مرحلة العفيص

يعتبر د. مصطفى عثمان إسماعيل رئيس القطاع السياسي بالمؤتمر الوطني(أكثر) قياديي المؤتمر الوطني (مرونة( وتعقلاً وإبتعاداً عن التصريحات (الخشنة) لكن يبدو ان الرجل قد إنطبقت عليه مقولة (من عاشر قوماً) إذ نسب إليه مؤخراً عبارات تفتقر إلى (الدبلماسية) وتتعدى حدود اللباقة واللياقة والكياسة هذه العبارات التي أطلقها من داخل مكتب حزبه العام والتي يهدد فيها بكسر كل يد تمتد على الحزب حيث قال : (البمد يدو علينا بنكسرا ليهو) وعليه :

– نطالب بتأهيل مستشفيات العظام وتوفير الجبص والشاش
– نطالب بتحديد (الأيد ياتا البتكسروها) البناكل بيها وللا التانية
– هل يتم (الكسير) تحت بنج (موضعي) أم بنج (عام) وللا (عدييييل كده)؟
– هل يتم (الكسير) بضربة واحدة (وللا بتفو الليد تف) ؟
– لو الزول أساسن أيدو مقطوعه؟ ح تقطعو ليهو شنوووو
– هل مد (اللسان) يستدعي ايضاً قطعه وللا القصة بس في (الليد)؟
– هل يقتصر (الكسير ده) على الذكور أم (الإناث برضو) بتكسرو ليهم ونبقى في (حي وووب) !
– ماهي الأدوات المستخدمة في (التكسير) فرار، عصاية ، عتلة (عشان نعرف بس)؟
– هل يتم التكسير على يد (عصبة) متدربة وللا (كسارين تحت التمرين)؟
– هل يتم التكسير في ساحات عامة لتشهد (التكسير) طائفة أم يتم في مكان مقفول
– بعد ما تكسر يد (المواطن) هل تتولي (الحكومة)علاجه وللا بخلوهو بأيدو (مدلدلة) !
– في حالة علاج الحكومة للمواطن (أبو أيد مكسورة) هل تفضل (الحكومة) الجبص ام الجبيرة ولماذا (مش برضو سؤال)؟
– في حالة إنو الشعب الفضل كوووولو مد أيدو : هل ح تستورد الحكومة(كسارين) من الخارج !
– في حالة (المغتربين) البيمدو أيدهم .. كيف ستتم عملية الكسر ؟ بعد عودتهم أم سوف تنشأ (ملحقيات كسر) بسفاراتنا في الخارج؟ – تنبيه – (جدة لا تحتاج) !!
– نقترح تجميع (الناس البتمد إيدا) وكسرهم (بالجملة) في إحتفال بالساحة الخضراء
وتسمية اليوم بيوم (الكسر العالمي)
– نقترح علي الحكومة فتح مكاتب لإستقبال المواطنين العاوزين يمدو أيدينهم (ويخلصو من الموضوع) عملاً بمبدأ (كسروك وللا جوك) !
– هل ستساعد أحزاب الكرتون الموالية الحكومة في كسر يد المواطنين من مبدأ (حبيبي أكسر ليا وأنا أكسر ليك)؟
– إذا تم كسر يد (الشيخ) حتماً سوف يغني (كسروني الاحبة وقالو ليا أنسي) !
– نقترح إعفاء كبار السن (زي حلاتنا) من قصة (الكسر دي) والإكتفاء بتحفيظهم جزء من القرءآن !
– نقترح إنشاء (الهيئة العليا لتكسير الأيادى) على أن يتولى رئاستها (أبوساطور) !
– سوف ينقسم الشعب الفضل إلى فئتين فئة (أبو يد مكسورة) وفئة (أبو من غير يد مكسورة )!
– هل إذا رفع مواطن يده (مداها يعني) مشيراً بالسبابه .. هل سوف يتم كسر (السبابة) فقط أم اليد حتى مفصل الكفين أم وضوؤه باطل؟
– ماذا إذا مد المواطن (إيدينو الإتنين) هل تكسر واحدة فقط أم الإثين معاً ومعهم الثلاثاء والخميس
– من المؤكد بعد الخروج من مرحلة (الكسير) سوف تبدأ مرحلة (الشليت) وصولاً إلى مرحلة (العفيص) !
– مانشيت في الصحف : توقف مراكز (الكسير) بسبب عدم دفع إستحقاقات (الكسارين)
– واحد من الجماعة إياهم : إن كان الكسر بين الرسغ والساعد فلا غبار عليه والله أعلم !
– عاوزين فتوى : إذا الزول رفع إيدو وكسروها ليهو .. وقام تاني رفعا (ذاااتا) .. في هذه الحالة هل يتم كسر اليد التي تم كسرها قبلا أم يستعاض عنها بالأخرى (الما عملت حاجه)؟
– ويغني المغني : وا ناري الما بقيت (كسار) أطلع (الشجرة) وأمسك (الفرار) … أييييه الليله وا ناري

كسرة :
– تنبيه : هذا المكان مراقب بالكاميرات .. إنتبه لحركة ايدينك !

– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

12 تعليق

  1. برنجية

    1. مبروكه يا جنوبي
      وقلنا نكون اول المو باراكيين
      ياااخ بالغتا عديل
      دي عملتها كيف
      هل من افاده؟

      1. هي الايام دي القمردينة ما زي تلفزيون السودان !!
        كلم قريبك قولو بتطفش الناس

  2. هو الزول ده اظنو حتي وهو طفل ما اتشاكل مع زول ! العرفو بي جنس الكلام ده شنو !!؟
    بعدين من جضومو ديل اظنو نوع الكان بكااااااي داك ! كان زول هبشو سااااي يبكي ويدردق في الواطه ! هاكا مصبعي ده اكسروا ولآ اقول ليك ! هاكا الوسطاني اقعد ..

    1. وى !!!

    2. جضوم كفيّت
      سمعت قالوا كانو بدقوهو ويسوقو عجلتو !
      وعامل لينا فيها عنتر و عنتر … لكن هو ما عنتر

  3. عزيزى الاخ الفاتح جبرة السلام عليكم نسيت اهم حاجة حسابات تجنيب لهيئة التكسير العليا تقرير المراجع العام / اختلاسات ونهب لاموال كبيرة من هيئة التكسير العليا الكسار الكبير يقول ان كل جنيه دخل الخزينة تم صرفه فى سبيل الله لاجل حملات التكسير الكبرى السنوية استجلاب الات كسير يمكنها كسر وجبر العظم فورا وبدون بنج التقرير الالات المستجلبة اتضح انها صينية وان اسعارها اقل بكثير جدا من القيمة المدفوعة لها . هروب احد مستشارى الهيئة العليا للكسر وانضمامه للعدل والمساوة بعد اختلاسه كم مليون دولار كانت تحت يده
    ههههههههههههههههههههههههههههههههههههههههههههههههههههههههههههه رايك شنو فى الكسير ده مع تحيات

    Abdelazimm Taifour صاحب صاحبك اسماعيل حسبن (حميم )
    abdalazim9@hotmail.com

    Date: Tue, 17 Mar 2015 15:27:10 +0000
    To: abdalazim9@hotmail.com

  4. قرقرقرقرقر
    ياخ الطفل المنغولي دا لذيذ خلاص
    وانا من هنا بقول ليهو
    يايمه إتكسر فيك …………………………..
    أي واحد في بالو حاجة يتمها بطريقتو

    1. في واحد من الافلام المصرية واحد جا لقي زول بيدق في صاحبه وطوالي خش يدافع عن صاحبه الزول داك دقاهم الاتنين ومشي , بعد قاموا واتنفضوا الجاي فازع بقول لصاحبه : شفتني لما رفعتلو صباعي و التلو : انت فاااهم ؟
      هسي مصطفي جضوم يكون مشي قال لي بشة : شفتني لما قت ليهم أي زول يمد اصبعه حا نكسروا ليه ؟

      يايمه تنكسر فيهو دورة شهرية ..

      1. آمييييييييييييييييييييييييييين ,,,
        وما يلقوا البوقفها ليو الا اناااااااااااااااااااااااااا

  5. اولمبية!!!؟..ويسموها دورةاﻻستثمار ويعملواليها لجنةعليا.وتتمخض عنهالجان واللجان ترفع توصياتها..وووووو..ﻻﻻياجنوبي غير الدعادا بي حاجة تانية تكون مرة واحدة بس

  6. ليه يابروف …انت والحكومة……..دانا غلبان ..تعليقاتي البوديها تقول..ﻻبتمشي ﻻحاجة ..ترم ترترم تراتراﻻﻻ!!!!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: