الطفل المعجزة

أصيب العبدلله بحالة من (الإستغراش) المفضي إلى إنفجار المرارة وتهتك القولون العصبي وهو يطالع عنواناً رئيساً في أحدى الصحف يقول :مرشح مستقل للرئاسة يطلق على نفسه (الطفل المعجزة) !
للحظة لم أشك مطلقاً بان المرشح قد اطلق هذا التصريح بعد أن أغرته صورته وهو يرتدي (روب التخرج) من روضة (دار الحنان) غير انني عندما دلفت لقراءة بقية الخبر وجدت أن (رئيسنا القادم) قد قام بإطلاق هذا اللقب على نفسه إستناداً على أنه أصغر المرشحين سنا إذ أنه من مواليد 1972 (يعني عمرو هسه 43 سنة) !

أن يطلق مرشحاً لرئاسة (بلد) على نفسه لقب (الأسد النتر) ، تمساح الدميرة أو حتي (الشافو خلو) فهذا من الممكن ولا غبار عليه أما أن يلصق بإسمه لقب (الطفل المعجزة) فهذا ما لم ولن يسبقه عليه أحد ويدل دلالة واضحة بأنه يمكنة ان يترشح لرئاسة مجلس امناء (معهد النور) !
تخيلو معي سادتي الأفاضل أخبار هذا البلد المنكوب بعد (فوز) هذا المرشح المستقل بنسبة 100% كما قال في تصريحه :
– الطفل المعجزة يؤدي اليوم القسم رئيساً لجمهورية السودان
– الرئيس الطفل المعجزة يفتتح عددا من المنشآات
– الطفل المعجزة يستقبل السفير الأمازوني
– بعد إصابتة بوعك صحيه يغادر الرئيس السوداني الطفل المعجزة إلى المانيا
– يسافر اليوم لحضور القمة العربية … الطفل المعجزة (ههههه)
ولتتأكدوا سادتي من أن هذا المرشح يستحق هذا اللقب الذي أطلقع على نفسه إستحقاقاً لا ينازعه عليه احد تعالو معي لنقرأ معاً فقرات من برنامجه الإنتحابي (بالحاء عشان شئ يبكي) والذي وصفه بأنه يملك حلولاً لكل أزمات البلاد الإقتصادية والسياسية :
– يقول الطفل المعجزة (جايبا من عندي؟) : بان ايرادات الدولة السنوية ستصل بنهاية حكمه الى 134 مليار دولار، وأضاف “بعد عامين من بداية الحكم ستبلغ 41 مليار دولار … (الله يرحم عمنا خضر الحاوي) !
– كما أعلن المرشح الرئاسي ( ده ) اعتزامه توفير فرص عمل في القطاع العام تصل الي 4.500.000 عامل مقابل 17,962,000 عامل للقطاع الخاص والحر … يعني بعملية جمع بسيطة 22.462.000 إتنين وعشرين مليون وأربعمية إتنين وستين ألف (فرصة عمل) … وهنا نسألة (وريالة) الأطفال تسيل من افواهنا (ورينا ديل ح تشغلهم كيف ووين يا فالح؟) !!
– أما عن مشكلة (السكن) بالنسبة للمواطنين فقد وجد الطفل المعجزة (الحل) إذ وعد بتوطين كل سكان السودان بالخرطوم والخرطوم بحري وامدرمان وإلغاء كل الولايات واستبدالها بمربعات سكنية وجعلها عاصمة بمواصفات عالمية (يعني نظام يستبدل السندوتش بتاعو مع زميلو في الفصل وكده)
– أما في مجال التعليم فقد قال (الرئيس القادم) بانه ينوي الغاء كل جامعات التعليم العالي عدا ثلاثة منها حددها في جامعة الخرطوم، السودان، امدرمان الإسلامية وتخصيص جامعة الخرطوم للكليات الطبية والسودان لكليات الهندسة وامدرمان الاسلامية لجميع الكليات النظرية متعهدا بتطبيق مجانية التعليم ليتمكن الطلاب من الحصول على تعليم حديث ومطور (والخرتمية جامعه ديل نموصهم يعني وللا الفهم شنو ؟ والجامعات التلاته ديل نزيد مساحة كل واحده فيهم (كم هكتار يعني؟) !!
وأخيراً ليس هنالك ما يمكن أن يدلل بان هذا المرشح الرئاسي قد وصف نفسه بذلك اللقب بعد أن قام بفحص إمكانياته الذهنية فحصاً دقيقاً سوى أقتراحه لضمان نزاهة العملية الإنتخابية والقاضي بأن يتم استبدال (الحبر) الذي يوضع على أصابع المصوتين بان يمتنع كل من يرغب في التصويت عن قص أظافر يده اليسرى (شفتو كيف) حتى إذا جاء الشخص (المصوت) للصندوق يتولى المراقب بالمركز قص أظافره وبذلك يمكن ضمان عدم تكرار صوته.
(يعني نرسل الصين نجيب لينا ستين مليون ضفارة) .. وتجي ماشي قدام مركز التصويت تسمع واحد من (المصوتين) :
– يا زول ضفر براحه شلتا لحمتي !!
والعجب (النسوان ) :
– وووب عليا فيها كمان (شيل ضفور) .. ضفور شنو العايز تشيلا .. ديل أنا بربي فيهم ليا سنتين !!

كسرة :
يعني ده لو فاز (مثلا يعني) … يومين ويلحقنا أمات طه !!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

Advertisements

14 تعليق

  1. برنجية

  2. برنجية

  3. يابروف دا برضو إمتداد لبعض مهازل مايسمى بالإنتخابات ؛؛؛

  4. يا شباب دا دليل على ياتو مرحلة محتاجين ننحدر عشان نجعل من البشير أفضل السيئين … !

    يعني لو جابو زول فيهو أي رقشة … حيخرت لينا بشة …. فمافي طريقة غير نجيب الحالات المتأخرة الزي دي

    أفهموها بقى … يعني بعد 25 سنة كتاب .. لسة ما فهمتو … ؟
    نعمل ليكم شنو أكتر من كدا ….

    اللهم أنت مطلع على ما يفعلون فينا
    اللهم أرنا دلائل قدرتك فيهم … !

  5. عجبني ليك لكن ي( المواطن) البشير، نازل انتخابات مع جنس ديل؟ غايتو ، رجرجة و دهماء وشوية هبالة كدا على عباطة، واحنا بنتفرج و نعييييط!
    اها بكرة حي رفع عليهو قضية البتاع القال حي كسر ايدينا ( مصطفى عثمان شحاتين) بحكم انه صاحب الملكية الفكرية و الماركة التجارية للقب!!! ياربي ديل جاااادين مستهونين بينا للدرجة دي؟ غايتو بس آمييييين يا أب احمد

  6. مرشح فافى ودلوعة كيف حيقلع لينا الفساد؟ودقنو دى بتاعن شريعه. نظيفه ولا لونها شنو؟

  7. اهى اهى دى الرايقة جات تعوم بصدييييرها دى الرايقة ,,,,

  8. الجرّب بِشة يفتش خشم البقرة

  9. ارض المعجزات والانجازات
    يهب الملك لمن يشاء
    كل من يانس في نفسه التفاهة والعوارة فليترشح ونحن وراهو سير سير سير

  10. الطفل المعجزة دا واحد من إتنين : إما يكون مستشاره السياسى بلة الغايب أو عندو خاتم سليمان عليه السلام ..
    بس بينى وبينكم نحنا ليه ما نديهو فرصة .. عسى ولعل …
    ويضع سره فى أضعف خلقه ..مش لسه طفل ؟؟

    1. كلامك صحي ما نجربه هو نحنا خسرانين شنو !!؟ كده كده البص وااااقف واليقدر يدوّره اليسوق !
      لاكين كان صحي وفر اتنين وعشرين مليون ونص فرصة عمل إلا بعد كده يعينوا موظفين عمرهم 6 سنة وتسأل : الموظف الهنا وينو ؟ يقولوا ليك الباشكاتب ساقو يغير ليهو البمامبرز. هو نحن كووولنا كمّنا ؟ ما تامين اربعين مليون بالحريم والشُفّع !

      1. مقهورين و ساكتين

        غلبت ساخر سبيل هههههههههههههههه

  11. مقهورين و ساكتين | رد

    الطفل المعجزة !!!!!

    1. مقهورين و ساكتين | رد

      ما ﻻزم يكون معجزة اذا كان نحن بنستثمر في مصر بما ﻻيقل عن المليارات لرفع اقتصاد مصر طيب نحن اقتصادنا ماشي بالعكاز

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: