أحلام إيزي

عدت إلى البيت بعد يوم عمل مرهق وما أن فنحت الباب حتي إستقبلتني كعادتها بشوق وترحاب إلا انها هذه المرة قد (زودتها حبتين) إذ انها اخذت تنطط وتأتي بحركات بهلوانية توحي بانها في غاية الإنبساط و (الفرفشة) ، أمسكت بها وهي تحرك ذيلها في تناغم يمنة ويسرى
وواجهتها بسؤال لم تضع له حسابا :

– هسه إنتي البفرحك شنو .. شايفه ليك زول واحد في البلد دي فرحان ؟
– (وهي تضع يدها على خدها) : مش عملوا لينا قانون وكمان أجازوهو
– قانون شنووو .. والله ياهو ده الفضل
– يا أستاااذ ده إسمو قانون (الرفق بالحيوانات) .. اللي هم ديل نحنا !!
وبعد أن توقفت عن الفرح والإنبساطة إعتدلت أيزي (وهذا إسمها) وأخبرتني بأن (برلماننا) الموقر قد صادق على قانون رفاه الحيوان لسنة 2015م، بعد أن قام بنعديا اسم القانون إلى (الرفق بالحيوان) وأن القانون قد قضى بإنزال عقوبات تصل إلى السجن 5 سنوات والغرامة المالية ومصادرة الحيوان على منتهكي حقوقه كما أن القانون قد وضع (5) حريات كفلها للحيوان تتمثل في الحرية ضد العطش، والجوع، والخوف وعدم تعريضه لمؤثرات فيزيائية تؤثر عليه وإتاحة حرية التعبير للحيوان عن سلوكه الحيواني ..
– هسه ده الشئ الخلاكي تننططي يعني ؟
– أكيد تاني أخواني الحيوانات ديل كوووولهم ح يكونو في مأمن من الإنتهاكات !
– أول مرة أعرف إنك كلبه (غبيانه) مع إنو جدودك (خواجات) .. في بلد عربي ما فيهو إنتهاكات ؟
– والله أنا لاغبيانه لا حاجه أها شوف كمان أدونا الحرية ضد العطش
– عطش مين يا أيزي كدي أمشي بس (غرب الحارات) القريبة دي ح تلاقي البشر (المواطنين) ذاااتم عطشانين
– وكمان الحرية ضد الجوع !
هنا لم أتمالك نفسي فضحكت حتى بانت نواجذي فقلت لها :
– الظاهر يا أيزي إنتي ما جايبه خبر ساااكت .. وقافلة القزاز ومشغلة الفريون
– كيف ؟
– ضد الجوع بتاع مين يا أيزي .. العاصمة دي بس فيها كم ألف تلميذ جعانين وما قاعدين يفطرو !
– طيب عندك كلام في إنو القانون كمان عمل لينا حصانة ضد الخوف؟
– ههههه … والله (فعلن) إنتي ما جايبه خبر .. ده نص الشعب الفضل خايف وقلبو مقطوع … الخايف من الحرب والخايف من بكرة والخايف يمرض ليهو زول وما يلاقي حق العلاج والخايف يفصلو أولادو عشان أقساط الكلية ده غير الخايف من (المرا) عشان عايز يدبل وبالمناسبة يا أيزي ديل من النص (التاني) !
– والماده الرابعة بتقول ما يتم تعريضنا لمؤثرات فيزيائية !
– (في إستغراش) : مؤثرات فيزيائية؟ إنتو كمان يا أيزي قاعدين يستجوبوكم ؟
– لا .. لا ما كهرباء .. وللا تلج .. بيقصدو مثلا ما يشيلونا حمولة أكتر من طاقتنا مثلاً !!
– أكتر من الحموله يعني الشايلنها نحنا دي ؟ الواحد يكون مرتبو ألف جنيه ومأجر بي ألف وميتين وعندو ستة شفع في المدارس غير المرا ؟
– أها يا أستاذ المادة الخامسة بتقول إنو أدونا حرية التعبير رايك شنوووو؟
– ههههههههه .. ده كلام جرايد … كدي أطلعي ليكي مظاهرة !!

كسرة :
لا داعي لسن أي قوانين (جديده) ما دام القوانين (الموجودة) لا يعمل بها وللا مش كده ؟

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

8 تعليقات

    1. واحد .. والله واحد … مبروك ياود بوتن

    2. واحد صوط في نص راسك الغليد ده ..

  1. يابروف إن شاء الله أجازوا ليهم حق الحريات الأربعة مع مصر كمان ( مش هما برضو حيوانات سودانية من حقهم التواصل مع إخوتهم في شمال الوادي )

  2. انا ليتني كلبٌ جنسيتي سووووداااني أناااا
    انا ليتني هِرٌ او حتي حييييمااارِ اناااا
    يحلو تلاقيناااا من غيرِ افكاااري
    ويرف ذيلي شكرا ل برلماااني اناااا
    احيييييييييييا صحي الدم بحِن وعمر الضُفر ما يطلع من اللحم ..
    بكره يا إيزي يجوا اهلنا كمان ويخشوا البرلمان ويعملوا لينا قانون الرفق بالانسان ورفاه الانسان كمان ونعيش في سلام وامان ونخلف بنات وصبيان ..

    1. ههههههههههههههههههه ,, دى شكلها اتكتبت فى لحظة استثنائية !
      نقلنا ونشرنا يا حبيب ….

  3. عليكم الله الدين دا خلى لينا عشان ننظر فيهو ا كل الحجج موجودة فى طياته .. والحشاش يملا شبكته

  4. الحبان .. إزيكم ربي يطيب خاطركم …

    الناس ديل ليه مصرين يفقعوا المزيد من أعضاءنا الداخلية ؟؟

    يعني بلد بطلع فيها مرضى الفشل الكلوي المعسرين مظاهرة يطالبوا فيها بمحاليل لغسل كلاهم
    وطلاب مدارسها ما قادرين يستوعبوا الدروس لأنهم جائعين،
    بل ينتحر فيها الأطفال من إملاق كانوا لا يخشونه

    يقوم برلمانا يأجل دا كووووووولو … ويعمل فيها داير يبقى نصير للحيوان المضطهد من قبل بني آدم؟
    ويديهو حرية التعبير عن شعورو ؟؟

    الكلام دا بحصل بعد ما خلااااااس الحكومة تحل مشاكل الشعب كلو … بعدين تشوف الحيوانات والجمادات حتى !!!

    عليكم الله الناس ديل أهلنا ؟؟؟ زي ما قالت الأغنية البقت شهيرة:

    أنا دي؟

    بري بري بري بري !!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: