الكهرباء ودس المحافير

تخيل مجرد خيال ان لديك مصنعاً أو منشأة ينتج عن تشغيله يومياً أطناناً من النفايات الضارة التي تؤثر على البيئة تأثيراً قاتلا ليست البئة القريبة بل حتي التي تبعد كيلومترات عن موقعها … تخيل مجرد خيال أن يأتي إليك أحد الأشخاص ويسالك ان تمنحه هذه النفايات ويخلصك منها بل يخبرك بانه قد توصل إلى إختراع يقوم بتحويلها إلى شئ مفيد للإنسان وللبلاد عموماً ماذا سوف يكون ردك؟
نقيف هنا ونحكي الحكاية :

توصل المواطن مكي هاشم عبدالرحيم مدير عام شركة أم در ميستو للتشييد والطرق والجسور من إستحداث طريقة لمعالجة رماد الفحم البترولي المتطاير وتحويله إلى طوب وبلوكات وإنترلوك وقد تم تسجيل الإختراع بوثيقة براءة تحمل الرقم 1937/ 2014 .
وقد تم فحص عينات من هذه المنتجات من قبل كل من الإدارة العامة للبيئة والسلامة بوزارة النفط وقامت بإستصدار الشهادة بالرقم ون/م س ن/ أ ب س/71/1 بتاريخ 9/2/2012م كما تم فحصه أيضاً بواسطة معهد السلامة الإشعاعية بهيئة الطاقة الذرية التابع لوزارة للعلوم والتكنولوجياً وجاءت النتيجة بموجب الشهادة رقم SAEC/B/2012L04 بتاريخ 10/04/2012م والتي جاْ فيها بأن العينة لا تحتوي على إشعاع إصطناعي وتحتوي على مستويات طبيغية من الإشعاع الطبيعى ، لم يكتف المواطن مكي هاشم عبدالرحيم بذلك بل قام بأخذ عينات من الطوب والبلوكات المصنعة من الرماد المتطاير وتوجه بها إلى معهد بحوث البناء والطرق وقد أثبتت كل التجارب التي أخضعت لها العينات من قوة تحمل وغيره صلاحيتها للبناء والتشييد .
سعد المواطن مكي هاشم عبدالرحيم ايما سعادة لأنه بإختراعه هذا سوف سوف يقوم بتخليص محطات الكهرباء الحرارية من أطنان يومية من الرماد المتطاير الذي تخلفه عمليات إنتاج الكهرباء .
قام المواطن مكي هاشم عبدالرحيم بمخاطبة السيد/ المهندس الصادق محمد على وزير الدولة بوزارة الكهرباء والسدود بالخطاب رقم أ م ت/ط ج/10/2012 بتاريخ 26/2/2012عارضاً على الوزارة معالجة مشكلة الرماد المتطاير بمحطة قري الحرارية وتشمل المعالجة كميات الرماد المخزنة بالمكب او تلك التي تنتج يومياً .
قام السيد الوزير مشكوراً بتوجيه المسؤولين بمحطة قري الحرارية بعمل عقد مع المواطن مكي هاشم عبدالرحيم يلزم محطة قري الحرارية بمنح شركة أمدر ميستو 800 متر مربع داخل المحطة وإمدادها بالمياه والكهرباء مع إلتزام الشركة بتخليص المحطة من كميات الرما المتطاير المخزن والمنتج وتوفير كل الالات والمعدات الكافية .
أيه الحصل؟
تمت صياغة العقد ولم يتبق إلا التوقيع عليه لكن هنالك جهة ما أرادت لشئ في نفسها ان تقوم بتعطيل (المشروع) وقد حفيت أقدام المواطن مكي هاشم وهو يتردد على مكاتب المسؤولين بمحطة قري الحرارية من أجل توقيع العقد وتخليصهم من هذا الرماد المتطاير الملوث للبيئة وتحويله لمنتجات تساعد إنسان هذا البلد الأمين !!
العبدلله بين يديه كل الخطابات والشهادات والمكاتبات الخاصة بهذا الموضوع يرفعها للسيد / معتز موسي وزير الكهرباء حتى لا ينطبق علينا القول (جو يساعدوهو في حفر قبر أبوهو دس المحافير) !!

كسرة :
في إنتظار توجيهات السيد الوزير لحسم هذه (العصلجة) غير المفهومة !

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)

27 تعليق

  1. دس المحافير مقدور عليه –بنستلفتها من ناس المقابر — المصيبه يقول ليك انته الكتلته ابوى

    1. مبروكه عليك … قربت اتنيّها الا الله غالب

      1. دكتور الطيب
        مبروووكة البرنجيه و تعيش وتختف
        جنوبي
        يا أخوي دي فيها كهرباء ودس محافير !!

      2. الحمدلله شفت واحد غير جنوبي و المندهش والكومندان ختفى

    2. مبروك Dr. Tayeb ،، شرفتنا .

    3. هههه ختيتها ليهم على بلاط لناس جنوبي ديل .

    1. هههههه صباحك بحيرة البجع

  2. الجبايات والنفايات،،،،

  3. حكاية مكي هاشم مع ناس محطة قري دي زكرتني النكتة بتاعت المسطول القاعد قدام الباب وجوهوا ناس النفايات قالوا ليهو عندكم وساخه ؟ قال ليهم دقيقة , خش سأل ناس البيت قال ليهم عندكم وساخه ؟ قالوا ليهو ايوه في .. رجع لبتاع النفايات قال ليهم شكراً , قالوا عندهم !!!

  4. داير تصنع بُلك من الرماد !! ومال الاسمنت حقهم ده يسفوهو يعني ؟
    مكي ده كان يعمل مصنعه ده بالدس ويمشي يعمل شركة نضافة ويتعاقد مع محطة قري ويمسك نضافة المحطة من الرماد ويشيل الرماد ويدوهوا قروش كمان وبعد داك يمشي يعمل من الرماد البلك بتاعه ده .. وكده يبقي هو الدس القبر بدل هم يدسوا منو المحافير ..

    1. هههههههههههههههههههههههه ,, لا حول ولاقوة الا بالله منك !
      دى جبتها دغشا بدرى كدة !!!؟

      1. شمباتي
        انا امس قلت ليك شنو ؟
        ما قلت ليك جنوبي ده زول ما ساهل أبداً أبدا ً
        أها مشيت وجيت لكلامي !
        لكن بالجد يا جنوبي متكيف من كلامك ده كيف !!
        عشرة منك ونكون حاجة تانية خااالص

      2. ههههه
        من حُكم من قوماً اربعين يوما صار مثلهم ..
        شمباتي والمندهش انتو ما ملاحظين البروف ده بيطعّنلو في زولاً كدي ؟ المواطن .. المواطن .. المواطن , كررا كتييير

  5. مبروووكة عليك دكتور ، وهاردلك يا جنوبي خيرها في غيرها .. بس أنا أول مرة أشوف (dr tayeb) في القمردينة، ما عرفتونا بيهو يا جنوبي ، منور يا دكتور وفرصة سعيدة .. سلااااام ..

    1. هو انا كان بعرفو بباركلو !!؟

      1. هههه بالغتا ياجنوبي ،، للدرجة دي !!!

      2. سُ عليك يا مطموس ! بارك من سكات يبركوا فوقك عبدالرحيم وبكرى ونافع ,, بارك

      3. عبد الرحيم لا .. بملاني تُفاف ونافع مُضِر ببرك زي الجمل .. الا بكري ده ماااا من ناسي وبالريحه سااااي بيعدل لي راسي

      4. ريحة شنو يا جنوبي !! إنت لسه ما تبت ؟؟ الله يصلحك ، إنتو وييين بتي نونا قاطعو مويه ونور مالا ؟؟ .. سلاااام ..

      5. ههههههههههههههههه ,, التفاف ما بضر ! اسمع الكلااااااااام

  6. عرفتو ليه الناس بتهاجر من هذه البلاد الظالم اهلها ؟؟؟؟
    يا باشمهندس مكي – يا أخوي إتخارج وخليها ليهم بس ما تخلي ورق براءات الاختراع ده بي وراك !

    1. إنت يا مندهش ( الله لا أدهشك ) !! بدل ما تقول ليه خليك قاعد ودافع عن حقك وما تسكت ، تقول ليه أطلع خليها ليهم !! نان منو الحا يقعد عشان يصلح البلد ؟؟ نخليها كدي ساااكت لقمة سااائغة لهم – الله لا كسبم ولا ربحهم – لا كده ما صاح !! لازم نمشي ونقيف أمام الطغيان ونقاتل ونجاهد لامن نجيب حقنا بأيدنا (وأعلى أنواع الجهاد كلمة حق أمام سلطان جائر) .. أنا غايتو ماااشي قريييب إن شاء الله، والداير يجي معاي حبابو ألف مش عشرة .. سلااااام ..

  7. عشان الفكرة ما جات منهم وما حيستفيدوا منها .. وماعندهم نصيب الاسد فيها
    اسع ما كان اخيرليهم يبنوا بالرماد دا كبري المنشية

  8. الموضوع مامذكور فيه التسهيلات فيمتها قدر شنو ورفعت ولا ….. لا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: