تخطيط X تخطيط

هل نحن شعب يجيد التخطيط ووضع الخطط والإستراتيجيات ، الإجابة بكل تأكيد نعم وحتي لا يتهمني البعض بالملاريا أضيف إلى قولي هذا بأننا أكثر الشعوب تخطيطاً بل أن التخطيط عملنا ليهو وزارة مهمتها التخطيط لكل ما يتعلق بمصير هذه الأمة وجعلها في مقدمة الدول الراعية للفقر .

نعم التخطيط في كل مكان الجميع يخططون ويجنون ثمار ما خططوا له كل مسؤول يخطط كيف يقوم بتأمين مستقبله ومستقبل (عياله) وأقاربه عبر إنشاء الشركات في دبي وسنغافورة وكل الأقطار ذات الإستثمار (المنتعش) كما يخططون كيف يوظفون أقاربهم في شركات البترول والبنوك والمؤسسات ذات (الدفع) الدولاري ، كما أن المسؤولين يخططون للبقاء في (الكرسي) لأطول فترة ممكنة من أجل (شفط) الميزانيات و(لحس) المخصصات والتخطيط لمشاريع وهمية تذهب ميزانياتها لشراء الأبراج والفلل في (ماليزيا) وما وراء البحار .
المسؤولون (عندنا) يقضون نهارهم وجل ليلهم يخططون للسفر للخارج على حساب (المواطن التعيس) فمنهم من يخطط للسفر إلى اليابان للوقوف على التجربة اليابانية فى مجال (جمع النفايات) ومنهم من يخطط للسفر إلي (تركمستان) من أجل مشاهدة المشروع التركمستاني لحل مشكلة المواصلات .. ثم يعودون بالسلامة إلى (الوطن) بعد أن يكونو قد نالوا قدرا من (الترطيب) و(التطبيب) والتأكد من الحالة الصحية وخاصة نسبة الكلسترول في الدم الذي يعود إزديادة لضرب (المشاوي) والأطايب كما (ودي مهمة) يكونو قدإطمأنوا على تجارتهم ومشاريعهم وأن كل شي تمام وكله من اجل المصلحة العامة وكده .!!
وكما أن الحكومة تخطط والمسؤولين بيخططو الأحزاب (عندنا) برضو بتخطط وكل حزب لدية (مكتب) مسؤول عن التخطيط مهمته التخطيط للحصول على وزارة وزارتين (هامشيات) أو مقعد مقعدين في البرلمان لممارسة (فضيلة) النوم كما أنه من اهم مهام هذا المكتب التخطيط للحصول على تعويضات من (الحكومة) عن ممتلكات هي في الأصل تعود للشعب الفضل !
ولا يقتصر التخطيط (عندنا) على الحكومة والأحزاب فالجميع يخططون كباراً وصغاراً فالمواطن يخطط كيف يقوم بتدبير منصرفات أسرته بعد أن يكمل المرتب (من يوم خمسة) وكيف يقوم برسم خارطة طريق تجعله يزوغ من (سيد الدكان) وبتاع الخدار و(سيد اللبن) كما إنه (يخطط) للهروب من واجباته الأسرية بعد أن ضاعت مروته في الجري وراء المواصلات والشعلقه في (بصات الوالي) !
أما الفئة الميسورة (المنغنغة) فهي تخطط لإجازة نهاية الأسبوع كيف سوف تقضيها في أي المطاعم الفاخرة أو الفنادق الراقية التي تقدم طيبات الأكل وخدمات الساونا والمساج , أما ناس (مثني ورباع) فهم دائمي التخطيط للزواج بإخري وتوزيع الفرص بعدالة علي من هن في عصمتهم فيوم في (الطائف) ويوم في (المنشيه) ويوم في (الرياض ) وتلاته مرات في المعمورة (ما الجديدة وكده) !
وعلي صعيد المهن فالجميع يخطط .. السمسار يخطط من أجل إقناعك ببيع منزلك في وسط البلد وشراء آخر على تخوم العاصمة حتي إذا ما تم له ذلك أقنعك بعد حين ان تبيعه وتشتري لك مزرعة في كيلو 27 ثم ما تلبث وهو يخطط لك أن تجد نفسك لاجئاً في أحراش (الكنغو) !
والطبيب يخطط لك .. (مش إنتا قلتا ليهو عندك مغص في البطن) يطلب منك عمل اشعة مقطعية (للراس) ورنين مغناطيسي (للحالب الشمال) وفحص لوظائف (الكبد) وآخر لوظائف (الكلي) وثالث لوظائف الدم (لو فضل فيها دم) ثم يكمل تخطيطه بأن يشير عليك بعمل كل هذه الفحوصات في معمل (تفحصون) التابع لنسيبو (المتزوج أختو) وتكتمل نهاية الخطة بان يقوم بكتابة الروشته لك ويطلب منك شرائها من صيدلية شريكه (تمساح الدميرة) صاحب مجموعة صيدليات (الدواء المضروب) !
أما الميكانيكي فمنذ ان قام بالكشف علي سيارتك التي أصبحت (تسخن) فهو يخطط (للضربة القاضية)
– شوف يا أستاذ السخانة دي من (الكويل) فحماتو محروقه و (الدينمو) ما رامي كويس القلب بتاعو عاوز (لف) واللديتر عاوز (تسليك) والبلكات عاوزين (غيار) ! …. وتكون المسالة كوووولها (فيوز) !!

كسرة :
عندنا وزارة للتخطيط وما عندنا تخطيط ووزارة للسياحة وما عندنا سياحة ووزارة للصناعة وما عندنا صناعة ووزارة للرياضة وما عندنا رياضة ووزارة للزراعة وما عندنا زراعة ووزارة للثروة الحيوانية وكيلو اللحم بالشئ الفلاني !!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)

15 تعليق

      1. خلاااس جيت لي خرخرتك !! مبروك يا عبيد

    1. مبرووووك يا دكتره
      كتلوني … عجبني وسرّ بالي !

      1. عين الحسود فيهو عود وكمنجة
        كسرة ثابتة : المقابلة متين ……………..؟؟؟؟
        هههههههههههه

      2. مقابلة وانا ماف يا ما خرخار يا ما عندك دم !!؟؟

  1. ووووووووووووب علينا ده كلو حاصل علينا
    وقبل ما تنسى يا بروف
    عندنا وزارة للدفاع وما عندنا وزير
    وعندنا قصر رئاسي وما عندنا رئيس

    وهلمجرا يا قول هناي !

  2. وعندنا وزارة الطاقة و لا نحنا ولا لاعبينا عندهم طاقة وبترولنا شامينو قدحه .. وعندنا وزارة العمل والعطاله ما يدوك الدرب .. وعندنا وزارة الاستثمار واي مستثمر يجي يومين تلاته ويدينا عرض اكتافه .. مش كده وبس بل و العجب العجيب عندنا وزارة معادن وفي مناطق الدهب الحشاش يملي شبكته سنه يا نحنا ديمقراطية هبر لا تضاهيها ديمقراطيه ….. وعندنا و عندنا وعندنا و ……….. يلا علينا جاي

  3. ود العبيد مرحب بيك وجيدن جيت ومبروووكة عليك البرنجية (طووولت الغيبة) !! أما حكاية التخطيط دي أسكت سااااي !!! وعاااش البعرفو براااي .. وهو في شنو فضل عشان يخططوا ليهو ؟؟ والله حكاية تفقع القلب والمرارة لو باقي منها حاجة .. ناس الإستثمار ديل فضحونا وشرطوا عينا .. “كان عندي محاضرة في أحد المساجد عن الأمانة” وبعدما إنتهت جاني واحد شكلو محترم جداً وقال لي :
    (والله أنا أحب السودان وأهل السودان فمشيت هناك بغرض الإستثمار في مجال الزراعة، لكن للأسف كل واحد عائز “حقو” ودفعت أكثر من مليون دولار (تسهيلات) ودخلت في جرجرة أمشي وتعال لحدي ما زهجت ورجعت بخفي حنين ) ، وأكتشفت أنه من السادة آل البيت .. حسبي الله على كل متكبر جبار نصاب .. سلاااام ..

    1. ديل اكلوا حق رب البيت وسيد آل البيت ما ياكلوا حق آل البيت !!؟

      1. شكرًا للأخوان نانو والمندهش ولسه حي،،
        ايوه يا جنوبي قصه قروش الأوقاف والشئون الدينية وبرضو راحت شمار في مرقه،،غايتو التخطيط عندهم

  4. انا زمان ما كنت بقرا كلام الناس البتكتب كلام بايخ زي كلامك ده لكن من بديت اقرا كلامك بقيت عايش الواقع وقبل كنت مرتاح
    الله اسامحك ياخي

  5. كلللللللللللللنا بنخطط لمصالحنا الشخصية والنتيجة ياها دي صفر كبيييييييييييير !
    بس كمان حق الحيكومة ده اسمو شخبطه مااا تخطيط !

  6. وكمان تقول نحن مابنعرف للتخطيط

    أرسلت من هاتف HTC

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: