مستشفى MTN لسرطان الثدي

قال لي صديقي (ياسر) الذي يشغل منصب المدير العام لإحدى الشركات :
– يا استاذ كتاباتك كوولها عن الأشياء السلبية .. البلد دي مافيها حاجة إيجابية تكتبوا لينا فيها?
– قلت له : والله لو شفنا شئ إيجابي بنكتب

– قال لي : هل تعلم بأن هنالك شركة سودانية (عالمية) خرجت من عباءة المفاهيم التقليدية (للبيزنيس) المتمثلة في التوسع وجني الأرباح وتوزيعها على المساهمين وأصبحت تشارك مشاركة فاعلة في بناء ونهضة المجتمع (السوداني) !
– قلت له : يعني شنووو؟ أنا بعرف شركات كتيرة تشارك في كثير من الأنشطة الإجتماعية
– قال لي : معظم شركاتنا وخاصة الكبيرة منها مشغولة بتحقيق مكاسب أصحابها فقط دون أن يكون لها دور فعال في تنمية المجتمع أو المشاركة في قضاياه المختلفة.
– والشركة الإنتا قاصدا دي عملت شنووو يعني؟
– الشركة القاصدا دي عندها مشروع سنوي إسمو (21 يوم لخدمة المجتمع) يبدأ في الأول من يونيو، ويستمر لحدت يوم واحد وعشرين .. في الواحد وعشرين يوم دي الموظفين كووولهم بمختلف درجاتهم الوظيفية (من المدير العام وإنتا نازل) بيطلعوا من مكاتبهم (المكيفة) عشان يخدموا المجتمع .. يعني ممكن تلاقي المدير العام طالع ليهو في سلم (بيضرب بوهية) ونائب المدير العام ماسك ليهو (مسطرينه بيبني) وواحد من رؤساء الأقسام بيعجن ليهو في (مونة) !
بيني وبينكم الكلام ده (ما وقع ليا في رأسي) فطلبت من صديقي (ياسر) أن يعطيني أمثلة لما قامت به هذه الشركة من (أعمال) فأخرج (ورقة من درج مكتبه) وقال لي (أمسك عندك) :
1- ساهم موظفو الشركة في اعمال تأهيل دار المايقوما للاطفال مجهولي الابوين ، وشملت اعمال الصيانه دار الاطفال فاقدي السند وتوسيع الصيدلية وانشاء صهريج مياه وتقديم معينات عينية.
2- قام الموظفون خلال (الواحد وعشرين يوم دي) باعادة تاهيل دار العجزة (الضو حجوج) وشمل المشروع الصيانه للدار والتبرع باجهزة حاسوب ومولد كهربائي واقامة يوم علاجي ، ودعم المسنين بالملبوسات ، بجانب تنفيذ جولة ترفيهية لهم داخل العاصمة
3- قام موظفو الشركة بدعم (دار الرشاد للاطفال المشردين) الى جانب اقامة يوم ترفيهي ليهم بمستشفي التجاني الماحي ، وقدموا للمشردين ملبوسات أجهزة تلفاز بالاضافه الى ملبوسات ومعدات رياضية ومواد الرسم.
4- بادر موظفو الشركة خلال هذه المبادرة السنوية (الواحد وعشرين يوم) بتنفيذ مشروع تدريب النساء ذوي الاعاقة الحركية لمبادئ الحاسوب والانترنت، وتم تدريب عدد 90 دارسةعلماً بأن المشروع ليستهدف عدد 450 دارسة.
5- قام ّ موظفو (الشركة) بأعمال الصيانة والترميم وإعادة تأهيل مباني مدرسة الصم والبكم بالخرطوم 2 حيث تمت صيانة المدرسة من الداخل والخارج، وصيانة مرافقها المختلفة: فصول، استراحات، المصلّى، ومكاتب الإدارة، وذلك حتى يجد تلاميذ هذه المدرسة بيئة دراسية مهيئة بإنتظارهم عند إنطلاق العام الدراسي الجديد.
أراد صديقي (ياسر) الإستطراد في سرد ما قامت به هذه الشركة لكنني قاطعته قائلاً :
– شوف يا ياسر .. جميل جداً إنو الشركات الكبيرة دي تطلع بمسؤوليتها الإجتماعية تجاه المجتمع العايشة فيهو .. وجميل جداً إنو الشركة القلتها دي تستن ليها سنة زي دي وتخصص ليها 21 يوم كل سنة عشان الموظفين بتوعنها يطلعو من مكاتبهم ويخدموا المجتمع وده شئ تشكر عليهو .. لكن
وهنا قاطعني صديقي (ياسر) قائلاً :
– طيب وكت دي حاجه كويسه ليه ما بتكتبوا عنهم؟
– أنا شخصياً ح أكتب ليك عنهم في عمودي بس بشرط
– شرطك شنووو؟
– زي ما قلتا ليكا شئ جميل إنو الشركة دي تخصص ليها 21 يوم من كل سنة لخدمة المجتمع .. لكن أنا شايف إنو حقو الشركات الكبيرة دي بدل ما تشتت مجهوداتها في (صيانة المدارس) وتأهيل (المعاقين) وحفر (الآبار) وإجلاس (التلاميذ) والحاجات الكتيره دي تعمل لينا حاجة واحدة (ضخمة) تخلد بيها إسمها وتقعد ليها صدقة جارية على مر الزمن ويستفيد منها كل الشعب السوداني !!
– زي شنوو؟
– مثلاً (مستشفي لسرطان الثدي) !!
– والله كلامك في محلو يا أستاذ !!
– خلينا من محلو ولا ما محلو .. الشركة إسمها شنوو؟
– الشركة هي شركة (إم تي إن) MTN
– يبقي خلاس .. مستشفى MTN لسرطان الثدي !!
كسرة :
قال لي صديقي (ياسر) وأنا أغادر مكتبه : يا أستاذ والله ورطتنا معاهم جنس توريطه !
كسرة تانية :
شكراً لشركة MTN على ما تقوم به من مشروعات مقدرة تخدم المجتمع .. ونحن في إنتظار (المستشفى) وللا من بكره نعمل ليكم كسرة : أخبار مستشفى MTN لسرطان الثدي شنوووووووووووووووووو!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :

Advertisements

20 تعليق

    1. انت زي حسن اخبار ود حلتنا يجي المقبرة اوووول زول وكوريك ساااي ما بشيل مع الناس !

  1. مقال رائع جدا ونتمني ان تتبني هذه الشركة العملاقه هذا المشروع الذي بإمكانه ان ينقذ الكثير من نساء هذا الوطن الجريح

  2. هههههههههههه
    كسرة ثابتة ( جديدة ) :
    خليتا فاضية ليه ؟ علي الطلاق انت رباطابي بس ! هو بالله ولايته انتهت ؟ شان كدي الليلة حاسي صدري واااسع وجواي فرحه غريبة كدي !

    قالوا عمك عوض وعمك علي ديل متشاكلين شكل السنين بيناتهم وفي سنة عوض بقي ماشي الحج وناس الحلة لقوها فرصة يصلحوا بينه وبين علي وقالوا لي عم عوض الماش يحج لازم يعافي أي زول عنده مشكله معاه لأنو ربنا ما بيقبل حجته كان ما مشي الحج وهو صافي مع الناس , عم عوض مشي دق باب عم علي وكوركلو : يا علي انا ماشي الحج ودحين العفو والعافيه يا خوي إلا بعد ارجع من الحج الحال فييييي حالو ..
    كسرة ثابتة ( جديدة ) : كان فزت السؤال فييي حالو .

  3. ام تي ان عااافنها من الواحد وعشرين يوم بس تطلّع 2.5% من ارباحا السنوية وتوزعا علي الفقراء تعدِم البلد المحتاجين !
    كان 21 يوم في السنة يكتبوا عنها يعني طارق الامين العدمان ده وعديل المدارس ديل يعملوا ليهم تمثال عدييل .!

    1. احييك ما بتحيينا ,,
      احححححححححححححححححح

  4. كلام كويس !
    بس الما قادر أفهموا علاقة MTN بالمؤتمر الوطني شنووووووو ؟؟
    لأن الموضوع ده طالما كان في يوم 26 من شهر يونيو السنة الفاتت الجاب سيرتو في اليومين ديل تحديدا شنوووو؟؟
    غايتو إلا تكون صدفة ساي !!
    وكمان ياريت تكون الحاجات دي حقيقة مش دعاية إنتحابية !ّ

  5. ههههههه الله يخزي شيطانك يا جنوبي ضحكتني .. طيب يا أخونا مالو ما يبقوا مؤتمر وطني ولا مؤتمر همجي !! المهم إنهم يعملوا ليهم حاجة تنفع الناس المساكين ديل ربنا يكون في عونهم وبرضو أهو شعرة … سلااااام …

  6. باقي أيام وتفوز السُلطة
    ونرجع تااااني عشان نتهان
    نفس الريّس ونفس الوزراء
    والسودان ياهو السودان
    مافي جديد الناس تفرحبو
    وياها الوجعه في كل مكان
    وياهو الظُلم السايد فينا
    وعفن العسكر والكيزان
    ياها المدن الصاحية تمنّح
    وجارية دموعا علي ام درمان
    ونفس الليل بي وجعو المؤلم
    وطبق الاصل من الحِرمان
    ياهو الوطن اب شارع ينزف
    لا في سلامة ولا في أمان
    اخبار الانتحابات شنو يا ناس جوه ؟
    الحكومة تدعو الشعب يصوّت !
    الشعب : ورورووووووووووووووووووووووووك

  7. سلام يابروف ..
    الكثير من الشركات والمؤسسات الخاصة تقوم باعمال خيرية وانسانية , وعلى راسهم مجموعة دال ,, كمان شركة سودانى للاتصالات وشركة زين ,, ربنا يصلح الحال ويعدل المائل …

  8. اللهم آااامين يا ود شمباتي .. وحقو يا أخوانا نشجع أي مبادرات لمساعدة أهلنا الطيبين بدل التريقة !! ولا مش كدا … سلاااام ..

    1. ما اتريقنا يا نانو لكن شنو يعني يقول ليك 21 يوم يساعدوا في بوهية ولا نضافة ؟!
      الدعم الصحي بفيد المواطنين انا شايفه الدعم بتاع شركة النيل للاعشاب ولو انت بتحضر برنامج بنك الثواب في قناة قون شوف ناس شركة النيل للاعشاب بيتكفلوا في كل حلقة بعلاج كم حالة .. انا مرة حضرت حلقة واحدة شركة النيل اتكفلت بي اكتر من مية وستين مليون فيها . شان كده انا قلت عافنها من ال 21 يوم وتدي المحتاجين نسبة من ارباحها .

      1. أوووو عمنا أبوأحمد
        حاشا لله ما إتريقنا
        ولكن سؤالي لازال لم يجد إجابة !
        لماذا الإعلان عن هذه المبادرات والتبرعات في هذه الأيام بالذات بالرغم من مرور (تسعة شهور) عليها ؟؟؟
        وهل في ذلك قصد ؟؟
        كم نسبة المبالغ المُتبرع بها مقارنة بأرباح الشركة ؟
        هل صيانة المدارس تندرج تحت ( الوقف ) ؟
        هل صيانة المدارس تساعد أهلنا الطيبين الغلابة ؟
        فالشركات العائلية كانت من أهم المساهمين في العمل الخيري ( الضو حجوج ) و ( إبراهيم مالك ) مثلاً أما الشركات المساهمة في السودان يعتبر دورها ضعيف جداً في دعم العمل الخيري مع العلم بأن رأس مال الشركات دي يعتبر كبيراً جداً بالمقارنة مع الشركات العائلية وكل المطلوب من الشركات المساهمة هو إقناعها وإقناع مجلس إدارتها والمساهمين فيها بضرورة القيام بدورهم بالمساهمة في هذه المبادررات و بشكل أكبر
        وبرضو شوف الخواجات لم يبخلوا بشيء علي بلدانهم بل وعلى البلاد الإسلامية من مستشفيات ومدارس وعلاج وغيره ولا ننكر أن هناك أهداف أخرى ولكن لعدم وجود المبادرات المحليه شجعهم ذلك على العمل الخيري ذو المآرب الأخرى فياريت لو شركاتنا عملت شيء تستفيد منه الوطن آنياً ومستقبلاً ( أوقاف) لوجه الله بدون رياء ولا سمعة
        وكده نكون قد ضمنا موارد مالية كبيرة تدعم العمل الخيري المفيد للبلد بشكل كبير ولأمد طويل.
        سلاااااااااام

      2. يا شباب إنتو برة البلد و يمكن ما مطلعين عشان كدا! ياالمندهش الناس ديل ما إتكلموا الأيامات دي بس يمكن صادفوا البروف بس الأيامات دي لكن طوااااالي قادننا بال21 يوم ديل بل و كمان بإعلانات ثابتة على طول بعض الشوارع منها شارع الستين ، و على فكرة عندهم حملات صحية كتيرة و بالأخص في العيون و برضو بإعلاناتها و مش كدة و بس و كمان الجرائد ( عااادي صفحة و صفحتين) . و الناس دي طبعاً قصدها توري إنهم مواكبين لأنه من أهم متطلبات الم}سيية في القرن ده بقى موضوع المسئولية الإجتماعية Social / community Responsibility وهم عاوزين يقولوا إنهم قايمين بواجبهم على أكمل و جه و خصوصاً و إنه الحكومات ما بترغمهم عليها (تطوع منهم سااكت) شان كدا يقدوا أضانك بيها. أما عن زين و أخواتها فهي (راعية بي قيدها بي هناك) حالات خاصة و حفلات تكريم و يترعى جوائز كمان (زي جائزة الطيب صالح) و أي حاجة عندها (تماس) مع الحكومة!!!! و برضو بي إعلاناتها!!!! على العموم ، من وجهة نظري الخاصة و بحكم مقعدى (الوهيييط) كمراقب (ما إنتخابي) بشوف إنو فيما يخص شركات الإتصالات، ناس MTN بحتكوا بالناس أكتر بالرغم من الشوفونية بعد داك (حفروا آبار كتيييرة في بعض القري) و في النهاية بيفوز المواطن و الحشاش يملا شبكتوا!! لكن ناس دال شغالين شغل منظم و متوااااصل ما بنقطع و منها مشروع 5*5 و بستقطعوا من العاملين 5 جنيه كل شهر و بصلحوا بيها المستشفيات و المدارس و عندهم في رمضان مساعدات و أيامات الكارث (الكتيييرة العندنا ) كمان ما بقصروا مع الناس لكن حقيقةً ما بعلنوا عنها بنسمع بيها من العاملين بس! و أجرهم بي نيتهم على الله، المهم الناس تتعالج و تروى و تتعلم (إحنا حنشتغل شغل الحكومة؟!!!)ههه

      3. صدقتى يا نونا يا بتى ….

      4. يا نونا يا بتي …..
        سلااااااام
        عشان نبعد من الشوفونية دي وما تكون المبادرات دي مجرد دعايات ،، ياريت لوكانت منظمة وبطريقة علمية مدروسة وسوف يساعدهم الإعلام في ذلك بل بالعكس سوف يكون مردودها الإعلامي أكبر لو كانت منظمة يعني ومثال لذلك يمكن
        1- تقديم المساعدات للشرائح الضعيفة عن طريق برنامج (شراع الأمل) الذي تقدمه الإعلامية “رانية هارون” بقناة (الشروق) على أن تكون إحدى المؤسسات او أكثر راعية للبرنامج .
        2 – برنامج (بنك الثواب) بقناة (قوون) الفضائية للإعلامي “عبد الله محمد الحسن” يهتم بالمشاكل الصحية وراينا أنه يجمع عشرات الملايين في الحلقة الواحدة برضو يمكن تبنيه ورعايته من عدة مؤسسات وشركات بالإضافة للتبرعات الشخصية وبكل بساطه يمكن عن طريق هذا البرنامج علاج المرضى وبناء المستشفيات .
        3- برنامج (أهل الخير) بالإذاعة الرياضية وبرنامج (البيوت) بالإذاعة القومية.
        4- برنامج (عديل المدارس) في (النيل الأزرق) للنجم الكوميدي “طارق الأمين” برنامج تطوعي يهدف لإعمار وصيانة المدارس وإعادة تأهيلها في كل أنحاء البلاد بمشاركة مجموعة من الشباب المتطوعين ومساندة عدد من المؤسسات والهيئات الخيرية على رأسها شركة (دال)، نجح هذا البرنامج في صيانة وإصلاح أكثر من (200) مدرسة فتخيلي لو كانت شركة (دال) وجدت منافسين لها في عمل الخير فانا متأكد أن إسهامها سوف يكون ضعف ما تقدمه الآن.
        فلو الناس قعدت في الواطة ونظمت نفسها وتركنا الشوفونية ممكن بكل بساطة .. نعمل حاجة نفتخر بها ونطلب من أساتذتنا ناس جبرا يكتبوا عنها .

  9. دى خالية من الموانع (لا بينسون و برنجية)

  10. شركات الاتصالات ملزمة انها تدفع جزء من اربحاها في خدمة المجتمع يا استاذ الزول صحبك ده كذاب للاسف بس انت ورطتو بي قصة المستشفي لانك طيب لكن ارجو من الناس تراجع قوانين شركات الاتصالات لذلك ناس وين قجمو كان عربات اسعاف وده كلو عشان ملزمين وليس خدمات اجتماعية مقصودة زيها زي الخدمة الوطنية فصاحبها مجبر غير موجر

  11. دايما تعليقك في انتظار المراجعة لي يابروف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: