمسكنى من إيدى) وتذهب بى إلى (الشيخ صالح) وهو شيخ هرم مقوس الظهر (يأكل من عمل يده) فنجده وهو يمارس عمله فى (فتل الحبال) فيمسك بى بيديه الناشفتين المشققتين ثم يضع أحداهن على رأسى ويرقى بآيات من القرآن الكريم ثم يعود إلى عمله من جديد .

وقد جاء فى (طبقات ود ضيف الله) فى طبقات الأولياء أن الشيخ (حمد) قد مكث فى (خلوته) وهى حجرة تم (تطويب) منافذها بالطوب إلا من كوة صغيرة يناولونه بها الماء بعد أن حمل معه زاده المكون من قليل من (القرض) و سبعه (تمرات) حيث مكت فى خلوته تلك اثنين وثلاثين شهراً فلما خرج من الخلوة وجدوا القرض والتمرات على حالها والركوة ملانه ماء، فجميع من شرب منها وقع مغشيا عليه وصار ولياً من أولياء الله الصالحين !! (أو كما قال)
كنت أظن – وليس كل الظن إثم- أن (الشياخة) لها علاقة وطيده بالزهد عن (ترف الدنيا وملذاتها) حتى قمت بزيارة صديقى (س) فى منزله والذى ما أن فتح لى الباب وإستقبلنى حتى هتف فرحاً مسرورا وهو يقودنى لحجرة طرفيه وليس (الصالون) مكان جلوسنا المعتاد :
– أبونا (الشيخ) معانا .. أبونا (الشيخ) الليلة جانا (ثم أضاف ) أبونا الشيخ فى القيلولة دى بياخد ليهو (نومة) ويرتاح شوية لو ما كده كان دخلتك سلمت عليهو !!
فى داخل الحجرة التى جلست داخلها كان هنالك شابين من شباب الحى الذين ربما رصدوا قدوم (الشيخ) فأرادوا الإستفادة من (خدماته) فها هو أحدهم يقول مخاطباً الآخر :
– أنا عاوزو بس يدينى حاجه تسهل ليا أمورى عشان إتخارج من البلد دي !!
– لكن (الشيخ) ده ح يفضى متين أنا قاعد ليا تلاته ساعات
– كدى أمشى (مد راسك) جوه الصالون شوفو صحى؟
ذهب الشاب الآخر (فى غياب صديقى س) ونظر من فتحة باب الصالون وجاء ممتعضاً :
– ياخى الشيخ ده الظاهر بتاع راحات
– كيف؟
– معاهو أربعه (حيران) إتنين ماسكين (راسو وإيدينو) وإتنين ماسكين (ضهرو وكرعينو) وقاعدين (يعصرو) ليهو … ( نظام مساج وكده) !!
بعد قليل كان صديقى والخادم الذى يعمل عنده يمران أمامنا وهما يحملان (صينيتين كبار) ملآنتان بما لذ وطاب من اللحم المشوى والمندى و(الفراخ) المحمر والمقمر وقطع (السمك) المتبل والسلطات (البيضاء والخضراء)
والشوربات (الكاربه) و(الأجبان) مختلفة الالوان … ثم ما لبثا وعادا يحملان مثلهما ملآنتان بالتحلية من (سطات فواكه) وجيلى وكاسترد وأناناس وكنافة وبطيخ أحمر يسر لونه الناظرين ثم عاد الخادم منفردا وهو يحمل(صينية) عليها (جكوك) من (العصائر) ذات الألون و(الكثافة النوعية) المختلفه !!
إعتذرت لصديقي عن تناول الأكل ولكن تملكنى إصرار فى داخلى أن أرى ذلك (الأبونا الشيخ) !! فجلست حتى تم (أخراج الفاضى) من الصالون .. ثم إدخال (الطشت البلاستيكى والصابونة) كيما يغسل (أبونا الشيخ) يده (فى بكانو) .. تم إدخال ثرامس) القهوة بالتمر) والشاى .. ثم بعد وقت ليس بالقصير خرج (ابونا الشيخ) الذى يبدو أنه لم يبلغ الخمسين بعد – وهو فى كامل (حلته) .. مركوب (نمر فاشرى) ..جلابية (زبده بيضاء( عمامة (توتال أصلى) وملفحة بألوان الطاؤوس وساعة يد (بلاتينية) مغروزة فى ذلك المعصم المكتنز .. يحيط بة أربعه من الحيران (الأشبال) يرتدون زياً (أخضراً) موحداً بزيق (اصفر سيتانى ) أتجه الشابان اللذان كانا معى بالغرفه نحو (أبونا الشيخ) مد لهما يده في ترفع فقاما (بتقبيلها) وبعد أن تحدثا إليه منفردين بصوت هامس أجابهما معاً :
– إن شاء الله غرضكم مقضى
ثم جاء دورى فقمت بتحيته (من بعيد بعيد) وصديقى (س) يعرفه بى :
– ده الإستاذ الفاتح جبرا يا ابونا … عليك الله يا (أبونا الشيخ) أديهو لينا فاتحة (قوية) عشان يبطل (السجائر) دى عشان عندو (القلب) وبشرب ليهو أربعه علب فى اليوم !!
ورفع (أبونا الشيخ ) كفيه (البضين) بالدعاء ملياً ثم أنزلهما وهو يقول لى :
– إن شاء الله تترك السجائر ده نهائى !
ثم توجه نحو العربة الفارهه (البرادو) المكندشة وسط كلمات وداع صديقى (س) … وبالفعل لم تمض أيام قلائل حتى تركت (السجائر) نهائياً ……………. وإتجهت (للشيشة) !!

كسرة :
حليل شيوخ الزهد والتقشف … جونا شيوخ البرادو (موديل السنة) !!
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) !

Advertisements

28 تعليق

      1. Thank you ود بوتن ، اقتصادكم كيف الأيام دي

    1. مبروك
      بايت ليها في الخيرة !؟

  1. شيخ للجنة شهاني
    ومن اللهو بنهاني
    شيخي .. شيخي شيخ هاني
    تقول لي دفع الله وحمد النيل وحسب الرسول !!
    بكره يجينا شيخ ميدو البقلب المريسه لبن نيدو !

    1. هاك دي يا جنوبي ، زي حقت التيس بتاع الدلكة تتذكرها يا جنوبي ،، يحكي ان لنا حبوبة ( حقيقية يا جنوبي ) سافرت الي دبي كي تنفس بنتها ، وما ان رأت الحبوبة مستشفي دبي التقول فندق خمسة نجوم انبهرت وراحت تقارن بين حالهم وحالنا ، المهم الحبوبة رجعت السودان وديك يا زيارة الأهل للمباركة ، وسئلت الحبوبة عن دبي ، وقالت ليهم والله دبي فيها جنس مستشفي ،، يحملني خوجلي سااااااي ،،،،،

      1. ههههههه
        المستشفي الشهت الحبوبة الحمل دي شهيتنا نشوفا والله .

    2. هووووى يا جنوبى , شيخ هانى دا قادم من العالم التحتانى !
      تكتر تقلل بقلبك تهانى !
      وانا ما خصانى !

  2. دا زى شيخ الامين المحايتو بيبسى وحيرانو جكسى ,,
    حيييييييييييييييييييييييييييييييييييي ,,
    ياخ ديل كلهم دجالين وافاكين , عليهم غضب من الله وذلة ,,,

    1. تعفوا وترضوا .. جاهل صغير سامحوهوا ..
      لاكين ماشين كويييس بكره يجينا شيخ داقي سستم والهناي الداخلي يكون لونه اخضر

      1. اخدر زرعى لاااادن جسمو !
        احححححححححححححححح

  3. اذا سألت فسأل الله تعالى وإذا استعنت فاستعن بالله..لا اله الا الله وحده لاشريك له فى الملك ولاحول ولا قوة الا بالله العظيم.. ولو اجتمعوا اهل السماء والارض على ان ينفعوك بشى لاينفعوك الا بشى قد كتبه الله لك..ولا يضروك بشى الا بشى قد كتبه الله لك..

  4. فأغلب اهل (الشخشة )عندنا فى السودان الحبيب مالوا عن جادة الطريق الى طرق تحضير المردة والشياطين والسحرة لايذاء الناس الذين غفلوا عن عبادة اللة وتحصين انفسهم بالصلوات والاذكار المشروعة. وللاسف ان كثيرا من الناس اصبحوا يلجؤا اليهم طمعا فى منصب .. او تقربا لمن هو اكبرمنه مكانة ..او .. او.. والله المستعان الهادى الى السراط المستقيم اللهم اجعلنا هداة مهتدين غير ضالين ولا مضلين.. آمين

  5. يا سلاااام يا بروف
    بالطريقة دي نفسي دخلت أنا زااااتي أبقى شيخ
    هم أحسن مني في شنو ؟؟
    مهنة من لا مهنة له
    بس انت تعال زورني وفاتحة وااااحدة مني بخليك تخلي السجائر وتقلب علي وارد بورتسودان !!

    1. ايواااا طالما جات السيرة وينا القروش السرقتها من قروش الزيارة حقت قبر جدي ؟
      اصلي ما عافي ليك ..

    2. خوجلى الندهتو الحبوبة فووق داك واتشهت تحمل منو ,, بتخبروهو !!؟
      عين غااااامزة

      1. هووووي يا شمباتي
        انا الكلام بالألغاز ما بعرفو !ّ!ّ!ّ
        إنت ما تقول هناية ديك لما مشت كايسة الجنّا من الشيخ خوجلي وما دفعت البياض و إستولت على قروش الزيارة الفي الصندوق و مشت ….متحللة

      2. ههههههههههههههههههههههههه , وانا ما بجيب سيرة (الجنوب) ,,
        وسى يا خوجلى سييييييييييييي

  6. مبروووكة عليك البرنجية يا ود أونكل سام .. وأنت يا جنوبي الله يخزي شيطانك لأنك أنت ما داير تخزيه براك !!! .. سلاااام ..

    1. الولد الضغير بياكل مع اخوانه يا نانو وبقي يبكي , امه قالت ليهو بتبكي مالك ؟ قال الاكل حار , قالت ما تخليهو يبرد . قال يمه لاكين هم ما بخلوهو … هسي انا دار اخزيهو لاكين عمايل الحكومه مااا بتخليني اخزيهو , شايفو هدي ورضي جمبهم ..

      1. إستعن بالله وألعن الشيطان والحكومة كمان …. ههههههههه … سلااااام ..

  7. كدي ورينا يا مندهش ( الله لا أدهشك ) !! وارد بورتسودان دا شنوووو ؟؟ .. سلاااام ..

    1. هلا يا أبو أحمد
      وارد بورتسودان والعهدة على الراوي قالوا حاويات توزعت ما تحويه بين الشباب و ذهب عائده لهناي

  8. إزيكم يا شباب .. وكل سنة وإنتو طيبين

    البلد اتعولقت على كل المستويات … إمتداد لإعداة صياغة الانسان السوداني والبرنامج الحضاري
    مستغرشين ليه؟
    يعني عااااادي بكرة ممكن يجيكم إمام جامع في خطبة الجمعة لابس برمودا … تحت مظلة ما قصر من الثياب !!
    ولا تسمع بي ولي قلب القلكسي أيفون …

    أي حاجة بقت ممكنة في بلدنا الجريح

    لكن الله في

  9. هناي منو يا مندهش (الله لا أدهشك ) ؟؟؟ .. سلااااام ..

  10. يا استاذ قلبت شيشة و لا حاجة تاني …… وأنا أقول ليه كل مقالات الأستاذ ظابط كدة ههههههههههههه

  11. مافي حتي مقالة وااااحدة
    بيها نتنفّس شوية !!؟
    اها هبشُم تاني ؟! ترا جروا ليك السبحة ! ومن اول يناير .. حتكون انسان جديد .. تبطل الكتابة خلاص حتشيل حديد و اييييييييييييه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: