الهيئة العامة للطرق والجقور

أرجعت بعض التبريرات الحكومية ما حدث في جسر المنشية بأنه كان بسبب هجمات (الفئران) التي أدت لتآكل وتصدع الكوبري ولما كان العبد لله لا كتب عن شئ إلا بعد أن يستمع أن يستمع إلى جميع وجهات النظر فقد (ركب عربيتو) صباحاً متجهاً إلى الناحية الشرقية من كبري المنشية مؤملاً أن أقوم بمقابلة السيد الجقر ومعرفة رأئه في هذا الإتهام الخطير الذي يمكن أن يوضع في خانة (التخريب) .
كان في إعتقادي انني وبمجرد الترجل من العربة والإتجاه نحو مكان (الضرر) أسفل الكبري سوف أجد عشرات (الجقور) وهي تمارس عملها في (قضم) السيخ و(قرقشة) طبقات الاسمنت غير انني وجدت المكان خاليا من جنس (فأر) ، وأنا اتجول بنظري لحصر الأماكن المصابة إذ لمحت فاراً صغيرا يخرج من أحد الجحور فناديتة :

– أهلك ديل وين يا جنا
– نايمين لسه ما صحوا
– طيب انا عاوز أتكلم مع الجقر
– الجقر الأكل الكوبري !
– وإنتا عرفتا كيف؟
– ما جابوها في الجرايد … ومن اليوم داك (الجقر) كلم باقي الجقور كوووولها ما تطلع عشان قالو جايبين ليهم (كدايس) من الصين !
– أمشي كلمو وطمنو قول ليهو ده عمك جبرا عايزك تثبت للدنيا براءتك من التهمة دى
لم يلبث الفأر الصغير أن أعطاني ظهره مهرولاص نحو أحد الجحور وبعد برهة خرج أحد الجقور المدغلبه من (الجحر) وهو يرفع يديه في إستنكار وهوً يقول :
– خلاس رموها فينا … خلاس رموها فينا
قلت له وأنا أتصنع الإبتسام لإمتصاص ثورته :
– هدي أعصابك يا أبوالجقور .. أنا جاييك عشان تثبت براءتك إنتا وأهلك وعشيرتك !
– عليك الله فضلت لينا أعصاب نحنا … البيوت بتاعت الناس عدمت الشئ البياكلوهو قمنا خليناها وجينا البحر .. يجو يقولو ليك أكلنا الكبري .. الجماعة ديل يعني لازم يلقوا ليهم شماعه يعلقوا فيها أخطاءهم؟
– يعني إنتو ما أكلتو الكبري ده؟
– (يصمت برهة) : والله شوف (الحتت) البتتاكل أكلناها !
– (في إستغراش) : هو بالله في حتت في الكبري ده بتتاكل !
– نعمل ليهم شنووو ..أول ما نعمل شاي الصباح برسل الولد يجيب لينا شوية بسكويت أقصد أسمنت من (الحتة) دييييك والله حاجه ما تخلص
– والسيخ كمان بتاكلوهو
– سيخ شنوووو؟ هو ده إسمو سيخ … ده فسيخ .. لمن يصديء بيبقي (كفتة) ساي
– بتاكلوهو ..
– تصدق يا أستاذ ده أحسن (مزه) .. الجقور البتشلع كوووولها أول ما الليل يجي كل واحد يخت (قزازتو) ويخت ليهو قدامو سيخة سيختين !
– والعجب (الحصاص) ؟
– مالو ؟ ..
– والله ده ما عارفين جابوهو من وين (الشفع) ميتين فيهو موت لو الواحد ما ختو ليهو حصاصة حصاصتين سندوتش الصباح يحلف ما يمشي المدرسة
– يعني هسه كلام الجماعة ده صاح وإنتو العملتو التخريب ده لحدت ما الكبري بقي عاوز صيانة
– ياخي الجماعة ديل بيبالغو … هو أنحنا جقور اصلو وللا أسلحة دمار شامل .. هسه (المواد) دي كان ما هشة وبتتاكل كان قدرنا أكلناها !
– لكن هم قالو أنو إنتو حفرتو؟
– نحفر شنو انحنا بننقب ذهب؟ المواد الأتبني بيها الكبري دي لا تقاوم !
– هسه ما خايفين يعملو ليكم إباده ؟
– والله من ناحية خايفين .. فخايفين عشان كده قررنا نرحل !
– وماشين وين !
– كبري الحلفايا .. والله قالو ليك فيهو (سيخ) بسكويت سااااكت والعجب الأسمنت (إيسكريم عديييييل كده )

كسرة :
هذا المقال برعاية الهيئة العامة للطرق والجقور !

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)

Advertisements

51 تعليق

  1. برنجيييييييييييييييييييييييييييييييييييييييييييييييييية

      1. ود بوتين إزيك ياخ
        مشتاقين وكده !
        رسل ليّ رقمك
        جا جقر اكل مني كل الارقام !!

      2. اجى يااااا الترقيم الزى دا !!؟
        بتلقاو فى القروب يا مضروب ….

      3. المندهش،، رقمى : صفرين دبل او زيرو زيرو !
        و اذا ما رديت عليك أترك رسالة،، برجع ليك …

    1. وفرحااااان ماطيها كدي ! ان شاء الله تبقي ليك ام سيسي !!

  2. يا بروف
    غايتو العملوها الجماعة ديل رقدت
    الله لا كسبهم عافية
    ضحكّوا فينا العالم
    انتهينا من جات طافية النور
    دخلنا في موضوع الجقور
    الناس ديل مركبين مكنة شنو ؟!

  3. انا بفتكر انو التصريحات الزى دى مقصود بيها استفزاز المواطنين واستحقارهم ليس الا ,,,
    قال جقور قال !!

  4. الجقر جقري براي منو البحتو معاي

    1. أها حتو براك آ المسنوح !

    2. يخسي عليكن ما بتنادوني في الحت مااالكن
      جب وجب وجبجبجبجب

      1. جبجبة زى اللى فى عرس هناى داك ؟؟

  5. تنظيم الدولة الجقرية بأرض النيلين ( جاقر )
    بسم الله الرحمن الرحيم
    {يمحَقُ اللّه الرّبا ويُربي الصّدقات، واللّه لا يُحبّ كلَّ كفّار أثيم}،
    الي كافة شعب ارض النيلين نحن تنظيم الدولة الجقرية ( جاقر ) سلطنا الله تعالي لنمحق كل ما تم تشييده من الربا بارض النيلين بسبب كفر حكومتها ولؤمها اذ ظلت لأكثر من عقدين من الزمان ترفع شعار الدولة الاسلامية وتفعل فعال الدولة الإثنية لذلك اقسمنا ان نبيد كل ماتم تشييده من ربا حتي يعودوا لرشدهم وما كبري المنشية بأول عمل للتنظيم ولا اخر.. كبري رفاعه الحصاحيصا كبري الحلفايا , سد مروي , ويستمر زحفنا للقصر الجديد باذن الله ..
    لمتحدث الرسمي باسم تنظيم الدولة الجقرية بارض النيلين ( جاقر )
    محمد حسن الجقر

    1. شنو يعني لزوم التقلية
      لا هزة كانون لا شربات ليمون
      اها المدارس في السودان قفلت ولا لسة
      اسعار البصل كيف …. قال خروج نهائي قال

  6. الجقور دي ما شايفة القصور دي ؟ بس لاقين كبرينا الحلاتو دا يقمرشو فيهو ساكت
    تقدم الاتحاد العام لجقور النيلين بشكوي للامم المتجقرة . تدين وتستنكر هذا الاتهام الذي لا يمت للواقع بصلة . واشارت الي انها ستحتفظ بحق الرد …….

    1. غايتو عليكم جنس حسادة !

  7. بالمناسبة يا جماعة
    الحصل شنو على القرود
    قبل ايام قريت موضوع بقول ( القرود واصلت مهاجمتها المنازل لليوم العاشر.. قرود كسلا تخطف أكواب الشاي من الأطفال وباحثون من الخرطوم يصلون المدينة)

    قال الوفد (أنهم بصدد الوقوف ميدانيا على المشكلة وعقد سمنار تمهيدا لمعالجتها)
    .

    أها السمنار بتعمل متين ؟
    .
    عشان ندلي بدلونا

    1. نطلب من جقور الدمار الشامل دي تمشي بسرعة لبرج الاتصالات عند مدخل كبري المنشية وتدمرو لانو شكل التصميم الاتعمل بيهو دا فيهو مسخرة شديدة وقلة ادب …. وعدم احترام …..
      زول قادر يقول بغم مافي
      الله يجازيكم يا كيزان بان تحشروا الي جهنم ضحي

  8. مبروووكة عليك يا مندهش (الله لا سلط عليك جقر يدهشك زيادة) هههههههههه ..

    سامع لي خبر قالوا الجسر إنهار *** قالوا النيل رحل وشاف ليهو تاني مسار
    والتقرير وصل من هيئة المعمار *** السـبب الأســاسي سمـعت قالوا الفـــار
    ***********************************************************
    إحتار الفكر وأنا عقلي ذاتو إنصبه *** إتجمد عدييل تفكيرو ودر وغبه
    تقرير الوزير ما فهمت منو الحبه *** معــقول الجـقر يقدر يهـد الصبه
    بالغتوا وشطحتوا الليلة يا حبان *** تصريحكم يحير الإنس معاه الجان
    خليتوا البشر بين واعي بين سكران*** والكبري الوقع ختيتوا في الفيران

    قصيدة من تأليف …. (ما عارف) ؟؟؟؟ بتصرف والبقية في العدد القادم … سلااااام ..

    1. إزيك يا شيخنا ويبارك لينا في عمرك
      ياخ والله في ناس مبدعين وقاعدين على الهبشة شوف القصيدة دي حلوة كيف ! وحاول جيب لينا البقية
      واحد برضو علق على موضوع البرلمان (الطرق والجسور تفرض رسوم عبور مخالفة للموازنة)
      وعلق قال :
      خلاص!!!! بدل عبور يعملوها رسوم جقور!!!!!!

    2. وبالمناسبة أيضا يا نانو
      خندق الخرطوم العظيم سوو عليهو شنو ؟
      فسمعت في الاخبار قالوا المهندس الشيخ الصديق سيدشن الحملة الرسمية لبناء خندق حول الخرطوم.. الخندق سيبلغ طوله 180 كيلومترا.. الهدف الرئيس من الخندق حماية الخرطوم من الأعادي.. وحيملوهو بالماء !!!
      يعني جقور متغذية تماااااام بالضفادع والبعوض
      ما زي الجقور دي المتغذية بالاسمنتي والحديد دي الماسكا إمساك ويابوسة !
      غايتو الناس ديل!
      تحفة
      شمباتي يا دكتور
      ألحقني بالحبوب !!

      1. جيييييييييييييييتك

  9. اعيد واكرر ان قناعتى تقول بان الجماعه ديل عندهم كونسلتو من اطباء واخصائي علم النفس …يقرروا اصدار مثل هذه التصاريح من وقت الى اخر ليلهونا تماما …..واظن هذا سر بقاءهم الى الان والان يوم القيامه

    1. والله يا حبيب كلامك ما بعيد , اى نظام امنى بيكون فيو محللين نفسانيين واستشاريين فى هذا المجال , وللاسف الشعب بجرى ورا الترهات دى ….

    2. وبقينا لاهين ونلهي بعض كمان و ردود فعلنا بقت نكات واشعار وكراكتيرات ونضحاااااااااااااك والجمل مااااشي ..
      عزيزي المواطن إنتخب لتنتحب ..

  10. يا جماعة الجقور الأكلت الكبري دا مش جقور سودانية؟
    ومش عندها حق في البلد دا ؟
    والدستور يكفل ليها حق الاستمتاع بخيرات البلد العامة؟
    ومش لاحقاها الظلامات الشملت كل السكان؟
    ومش ليها 26 سنة رابطة الحزام سوا سوا مع المواطنين الغلابة البقو أفلس من فار الجامع؟
    ومش الإغراء بالطعام الشهي للجعان يعتبر من الناحية القانونية تحريض على إرتكاب الجرم ؟

    أحيييي أنا من المنشية حلة شيخ حسن … وأحييييي أنا من كبريها الزي القشطة !!!

    طيب لما الجقور تلقى قداما البزار دا كلو …
    دايرنها تقول (جقورنا زمان وصونا علي الوطن)؟؟

    ما في أي داعي للإشتغراش !!

    1. ههههههههههههههههههه ,, انت يا هناى مع (رفاه الحيوان) ولا كيف ؟؟؟

  11. ضجت القاعة بالتكبير وإبتسم حميدة ابتسامة واسعة
    02-09-2015 11:54 PM
    الراكوبة – فى جلسة الاستماع الى تقرير وزير الصحة مامون حميدة بالمجلس التشريعى قال العضو البرلمانى كمال حمدنا الله بعد انتهاء تقرير وزير الصحة انه كان فى العمرة وعندما كان يغط في نوم عميق في أحد أيام العمرة ، حلم برسول الله صلى الله عليه وسلم الذي قال له : ابلغ مامون حميدة التحية وقل له جزاك الله خير لما تفعله ، وضجت القاعة بالتكبير ولاحظ المصدر ابتسامة واسعة علت على وجه مامون حميدة.

    هههههههههههه
    زمان في حلتنا واحد عزابي مؤجر بيت من راجل كبير والراجل ده عنده معرفة بأبو المستأجر والعزابي ده مطلع عين سيد البيت في الايجار , قام مره الراجل سيد البيت جاء قال للعزابي والله يا ولدي ابوك الله يرحمه كان صاحبي وامبارح دي جاني في المنام وقال لي خلي بالك علي ولدي .. العزابي طوالي قال ليهو : وما قال ليك خلي ليهو الايجاااار ؟
    ههههه هسي يا حمدنا الله ما قال ليك قول ليهو يعالجنا بلااااش ؟
    نسوي شنو ؟ اسمك حمدنا الله بس الحمد لله !!

    1. ياخي ديل وصلو مرحلة متقدمة خالص من كسير التلج وقلة الأدب بإفتراء الكذب على أشرف خلق الله صلى الله عليه وسلم ؛؛؛

    2. نفسى واحد من علماء السلطان يتكلم فى ظاهرة التأول والكذب والافتراء على رسول الله صلى الله عليه وسلم دى !!

    3. هم طبعا غيروا الاسترتيجية الكذبية بتاعتم وبقوا يلعبوا علي تقيل وماسكين لينا في حديث الرسول صل الله عليه وسلم ( من رآني في المنام فقد رآني فإن الشيطان لا يتمثل في صورتي )
      وبالله كل واحد يخت خط تحت لا يتمثل في صورتي دي لحدي ما شيخ نانو يجي يشرح لينا لأنو صحي الشيطان ما بيقدر يتمثل في صورة وهيئة جسد وملامح واوصاف الرسول صل الله عليه وسلم لكن ممكن يجي في صورة زول تاني ويقول للزول انا الرسول .
      هو زاااتو ماشي عمره النوم العميق الليهو شنو ؟ ونوم عميق ده يعني ظرّط وفسي وإتنيّل في ستين نيله وداير بعد ده يشوف الرسول !!
      هو الرسول زاااتو ما بيحلموا بيهو الرسول بيروه رؤيا ..

      1. في رواية تانية للحديث بتقول : ومن رآني في المنام فقد رآني، فإن الشيطان لا يتمثل في صورتي، ومن كذب علي متعمداً فليتبوأ مقعده من النار.
        وبرضو نخت خط تحت من كذب علي متعمدا دي , وده معناه ممكن يجي واحد ويكذب شان كده كان الوعيد من رسول الله صل الله عليه وسلم .

      2. يا جنوبى الروايه التانيه دى ريحتنى راحه شديده

  12. بالله الليلة فااااااضية .. يا ربي ما ترمي لي برنجية زي الوكت ده واجازفا من المغيرين ديل ..

    1. كلنا في خندق واحد و جاهزين للوثبة !

      1. يع عليكم ! ما حبيتها منكم نوهاااااائى

      2. أها انا قعدت كتير حارسها وبعد ده ماشي
        لكن شاحد الله يجي فار يختفها منكم

  13. كنايات عامة
    )الكناية) في اللّغة هي التكلّم بما يريد به خلاف الظاهر و(كَنَيْت) أو )كنَوْت) بكذا عن كذا، إذا تركت التصريح به وفي الاصطلاح هي لفظ أريد به غير معناه الموضوع له، مع إمكان إرادة المعنى الحقيقي، تمتلئ لغتنا (العامية) بكنايات كثيرة أردت في مقال اليوم أن استعرض بعضاً منها:
    – أخلاقو في مناخيرو: تقال للشخص كناية عن (بالو الضيق) كون أنه مستعد للشجار و(الشكل) لأتفه الأسباب، وهذه الخصلة تكاد تكون ملازمة للموظف أو العامل (الما مقتنع) بي شغلانيتو.
    – أيدو لاحقة: تقال للشيخ يظن به فعل الكرامات وعلاج الأمراض حتى إذا ما أصابك (مرض) شددت إليه الرحال فلم تجده لأنو (بي بساطه) مشى الأردن يتعالج.
    – أيدو خفيفة: تقال للشخص الذي تمتد يده لأخذ مقتنيات الآخرين ووضعها في )جيبه) أو حيازته (يعني نشال)، أما إذا كانت تلك المقتنيات (مال عام) فلا يشترط أن تكون (أيدو خفيفة) وممكن (يقزقز) على راااحتو!
    – أضانو تقيله: تقال للشخص الذي لا يسمع جيداً و(تقل الأضان) يمكن أن يكون )مصطنعاً) كذلك الذي يمارسه المسؤولون تجاه (نباح) المواطنين حول مشكلة ما ! أو الأزواج عندما يطلب منهم العودة في المساء (مبكراً)!
    – خشمو مسيخ: تقال للذي لا يستطعم الطعام (في الغالب يكون عندو ملاريا).
    – من إيدك دي لي إيدك دي: عبارة يقولها المرشح للناخب عند الانتخابات وتصبح غير ذات قيمة بعد فوزه لأن (الناخب) عندها مش ح يكون عندو (إيدين) خالص!
    – إيدو طرشة: كناية على أن هذا الشخص (أبو إيد طرشة) لو ضرب ليهو بيها زول لو رشوهو بالموية ما بيقوم تاني.
    – روحو محرقاهو: تقال للشخص (الأخلاقو في نخرتو) !
    -لسانو حلو: الشخص صاحب اللسان الحلو هو ذلك الذي يحادث الناس بمعسول الكلام (ما بعرف يتماسخ).
    – مبسوط أربعة وعشرين قيراط: تقال للشخص المبسوط للآخر.. (ما ينبسط ليه؟ عامل ليهو عمارتين من مرتبو)!!.
    – خشمو فاكي: تقال للشخص الذي لا (يمسك السر) والغريب في الأمر أن هذا الشخص في العادة يبدأ حديثه بعبارة: أقول ليكا (سر)!!
    – كراعو حارة: تقال للشخص الذي تأتي الكوارث متزامنة مع قدومه وتكثر هذه المقولة عند (إنقطاع التيار الكهربائي) لأنو لازم يكون في زول (في نفس الوكت) دخل ليهو حته!
    – عينو حارة: تقال للشخص إذا قام بالتعليق على شئ ما وأصاب ذلك الشئ مكروه، كذلك الشخص الذي رأى (سخل) يقف على (تربيزة) فقال: الشئ مكنة خياطة !
    – راسو ناشفة: هو ذلك الشخص المعتد (بي رايو) حتى لو كان غلط، كذلك المسئول الذي أتى بالبكور و(أخرجنا) من ملة (التوقيت العالمي).
    – زيتو طالع: كما هو معلوم فإن الزيت النباتي يستخرج بعد (عصر) الحبوب .. يعني عشان يجي زيت لازم يكون في (عصر) والزول عشان (زيتو يطلع) لازم (يتعصر) والمعنى واضح!
    – فاتو القطر: تقال للذي فاته قطار الزواج وتقال للأنثى أيضاً إذا ما تعدت الثلاثين ولم يتقدم لها الزول الفاتو القطر ده ذااتو .
    – نفسو فاتحه: تقال للشخص الذي على الرغم من أن كل ما يحيط به يبعث على (الطمام) و(سد النفس) إلا أنك تراه مقبل على الحياة (ليه مش تعرف)!
    – لا بهش لا بنش: يقولون إن فلان لا بيهش ولا بنش يعني (لا بيحل لا بيربط) دلالة على سلبيته مما يؤكد تماماً إنو (عضو برلمان)
    – جلدو تخين: تقال للشخص متبلد الشعور وما (بحس) وهذه صفة تتناسب طردياً مع حجم المسئولية التي كلما كبرت كلما إزدادت طبقات الجلد مما أدى إلى (تخانتو)
    – لسانو خفيف: (أنظر خشمو فاكي)..
    – سلوكو ضاربة: تقال للشخص إذا فقد جزءاً من قواه العقلية كما يمكن أن يقال له : مكشكش ومدروش ومهترش وفاطي سطر هذا قبل أن يقوم بإعتلاء (الصينية) أما بعد الإعتلاء فيقال له : فاكه منو – ضارب فيوز – فاكي صامولة – مسحلب – ومجنتر!
    – عينو طايرة: كل ما يعينو ليهو سكرتيرة يقوم (يعرسا) !
    – قلبو ميت: أنظر (نفسو فاتحة).
    – دمو تقيل: تقال للشخص الذي بطبعه ينعدم عنده الإحساس بالآخرين ولا يجيد قراءة وجوه من يخالطهم مثقلاً على الحاضرين كذلك الشخص الذي يزورك عند التاسعة مساء دون سابق إنذار وأنت منهمك في عمل ما فتجلس صامتاً … ثم تدخل وتمرق ثم تغمض عينيك وتتثاءب .. وبعد أكتر من ساعة يقول ليك : كدى أفتح لينا (الجزيرة) نشوف الحاصل شنو؟
    – دمو خفيف: المقال ده مش كده ؟ …. شكراً!!!

    كسرة:
    – باضت ليهو في القفص: تقال للشخص (المحظوظ) فالجدادة ما باضت ليهو (تحت العنقريب) أو (في التكل) وسط الصحون والحلل و(العدة) عشان يقعد يفتش.. لا.. دي باضت ليهو جوه القفص (ذاااتو) يعني بس يفتح ويشيل وعلى (البنك) طوااالي!

    كسرة ثابتة (قديمة)
    أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
    كسرة ثابتة (جديدة):
    أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و).

    برنجية ،، دا المقال الجديد بتاع البروف …

    1. برنجييييييييييييييييييييييييييية

      1. ههههههههههه مبروكة عليك تقطعا بعرق العافية …

      2. اااي انحنا زاااتنا زمان د. احمد صابر ( الله يرحمه ) كان بغشنا بي حلاوة دِربّس او حلاوة حربه وكنا بنكون فرحانييييين .

    2. ده شنو السويتو ده يا الكمندان ؟؟؟

      1. نعمل شنو يعني ؟؟؟ من أمبارح خلينا شغلنا كلو وقاعدين منتظرين وفي النهاية يمشو ينشرو المقال في المواقع التانية عشان كدا نسخنا وجبنا هنا وأنا والمندهش جبنا البرنجية وشكرا جزيلا والسلام عليكم ورحمة الله وبركاته خلاص …

      2. انت ما تشيل الصبر ياخوي الشفقة الليك شنو ؟
        كلنا قعد نشوف المقال في الفيس او في الراكوبه او في الجريدة لكن بنرجاهو ينزل في القمردينة عشان هنا عنده طعم خاص .. سمح الكلام في بيت سيدو !
        شمباتي نادي اربعه من سنه ساتة واقطع ليك فرعين من النيمة ديك وتعالوا ..

      3. هههههههههه ,, انا كان ناديت الاربعة ما بحتاج سوط ! سوطى بعرفو براااااى آ عشاى !

  14. دي جقور حفرت الكبري إها الجقور الدعول ألب تحفر في وتلهط في البلد دي يعملو ليها شنوووووو

    1. مصاقرة عدوووووك يا هناي !
      جنس قريفة أسكت ساي !

      1. رشينا الحوش وفرشنا السراير ….. انا واشواقي والساعة ميعادك جينا من قبلو
        ياخي يومين راجنها ………….

  15. غايتو أنا بالشايفو دا المقال قبل ماينزلوه البرنجيات دي حتتهاطل وماتديك الدرب ،، ههههه العالم دي كلها خالين شغلم ومصاقرينها وقاعدين ،، غايتو موعودين برقم قياسي وغير مسبوق ،، الله يستر ويجيب العواقب سليمة هههههه …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: