طب التخمين

في مقال كتبه العبدلله مؤخراً عن (التخطيط) قمت (بهبش) أخواننا وأولادنا (الأطباء) وذلك حينما ذكرت بأن بعضهم يقوم بممارسة التخطيط (لحلب) المواطن المريض بعد أن أصبح (الطب) مهنة إستثمارية ، وقد ذكرت في المقال كيف أن بعض الأطباء يطلبون من المريض عمل (صور) وفحوصات (ما تديك الدرب) وعند (معامل) بعينها ، كما يوجهونه لشراء الدواء من (صيدليات) بالإسم !

على الرغم من أننا لم نعمم الحديث إلا أن بعض السادة الأطباء لم يعجبهم ما قلناه على الرغم أن ما أوردناه حقيقة ماثله لم يكن العبدلله يتوقع أن تحدث له شخصياً ..
قبل عشرة ايام تعرضت شقيقتنا الكبرى لإرتفاع شديد في درجات الحرارة مع إستفراغ و(هضربة) وبقية الأعراض التي تشير إلى إصابتها بالملاريا فتوجهنا بها إلى (حوادث) أحد المستوصفات الخاصة حيث قابلنا الطبيب المناوب الذي طلب منا عمل الفحوصات المطلوبة وبعد رؤية النتيجة أفادنا الطبيب بأنها مصابة بملاريا من النوع الخبيث ، وعليه يجب أن يتم إستدعاء الأخصائي ، قمنا بدفع قيمة إستدعاء الأخصائي والذي قام بالكشف على المريضة وعندما قام بقراءة نتيجة الفحوصات أشار هو أيضاً إلى أن الملاريا خبيثة ويجب أن يتم تنويم المريضة وإعطائها (الكينين) إذ لا ينفع مع هذا المرض أي عقاقير أخري .
بعد دفع (الكم مليون أمنية) تم البحث عن (غرفة) ولكن (لحسن الحظ) إتضح أنه لا توجد غرف شاغرة إلا في صباح اليوم التالي ، حيث عدنا إلى البيت .
نسبة لخطورة العلاج بالكينين والآثار الجانبية التي يمكن أن تحدث عند إستخدامه فقد راى العبدلله أن يقوم في صباح اليوم التالي بإعادة الفحوصات عند معمل آخر للتأكد من نوعية الملاريا والذهاب بالمريضة إلى طبيب أخصائي آخر وقد كانت المفاجاة بأنو الملاريا طلعت لا خبيثة ولا حاجه وقد أوصي الطبيب بأن تأخذ المريضة حقن الملاريا العادية وتعود إليه بعد أن (تخلصا) وبالفعل عند إنتهاء الحقن تماثلت للشفاء وعند إجراء الفحص ومعاودة الطبيب إتضح إنها شفيت تماماً .
من الواضح أن هنالك خطأ ما .. قدر ما الواحد (نحت مخو) ما قدر يعرفو … يا ربي يكون من شنووو؟

حادثة اخري توضح (إنو في حاجه غلط) فقد إتصل بي صباح الأمس المواطن خالد أحمد علي من سكان حي المنارة بأمدرمان يقول أنه قد توجه إلى مستشفي (ط) بالثورة الحارة 17 بعد إن إنتابته نوبة من الإستفراغ حيث قام بمقابلة الطبيب العمومى الذي طلب منه عمل رسم للقلب وتحليل للدم وبعد رؤية الطبيب الأخصائي لنتيجه الفحوصات أخبره بانه مصاب بإنسداد في أحد الشرايين (ذبحة يعني) وقام بتحويله للعناية المركزة بالمستشفى (بعد دفع سبعة مليون أمنية) علماً بان قيمة الليلة الواحدة بها مليون وميتين الف !
يقول المواطن (خالد) أنه قد تم أعطائه وهو في العناية المكثفة بعض العلاجات من ضمنها (حقنة) تؤخذ بالدرب أنقذته منها العناية الإلهية إذ أحس عند بداية إمتصاص الجسم لها بهبوط عام وتنميل في الجسم حيث طالبهم بإيقافها وقد كان .
هنا أخبره نائب الأخصائي بعدم وجود أي ذبحة ولكن عند حضور الأخصائي أكد أن هنالك ذبحة (شختك بختك) ، المهم تم نقل المواطن خالد بعربة إسعاف إلى مستشفي (رويال كير) وقد أكد الأطباء هنالك بعد الكشف عليه بعدم تعرضه لذبحة وأنه سليم (ميه المية) وأن يمكن أن يقوم بقيادة سيارته (التى كان يقودها شقيقه) بنفسه والعودة لمنزله وقد كان !!

كسرة :
من الواضح أنو في شئ غريب … ملاريا (خبيثة) تطلع ما (خبيثة) … و(ذبحة) تطلع ما (ذبحة) .. شنوو القصة بقت تخمين وللا أيه ؟

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

18 تعليق

  1. قدلة يا مولاي حافي حالق … البرنجية في ايدك يا حسن

    1. حسن منو ؟؟
      مبروك يا سحس

    2. حافي حالق ويلم فيك ترماي في تقاطع الموردة مع الطابية قادر يا كريم ..

      1. آميييييين …

  2. قبل الملاريا خبيثة ولا ما خبيثة !
    الدكتور زاااتو دكتور ؟
    انا لما اكون في السودان وامرض والله دكتور عمره اقل من خمسين سنة إن بقي شنو داك ما بمش ليهو !!

    1. وتلم فيهو وين أبو خمسين دا ؟؟
      يهاجر سنوياً أكثر من خمسة آلاف طبيب للخارج وكلهم كوادر ابو خمسين ولا فوق
      الباقيين ما دون ذلك وفي انتظار بلوغ سن الهجرة

  3. بعاتي و ما فاضي | رد

    تاااااااااااااااااااااااااح، ضربو يا حكم

  4. زوجة اخي جات من البلد قاصدة الشفاء بعد ان اتعبتها الجلطة , اخذتها الي مركز طبي خاص . قابلت اطباء الاستقبال واخبرتهم بالحالة وداير لي اخصائي شاطر . قالو اولا جيب المريضة للكشف الاولي , فما كان مني الا وناديتها جات تووش داخلة , بعد شوية قالو لي وينا المريضة بتعتك , قلتا ليهم الواقفة قدامكم دي ,, قالو ودي عندها جلطة ؟؟؟؟؟ قلت ليهم آآآآآآآآي قالو ومنو القال ليكم الكلام دا ,,,,
    طلعنا الادوية وورق الفحوصات ,,,, طوالي حولونا للاخصائي ,,,, وبعد رسوم الدخول والفحوصات ,,,, طلعت الحبة دي ما عندها
    قال ليها توقفي الاسبرين وكتب ليها مسكن عند اللزوم ب 18 جينه بس .
    كسرة: كانت تستخدم ادوية الجلطة لمدة خمسة سنة
    اتصلت علي اخوي وقلت ليهو من دربك دا عدل للبلاغات , افتح بلاغ في المستشفي والدكتور وفني المعمل …. وطالب بعويض

    1. الجلطة هينة يا كتلوني قال ليك امس في كسلا طلعوا لي واحد شهادة وفاة عديييييل واهله غسلوه وكفنوه وودوه المقابر وبعد صلوا عليه الراجل فرفر قال ليك المشيعين ديل العميان شايل المكسر وفتح نضيف , احمد ربك علي الجلطوها ليكم ..

  5. السلام عليكم ورحمة الله وبركاته …
    بس تنويه بسيط لحتة الجلطة دى , ممكن عادى ما تظهر فى اى فحص !
    ويا حبذا لو الحبيب د / طارق افتانا وما خلانا …

    1. مين يشهد للعروسة !!؟
      اخجل ليكم انا ! كشفتوا حالنا يا دكاتره ..
      ناس شركة النيل للاعشاب ديل مفروض يدوا الدكاتره نسبة من الارباح شان خدموهم كتيييير في زعزعة ثقة المواطن بالطب الما بديل ..اووووووول مره اشوف البديل يبقي احسن من الاساسي !
      الجردقه والحرجل النبق النبق النبق ههههههههه

      1. ههههههههههههههههههه ,, يعرس ركبيك ديل ,,
        والله انا مرقت النصيحة بس ,,,
        بعدين اقولها بكل امانة ,, الاخطاء الطبية اللى بقت تحصل دى بسبب المواطن !
        لانو سنة 2010 لما بدأ اضراب الاطباء الشهير كل الشعب بلا استثناء وقف ضد الاطباء ,, مع انو الاطباء اول بند كان فى مطالبهم هو تحسين الخدمات الصحية المقدمة للمواطن !
        ومن غير منسوبى الصحة وقف قدام تجفيف مستشفى الخرطوم !؟
        ومين غيرهم وقف ضد اغلاق مستشفى النساء والتوليد !!؟
        خلى الشعب يخم ويصر وما يفتح خشمو …
        معظم الاطباء طلعوا خلوا البلد , والموجودين فيها مضطرين وشغالين بلا نفس ,, ومعظمهم ما اتلقى تدريب كويس …

      2. في دي صدقت يا اخوي وما بقدر اقول بغِم !
        وفي اضراب الاطباء فعلا بدل نثور علي الحكومة ثُرنا علي الاطباء وخلينا الحكومة تنفرد بيهم !
        نحنا ما بقينا بنعاين تحت كرعينا بس لاكين يا شمباتي شدة ما وطوا لينا راسنا !!

    2. غايتو انا لا وقفت مع الحكومة ولا شتين بالذات حميضة دا يحمض في جهنم قولوا آمين. الناس يا شمباتي من عشما فيكم نظام احنا ما فضل لينا الا أنتو كمان سويتوها لينا اعتصامات؟

      1. والله الاعتصامات دى كانت عشاااان الشعب , لكن الشعب اعترض وقال انو الطب مهنة انسانية وعلى الطبيب ان يطاطى ويبقى واطى ! اها تانى شنو ؟

  6. السلام عليكم
    زي ما يقول ليك طرف السوط هبشني ))))
    سنه ٢٠٠٤ نزلت السودان و معاي زوجتي كنا سنه ٥ طب وبدرس في روسيا و دي بعد غيب عنه لي اكتر من ١١سنه
    شاءت الاقدار انو قريبه لي ترقد المستشفى و تعمل عمليه لوز و البت عمرها ٦ سنوات
    فا مشينا ليها زياره في المستشفى ( في نفس يوم العمليه )
    ١- أفواج من الناس و الأهل و الاقارب ( العالم دي كلها معطله شغلها و قاعدين خارج أسوار المستشفي مستنين نتيجه العمليه
    ٢- جيت جنب البوابه و معي احد أقاربي و زوجتي و انا ليس لي اي علم عن كيفيه الدخول
    قابلنا الحارس بي جمله ( يازول هي انت ماشي وين ؟؟؟) فا رد عليه اخي أطباء أطباء
    فا طالب بي البطاقة مديت ليو البطاقة الجامعية ( مكتوبه من الغلاف لي الغلاف بي اللغه الروسيه فقط ) عاين للصور و طبعا عمل انو فاهم اي حاجه و سمح لينا بي الدخول
    ٣-دخلنا عليها في الغرفه فا وجدت حشد داخل الغرفه ( طبعا هناك اي واحد في العائله دارس طب ولا صيدله ولا أسنان ولا تمريض او اي حاجه ان شاء الله بيطره قاعدين جوه و عاملين لجنه و متابعين العلاج و كل واحد يعمل فيها فاهم )
    ٣- دخلت لقيت الطفلة تفوق من البنج الكامل ( طبعا بي النسبه لي دا كان صدمه لانو العمليه دي بتنعمل بي بنج موضعي و المده البيقضيها المريض في المستشفى من ٣-٤ ساعات و بعدها بي غادر الى المنزل
    و في حاجه اسمها حساب المخاطر ، خطر البنج الكامل مقارنه بي حجم العمليه كبير جدا )
    بعد ثواني دخل شخص مسن لابس جنز و قميص كاروهات لا يليق بي بعمره
    استفسر عن المريضه و خرج
    و بعدها فهمت من الناس انو دا الدكتور المعالج بروفسور فلان و هو الاجرى ليها العمليه (في الفتره الصيفية عندنا دورات في المستشفى و انا في السنه الخامسه بيجري العمليه طبيب منواب و ممرض او طالب سنه ٥ ) طريقه عمليه البروف من عام ١٩٨٨ لا تجرى بيها عمليات في روسيا
    و بعدها علمت انها تحتاج من ٤-٦ ايام في المستشفى طبعا الكلام دا في مستشفى خاص طبعا دا كمان برنامج العالم دي كلها حا تبدأ مشوار العطاله و الجمعات كل يوم في المستشفى
    بعدها بدأت اسأل عن دراسه الطب في السودان فا عرفت انو المراجع سنه ١٩٨٠ ١٩٧٩ ( تاريخ الطب )
    طريقه العلاج الشخصي و المضادات الحيويه

    دي كلها جزء من انهيار السودان كا كل من مؤسسات و أفراد و نظام (الكيزان دي ولا بنذكرهم لانو الضرب في الميت حرام )
    كانت بي النسبه لي صدمه كبيره في المجال دا
    * دا كلوا كوم و زوجتي اجنبيه و دي اول زياره ليها للسودان كا مكان راجعين نعيش فيو )))
    **
    ناسف لي ركاكه العربي

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: