دفيء غيرك

العبدلله يقوم بتقديم برنامج إذاعي بعنوان (ساعة مع جبرا) في العاشرة صباحاً من كل يوم سبت وذلك على أثير إذاعة (هلا) على الموجه 96 أف أم وهو برنامج تفاعلي يناقش قضايا المجتمع المختلفة وقد كانت حلقة أول أمس عن موجه البرد التي تضرب البلاد والشتاء القارص غير المسبوق الذي نشهده مما أدى إلى إنخفاض درجات الحرارة الشئ الذي جعل المواطنين يهرعون

إلى التزام بيوتهم حتى لا يتعرضوا للسعات البرد ، ولكن لا يعرف الكثيرون أن هناك أشخاصا لا يجدون المأوى للاختباء من برد الشتاء، ولا حتى ملابس ثقيلة أو بطاطين تحميهم من هذا الصقيع، فى الوقت الذى نجد أشخاصا آخرين لديهم (قصور) ومنازل تحميهم مزودة بأجهزة التدفئة التي (توزن) لهم درجات الحرارة ويقتنون أفخم الملابس (السميكة) التي لا ينفذ من خلالها البرد .
وقد كان موضوع الحلقة هو : لماذا لا نضع أنفسنا مكان هؤلاء الذين يموتون من البرد كل يوم.. وما هو شعورهم الآن والإجابة هي : لو وضعنا أنفسنا مكان هؤلاء لا نستطيع أن نتحمل ساعة واحدة فى هذا البرد!
لذلك فقد تبنت إذاعة هلا أف أم 96 من خلال هذا البرنامج إطلاق حملة أسمتها (دفيء غيرك) تهدف إلى جمع الأغطية و (البطاطين) والملابس الشتوية والأحذية والجوارب وكل ما من شانه التدفئة ومن ثم توزيعها على الفقراء والمساكين .
القارئ الكريم .. بعد أن تقرا هذا المقال (أمشي) فتش (دواليبك) و دواليب الأطفال .. شوف الحاجات الما محتاج ليها … الملابس المقاساتا صغرت على الأطفال .. البطاطين القديمة .. أجمع كل الحاجات دي وختها في (أكياس) … وتابعنا يوم السبت القادم في العاشرة صباحاً على راديو هلا على الموجه أف أم 96 … ح نوريك توصل لينا الحاجات دي كيف وكمان لو وقتك بيسمح عاوزنك تشارك في توزيعها معانا ومع الجمعيات الطوعية المشاركة في الحملة وتكون فرد من أفراد حملة (دفيء غيرك) .

هنالك الكثير من المبادرات الشبابية في هذا الشان وهم يقومون بأعمال عظيمة من جمع لكسوة الشتاء وتوزيع لها على الفقراء والمساكين والمشردين وما هذه المبادرة التي نقوم بها إلا (زيادة خير) وتفعيلا للدور الإجتماعي المسؤول للأجهزة الإعلامية من إذاعات وصحف وقنوات فضائية إذ لابد لمؤسسات وتنظيمات المجتمع المدني أن تهب لدرء مثل هذه الكوارث الطبيعية

عزيزي القارئ :
قبل أن تأوي إلى فراشك عزيزي القارئ وتدخل (تحت البطانية) بعد تأكدك من أن أطفالك قد تدثروا (بتخين) الثياب و(تغطوا) بسميك (الأغطية) تذكر أن هنالك أسر كاملة تعاني في ذات اللحظة من البرد وترتعد فرائصها من زمهرير الشتاء … من أجل هؤلاء نلتمس منك أن تجمع كل ما هو زائد لديك من (كسوة الشتاء) وتنتظرنا العاشرة صباح السبت القادم على أثير إذاعة هلا أف أم 96 لتشهد معنا إنطلاقة مبادرة (دفيء غيرك) ..

لن نسال والحال هكذا في كل مناطق السودان تقريباً أين جهد الجهات الرسمية من وزارة شؤون إجتماعية وغيره في انتشال المحرومين وضعاف الحال من موجة البرد هذه ومحاولة مساعدتهم فالجميع مشغولين (بالإنتخابات) وإن شاء الله (الناخبين) يموتوا من (البرد) !!

كسرة :
اللهم ابسط دفء رحمتك على من لا ملجأ له ولا مأوى، وهوّن عليهم شدة الشتاء فاحفظهم بأمنك وأمانك يا الله يا أرحم الراحمين ..

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

Advertisements

30 تعليق

    1. بالبركة بالبركة ان شاءالله اخونا نانو مع البرد دة !!

    2. اخي نانو مبروكه البرنجيه

    3. برنجية بتشبهك وحات الله وجايه طقم مع المقال ..
      بركة الشلتها من ود بوتن الشيوعي ده .

      1. شيوعى؟ هو لسه فى منهم …انا البعرفهم يرفلون الان فى بلاد الغرب واخدوا جوازاتهم كان ما عجبك

      2. لقيتك حاقد لكن يا جنوبى ،،

      3. عباس جدة،، اى بالله عليك اسأل لينا جنوبى دا تانى: هو لسة فى شيوعيين ؟ اذا كان فيلاديمير سيد الاسم زاااتو هسى مقدم على جواز غربى و اداهو الموافقة المبدئية و ال green card ،،

  1. اخي نانو مبروكه البرنجيه

  2. جزاك الله خير يا بروف على هذا العمل العظيم والجهد المقدر لمساعدة الآخرين فالدال على الخير كفاعله ..
    قال صل الله عليه وسلم : { والله في عون العبد ما كان العبد في عون أخيه } ..

    وقال الإمام الشافعي رحمه الله :
    الناس بالناس مادام الحياءُ بهمُ ** والسعد لاشك تارات وهباتُ
    وأفضل الناس ما بين الورى رجلُ ** تُقضى على يدهِ للناس حاجاتُ
    لا تمنعن يد المعروف عن أحد ** ما دمت مقتدراً فالسعد تارات
    واشكر فضائل صنع الله إذا جعلت ** إليك لا لك عند الناس حاجات
    قد مات قوم وما ماتت مكارمهم ** وعاش قوم وهم في الناس أموات

  3. مشكورين أخواني ود العبيد وود بوتن .. إن شاء الله يهنوكم بالسمح وتحياتي لكم ، طمننونا عليكم كيف عاملين مع البرد دا ؟
    إنتو قاعدين في قرونو الله يستر عليكم منو .. سلااام ..

    1. شكراً اخي نانو يعني البرد عاجبك لي ،، تحياتي

      1. لا أبداً يا ود أونكل سام بس فات علي ، أنا كنت قايلك لسه في السودان ما رجعت !! الله يستر عليكم كووولكم يا الفي بلاد بره والجوه في السودان . وبالمناسبة يا أخي جنوبي في حملة مع بتاعة البروف إسمها (فضي دولابك) يقوم بها مجموعة من الشباب وإسمها حملة “بشارة خير” تهدف إلي جمع أشياء عينية مثل البطاطين والملابس المستعملة التي تكون بحالة جيدة ، وتوزع على المتواجدين بالسكن العشوائي بأطراف ولاية الخرطوم، كما يمكن التبرع بأسعار ملابس شتوية وهي كالتالي: البطانية = 50 جنيه ودستة السويترات الأطفالي = 600 جنيه “بالجديد” ، ويمكن التواصل معهم على الأرقام : 0912821330 _ 0914905058 _ 0922631310 _ 0901188478 _ 0111094411 .. فممكن تكلفوا أي شخص بالداخل للتأكد من مصداقية هذه الحملة ..

        ما نقص مال من صدقة ، والدال عليى الخير كفاعله ، ، والله لا يضيع أجر المحسنين .. سلالااام ..

    2. تسلم كتير اخونا نانو،، و كان على البرد العندنا و عند ود العبيد و انكل سام،، نحمد الله هنا الأمور طيبة و مقدور عليه،، بس الكلام أهلنا و عقابنا هناك فى البلد،، نسال الله العلى القدير ان يعينهم و يخفف عليهم اثاره و تبعاته ،،
      و التحية للبروف فى مسعاه الطيب و ربنا يجعلها فى ميزان حسناته و يجازيه و كل من شارك و ابداى الاستعداد للمساعدة خير الجزاء …
      و ماشاءالله كل الأفكار التى طرحت جيدة و قابلة للتنفيذ و معظمها شغالة و الحمدلله ….

      1. مشكووور يا ود بوتن على المشاعر الطيبة ، وربنا يتولى عقبنا وأهلنا هناك من عندو ويستر علينا وعليهم .. أما أنت يا جنوبي أحيييييييييي عليك ، قبل كده قلنا شنو ؟؟ ما بلاااااش كلااام زي دا ( معانا بنات ناس ) خجلتنا الله يهديك ويصلحك قول آمين .. سلااااام ..

  4. سودانيه موجوعه | رد

    هوفي زول عنده اغطيه و لا ملابس كفايه خليك من زايده في السودان الله يكون في عون الناس لو في طريقه شوفوا حل للناس البره عايزين نشارك و ما لاقين طريقه

  5. اعانكم الله يا استاذ الفاتح ..
    بالنسبة لينا نحنا المغتربين نتفرج بس ولآ في طريقة نساهم ؟ وكيف ؟

  6. نسأل الله ان يمدهم من فضله ….وجزاك الله خيرا

  7. ياريت لو البروف يدينا عنوان وتلفونات جهة معينة نتواصل معاها لنشارك معهم في هذا العمل الخيري العظيم .. سلااام ..

  8. جاتني معلومات إضافية عن حملة (فضي دولابك) عن مراكز الجمع الرئيسية وهي :
    1- شارع 11 العمارات .. 2- شارع النادي القبطي / نادي العاملين ببنك السودان .. 3- شارع محمد نجيب لفة أستوديو منير الرماح (تاني بيت على الشمال) .. سلاااام ..

  9. ما أروعها ( دفئ غيرك ) .. لقد دفأت قلوبنا … قواك الله وخضر ضراعك أنت وكل من بادر .. سؤالي :- لماذا لغااااااااية السبت ؟!!! ما ذا عن البيكتكتو الآن وبعد ساعة ومساء اليوم وشايلين هم الليله دي وليله بكره الاربعاء وليله الخميس و ليلة الجمعة لتدخل ليلة السبت لأن البرنامج نهار السبت ليبدأ أمل التدفئة من صباح او ليلة الاحد . او الاثنين .. لماذا لا تبدأ الحمله الآن …. إتصال منكم بالاذاعة ثم فاصله مدتها دقيقتين تلاته ( ان شاء الله خصما من وقت البرنامج ) توري الناس يوصلو الحاجات دي كيف … وناسنا ماشاء اللله عليهم مقنطرين للخير بس عاوزين هبشة .. وهبشتكم العظيمة دي أقترح أن تكون بنهاية قراءة هذا السطر .

  10. أستاذ الفاتح ….نحن المغتربين عاوزين نساهم والدواليب مليانة ….أنا كل فترة بشيل معاى شنطة من المستعملات للسودان أو بشحنها … …لو تعملوا إتفاق مع فلاى دبى أو العربية …بس شنطة مجانية كل يوم …وأوعدك كل يوم شنطة من هنا ….

  11. سلام شباب، والله ما قادرة اطلع ايدي للكيبورد من البرد
    اولا مبروكة شيخ نانو تستاهلا، ثانيا و الله يا بروف امبارح قريتا في الجريدة و كنت عاوزة اقول ليك تنزلا في القمردينة لأنو لحد السبت بعيدة شوية عليهم مش؟ على العموم يا ريت برضو تنزل طريقة المساهمة هنا في القمردينة لأني و الله جني جن الراديو أصلي ما بسمع لي لي زول ما شايفاهو هههه

    1. يباركو ليك السمح يا بتي نونا .. شوفي الكلام الكتبتو فوق دا الساعة 8:49 ، ولو قدرتي تتأكدي لينا من الحملة دي كان صحي ولا ….. وتورينا يكون كتر خيرك .. عشان عندنا الجماعة الهنا كووولهم عائزين يساهموا ، لكن أهم حاجة يتأكدوا إنها حاتمشي للجهة المعنية . وجزاك الله خير .. سلاااام ..

      1. والله يا شيخ انا اتصلت عليهم و معلوماتك صحيحة و بقبلوا أي مبلغ مالي و الملابس بجوا يشيلوها من عندك و قالوا عندهم ناس في المناطق المحتاجة بوصلوها ليهم للمحتاجين لكن بس أتأكد كيف إنهم ناس جادين في عمل الخير و ما نصابيييييييين؟ ما ديارة أبخس حقهم لكن دا سؤال مشروع و حقيقةً دايرة لي نصيحة و انا حاعمل بيها

      2. يا نانو ونونا اخونا الفاتح جبرا ده عنده علاقات مع معظم الكيانات التطوعيه الزي دي وهسي مقدم لينا ( حملة دفي غيرك ) يبقي نركز معاه وما نشتت الكورة وهو يورينا نحنا المغتربين نحوّل ليهم مساهماتنا عن طريق منو ؟
        بس عليكم الله يا بروف ما تعملوا زي باقي الناس البتوزع اغاثة وتقعدوا تصوروا الناس المحتاجه وتشيلوا حسهم شان في ناس محتاجه ولو عرفت انو الشغلة فيها تصوير وشيل حس ما جوكم والله ما بجوكم . ادوهم غُميتي غُميتي .
        قت ليك ؟ حملتكم دي ما عندكم زي الحملة اياها ( احضني بواحد جنيه ) وسموها حضن داااافي شان نجي نبرد عندكم شوية ونرجع ..

      3. جنوبى يا جنوبى …نانو ابواحمد كان عنده احساس مسبق انك حتعملها…قال لك احييييي عليك قبل المداخله

  12. يا بتي نونا كتر خيرك كونك إتصلتي عليهم ، وما أظن إنهم ( …. ) !! لأنو في ناس تانيين إتأكدوا وكلموني ، وكونهم يجيوا لحدي عندك عشان يشيلوا مساهمات عينية أو مادية دا مؤشر كويس ينم عن مصداقيتهم ، الله يجزيهم خير وكل إنسان حسب نيته .. وإنت يا أخونا أبو وائل ليه يعني يعمل ليكم أبو ناجي إتفاقية مع فلاى دبى أو العربية عشان يشيلوها ليكم مجاناً ؟؟ ما تدفعوا إنتو حق الوزن كمان مساهمة (غطة) وبالخواجاتي ( Sharing ) .. { ألا إن سلعة الله غالية ، ألا إن سلعة الله الجنة } سنن الترمذي (صحيح)
    يا سلعةَ الرحمن ِلست رخيصة ً ‍ —- بـل أنتِ غالية ٌعلى الكسلان ِ
    يا سلعة الرحمـن ليس ينالُها ‍— في الألـفِ إلا واحـدٌ لا اثنان ِ
    يا سلعة الرحمن أين المشتري — فلقـد عُرِضتِ بأيسـر الأثمان ِ
    يا سلعة الرحمن هل من خاطب — فالمهرُ قبل المـوتِ ذو إمكان
    يا سلعة الرحمن لـولا أنَّهـا ‍— حُجِـبَتْ بكلِّ مكـاره ِالإنسان
    ِما كان قـطُّ من متخلفٍ ‍ — وتَعَــلتْ دارُ الجـزاءِ الثاني
    لكنَّها حُجِـبَتْ بكلِّ كـريهـةٍ ‍— ليُصـدَّ عنها المبطلُ المتواني
    وتنالهـا الهـممُ التي تَسْـمُو ‍— إلى ربِّ العلا بمشيئةِ الرحمن ِ
    فاتْعَـبْ ليوْم ِمعادِك الأدنى — تَجِدْ راحاتهِ يومَ المعادِ الثاني

    قال تعالى في سورة آل عمران آية -92- بعد أعوذ بالله من الشيطان الرجيم:
    ( لَنْ تَنَالُوا الْبِرَّ حَتَّىٰ تُنْفِقُوا مِمَّا تُحِبُّونَ ۚ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيمٌ ) صدق الله العظيم .. سلاااام ..

  13. يا عباس ( ركس ) أنا ما بعلم الغيب !! فلا يعلم الغيب إلا الله .. وأنا ما قلت لجنوبي أحييييييييي عليك قبل مداخلتو ولكن بعدما علق .. فلو رجعت للزمن بتلقا جنوبي كتب المداخلة بتاعتو الساعة 8:05 مساء أمس الثلاثاء .. أما تعليقي أنا فقد كان الساعة 8:51 مساء أمس يعني بعد 46 دقيقة من مداخلتو !! لكن الـSystem بيوضع ترتيب المداخلات حسب الشخص المعلق وليس ترتيباً زمنياً !! والحقيقة أنا بقول الكلام دا عشان ما يطلع لينا واحد (صوفي) يقول لي: ( بركاتك يا شيخنا يا البتعرفا طااايرة ) ههههههه .. سلااااام ..

    1. ههههههههههههه
      تخااااف !
      انت ما شفت اب زرد داك رماها كيف ؟ قال الرسول جاني في المنام وقال لي يا شيخ فلان !
      مسيلمة الكذاب الرسول صلي الله عليه وسلم قال لجماعة مسيلمة زولكم الحرس جمالكم ده ليس بأشركم ومسيلمة ما صدق وطوالي استشهد بالكلمة دي واعلن النبوءة ومال البقول الرسول شيّخو عدييييييل ده ناوي علي شنو ده !!!؟
      انت يا نانو جاتك حقت الشيخ ( …. ) الجا عمل عملية جراحية للمرا ديك ؟ وكمان بيجي يغيّر ليها الجرح !!
      مااا في المنام يا نانو جاها عدييييل وهي صااااحية وعملية بي شاشا وقطنها !!

      1. ما جاتني يا جنوبي !! يجينا الخير أنا وأنت وكل الإخوان والأخوات القمرديناب .. سلااااام ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: