خبير أجنبي

إنتشرت في الآونة الأخيرة ألقاب لا يدرك العبدلله كنهها ولا يعلم متطلبات (نيلها) ، يستضيف أحد البرامج السياسية أحدهم فيقوم مقدم البرنامج بتعريفه للمشاهدين بأنه الأستاذ فلان الفلاني (الباحث في شئون الثورات العربية) او يستضيف أحد أستوديوهات التحليل الكروي أحدهم مقدماً أياه .. الكابتن علان العلاني (الخبير) في (دائرة السنتر) !

ومع إنتشار (الخبراء) و(الباحثين) عندنا في كل المجالات إلا أننا نعيش أخفاقات وتردي (معتق) وقصور بائن فى كافة المرافق والخدمات ، قصور طال أمده واستفحل لسنوات طوال من غير (مجرد أمل) في تلافيه أو إيجاد بعض الحلول التي من الممكن أن تحسن منه قليلاً .
هذه المرافق والخدمات المتدهورة كالصحة والتعليم والطرق (كمثال) يبدو أن حلها الجذرى يكمن فى اللجوء إلى الخبرات الأجنبية وأعتقد أن أكثر مجالين يحتاجان إلى (إسعاف عاجل) وإلى خبير أجنبى (سرو باتع) هما مجالى (الكهرباء والكورة) فقد أصبح الخلل فيهما واضحاً على الرغم من(القروش الإتصرفت فيهم) لذا فالعبدلله يدعو المسئولين (الكبار طبعن) للعمل على استيراد عدد واحد خبير (كهربجى) أجنبى عشان ينتهى لينا من مسألة (الكهرباء) دى ونخلص ، وكمان واحد خبير (كورنجى) أجنبى يرجع لينا الكورة دى أربعين سنة لى وراء أيام ناس جكسا وماجد وقاقرين والدحيش علشان ما يطق فى المشجعين ديل (عرق) يلحقهم أمات طه وهم يشاهدون هذا العك والرفس والشليت الذي لا يمت للكرة بشئ .
قد يتساءل البعض عن الآلية التى سوف يتم بها إستيراد هذا الخبير ؟ العبدلله يعتقد بأن المسألة لابد أن يكون فيها قدر من السرية إذ لا يصح أن تقوم الحكومة بعمل إعلان فى الصحف العالمية تعلن فيه حاجتها لإستيراد واحد خبير (خواجة) متخصص فى (متابعة) سير (التيار) من (السدود) وحتى (البيوت) ! لأنو حاجه (تكسف) أن تعلن بلد بحالها عن نجاحها فى بناء (سد) وعجزها عن توفير الكهرباء (الطالعة منو)!
وبما أن حكومتنا المجيدة تدعو للتقشف وترشيد الإنفاق أقترح أن يكون ذات الخبير بيفهم فى الكورة برضو يعنى يكون خبير (كورة وكهرباء) عشان بعد ما ينتهى لينا من موضوع (الكهرباء) يقوم يقبل لينا على موضوع (الكورة) وينجضو لينا وبى أقل التكاليف!
وحتى لا نكون عرضة للتهكم من (اليسوى واللى ما يسواش) والناس تقول علينا (عملو السد وما قدرو يوصلو كهربتو) فأنا أعتقد أن يتم التعاقد بدون ذلك الإعلان وبصورة شخصية (كتامى) ، وأن يتم تكوين وفد عالي المستوى من أجل إنجاز هذه المهمة يجوب بلاد العالم المتحضر متسائلاً فى كل قطر يزوره:
– يا جماعة ما عندكم لينا خبير (كورة) وتوصيل تيار سدود!!
حتى إذا ظفر أعضاء الوفد بأحد الخبراء وإطلعوا على ملف سيرته الذاتية وإتضح لهم أن (الخواجه) خبير (كورة وكهرباء) وقعوا معه عقداً وأحضروه معهم على نفس الطائرة:
– شوف يا خواجه الكهرباء دى زمااان كانت بتقطع عندنا عادى .. ساعة ساعتين تلاته فى اليوم … مره تقطع هنا ومرة تقطع هناك لكن بعد ما عملنا (السد) ده بقت تقطع كلو كلو وبقت البلد كووولها تقعد بالساعات فى (إظلام شامل) ! وكمان شوف لينا معاكا (كورتنا) دى زمان ما كنا بنصرف عليها ولا مليم لكن كانت عال العال نلاقى (الهونفيد) نغلبو نلاقى (الجن الأزرق) نغلبو لكن بعد ما بقينا نصرف عليها ملايين الدولارات بقينا ملطشة وما شلنا لينا ولا (علبت صلصة) !!
– أوكى … أوكى خواجه يشوف أول كهرباء بعدين يشوف كورة ! بعدين يوريكم الحاصل شنو!
قام (الخواجه) بزيارات ميدانية شملت كل المحطات الحراريه والمدارية والسدود والخزانات وتحصل على صورة من جميع الدراسات التى تخصها وكل البيانات اللازمة ثم بعد ذلك قام بزيارة ميدانية لكل الإستادات والميادين والفرق الرياضية وتم تزويده بالسيرة الذاتية لكل الإداريين والحكام ولجان التدريب واللاعبين وحتى المشجعين بعدها طلب الخواجه أن يعتكف فى مقر إقامته ليومين لدراسة المشكلتين ومعرفة الإخفاقات التى تلازمانهما!
– أها يا خواجه ما إتوصلتا لى مشكلتنا مع الكورة والكهرباء لسه ؟ ما لقيت لينا حل؟
– مفيش حل .. مفيش فائده .. الظاهر إنو مكتوب عليكم أى (كهرباء) تولدوها (تطلع) برة الشبكة .. وأى لاعب تجيبوهو (يطلع) ماسورة !

كسرة :
الغريبة عندنا حاجه إسمها (خبير وطني) وما بعيد على كده يكون عندنا خبير (شعبي) ّ
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

20 تعليق

    1. صحي بجيبن الرزق !!
      مبروكات عليك الاتنين
      ان شاء الله تخاوي ديك و دي

      1. آآآآي إن شاء الله

      2. اي كدولي
        اصبر لي بلاقيك ……… الحلة تجقجق والج……….. تلقلق

  1. يا بروف
    أعتقد أن أكثر مجال يحتاج إلى (إسعاف عاجل) وإلى خبراء أجانب (سرهم باتع) هو إستيراد ( طقم وزراء ) بالكامل وبعداك نشوف الخلل وين ؟؟

  2. من حكم الزمان أن الناس تخطط أنيا و إستراتيجيا لتطوير حاضرها ومستقبلها و نحن نتمني فقط لو عدنا لسنوات مضت .. لعمري أنه ( إنقاذ أحوص ) .

    1. ههههههه سمح ما نوديهم يحكموا تشاد يمكن يشوفونا !

  3. الكورة بلا الأجانب فيها منو يا بروف؟ و شوف حكمة الله طوااالي بجنسوهم ، و أظن المشكلة هني! كدي اليخلوهم يلعبوا بي جنسياتهم دي يمكن يعمروا!! أما مشكلة الكهرباء فدا حق أهالي (حلفا) الما وقف معاهم زول! ضحوا بي بلدهم عشانا و نحن و لااااا هنا و لا حتى متأسفين يا جماعة! طمعوا الناس في الكهرباء و كل زول لزم بيتو و لا مظاهراياية و حدة طلعت تؤازرهم . أها خموا و صروا ، تراهم الحلفاويين مبشتنين و سرطانات من الأسبستوس في حلفا الجديدة و خلوا الزراعة و جوا الكلاكلات و إنتو يا شعي السودان لا طلتوا عنب الشام و لابلح اليمن

    1. سِكِر في .. ويو فِينا
      حكمة الله جنّسوا اللاعبين الاجانب والسياسيين حققنا يتجنسوا بي جنسيات اجنبية !!
      مش آآرفين البلد دي رايه ألي فين !!

      1. همدو لله اوو جنوبي ، اوو تاا أأغرو منقا هااورو ان بلدٍ اركانا

  4. نحنا يا بروف نختصر الزمن ونجيب لاعب الارغواي المعتزل خوسيه موخيكا يلعب معانا موسم واحد قبل يموت ولو الناس اعترضت وقالت ده شيوعي نستني لاعب تركيا اردوغان في فك التسجيلات الجاية ونسجلوا يلعب لينا موسم موسمين واهو برضو هي لله تكون في محلها الصحيح !
    لعيبة الكورة زمان ناس الدحيش وكمال وقاقا ورفاقهم كلهم مهندسين ودكاترة ودبلوماسيين واقل واحد فيهم بكون بانكر ! هسي لعيبة الكورة الشغال فيهم بكون شغال عاطل ومراحله الدراسية يكون قاري روضة بالمساء والاساس اتحاد معلمين والثانوي من منازلهم .
    قصدك شنو بي خبير وطني دي !!؟ هييييي الزول ده بحب المحاكم !

  5. خبير وطني خبير شعبي خبير اتحادي خبير امي و خبير سانو وخبير مستقل جبانة هايصة

  6. يعني الليلة يا نونا وجنوبي رجعتوا لي أصلكم ، وقبائلكم ومن نسى قديمه تاه !! أيوه كده خلو عندكم وطنية وولاء وبراء لي أهلكم
    الطيبين وموروثاتكم ( الرطانية ) واللبيب بالإشارة يفهم أو لا يفهم !!! .. سلااااام ..

    1. سلام يا شيخنا ى، احنا طبعاً ولاءنا الأول و الدائم للرطانة لكن دا (حمدو في بطنو ) لأنو شي مفروغ منو و بنجابد للسودان الوطن الأكبر و الدليل تراهو سيفنا الرافعنو مع البروف (اللسان)

  7. وعليكم السلام ومرحب بيك بتي نونا كيف حالك وأحوالك إن شاء الله طيبة وفي أمن وأمان وجيداً جيتي .. بس ما تتكلموا لينا عربي إنتي وجنوبي عشان نفهم حاجة معاكم .. سلاااام ..

  8. يلا ترجم يا جنوبي .. اللغة (الهيروغلوفية) دي ما بفهما !! .. سلاااام ..

    1. قالت يا ريت الصمت الانتخابي للمنتخبين يعقبه صمت وصوم انتخابي من الناخبين
      ومحل الرهيفه التنقد

  9. هههههههههههه الله لا يقدها ولا يسدها !! مالكم قادنها لينا بلدنا الحلوة .. الله يقد الكان السبب في تدهورها .. سلاااام ..

    1. يقدو وين !!؟ وش مصدوووووم ,,
      هههههههههههههههههههههههههه

    2. ما تسمع كلامو يا شيخنا انا قلت هي لله هي لله!!! ههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: