جلطة نفيسة

بينما كنت أجهز نفسي للخروج من المنزل متجهاً إلى الصحيفة قالت لي زوجتي وهي تسألني :
– ما مشيت لي حاجة نفيسة دي؟
– مشيت ليها.. مش عشان أعزيهم في وفاة حاج عبدالمنعم؟!
– وفاة شنو؟ حاجة نفيسة جاتا جلطة وراقدة في المستشفى!

– معقولة؟ المرة دي والله مسكينة.. راجلا حاج عبد المنعم فراشو يا دوبك إترفع.
– ما هو الفراش ده ما ذاااتو المصيبة!!
حاج عبد المنعم تدرج كموظف بنك حتى صار مديراً لأحد الفروع قبل وصوله لسن المعاش قبل سنوات قليلة.. متزوج من (نفيسة) زميلته فى العمل قبل أكثر من ثلاثين عاماً أنجبا خلاها عدداً من البنين والبنات.. لم يكن لحاج عبد المنعم مشاركات اجتماعية، بل كان كائناً (بيتياً) ما أن يعود من عمله بالبنك و(يقرّش عربيتو) فهو لا يغادر منزله إلاّ لأداء صلاة العشاء بمسجد الحي، من صفاته أنه كان هادئ الطباع، حسن الهندام، خفيض الصوت يتحدث إليك همساً، توفي بصورة مفاجئة قبل حوالي أسبوع.
– كيفن الفراش هو المصيبة..؟ ما فاهم.
– طيب النحكي ليكا:
قالوا ليكا تاني يوم للوفاة.. والبكاء حاااار.. والنسوان ديل يعملن ليك في البدع ونفيسة دي تردح وتشيل وتوصف.
– الليلة وين يا الحاج الصلاي… خليتني أنا والمعاي.
– الليلو وين يا الأمين البأمنوهو الملايين.
– وووووب يا المثالي المشيت خليتني في حالي.
– وووووب يا الواضح أب كلامن ما فاضح.
– الليلة وييينك يا الأرباب الماك كضاب.
– الليلة وييينك يا الحنان الحافظ للقرآن.
– ووووب وووب وووووووووووب!!
حاجه نفيسة تشيل وتردح والدموع دي ما تديك الدرب والنسوان المعاها شغالات ليها كورس قالوا ما يشوفن ليكا إلا (مرا) طويلة وعريضة وقيافة.. التوب ما توب.. واللبس ما لبس.. والحنة ما حنة والدخان ما دخان.. تدخل ليك عليهن ومعاها تلاتة بنات الشعر كيفن والبلوزات كيفن والإسكيرتات كيفن ومما دخلن يطقو ليكا الثكلى.. وقعدوا يصرخو بي أعلى صوت لحدت ما وقفو ليكا بيت البكا على فد كراع..
– أها وبعدين؟
– بعدين بعد ما أخدن بكيتن.. وكل واحدة شربت ليها كباية موية باردة مشن قعدن بعيد.. يتخجخجن ويبكن.
والنسوان ديل كوووولهن سابو البكا وقعدن يعاينن ليهن!
– أها وبعدين؟
– أها قالو أخت حاجة نفيسة الصغيرة قالت لي ليها برااااحة في أضانا : إنتي النسوان ديل من وين؟
قامت حاجة نفيسة ردت عليها قالت ليها: يعميني قبال ده ما شفتهن!
– أها والحصل شنو؟
– الحصل إنو النسوان قالن لي حاجة نفيسة أمشي أسألي المرا دي وقولي ليها إنتي منو؟ قامت الحاجة مشت على المرا وقلدتا وقعدن يبكن زيييين وبعد ما قعدن في الواطة ومسحن دموعن قامت الحاجة سألت ليك المرا قالت ليها: ما إتعرفنا على بعض يختي!!
– أها المرا قالت ليها شنو؟
– قالت ليها أنا إحسان زوجة المرحوم على سنة الله ورسوله وديل بناتو هادية وهديل!
– وده الجاب لي حاجة نفيسة الصدمة وجاب ليها الجلطة؟
– لا لا .. حاجة نفيسة كانت متأكدة من المرحوم عشان أصلو ما كان بيطلع من البيت.. طوااالي قالت للمرا قومي أمشي من هنا قبل ما نجيب ليكي البوليس يا مرا يا محتالة.. الحاج ده من بيتو ما بيطلع إلاّ يمشي يصلي العشاء في الجامع ويقعد ليهو ساعة ساعتين في حلقة (التلاوة)!
– أها وقالت ليها شنو؟!
– قالت ليها ما أنا ذاااتي (حلقة التلاوة) دي ذااااتا!!
كسرة :
المقال ده من الأرشيف .. نفس مافي للكتابة !!
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)

17 تعليق

  1. برنجية

    1. والله يا بروف كلنا ما عندنا نفس لي اي شي، نقول الحمدلله… (و ان شكرتم لأزيدنكم) ما بنقولها ساي

    2. والحاله ما عندك نفس ؟
      تختف البرنجية
      وبعاتي كمان ؟
      ياخ تعال أكلنا
      ههههههههههه
      مبرووووووك البرنجية

  2. يا بروف إن شاء الله ينصلح الحال وتكون عندك نفس تكتب لينا ونقرأ ليك كل جديد والله يعينك وييسر أمرك ويفرحك بي عيالك .. قول آاامين .. ومبروووكة عليك البرنجية يا أخوي البعاتي .. طيب وقت إنت أصلك بعاتي ومشغول ما فاضي وريني قاعد تسوي شنو ؟؟
    .. ما تمش تاكل لينا ناس (الحيكومة) ديل عشان ما يجونا تاااارين تاني بي إنتخابات أصلن معروفة نتيجتها قبال ما تنعمل .. سلاااام

  3. دي محن آخر الزمن بعد التأصيل
    مثنى وثلاث ورباع
    اللهم اني اعوذبك من الفساد الحاصل والبنطلون الناصل ومن الزمن الممسوخ والوش المفسوخ ومن الزمن الحائر والشباب الزاجر ومن ظلم الميزان ومكر الكيزان وشر البليه وحراميه المحليه ومن اتباع الشيطان وملة الكيزان ومن جقور الكباري وحراميه الوالي اللهم.امييين👐
    💐💐صباح الحب والخير 💐💐

  4. ههههههههه صباح النور والسرور يا مندهش ( الله لا أدهشك ) !!!! سلاااااام ..

  5. حسي كدا ما جقلبت بينا يا بروف، يعني حسي نخاف من /:
    1. الراجل الهادئ2. الراجل حسن الهندام 3. البصلي العشاء حاضر 4. ولا البحضر التلاووووااااة
    غايتو الزمن دا أفتكر (كل ماذكر صحيح)بكون شكلو مؤتمرجي لكن ديل عياناً بياناً
    سلام للجميع و كل من سأل عننا (و بالأخص شيخ نانو) و جميع شباب القمردينة (ما تفرحو بي شباب دي ههه) و قلنا ندخل شوية لأنو سبب غيابنا أفصح عنو البروف (ماااافي نفس!) علا بس ما عندنا أرشيف ننزلو ههه!

  6. مرحب بيك بتي نونا شرفتي القمردينة وجيدن جيتي .. أكييييد لمسك رأس الخيط هههههه .. ما تقعدي تجقلبي ساكت وتتخيلي حاجات ما حااااصلة .. يا بتي راااجلك أريتو راجل السرور لا بتاع كدا ولا كدا، فما تخافي تب، إتوكلي علي الله وفوضي أمرك ليه … سلاااام ..

  7. تراها نفيسة بي جلطتا وارتاحت من عبد المنعم الخاين ! نحنا البحلنا شنو من عبد الكرسي !!؟
    خمسة سنين كمان لي شنو ؟!
    نشيلك هم على هم القراية أم دق

  8. سلام على الحبان
    عندما قال عمر البشير فى ود مدنى
    لكل النساء والمراه
    انا الان ابحث عن الفرق بينهما فى واحد فيكم عارف الفرق

    1. بسم الله عليكي ! ماااالك ؟ القراية لحست ليكي راسك !؟ كمان نسيتي اللغة القذافية !! اها النقرّبا ليكي :
      للمرأة حق الترشح سواء كانت ذكر ام أنثي ( القذافي )
      لكل النساء والمرأة ( البشير )
      سأظل في ليبيا الي ان اموت او يوافيني الاجل ( القذافي )
      سأرحل اذا لم ينتخبني الشعب ( البشير ) .. لا عليك النبي اكان ما قعدت معانا شوية !!
      تظاهروا كما تشاؤون ولكن لا تخرجوا الي الشوارع والميادين ( القذافي )
      سنحقق السلام خلال العام الجاري سلماً او حرباً ( البشير )
      كللللللللللهم كدي يا بت امي يقولولنا جنس الكلامات دي ويمشوا بي سرهم !!

      1. هههههههههههههههههههه
        الان لقد فهمت / زين العابدين بن على

      2. ياسين شمباتى

        فهيمة الجنوبية ولا شنو ؟
        ههههههههههههههههههه

  9. النساء في العربية هن اللاتي يتونسن بالقطيعة او ينسين معروف (الراجل المسكين) والمراة هي التي تقيف قدام المرأة طول اليوم هذا والله اعلم
    كسرة: ما كل الناس بتخستك اشمعنا انا

    1. يعني قصدك الراجل المسكين عمر البشير

  10. نفِيِسِي لسه مجْلوطِي ؟

    1. ياسين شمباتى | رد

      جلطها البلا ,,,,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: