وبدأت المبادرة ..

تنشط العديد من المباردات الشبابية هذه الأيام من أجل توفير الكثير من المستلزمات الأسرية للعائلات والأفراد المحتاجين خاصة فيما يتعلق بفصل الشتاء من كسوة تشمل الملابس الشتوية والأغطية وكل ما من شانه أتقاء البرد القارص.
ومن هنا، جاءت مبادرة “دفيء غيرك” والتي إنطلقت فعلياً في العاشرة صباح الأمس (السبت) من مباني إذاعة هلا 96 أف أم من خلال برنامج (ساعة مع جبرا) الذي اتشرف بتقديمه وهي مبادرة تهدف إلى جمع الملابس والاغطية من المتبرعين وتوزيعها لمن يستحقها من الفقراء والمعدمين .

لا أذيعكم سرا أن قلت لكم أن المبادرة كانت نوعاً من (الهاشمية) التي أملتها علينا الظروف الصعبة التى نشاهدها تواجه بعض الأسر والأفراد وإفتقارهم وإفتقادهم للملابس والأغطية التي تقيهم شر البرد ، هذه الهاشمية التي جعلت العبدلله يدخل في الموضوع دون أن يكون لديه تصور لعملية الجمع (مش كده وبس) وعملية ما بعد الجمع كمان .
ولأن عمل الخير (ربنا بيتمو) كما يقولون فما أن قمت بفتح بريدي الأليكتروني في اليوم التالي للإعلان عن المبادرة (وراسي ضارب) حتى وجدت رسالة أنيقة كريمة من الأخ الدكتور / مبارك عبده صالح المدير العام للشركة السودانية لخدمات البريد (سودابوست) يعلن لي عن وقوفه شخصياً ووقوف الشركة دعماً ومساندة للمشروع مجاناً (لا خمسة لا عشرة) وعلى الفور إتصلت به ضارباً موعداً للمفاكرة في الأمر وبالفعل قمت بزيارة الشركة ومقابلة الأخ الدكتور مبارك الذي وجدته قد أعد العدة لإجتماع طارئ داعياً له جميع أركان حربه من رؤساء الإدارات المختلفة بالشركة .
وقد كانت خلاصة الإجتماع تأكيد الشركة ممثلة في مديرها العام بأنها لن تتخلي عن مسؤوليتها الإجتماعية وأنها سوف تدعم المبادرة وتوفر لها كل سبل النجاح والدعم اللوجستي المتمثل في الوصول للمتبرعين في أماكنهم حيث أن للشركة السودانية لخدمات البريد (سودابوست) قرابة الأربعين مكتباً موزعين في العاصمة المثلثة وتمتلك أسطولاً من العربات و(المواتر) يمكنها من الوصول إلى المتبرعين في كافة أحياء العاصمة.
وهنا (تنفس العبدلله الصعداء) فمسألة الوصول إلى المتبرعين كانت تمثل له (بعبعاً) من شأنه أن (إفشال) المبادرة وجعلها ضعيفة لا وزن لها عملياً ..
طيب الفرز والغسيل و(التكييس) يا ود يا جبرا؟ ؟ لم يدم تفكيري كثيراً إذ إتصل بي (ولدنا) محمد عبدالله (القدم ) من مجموعة مبادرة (فضي دولابك) عارضاً تولي شباب المجموعة لمسألة الفرز والغسيل والتكييس (وكمان إستقبال المتبرعين) ! شفتو البلد دي كيف؟
وبالأمس ومن داخل إستديوهات إذاعة هلا أف أم 96 التي يقف على رأس إدارتها أخونا (الحبوب) الاستاذ ياسر أبوشمال وبحضور كل من الأخ الأستاذ (منتصر) مدير التسويق بالشركة السودانية للخدمات البريدية
والأخ الأستاذ (مبارك) مدير القطاع الحالي والأخت الاستاذة (آمال) مدير القطاع الأسبق وأيضاً حضور الإبن الاستاذ (محمد عبدالله) من جماعة (فضي دولابك) بحضور هذه الكوكبة تم إلإعلان عن إنطلاق المبادرة والتي تستمر لمدة أسبوع .
عزيزي المواطن … عزيزتي المواطنة أفتح خزانة ملابسك ، وأبحث عن الاشياء القديمة ، التي صغرت عليك (كبرتا عليها) ، أو على الاشياء التي لم تعد تلبسها .. على الأغطية والبطاطين .. الفنايل .. السيوترات .. البالطوهات .. ضعها في أكياس وإتصل بأقرب مكتب بريد (سودابوست) وسوف تأتي إليك العربة (في محلك) وتستلمهم منك علماً بأن مواعيد العمل بهذه المكاتب من الثامنة صباحاً وحتى الرابعة عصرا والمكاتب هي :
الخرطوم
1 بريد الخرطوم شارع الجامعة 0123488814
2 بريد السجانة سوق السجانة 0111687199
3 بريد العمارات شرق محلية الخرطوم 0123488893
4 بريد الستين الرياض شارع الستين قبالة قسم شركة الرياض 0123488802

أمدرمان
1 بريد امدرمان سوق امدرمان ميدان البوسطة 0123488853
2 بريد السوق الشعبي السوق الشعبي امدرمان جوار القسم والحكمة 0123488820
3 بريد العباسية بمباني ميدان الربيع 0123366218

بحري
1 بريد بحري جوار محطة البوسطة تقاطع المزاد 0123366022
2 بريد الحاج يوسف شارع (1) محطة البيارة 0123366214

أو أتصل علي شباب مبادرة (فضي دولابك) على الأرقام التالية
‫ 0111094411 – 0912821330 – 0914905058 – 0901188478 – 0922631310
الشباب ح يكونو في إنتظاركم من الساعة 11 صباحا وحتي السابعة مساء ،، وبي مناسبة (الشباب) دي العبدلله يناشد كل الشباب الإنخراط في مبادرة (فضي دولابك) الفوق دي عشان يساهموا ويساعدو أخوانهم في فرز وغسل وتكييس الملابس والأغطية حتى تكون جاهزة للتوزيع وربنا يجعل هذا العمل في ميزان حسنات الجميع إنه سميع عليم ، اللهم ابسط دفء رحمتك على من لا ملجأ له ولا مأوى، وهوّن عليهم شدة الشتاء فاحفظهم بأمنك وأمانك يا الله يا أرحم الراحمين ..

كسرة :
بعد ده بس أعمال طوعية لخدمة المجتمع … الكلام بقي ما عندو فايده … والقصة ذاااتا بقت طويلة ومسيخة … (ههههههه) !
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

Advertisements

28 تعليق

  1. ربنا يقويكم

    1. ود الحكووووومة | رد

      اللهم آمييييييييين

  2. جزاكم الله خيرا ووفقكم لخدمت المحتاجين
    كسرة :
    البلد بقت مبادرات طوعية والحيكومة ضاربة الطناش …
    كسرة تانية :
    اللهم فك اسر البلاد والعباد من هذه الحيكومة

  3. مبروووك صديق ومعليش ود الحكومة – الله يكفينا شرها !! وجزاكم الله خير يا بروف .. سلاااام ..

  4. بعد ده ما فضل إلا نشوف حكومة طوعية تدير البلد والحكومة الحالية ينووووموا في بيوتهم ويجوا آخر الشهر يقبضوا الراتب والحوافز ويرجعوا تاااني ينوموا لحدي الراتب الجاي ( يعني زي نظام السعوده العندنا ده )
    بس اهم شئ الحكومة الطوعية دي لما تجي تفتتح حاجه يعني كبري مثلا او شارع طوله مترين تلاتة او يافطة قف ينادوا ناس الحكومة النايمين شان يجوا يتصوروا ويكبّروا بالكضب ..
    علي الطلاق اللقتا الحكومة دي مافي أي حكومة في الكون لقتا قاعدة سااااااكت وأي حاجه الناس تسويها ليها .. هسي يجي واحد منهم يقول ده بسبب الروح الدينية البثيناها في الشعب ..

    1. والله كلامك صحي يا جنوبي !!
      امبارح القرييييييبة دي محمد الطيب الفنقلو قال ( أجزنا قانون الشركات وغيره ولكن نجهل ما في بنوده تماما، ولم نفهم شئ ولكن أجزناه ثقة في العلماء الذين وضعوه) أها شوف زي ناس الفنقلو ده وباقي المتفنقلين ديل نرجا منهم شنو؟؟؟ ومع المضره البعملو فيها كمان بياخدو رواتب !!!
      إييييييييييه غايتو الشكوى لله !

      1. هو اصلا اسمه الفنقلو يعني ؟!!
        وده جاهو من إيه ؟ لاااا حول ولا قوة الا بالله !!

      2. الفنقِلو اب حكاََ حِلو ؟

  5. دكتور .. اقترح عليك ان تتواصل مع شركة مواصلات العاصمة كماعون تجميع متحرك للتبرعات و يسلم ماتم تجميعه فى رحلة البص لمندوب فى محطة الوصول الاخيرة وبذلك لا يتاثرالمتبرع باستقطاع زمن من وقت معيشته وسموها حملة ( فى طريقك دفئ محروم مدينتك و فريقك) ..

    1. لا حولااااا يا الديامي ! شركة المواصلات ياتا !؟ الكان عندهم بص بقول تِش داك ؟

      1. آاااااي شركة أبو رجيلة الزماااان ديك البصها كان بقول “تش” يا جنوبي !! هو إنتو (الديامي) دا من أهل الكهف ؟؟

      2. المهم الفكرة وصلت

      3. المسالة مجرد راى وحنين للزمن السمح..وصلت الفكرة

    2. زمن الكمسارى ببرنيطة لافى نشال ولامرا بتقيف شماعة ولاسوق مواسير ولازول حارسلوا بضاعة وصفارة القطر كانت هى الساعة ..

    3. والله بارك الله فى ناس البريد.. والخوف يجوك ناس المحلية بإيصالاتهم.. ويطلعوا ليك ببند رسوم حملة هدوم المحروم ..

  6. هو زااااتو المتفنقل ليها شنووووووو ؟؟ – حسبي الله عليهم كوووولهم – ، وهاكم دي مصيبة جديدة تهدد الشعب الفضل وأطفالهم !! :

    سمعتوا بي حكاية (اللبن/الحليب) القاتل البيجيبوهو في البكاسي بي براميل بلاستيك وخاتيين فوقو (مضادات حيوية ومادة فورملين) ، شان ما يبوظ وينباع في الدكاكين ؟ معروف إنو الفورملين مادة بحنطوا بيها الجثث عشان تقعد أطول فترة ممكنة!! يعععع .. سلااااام ..

    1. أبو أحمد !
      معقول يا دووووووب سمعت بالكلام ده ؟؟!!
      الكلام ده من زماااااان فورمالين وبنسلين وكل الحاجات الحلوة دي فاتتك ؟؟
      غايتو انا شربتو كتييييير وكان طاااااعم
      تحياتي لك يا غالي……….

      1. وإنت بعدما شربتو لسة عااائش ؟؟ دا قبضوهوا ناس (حماية المستهلك) أمبارح !!! إنا لله وإنا إليه راجعون .. سللاااام ..

      2. والله شربتو كتيييير من خمسة سنين وما عمل لي أيتًها حاجة
        غذاء ودواء ههههههههههه

      3. والله انا لو عندي سلطة اي زول يغش في حاجه بتاعت اطفال ان شاء الله لعبة
        والله اعدمه

      4. أنت كدا 100% يا ريت لو كل الشعب الفضل زيك !!

      5. زمااااااان ونحنا صبيان في الخلا البين العرضه وامبده محل الحي الهسي اسمه الدوحه ده كان في عرب قاعدين بالبقر حقنهم شرق وغرب خور ابو عنجه وكان اهلنا برسلونا العصُر نجيب منهم اللبن , يدونا البستلة وانت مارق تطلع بي كتفة الباب وتصل راس الحمام تدلي القلوبية وتشيلا معاك وتمش من العصر تشرك جم العرب للطير وقرييييب المغرب العرب يحلبوا البقر . واللبن من جردل الحلب يكبوا في التٌمنه بعد يخطوا قطعة شاش في خشم التمنة شان تصفي اللبن ونرجع البيت الواحد شايل البستلة وكم ود ابرق ولا عشوشه يا قمرية يا قدالي او ام قيردون او قرانصيل ( انتو القرانصيل داك ما ياهو السمان ؟ )
        والعرب كان كل همهم من بيع اللبن عشان يشتري ليهو لوري قصب او كم شوال امباز شان يأأكل بقروا ( والله الامباز كان حلو خلاص ) يعني اللبن عندهم ما غاية تجارية , لكن من ما المتعلمين دخلوا في تجارة اللبن دخل معاهم الغش و البنسلين والفورملين
        والله يا الديامي فعلا كان زمن سمح ..

      6. إييييييك يا جنوبي إنت من زمن “القلوبية وود أبرق وعشة وام قيردون وقرانصيل” !! طبعاًَ الكلام دا لأولاد الزمن دا زي الـChinese ما بعرفوهو (تببب) وأمكن تبب دي زااتها ما يعرفوها .!!. وكمان كنت بتأكل الأمباز ؟؟ أتاريك بطيني تضايق البقر في أكلهم هههههههه آاااه ياحليل أيام زماااان أيام الزمن الجميل رجعتني دهوور لي ورا … سلااااام …

    2. من فلقوا فوق راسا..

  7. والله بارك الله فى ناس البريد.. والخوف يجوك ناس المحلية بإيصالاتهم.. ويطلعوا ليك ببند رسوم حملة هدوم المحروم ..

  8. احمد ابو عبد الرحمن | رد

    يا اخونا الفاتح ، ربنا يتقبل من الجميع ، طيب المغتربين في الرياض (السعودية) لو عاوزين يشاركوا في اي طريقة سريعة

  9. الأخ أبو ناجى .. ربنا يجعل عملكم ومجهوداتك وجهود العاملين فى المشروع الخيرى دا فى ميزان حسناتكم إن شاء الله ..
    ونحنا من محلنا دا جاهزين لى مساعدة أو فزعة ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: