جباية بدون رعاية

إنها دولة جباية لا دولة رعاية .. هذه العبارة ليست من الأقوال المأثورة كما قد يتبادر إلى ذهن القارئ إنها عبارة أطلقها العبد لله منذ سنين عددا وهو يتحدث عن إنعدام الرقابة في كل شئ … إبتداءً بالكافتيريات والمطاعم وإنتهاءً بالمختبرات الطبية

والمستوصفات .. أفتح مطعماً … سوف يأتيك من يطالب برسوم الرخصة التجارية … يطلع من هنا يجيك بتاع النفايات عاوز قروشو … يطلع بتاع النفايات يجيك بتاع العوايد … يطلع بتاع العوايد يجيك بتاع الزكاة … يطلع بتاع الزكاة يجيك بتاع الضرائب .. يطلع بتاع الضرائب يجيك بتاع (الكرت الصحي للعاملين ) … الزول الوحيد الما بجيك هو الزول المفروض يفحص الأكل ويشوف الزيت البتطبخ بيهو زيت (نباتي) وللا (زيت مكنة) .. واللحم القاعد تقدمو لحم ذات الأظلاف أم ذات (الكدارين) !
أفتح (عيادة طبية) حتى وإن كنت خريج (معهد القرش الصناعي) … أكتب على لافتتك ما شئت من التخصصات … ومن الزمالات .. ومن الشنو ما عارف .. وإستقبل المرضي .. أكتب ما شئت لهم من الروشتات والأدوية .. لا يهم إن لحقنهم أمات طه أو أبتهم بعاهات مستديمة وأصبحوا من رواد (معهد سكينة) … سوف يأتيك من يطالب برسوم الرخصة التجارية … يطلع من هنا يجيك بتاع النفايات عاوز قروشو … يطلع بتاع النفايات يجيك بتاع العوايد … يطلع بتاع العوايد يجيك بتاع الزكاة … يطلع بتاع الزكاة يجيك بتاع الضرائب .. يطلع بتاع الضرائب يجيك بتاع المش علرف ايه … الزول الوحيد الما بجيك هو الزول المفروض يتأكد من إنك دكتور طبيب مرخص ليك بالعمل ويتأكد من شهاداتك ومؤهلاتك ويتفقد صلاحية العيادة والأجهزة الفيها !!
وحتي لا نكون قاعدين نلقي الحديث على عواهنه فقد صرحت السلطات الصحية مراراً وتكراراً عن إكتشافها لعيادات تمارس فيها فيها مهنة الطب من قبل أشخاص معرفتهم بالطب كمعرفة العبد لله باللغة التركمستانية !!
الكلام الفوق ده بيؤكد تماماً أن حكومتنا الميمونة في هذا العهد السعيد (ما شايفه شغلا) وإنو القصة أصبحت هايصة .. ودونكم ما حدث مؤخراً من حدث (غريب وعجيب) بمنطقة الدخينات إذ إستأجر عدد من الأساتذة مدرسة وأسموها (الريان) -شفتو كيف.؟- وقاموا بإستقبال طلاب الشهادة السودانية وإستلموا منهم رسوم تسجيل ورسوم إمتحان ورسوم شنوووو ما عارف … وعندما جاء الإمتحان (نجرو ليهم ) أرقام جلوس من راسهم .. وإذ أن الإمتحان الأول قد كان (تربية إسلامية) فقد قاموا بتعديل إمتحان (السنة قبل الفاتت) وأدوهو ليهم .. وحتى تكتمل الحدوته فقد قاموا بتعيين (بائع أواني) كمراقب !
وبعد أن تم إكتشاف (اللعبة) إتضح أن المدرسة غير مسجلة بوزارة التربية والتعليم …. يعني مدرسة (كيري ساااكت) .. وكاد مستقبل هؤلاء الطلاب ان يروح (شمار في مرقه) لولا إكتشاف هذا الأمر مبكراً وتلافيه من قبل إدارة الإمتحانات بالوزارة التي قامت بإستخراج أرقام جلوس (ما مزوره) لهم وإجلاسهم لإمتحانات الوزارة مع الوعد بعقد إمتحان تعويضي لهم لمادة التربية الإسلامية !!
بالطبع مثل هذه (القصص) من (الإحتيال) لم تحدث ولن تحدث في اي بقعة في العالم إلا أنها تحدث لدينا .. ليس لأي سبب من الأسباب إلا لأن الرقابه لدينا معدومة وأن حكومتنا أطال الله بقاءها حكومة جباية لا حكومة رعاية .. وكلو أصبح تزوير في تزوير وما عارفين التزوير الجاي ح يكون في شنوووو !!
كسرة :
(الريان) باب من ابواب الجنة الثمانية كما جاء في الحديث الشريف .. الجماعة عملوهو باب من أبواب (الإحتيال) !
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

Advertisements

20 تعليق

  1. اجمل واحلي محتالين

  2. البرنجية اتختفت يارجالة…في شنو؟

  3. دي البرنجية ؟

    1. بسسسسسسسسسسسس ياها !
      مبروووووك يا عمك

    2. بالالتهاب الرئوى يا يابا !!!

  4. البقولوها ….

    1. طعما كيف يا أب احمد؟

      1. جداد جداد !!!!!
        (:

      2. هههههههههه
        الببغاء ؟

  5. انا حقيقة يا بروف غايظني و فاشي فش فاشي الموضوع دا و الهللولة الاتعملت ليهو ، هو فعلا فعل فظيييييع ما فأتم فيهو زول و إن دلّ إنما يدل على غباء الفاعلين ، هل كانوا يظنون انهم لن يكشفها احد ولا كانوا ناويين يزوغوا نص الامتحانات و لا كانوا حيرجعوا القروش بعدما يصرفو ها سوق اسود و ًشيلوا الفرق !!؟؟؟ غايتو المهم هو فعل غريب لكن الا فظع منه و لم يجد كل الهللولة دي هو اغتصاب مدرس لتلميذته!!!! و خيرا فعلوا حينما تم تنفيذ الإعدام في حقه و دا فعلا ما يستحقه و لكن الشاهد ان الامر لم يجد كل ردود الأفعال هذه!!!!! الواحد كان لو موصل اولادو و لاقاهو المعلم يتركهم معاه ويرجع مطممممممن، الآن انقلب الحال، أسلمهم المدرسة و أشيل الهم لحد ما يرجعوا سالمين و لا حول و لا قوة الا بالله العلي العظيم!

  6. دى بالغو فيها مبالغه ما حصلت وعلى قول شاعر نميرى ( وريتنا جديد ما كان عل البال ) وما خفى شكلو اعظم …غايتو لو ما تمت محاكمه عاجله وعلنيه وفوريه تبقى المغسه مغستين

  7. يقول ابن تيمية: إن الله يقيم الدولة العادلة وإن كانت كافرة، ولا يقيم الدولة الظالمة وإن كانت مسلمة

    1- قبل ثلاث سنوات، أعلنت وزارة التربية بالخرطوم عن حصرها (مائة مدرسة عشوائية) و أعلنت تواصل عمليات حصر بقية المدارس العشوائية بغرض (إغلاقها كلياً)
    2- قبل ثلاث سنوات ، حذر مدير الإعلام بالتعليم العالي الطلاب الذين لم يتم قبولهم في الجامعات من اللجوء للمؤسسات التعليمية التي لم يرد اسمها في دليل القبول، ونوضح أن التسجيل بهذه المؤسسات يعد ضياعاً للزمن وهدراً للمال، وأن الوزارة لم تعترف بشهاداتها ولن توثقها، ونفيد بأن عدد هذه المؤسسات التعليمية غير المعترف بها 14 مؤسسة)

    * أكثر من مائة مدرسة حتى الآن طلابها لم يصلوا مرحلة الجلوس للإمتحانات !! ..

    وبكرة ينكشف المستور

    1. اصلا طالما ما قادرين يضبطوا الشغلة , خلا يعملوا ختم زي ختم السلخانة ويختموا بيهو مدير المدرسة او الجامعه وأي ولي امر داير يسجل ولدوا يقول للمدير كدي الختم النشوفو !!
      بس الختم ح يكون وين ؟ لالا ما محل ختم الضبيحه يخلوه في العضل محل التطعيم ..

  8. هو زاااتو ( بوكو حرام ) !
    قال ما عارفين التزوير الجاي ح يكون في شنو قال !!
    بتاع العِده ده كان ما غبي يساهم في زيادة منافسين ليهو !!؟ هسي بكره ال 50 ديل كان حيلفوا الشوارع الحِلل الكبابي , باااايركس يااا
    اكتر شئ افرحني اني اكتشفت انو لسه في نفر من اهلي الجنوبيين متمسكين بالشمال والاحزني انو الجنوبيين الرافضين للشمال حيشمتوا فيهم !!

  9. لو ما اعدموهم جهارا نهارا يبقى مافى فائدة ! اى والله ,,
    وما اتجرأوا على عمل كدة الا لانهم واثقين انو مافى رقيب او حسيب ,,
    وربما كان مشاركهم واحد من الجماعة اياهم ! ما بعيد يا سعيد … ما بعيد …

    1. سعيد منو !!؟
      تصدق الوزيرة قالت ح تستقيل !! لاكين بعد الامتحانات ! تكون قامت الانتخابات واتشكلت حيكومة جديدة او مجددة وساعتها يحلها الف حلّال ..

      1. الوزيرة سعيدة ؟
        هييييييييييييييي يكاااااااااااااااااااااااا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: