ما فيها لعب

لن ينسي العبدلله أنه كان قاب قوسين أو ادني للبقاء في السجن حبيساً إلى حين السداد لولا لطف الله ، والحكاية بدات حينما حينما قررت طباعة أول كتاب لي بعد أن (طمم بطني) أحد الناشرين (الطماعين) الذي اخبرني بانه إذا قام بتولي طباعة ألف نسخة من الكتاب فسوف تكون حصيلتي هي مائة نسخة فقط من الكتاب ، حينها قلت لنفسي الأمارة بالسوء (سجن سجن غرامة غرامة) وتوكلت على الحي الذي لا يموت وقررت أخذ مرابحة بمبلغ عشر ملايين (بالقديم طبعن) من أحد البنوك لطباعة الكتاب.

عليى الرغم من ضآالة المبلغ (بالنسبة للبنك طبعن) إلا ان القصة لم تكن ساهلة على الإطلاق ، شهادة مرتب من الجهة التي اعمل بها ، وخطاب يوضح إلتزامها بدفع المبلغ إذا (لا قدر الله) لم اتوفق في الدفع ، ثم ضامن شخصي يقوم بتحرير شيك (على بياض) ، وشهادة سكن ، وصورة من البطاقة الشخصية (سارية المفعول) وأشياء اخري كثيرة لا أتذكرها الآن (الزهايمر وكده) .. المهم بعد (جرجرة) طويلة تم تسليم الشيك للمطبعة ، ولان العبد لله جديد في حكاية (طباعة كتاب) دي فقد طلب من أحد أصدقائه وهو يمتلك عربة (أمجاد) أن يقوم بتوزيع الكتاب على الأكشاك والمكتبات وقد كان ، وبعد إسبوعبن تلاته طلبت منه طلبت منه أن (يلف) على الأكشاك والمكتبات لجمع حصيلة البيع وقد كانت المفاجأة أن عاد لي وهو خال الوفاض
– الكتب ما إتباعت وللا شنو؟
– من ناحية إتباعت فهي إتباعت
– طيب القروش وينا؟
– والله يا أستاذ أي زول امشي ليهو يقول ليا القروش (دخلت عليا)
وعلي الرغم من عدم البيع إلا انني كنت حريصاً على دفع الأقساط حيث اعلنت حالة تخفيض الإنفاق المنزلي والدخول في حالة تقشف غير انني بعد الإستمرار في هذا البرنام التقشفي (كم شهر) لم أستطع الإيفاء بدفع الأقساط وأصبحت من المتعثرين وكان المبلغ المتعثر فيه هو (ثلاثة مليون) !
وبدأت مطالبات (البنك) ، والتلفونات (اليومية) أن يا أستاذ تعال سدد … يا استاذ أديناك مهلة ما بطالة … يا أستاذ والله ما عاوزين نرفع الموضوع (للشؤون القانونية) .. ولما كثرت (التلفونات) قرر العبد لله أن يقوم بمقابلة (مدير البنك) ليشرح له الموضوع طالباً مهلة أخري للتسديد ولكن السيد المدير (العام) بعد أن إستمع لي جيداً أخبرني بأن (بنك السودان) لديه منشور صارم في مسالة (التعثر) دي وإنو دي اموال مساهمين (ما فيها لعب ) .. !!
طيب تعالو نشوف اللعب :
يقول الخبر … تتكتم دوائر الجهاز المصرفي على أضخم عملية إحتيال في الآونة الأخيرة حيث حصل احد التجار وهو صاحب مصنع (للسيخ) على قرض يعادل (50 مليون دولار) وفيما بعد إتضح بأن الضمانات العقارية التي منح بموجبها القرض كانت (مزورة) بالكامل كما أنها لا تغطي قيمة القرض موضع التصديق ، وكان التاجر قد رهن مخازن إدعى ملكيته لها إضافة إلى مواقع أخرى تمت معاينتها من قبل موظفي ثلاث بنوك معروفه وإعتمادها رسمياً ثم تصاعدت أزمة الرهن (المضروب) عندما شرعت البنوك المذكورة في إسترداد أموالها بعد عجز (التاجر) عن السداد وأعلنت عرض المخازن المذكورة للبيع في مزاد علني بعد أن حجزت عليها قوة من الأجهزة الأمنية والشرطة تمهيداً لبيعها لكن كانت المفاجأة … إن أحد الشخصيات الإقتصادية المعروفة قد قام بإبراز مستندات موثقة تثبت ملكيته للمخازن الشئ الذي دفع السلطات المختصة لإلغاء المزاد وإتخاذ إجراءآت صارمة حبست بموجبها مديري البنوك المعنية حيث تم إطلاق سراحهم بالضمان .. بقى أن تعلم أن (التاجر) الذي (لهط) الخمسين مليون دولار قد هرب إلى خارج البلاد !!
كسرة :
نحنا في تلاته ألف جنيه يقولو لينا : دي اموال مساهمين (ما فيها لعب ) هههههه !!
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

25 تعليق

    1. اسرح وامرح يا ود بوتن ما فارق الزمن وكده

    2. هههههه جابت ليه إنجليزي كمان !!!! أيامك والله ياود بوتن …

      1. فعلا يا ود أونكل سام،، خصوصا فى الشرق الاوربى دة،، برد و صقيع على كيف كيفك … عشان كدة ما ينفعنا الا البرنجية و (حاجات تانية مانعانى) !!

      2. الكومندان،، الملعب لمن يكون فاضى مش تكتب انجليزى بس،، دى تقلب فيها (باكوورد) عدييييل كدة !!
        و برضو فرق الزمن و كدة !!!

    3. برنجية ؟!!! دي بقولوا فوقا وووب عليييييا

  1. اخخخخخ يا بلد منكوبة , نكبوكى بنوكى ,, وقشطوا البنوكى ,,,

    1. اخخخخخ لو كنت لعبت في نكبوكي دي شوووووية !! كان اصبت المعني .

      1. ههههههههههههههههههههههه , امشى يا منحرف ,,,
        قدرك انا ولا قدرك ؟؟

  2. تب مافي لعب عفيت منك ..

  3. لحدي هنا انت ما قصرت يا بروف وبعد ده خلي لينا باقي الشمشرة الدُقااااقه
    حسب ما جانا في الواتس اب ( والواتس اب اصدق انباءً من الكُتبِ احيانا ) يقال ان الشخصية الجازفت قروش القرض هو شقيق جلال الدقير وهو نائب رئيس نادي المريخ عثمان الدقير والشخصية الاقتصادية المعروفة الاثبتت انو المخازن حقتا هو جمال الوالي رئيس نادي المريخ
    يلا بعد كده اتخيلوا حجم اللعبة دي قدر كيف !!
    وقالوا جمال الوالي رافع قضايا تعويض علي البنوك الحجزت علي مخازنه بحجة انو اثرت في سمعته في السوق وتسببت في خسائر فادحه ..
    يعني بقت علي البنوك هناي وشرط هناي ( شان نانو ما يزعل )

    1. عاد يا جنوبي اصلو ما بسألك !!!!!! وحالتك عاوزو ما يزعل ؟
      أها
      الموضوع ده ليهو اكتر من إسبوع تماااااااام
      والبروف بعد ما جابا لينا هنا معناتو الكلام ده صحيح
      إذن الله يقدرنا على النشر وهااااك يا نشر
      وشير في الخير

      1. شير شير يا بشير
        قت لي الفلسطينية قالت الرسول حلّما وقال ليها شنو ؟!!! ههههههههههههه يجازي محنك يا الفلسطينية !

      2. حكاية رؤية الفلسطنية دي فبركة (مؤتمر وطني) عشان الإنتخابات قربت الله لا وفقم !! والرقم الخاتنو في الواتس دا بتاع واحد سوري مقيم بجدة قال لي بالحرف الواحد : ( دي قرصنة ) لا أنا بعرف واحدة فلسطينية ولا سمعت عنها .. وجاتني إتصالات كتيرة من سودانيين بيسألوا عن الرؤية !!!! كمان النصب حصل أرقام الناس المساكين ؟؟؟ … سلاااام …

  4. مبروووكة البرنجية يا ود بوتن وسيبك من أمريكي والكومندان والجنوبي !! ديل حاسدنك عدييييل كده !! أخسرك منهم .. وأنت يا جنوبي أنا ما بزعل البزعلني شنو ؟؟ بس قاعد ليييك موجه زي (مقص الرقيب زمااان) أيام كان في رقابة !! حليل الحشمة والأدب والأخلاق .. وأهو بي كلامك زي العلقتا بيهو على ود شمباتي دا طيرت بناتي من القمردينة ( حياءاً وخجلاً ) من جنس دا !! إنتو صحي وين بتنا نونا وبت السودان ، والمهندسة بتاعة الطيران ؟؟ إختفن مررررة واااحدة !! أظهرن وبانن عليكن الأمان ، وجنوبي دا أنا بقدر عليهو .. أما حكاية اللهط القروش “وفص ملح وداب” ما حقو يغطوا عليهو مفروووض يفضحوهو في كل مكان وزمان ويشهروا بيهو لأنو ديل صنف يخاف (مش من الله) ما يستحي !! ومن أمن العقاب أساء الأدب .. وزي ما قال جنوبي البركة في الواتس ..
    ويا خبر بفلوس زمان كانت: (بكرة) ، وهسا بقت: (بعد ثواني) يبقى ببلاش بالواتس وجنس ديل هم الغطسوا حجر البلد .. سلاااام ..

  5. الله لا كسبم ولا ربحم أشوف فيهم يوم أسود ….

    1. اللهم آمييييييييييييين يا أبو أحمد
      وكتّر لينا من جنس دا !

  6. من داخل البرلمان :
    بعد أن اصّر و ألحّ عضو البرلمان الموقر السيئ / محمد علي قناوي في أن يُعطي الفرصة في الكلام مُنح فرصته , فوقف وعدّل من هيئته وتأكد من ان المكرفون يعمل بصورة جيدة وذلك بنقره بسبابته مرة واثنتان وثلاث , حمم لتسليك صوته وقال : قال تعالي ” إن الناس علي دين ملوكهم ” ومن نعمة الله وحفظه للزكر عاجله نفرٌ من صحبه قبل ان يقول صدق الله العظيم بأن القرآن برئ من ما زعم انها آية قرآنية ..
    طبعا سبب نجره لهذه الآية هو انو كان داير يمدح الوالي عبد الرحمن الخضر ويمدح البشير بي حجر واحد .
    ايييييييه يا حلاوة يا حلاوة يا وله يا قناوي .. إيه الحلاوة ديا ايه العظمة ديا ..
    وفي جلسة اخري زكر السيئ / عضو البرلمان ( غير السيئ قناوي ) ان هناك نفرٌ من الشعب يتعامل بالربا والميسر داخل مواقف المواصلات وعلي مرأي ومسمع من الناس والسلطات ألا وهم تجار الفكة ( الناس البتفك القروش للكماسره ) وزكر انهم يصرفون الجنيه الواحد بتسعين قرشا وهذا هو الربا بعينه ( هههههه يجازي محنك يا السيئ البرلماني ) حُقه تشوف ! قندراني ما تشوف !!؟
    ولمن لا يعرف قصة الحُقه والقندراني قالوا مره حصلت سرقة كبيرة في ميناء بورسودان واتشالت بضاعة بالشاحنات وطلعت من الميناء وبعدها حرس الميناء شدد المراقبه ويوم ادروب شغال عتالي في الميناء وجاي طالع من البوابة العسكري ناداهو وقال ليهو ده شنو الفي جيبك ده ؟ ادروب طلع ليهو حقة التمباك ورفعا ليهو وقال : قندراي ما تشوف حقه تشوف !!؟

    1. (الهقة تشيف القندراني ما تشييييف) !!! هههههههه الله يجازي محنك يا جنوبي !! هو السئ / قناوي دا ما قرأ خلووووة ولا شنو ؟؟؟ هذا زمانك يا مهازل فأمرحي *** قد عد كلي الصيد في الفرسان ، رحم الله المحجوب وأحسن إليه .. سلاااام ..

      1. كلب الصيد زاتو فيهو فايدة يا نانو , ديل زي كلاب الجزُر
        من هسي مفروض الحكومة تستعد لقبول النواب الجدد وتتعامل معاهم زي الطلبة البمشوا يدرسوا في الخارج يعني النائب قبل ما يخش البرلمان يودوهو يدرس ستة شهور في همشكوريب .

      2. دا كلام صاااااح يا جنوبي إنت 100% ، أيوه خليهم يدخلوا الخلوة من أول وجديد عشان يتعلموا القرآن وكمان أساسيات اللغة العربية (أبجد هوز حطي كلمن سعفص قرشت ثخذ صظغ) !! وأنا متأكد إنو 99% من أولاد الزمن دا ما بعرفعوا الكلام الكتبتو بين قوسين دا ؟؟ حايقولوا دا كلام صيني ولا شنو؟؟ والغرض من الدراسة عشان تاني ما يطلع لينا واحد يقول ” قال الله ” ويجيب ليك كلام من عندو ، ولا حاجة يكون قالا واحد من كلاب الحر بتاعنهم !!! …ههههههههه … سلااااام …

  7. اها ال 3000 سويت فيها شنو؟

  8. سيدة سودانية تشتري سبيبة من شعر رسول الله (صل الله عليه وسلم) في مزاد بدبي بمبلغ 50 مليون دولار !؟
    اولا : إيه اليؤكد انو السبيبة دي فعلا من شعر رسول الله صل الله عليه وسلم ؟
    ثانيا : ايه الانفع للمسلمين : انفاق المبلغ علي الفقراء والمساكين ام شراء السبيبه ووضعها في المنزل ؟
    قصة عباءة رسول الله صل الله عليه وسلم التي امر السيدة عائشة رضي الله عنها بان تهبها للسائل الفقير الجائع الذي طرق باب رسول الله بعد ان لم تجد شيئا في بيت الرسول لتهبه للسائل , اخذها السائل ولم يحتفظ بها لأنها عباءة رسول الله وباعها لأنه يحتاج للمال لأكله واكل اولاده وعرضها في السوق وتهافت الناس لشرائها وامر ذلك التاجر الاعمي عبده ان يأتيه بها مهما بلغ ثمنها فأتي العبد بالعباءة لسيده فوضعها علي عينيه وسأل الله ان يبصر , فأبصر واعتق عبده وذهب بالعباءة ليهديها الي رسول الله , فرح رسول الله لا لعودة العباءة اليه ولكن لأنها ( اغنت فقيرا وشفت مريضا واعتقت عبدا ).
    القنوات السودانية كووولها تمارس التسول علي الهواء وتعرض حالات تدمي لها الاعين محتاجه للمساعدة / بنك الثواب / في ميزان حسناتك / افتح دولابك / فضي دولابك / دفئ غيرك / و .. و.. برامج لا حصر لها تطلب مد يد العون
    وال 50 مليون دولار تساوي 450 مليار تقريبا فكم كانت ستغني فقير وتشفي مريض وتعتق عبدا وما اكثر العبيد اليوم لا بالمفهوم القديم ولكن كم مسلم مدان في مبلغ وهو تحت رحمة صاحب الدين لحين السداد ..
    اعوذ بالله .. ( كما يقول شبونة )

    1. جاءني الرد التالي من اح اقدره واحترمه ..
      الشيخة … كانت وما زالت تخدم السنة النبوية بمنزلها في الامارات , وتقوم بتدريس السيرة والاحاديث النبوية للمواطنات والمقيمات بالامارات ..
      وقد منحها لها ( هدية ) الشيخ محمد بن احمد الخزرجي الانصاري في احتفال حضره جمع غفير من علماء المسلمين من شتي بقاع العالم .. وقد ورثها الشيخ محمد الخزرجي كابرا عن كابر أبا عن جد حتي يصل التسلسل لرسول الله صل الله عليه وسلم , والذي كان قد منحها ل أنصار ( الخزرج ) في صلح الحديبية بعدما حلق رأسه .. وهذا الخبر قديم من 3 سنوات وموجود علي اليوتيوب مذ اعداد الخصلة لمنحها لها حتي وصولها لقريتها بالشمالية ..

  9. ظالمني شوف من كم سنة (89) ربع قرن | رد

    إذا تعثر الضعيف اقاموا عليه الحد
    وإذا أخذها واحد من بني كوزتركوه
    مليارات ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: