طيب ما تقول

في بلادي كل شئ ممكن .. حتى وإن كان غير متوقعاً البتة … في عصر يوم غائم جميل قرر العبد لله زيارة صديقه (ص) الذي عاد إلى الوطن بعد أن قام بإجراء بعض الفحوصات والتحاليل بالخارج ، في شارع الإنقاذ الفسيح ببحري قمت بركن العربة في أقصي اليمين (ركنة معلمين) ودلفت داخلاً إلى المنزل حيث وجدته في معية نفر من الأصدقاء يتسامرون ، ولم تمض دقائق قليلة حتي دخل إلى صالون المنزل حيث كنا (طفل) صغير يصيح
– العربية الحمراء صدموها .. العربية الحمراء صدموها

على الرغم من أن عربتي حمراء فاقع لونها إلا أنني قد إستبعدت الأمر فما من سبب واحد يجعل عربتي (تصدم) فقد تركتها في أقصى يمين الشارع تجلس في أمان الله ، لكن بيني وبينكم (قلبي اكلني) فقمت مسرعاً لإستطلاع الأمر لأجد أن العربة هي (عربيتي ذاااتا) وأن أحدهم وهو شاب يافع يقف أمامها وهو (يرجف) بينما (البوكس) الذي كان يقوده قد عانق عربتي عناقاً حاراً و (كشاها) مسافة لا تقل عن عشرين متراً .
– حصل خير يا إبني الصدمة ما مهمة بس أنا عايز أسالك ؟
– إتفضل يا استاذ
– بالله وريني دي عملتها كيف ؟
أخبرني (الشاب) وهو لا يزال في حالة ذهول بأنه فقد (التوازن) وهو يرد على رسالة في (الواتساب) ، يبدو أن (ولدنا) كان يسير بسرعه شديده إذ ان شكل العربة يوحي بأنها قد تعرضت لاحد أسلحة الدمار الشامل حيث أختفي الجزء الخلفي منها بقدرة قادر !
أمسكت بهاتفي وإتصلت على (أخواننا) في (999) لأطلب منهم حضور شرطة (المرور) وجاءني الرد في رسالة مسجلة :
– للإتصال بشرطة النجده إتصل على الرقم 999 !!
فقلت في داخلي بالله .. يعني ما 999 الضربناها دي ؟ .. كررت الإتصال باخواننا في 999 وكان الرد المسجل يأتي دائماً بان أتصل على 999 ، كان من الواضح أن هنالك خللا ما في كبانية شرطة النجده فطلبت من أحد الشباب الحاضرين (يشوفو لينا بوليس) وقد كان حيث جاء رجل مرور وذهبنا جميعاً إلي قسم المرور لتسجيل الحادث .
– لو ممكن يا أستاذ (التأمين) و(الترخيص) و (الرخصة)؟
– ده التأمين وده الترخيص
– والرخصة وين؟
– ما معاي .. عاوزين بيها شنووو؟
– كييف يا استاذ ده حادث مروري؟
– حادث مروري لمن عربيتين ماشات يتصادمو لكن عربيتي دي واااقفه وما فيها زول !
أصر الشرطي وألح على ضرورة إحضار (رخصة القيادة) على الرغم من أنني قد بذلت جهداً مقدراً لإقناعه بوجهة نظري التي تبدو منطقية ولما أعياني أيصال الفكرة (وحرق روحي) له قلت ليهو :
– ممكن أسألك سؤال وتجاوبني عليهو؟
– جداً
– أفرض ياخ في زول (أعمى) وعايز يشتري ليهو عربية يتنقل بيها ويجيب ليهو سواق ، قام مشي الوكالة إشتري العربية وقال لي ناس الوكالة وصلوها ليا البيت لحدت ما أشوف ليا سواق .. قاموا ناس الوكالة وصلوها ليهو البيت وختوها ليهو في (حتت) عربيتي دي وجا (ولدنا) ده صدمها أها … يجيبو ليكم رخصة منووو؟؟؟
– هنا نظر الشرطي إلى بيانات البلاغ ثم نظر لي مبتسماً وهو يقول :
هو بالله إنتا (الفاتح جبرا) بتاع الجرايد .. طيب ما تقول !!
كسرة :
باقي ليكم كان بيقصد بي كلامو ده إني زول (لايوووق) ؟؟

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

Advertisements

21 تعليق

  1. لكن عايز الجد انت لايوق لويق يا بروف

  2. ال (999) ما ردوا لأنك طلبتها من اليمين للشمال،،، لانو طالما هى بالانجليزى يبقى لازم تطلبها من الشمال لليمين !!!

    1. لالا هو ده بكون واحد منهم ذاااتم وعامل فيها رد آلي !! كترة ما بدق ليهم في الحفر واليافطات بقوا حافظييين الرقم .. هههههه

  3. متحري واااااعي ده ! عرف نفسه لو اصر علي الرخصة حيبقي موضوع مقال كااااااامل وقال اخير اقيف لحدي هنا وابقي اكسسوار جوه مقال … هههههههه
    كمان بتسألنا !!؟ انت ناس قسم المحطة الوسطي في موضوع النفايات مش قالوا ليك تاني كان ما رسلنا ليك ماااا تجينا ؟ وطيّب !!

  4. حبيبنا الفاتح
    كفاره والجاتك في عربيتك الحمراء الوحيدة سامحتك،،
    مش زي ناس عندهم اربعه عربيّات واربعع نسوان كمان

  5. الكــــــــــــــــــــــــــوز | رد

    دعني اختلف معك هذه المرة .. انت مادام سايق العربية كان مفروض تكون شايل معاك الرخصة .. ما تضغطوا على الناس عشان يتساهلوا في القانون وبعدين تجوا تقولوا دا فساد .. بطلو تنظير القانون بيقول تكون معاك رخصة القيادة دائما في حال قيادتك للسيارة فبدل ما تتلايق على الراجل كان تعتذر وتمشي تجيب الرخصة محل ما ختيتها وتخلى الرجل يقم بعمله.

  6. ابو ناجى .. حمدن لله على السلامة ..وبركة الجات فى الحديد ..
    الهم فى الموضوع .. ناس التأمين قالوا شنو ؟؟ ما قالوا ليك إنت الغلطان وراكن العربية عشان شنو ؟؟

  7. كفارة وسلااااامتك و(قليل الدسم) دا كراااامتك ,, عشان السكر والضغط طبعا ,,
    لكن عجبنى تعبير الطفل (العربية الحمراء صدموها) ,, ههههههههههههههههههههههههههههههههههه,,,
    تانى كل واحد يشيل عربيتو معاو فى جيبو ,, بلا تسيب معاكم ,,,

    1. عربية ( حمراء ) دي امس ما انتبهت ليها انا !! والله يا بروف ما فضل ليك الا تمشي شارع النيل بالليل كمان !!! هههه

      1. هههههههههههههههههههههههههه ,, خليك واعى يا انت !
        الحمرة دى بفوتوها كدة ساااااكت ؟؟؟

  8. سلامتك ألف سلامة أستاذنا البروف والمجموعة كرامتك .. بالجد أريتنا كووووووووولنا كنا لوايييق ذيك كده .. كان كل مسؤول شاف ليه مخارجه بأي شكل .. وكل مخارجه معناها تصحيح وضع وتنظيف شينه و أوبه لحق .. وبي كد أكيد البلد كان إتصلحت ………………………………………………………………………………………………………………………………………………………………………………………………………………………………………………………………………………………………………………………………………………………………………………………………. بعد عمر طويل

  9. مبروكة برنجيتك ود أونكل سام .. وأخونا أبو ناجي حمد الله على سلامتك وبركة الما كنت في العربية وقت الحادث والحمد لله ربنا قدر ولطف إنها جات في الحديد، وزي ما قالوا (الجاتك في مالك سامحتك)، وربنا يخلف عليك وإنشاء الله ناس التأمين ينستروا معاك في التصليح، والمشكلة على بال ما تتصلح عييييك الله يعينك..!! والله حكاية (الطبيزي) في الجوالات والواحد يكون سائق دي مشكلة كبيييرة تؤدي لكثير من الحوادث المؤسفة ومعظمهم شباب في ريعان الصبا ، قد يتكسروا ويقضوا باقي عمرهم معوقين أو يموتوا !! وده كوولو ليه كان سألو لاحق شنو ؟؟ ما كل شيء ملحوق !! زمان جدي رحمة الله عليه لمن يكون راكب معاي في العربية بقول لي:
    (يا ولد أمشي براااحة عشان نصل قوااام) !! وما فهمت قصدو إلا قريب دا !! لأنو السرعة الزائدة والإنشغال بالجوالات أثناء السواقة تؤدى لحوادث مؤسفة ، الله يستر علينا وعلى أولادنا وأولاد جميع المسلمين ..

    وأفتكر إنو نحنا كآباء مفروض نوعي أولادنا ونمنعهم من السواقة بسرعة والتحدث أو الإنشغال بالجوال أثناء السواقة .. أنا شخصياً أولادي في السواقة (لمن أكون معاهم) بعملوا ستين ألف حساب لأنهم عارفين إني بشيل الجوال من السائق “مهما كان نوعه وغلى ثمنه” وبرميهو من الشباك عشان يقع مدشدش !!! ولو كل واحد فينا طبق الطريقة دي مع أولادوحايتعودوا ، وما أظن واحد فيهم يستهتر تاني …سلااام ..

    1. لجاتك في مالك سامحتك ده كان زماااان ! هسي بقت عوّقتك !! هو في شئ بدون قروش تاني ؟

      1. أيووووة في الأخلاق والمثل والقيم ،، ديل كووولهم مجاناً بدون قروووش !! ولو الناس طبقوها كان وصلنا القمر .. سلااااام ..

  10. الف سلامة يا بروف، و اهي على الأقل مقالاتك نفعت في شي بدل ما كان السكري يجيك ساااي. و بالمناسبة ناس التأمين الله يحلك منهم بالذات الجماعة بتوع (بنقيف معاك) و معاها شعار كدا لو شفتو حتفهم طوالي انهم حيقيفوا معاك الف احمر!!هههههه

  11. نبارك للجالية السودانية المقيمة في الخرطوم وصول البصات النهرية , ومن هسي كل زول يجهز شبكته وهو طالع من الشغل يركب البص النهري ويرمي شبكته ولحدي ما يصل يكون قبض ليهو كم سمكه يبقن ليهو غداء للاولاد .
    وكمان لو جابوا ليكم ركشات نهرية بتنفع ايام الخريف برضك ….
    انتو اسعار النفط مش نزلت عالميا !؟ سعر جالون البنزين ولاااا نزل وسعر الدواء ولاااا نزل وسعر الكهرباء ولاااا نزل !! بس في السودان ده بلا نسمع البشير نازل انتخابات البشير نازل انتخابات نزلة بالالتهاب الرئوي ان شاء الله …

    1. آميييييين ,,
      والبشير نازل على خيط الكرسى ,,
      ودقووولك يا البشير عبوووولك يا البشير ,,,

  12. الخبر منقول للفائدة (بالله شوف الناس العملت ووصلت ) وبرضو تقول لى ود اللواء تأمينه مصفح ومصلح وعسكرى المرور مابمسكوا كان كورتك لمن واطتك تصبح ههههههههههههههه الموضوع:قانون إلزامي يصدر قبل نهاية العام الحالي
    إلزام شركات التأمين توفير سيارات بديلة للمتضررين من الحوادث المرورية
    |

    تاريخ النشر: السبت 07 يونيو 2014
    يوسف العربي (دبي)

    أوشكت هيئة التأمين على إنجاز الصياغة النهائية لمشروع قانون التأمين الإلزامي على المركبات، الذي يتضمن وثائق موحدة جديدة للتأمين على المركبات تلزم الشركات بتوفير سيارة بديلة للمتضرر من الحوادث المرورية، بحسب مصادر تنفيذية بالقطاع.

    وقال إبراهيم عبيد الزعابي المدير العام للهيئة لـ “الاتحاد” إن الهيئة تولي أهمية بالغة لإصدار القانون المشار إليه وفق أعلى المعايير المتبعة في أسواق التأمين بالعالم، انطلاقا من ريادة الإمارات وتقدمها في هذا المجال.

    وأوضح أن هيئة التأمين حرصت على إشراك جميع الجهات المعنية في إعداد وصياغة مشروع القانون، مثل جمعية الإمارات للتأمين، ووزارة العدل، وإدارات المرور وشركات التأمين.
    وتوقع الزعابي صدور مشروع قانون التأمين الإلزامي على المركبات قبل نهاية العام الحالي، ليحل القانون الجديد محل القرار الوزاري الذي ينظم عملية إصدار وثائق موحدة للتأمين على المركبات بشقيها الفقد والتلف والمسؤولية المدنية «الشامل»، والمسؤولية المدنية «ضد الغير».

    ومن جانبه قال محمد مظهر حمادة رئيس لجنة السيارات والشؤون القانونية بجمعية الإمارات للتأمين وعضو اللجنة المكلفة بإعداد الوثيقة الموحدة للتأمين على المركبات بشقيها “الشامل” و”ضد الغير”، إن الوثائق الجديدة تلزم شركة الـتأمين بتوفير سيارة بديلة للمتضرر في حالات الحوادث المرورية ولحين إصلاح السيارة، وذلك ضمن حدود زمنية معينة.

    وأوضح حمادة أن اللجنة المكلفة بإعداد وثيقتي التأمين على المركبات، انتهت من عملها وقامت برفع الصياغة المقترحة إلى هيئة التامين، تمهيداً لإصدار هذه الوثائق بقانون حتى تتمتع بالحجية القانونية أمام المحاكم والجهات القضائية.

    ولفت حمادة إلى أن الوثيقة الموحدة بشقيها ستبقي على عـدد كبـير من النصوص السابقة، مثل منـح حملـة الوثـائق الحق في الاختيار بين تحمل شركة التأمين لتكلفة الإصلاح وسدادها للورش المتعاقدة، أو تقاضي حامل الوثيقة لقيمة الإصلاح نقداً.

    وأوضح أنه بموجب إصدار وثيقة التأمين بقانون، ستصبح التعويضات المنصوص عليها في وثيقة التأمين على المركبات ملزمة لكل من شركات التأمين أو حاملي الوثائق، بما يسهم في تقليص حجم النزاعات القضائية بين الطرفين.

    ويعد إصدار وثيقة التأمين بقانون أحد المطالب الرئيسية لشركات التأمين التي تتكبد خسائر فادحة نتيجة التعويضات الضخمة التي تقررها المحاكم المختصة في حالات الوفاة أو الإصابات البشرية نتيجة الحوادث المرورية.

    وتأتي الوثيقة الموحدة للتأمين على المركبات ضمن جدول أعمال اللجنة الدائمة التشاورية المشكلة بين الهيئة وجمعية الإمارات للتأمين، وذلك لتحديد الجوانب التي تحتاج إلى تعديل في الوثيقة الموحدة، وتلك التي تحتاج إلى معالجة بتعاميم تصدر من هيئة التأمين.

    وكان وزير الاقتصاد بصفته رئيس مجلس إدارة هيئة التأمين، أصدر قراراً بتشكيل لجنة فنية لإعداد مشروع جديد لوثيقتي التأمين على السيارات.

    وتضم اللجنة في عضويتها ممثلين عن الهيئة وجمعية الإمارات للتأمين، حيث قامت بدراسة الوثائق الحالية للتأمين على السيارات واطلعت على أنجح التجارب والممارسات العالمية في هذا المجال وانتهت إلى صياغة وثيقة موحدة للتامين على المركبات بشقيها الشامل وضد الغير.

    وبلغ عدد الشركات التي تزاول جميع فروع التأمين بنهاية العام الماضي 11 شركة وطنية وشركتين أجنبيتين، فيما بلغ عدد الشركات التي تزاول فروع تأمين الممتلكات وتأمين المسؤوليات فقط 20 شركة وطنية، و17 أجنبية.

    كما بلغ عدد وكلاء التأمين 14 وكيلاً، وعدد الوسطاء 170 وسيط تأمين في الدولة، منهم 163 وسيطاً وطنياً، وسبعة وسطاء أجانب، وعدد استشاريي التأمين 18 استشارياً يعملون في الدولة، وعدد خبراء الكشف وتقدير الأضرار 69 خبيراً يعملون في الدولة، وعدد خبراء رياضيات التأمين 31 خبيراً مسجلاً في الدولة.

  13. د. الفاتح ..المشاركة مادعوة للاغتراب ولكنها دعوة اصيلة عشان تعمل كرامة البليلة لعربيتك الحمراء وجميلة وتقول ياحليلها.. والله يخلف عليك ..

  14. حمدالله على السلامه يابروف قلت لى يا جنوبى طالع من الشغل يشيل معاهو شبكه ههههههه حلوه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: