عوض طالوش

في بدية سبعينات القرن الماضي لم تكن هنالك صالات أفراح حيث كانت حفلات الأعراس تقام أمام المنازل أو في ساحات الأحياء وحينئذاك لم تكن قوانين سبتمبر قد طبقت بعد وكانت أماكن بيع الخمور (البلدية) والبارات التي تبيع والبيرة و (الشيري) وأخوانه مفتوحة على مصرعيها .

كانت هواية (عوض طالوش) أن يقوم (بفرتقة) حفلات الأعراس لا سيما ان الله أعطاه (بسطة) في الجسم وما سمي بعوض (طالوش) إلا لأن كفه كانت بحجم (الطالوش) الذي يتناول به معلم البناء المونة من (الطلبة) ، ما أن يسمع عوض طالوش (بحفلة) حتي يذهب إلى مكان تناول الخمور من (المغرب) ومعه شلته وبعد أن يتستفوا يتوجهون مباشرة إلى حيث صوت (الفنان) وعند وصولهم (وده المهم في الموضوع) كان (طالوش) يطلب من صبيته أن يدخلو إلى الصيوان ليقوموا (بإجلاء) أسر معارفهم حتى لا يصابوا بضرر عندما تتطاير الكراسي والترابيز ويختلط الحابل بالنابل ، وبعد أن يتأكد (طالوش) من تسللهم خارجين يدخل إلى الحفل ويمسك بأول كرسي يصادفه ويقذف به في الهواء ثم يقوم بلكم أول شخص يقابله فيصرعه ويختلط الحابل بالنابل فيكون الخبر الرئيس في الحي والأحياء المجاورة (تاني يوم) بإنو (عوض طالوش) فرتق حفلة ناس (فلان) وإنو فلان (خيطو ليهو كم غرزه في راسو) وفلان (إيدو إتكسرت) والفنان قام (جاري) !!
المهم في الكلام الفوق ده أن طالوش (الله يرحمو) كان يتبع قاعدة هامة هي (إن كنت تعلم أن المكان سوف لا يكون آمناً بعد فترة فأخل رعاياك منه) !!
كيف ينسى الموقعون على الإشتراك في تحالف (عاصفة الحزم) هذه أن هنالك آلاف (المواطنين) من المفترض أن يتم إجلاؤهم من الأراضي اليمنية التي يتسيطر الحوثيون على معظمها وإلا تعرضو إلى مختلف الأخطار التي ربما تصل إلى التصفيات الجسدية ؟
من البدهي أن (التوقيع) على المشاركة في التحالف لم يأت في ليلة وضحاها بل تم خلال أيام كانت كافية ليتم مخاطبة الجالية هنالك بحزم أمتعتها والخروج من أرض اليمن بأي منفذ كان ولكن يبدو أن التركيز على التصريحات و(التبريرات) لدي (المسؤولين) قد أناسهم أن لديهم (مواطنين) هنالك سوف يعيشون في وضعاً خطيراً بعد ان يعلم اليمنيون أن حكومتهم مشاركة في هذا التحالف .
وبالفعل رغم إحترام اليمنيين للسودانيين والتقارب الواضح بينهم إلا أن معاملتهم قد تغيرت إلى النغيض تماماً بعد بدء الغارات وأخذوا يسومونهم سوء العذاب عبر الاهانات اليومية والتحرش باقذع الالفاظ ، وهذا شيئاً كان متوقعا (وما داير ليهو درس عصر) ليصبح قرابة الخمس الف سوداني وسودانية في خطر دائم بدوام وجودهم في الأراضي اليمنية .
وكالعادة في مثل هذه الأحوال تهرع الدول جميعها إلى إجلاء رعاياها على طريقة (عوض طالوش) إلا حكومتنا المجيدة التي أبت إلا أن تزرع الخوف في قلوب رعاياها هناك والقلق في أفئدة أسرهم هنا هذه الأسر التي إنقطعت أخبار أبنائها عنها وصاروا لا يدرون عنهم شيئا .
إن حكومتنا مطالبه بالتدخل لإجلاء الرعايا السودانيين هنالك اسوة بكل الدول التي شاركت حكوماتها في “عاصفة الحزم” ، إن كل الأسر التي لديها اقارب عالقون في مدن اليمن يعيشون في حالة من الترقب والقلق والخوف على مصير أقاربهم هنالك فالجماهير الغاضبة التي تخرج بشكل يومي ضد الحرب تتحرش بالأسر السودانية هناك فالسودانيون ربما يكونو الجالية الوحيده المشاركة في هذا التحالف التي لم يتم إجلاؤها والتي لم تستخدم نظرية (عوض طالوش) .
إن البطء في معالجة هذا الأمر يعرض حياة معظم السودانيين للخطر وإلى إستباحة أموالهم وممتلكاتهم وربما أرواحهم وعلى الجهات الرسمية عمل شئ على أرض الواقع بدلاً عن التصريحات التي لا تفيد وتاني قبلما تشاركوا ليكم في تحالف أعملو بنظرية (عوض طالوش) !!

كسرة :
حيرتونا !!
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

Advertisements

20 تعليق

  1. برنجية

  2. مالا بايره ؟!!

    1. بايره كيف ؟؟ يمكن عوض طالوش قام بإجلاء قرايبو في القمردينة ؛؛؛

      1. هههههههههههههه

  3. متعووووووده دايمن
    الموجودين في ليبيا رجعوا ؟
    طالما حاج ماجد سوار قال ماااافي ما يهدد امنهم إذن مااافي مشكلة !!

  4. القرار ده شكله اتحذه عمر برطوش برااااهو
    لا شاور وزير لا شاور برلمان !!
    هو زااتو كان شاورن بلا سمعا وطاعة دار يقولو شئ ؟
    عوض طالوش مهما كانت صفاته فهو في النهاية ود ناس وابن بيئته لاكين من اين اتي هؤلاء ؟!!!

  5. مبروووكة عليك يا كومندان ، وما عليك من الجنوبي دا حاسدك عدييييل .. سلاااام ..

  6. قال : (تعليقك في انتظار المراجعة) قاااال !! هو يا ربي طالوش دا طلش معاهو السيستم بقى طاشي ما عرفني ولا شنو ؟؟
    ولا يمكن جنوبي قال ليهو سوي كدي عشان نانو دا تاني ما يهاجمني !!! ههههههههه .. سلاااام ..

  7. يا بروف محيراني حيرتك انت؟ منذ متى كان المواطن من اولويات هذه الحكومة؟!!!!!!!!!!!! بعدين انا كلمممممممممممتك انت البتديهم الأفكار دي ، اهي دي واحدة من افكارك طريقة بسيطة وهينة للتخلص من الشعب الفضل ، جاتهم من الله! يرفسوا نعمتوا يعني؟ اتحيرنا

  8. الله يكون في العون ،، الناس تركت وطنها بعد أن ضاقت بهم ظلماً وطغياناً من قبل فئة ضالة وغادرت أرضها كرها وإجبارا عشماً منها في حياة كريمة رغم مرارات الغربة ،، لكن أبت نفوس الزنادقة براغيث الرأسمالية الطفيلية والمؤتمر البطني المريضة بتجارة الدين وبيع كل شئ مقابل حفنة من الدراهم إلا وانت تلاحقهم وتنكل بهم بسياساتها الربحية الرعناء ،، بالأمس ليبيا واليوم اليمن وغداً الله أعلم ..

  9. الكــــــــــــــــــــــــــوز | رد

    كلامك صاح والله .. الموضوع دا اصلوا ما خطر ببال احد .. اول كدي قبل من نجليهم اجب على الاتي:
    1- ما عندنا اصلا قائمة بالناس الهناك ديل .. نعرف بعضهم اي نعم بس الاغلب ما عارفنهم وين اصلا
    2- بالتالي نكلمهم كيف نقول ليهم عايزين نجليكم
    3- نجليهم بشنو وطيارة واحدة عندنا مافي
    4- تكاليف الاجلاء دي البدفعا منو نحن ولا السعودية؟ نحن قروش لحاجات زي دي ما عندنا
    5- نوديهم وين ال5000 ديل .. وكان جبناهم السودان حيسكنو وين؟ وياكلو شنو؟

    اقول ليك شئ خليهم قبلهم كان ماتوا يكونوا شهداء والشهيد بيشفع لسبعين من اهله .. اها احسبا كدا 5000 ديل بيشفعوا لي كم واحد؟

    1. ال5000 ديل اقلو كانوا رافعين 10000 اسرة لو حسبتها صاح

    2. يا الكوز انت بي صِحكْ ! ولآ بتكاوي فينا ساكت ؟!!

  10. البروف والشباب

    زي ما قال الكوز .. الناس ديل ما عندهم احصائيات للناس البهناك .. غير إنو دي تكلفة تدفعها الحكومة وهي ما دايرة حاجة بتجيب ليها الدفع دا .. دايرين يستلمو بس .. !!
    حاج ماجد سوار قال دي ما مسئوليتنا في الجهاز .. لكن شغالين بناء على طلب الرئيس فقط .. !!
    يا سعادتو دي مسؤولة منو طيب ؟
    وزارة الثروة الحيوانية ؟ ولا إتحاد المرأة ؟؟؟؟

    يارب إنت شايف …… فش غباينا فيهم يا رب !!!

    1. أب أحمد ….. دى مسئولية وزارة الزراعة ..

  11. ياشبااااااااااااااااااااااااااااااااااااااب عمنا دا بتاع بينسون بس

  12. الم تلحظ يا جبرا ان عوض طالوش كان يحتسي الشراب قبل اجلاء الرعايا فهم الان في حالة احتساء الشراب

  13. إنتو سيستم جبرا دا شكلو طالوش دا طلشو !! أمبارح نزلت تعليق أبا يقبلو قال تحت المراجعة !! يعني بعد ما شاب دخلو الكتاب !! القمردينة دي من زمااان أنا بشارك فيها ليه المرة دي (طلشني) ؟؟ الشاطر يجاوب … سلااااام ..

    1. تكون من الناس الاجلوهم اصحاب عوض طالوش !!!

      1. هههههههههههه ,, متين يجى يوم جلاك انت ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: