عنترة ينتخب (منع من النشر)

أخذ (عنترة) يتقلب في فراشه وهو يستمع إلى أصوات تنطلق من الشارع (صوتك في الإنتخابات أمانة أيها المواطن) .. (أيها المواطن سارع بالذهاب وأدل بصوتك)
– ما هذه الجلبة يا عبلة !
– ويحك أنسيت يا عنترة أن اليوم هو يوم الترشيح
– لقد نسيت يا عبلة .. (الما بنسينا شنووو)

– هل ستذهب يا عنترة للإدلاء بصوتك ؟
– بلي .. قومي وجهزي لي بعض الشاي
– لا يوجد بالبيت شاي
– إذن ففنجان من القهوة
– لا يوجد بالبيت بن وللا سكر ذاااتو
– إذن أبعثي الجارية لتأتينا ببعض البن والسكر والشاي
– أنتا نسيت يا عنتر أنو الليله يوم تلطاشر في الشهر ؟ و(الخيمة) عدمانة المليم ؟
بدأ عنترة في إرتداء ملابسه وقام بإمتشاق سيفه وتوجه نحو (فرسه) يجهزها فيما بادرته عبلة :
– إلي أين تذهب يا عنترة؟
– إني ذاهب للإدلاء بصوتي
– إنتظرني لأذهب معك
– هل جننتي يا إمراة .. لا يحق التصويت للنساء !
– والله إنتا الجنيت .. فاطمة إبنة عبدالمحمود مرشحة عديييل .. خليني أنا العاوزة أصوت
– أهذا صحيح يا عبلة ؟
– بلى يا عنتر (والعلماء ساكتين ساااااااي)
– إذن إركبي هودجك وأتبعيني
عنترة يسير وسط شوارع (متسخة) ومغطاة (بالحفر) حتي إذا ما وصل حيث تقع (لجنة إنتخابات بني عبس) أناخ راحلته ثم انزل عبلة من هودجها قائلاً لها :
– الشوارع دي فاضية كده مالا؟ أنكون قد أخطأنا المكان؟
– لا لا لم نخطئ المكان يا عنترة .. ياهو مركز الإقتراع ما شايف البوليس (النايم في الكنبة داااك)
– إذن فلندخل لندلي بصوتينا
يدخل عنترة إلى خيمة التصويت .. يتوسط الخيمة صندوقان كبيران من الخشب أمام كل منهما يوجد شخص ذو لحية كثيفة و(عمامة خضراء) وبين الصندوقين توجد منضدة كبيرة يقف خلفها شاب يرتدى فوق ملابسه (مريلة بنية) مكتوب عليها .. (لجنة إنتخابات بني عبس)، إقترب نحوه عنترة بخطوات ثابتة :
– مرحباً
– أهلاً يا أخ العرب
– أهذا مكان الإقتراع والتصويت يا هذا؟
– بلى
– مالي ارى المكان خالياً ؟ أين بنو قحطان ؟ أين بنو طئ بل أين بنو القعقاع؟؟
– ديل كووولهم مقاطعين !
– وأي القبائل لم تقاطع ؟
– بنو (كوز) بس !
– ولماذا لم ياتو ليصوتو؟
– ما ضامنين وكده
– إذن نريد أن ندلي بصوتينا
– ما إسمك ؟
– عنترة بن شداد العبسي
يقوم الموظف بالإمساك بقطعة من الجلد عليها أسماء المقترعين وهو يتابع بسبابته … عنترة … عنترة … عنترة ثم يرفع راسه مخاطباً عنترة :
– الظاهر إسمك ده (سقط) !
– (وقد تطاير الشرر من عينيه) : ويحكم ؟ كيف يسقط إسمي من الكشوفات – ثم يستل سيفه ..
– يا عنترة ياخ أهدأ في مرشحين رئاسة عدييييل .. أسمهم سقط خليك إنتا
– هذه فوضي .. هذا عبث .. أين رئيس هذه الديار !
– إنتا قاصد الأصم ؟
– أصم؟ مكر؟ مفر؟ مقبل معاً .. هذا لا يعنيني دعوني أصوت وإلا أعملت سيفي هذا فيكم !
– (وهو يرتجف من الخوف) ) سمعاً وطاعة .. خذ قائمة المرشحين هذه واختر منها الشخص الذي تريد التصويت له وضع علامة صح داخل الدائرة التي أمام إسمه ! (يناوله قطعة جلد) مكتوب عليها أسماء ورموز المرشحين …
– (بعد أن يقرأهم) : قل لي من هؤلاء فإني لا أعرف أحداً منهم؟
– ديل المرشحين للرئاسة ؟
– وهل هم من عبس؟
– والله هم من (عبس) بس في واحدين عندهم (جنسيات) تانية !
– وإن قامت الحرب مع من سوف يحاربون ؟
– يا عنترة يااخ ما تصعب الحكاية .. المفوضية سمحت ليهم !
– لن أعطي صوتي وصوت عبلة لأي منهم لأننا لا نعرفهم !
– خلاس صوت للبتعرفو
– أتقصد (الشجرة) !
– يعني بقصد (الحماداب) ؟
– (هنا .. تتداخل عبلة) : شجرة شنووو يا راجل عنترة ده شاي الصباح ما شربووو !!

كسرة :
قيل أن عنترة قبل أن يغادر (مركز الإقتراع) أخرج من جيبه (علبة ضمنة) وناولها للموظفين قائلاً :
– إتسلو بدل قاعدين كده سااااكت !!

– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

Advertisements

26 تعليق

  1. برنجييييية قبل ما اقرا المقال و مبروك لينا انا و البشير اخوي

    1. ألف ألف مبروك الفوز

    2. مبروك ليكي انتي واخوكي القلتيهو ده يبركوا فوقو خنق ان شاء الله

    3. يباركوا ليكم السمح. و انت يا جنوبي مالك عليهو ، يبرى يا يمة!!!

  2. ههههه والله ليهم حق يمنعوها يا بروف حمضتها لكن المرة دي

  3. مواطن مطحووون | رد

    ههههههههههههههههههه ههههههههههههههههههه منافقين بلآ يخمهم ي رب اللهم ذكرهم كما دمروا السودان ي عزيز ي جبار

    1. مواطن مطحووون | رد

      دمرهم*

  4. بالغت يا راجل !!
    وهو عنترة زااااتو المتعنترلها شنو وكتين بمش يسوط إسوط عيونو
    ولا إمكن سمع بالقرار الصادر اليوم :
    (أن أوامر مشددة صدرت بالمشاركة في التصويت اليوم..
    و إنه قد تم ربط التصويت بصرف الأجور وفقاً لاستمارة مخصصة لذلك)

  5. واحد شغال في مركز اقتراع ..قالو ليهو اها امس الانتخابات كيف ..قال ليهم والله جانا زول واحد وضهبان قال لينا هنا في شنو ؟

  6. هههههههههههههه

  7. نحنا والله من زمان محتارين يا جبرة انت مقالاتك دى كيف بسمحوا ليها تمر وما بمنعوها الليلة يا دوب اقتنعنا انو ما شغل تنفيس وكدة

  8. هههههههههههههههههههههههههههههه , حنضل جد ,,
    بعد الغياااااااب تعود بقوة يا بروف …..

  9. شكراً كتر خيركم علي المباركة ، وأنا أصلاً كان صوتوا ولا ما صوتوا ، وكان باركتوا ولا ما باركتوا ، كده كده فااااائز .. والما عاجابوا يمشي يشرب من رهيد البردي ديييك ياها !!! .. معليش نسيت أبارلك برنجيتيك بتي نونا وخليك من جنوبي أصو حاسدك عديييل !!!
    .. سلاااام ..

    1. انت من زمن رهيد البردي فيها موية !؟
      الخمسة الجايات ديل ناس المقرن بيعطشوا !!

  10. عنترة قلت قبيلة بني كوز لي ما ضامنين !!! ….
    والله ديل لو ما ضامنين بنسبة واحد في المية ما بفتحوا السيرة دي …. الصناديق الحتتفرز قاااااااعدة … والنتيجة مطبوعة … بس يجي الأبكم ….. عفوا الأصم يقراها ليكم ….

    أنا لو سألتكم …. أدوني سبب واااااااااااااحد بخليني أصوت لي الجماعة ديل للخمسة سنة الجاية ….
    هسة بقوم وبحلف حرام على بيتنا كلو يقوم يصوت معاي ….
    بس أدوني سبب واحد !!!!!

    الله لا جاب عقابكم … !!

    1. ح يطبّقوا الشريعة
      بس كان في الخمسة دي ولا تااااني ح يحتاجوا لي خمسة تانية !!

      1. المدغمسة دي ولا واحدة تانية … ديل نحنا ما دايرنهم …. دايرين حكم الله … وهي لله !!

      2. اتكلم عديل يا زول ……….. ولو غلبتك اسال مولانا

  11. علاء الدين عثمان العوض | رد

    هم لو مامنعو وح يمنعو الذي ده قاعدين سته وعشرين سنه

  12. اها يا جماعه نبارك ولا لسه ما اعلنوا الخبر !؟
    بس زي البقول ليك بت فلان خطبوها لاكين الخبر داسنو !!

    1. الله يبارك فيييييييييييييك يا جنوني !
      بارك يا اخوي بارك
      قالوا فاز بنسبة 99,99% وللأسف في 01, % راحت للمرشحين التانيين حنشوف الصّوت ليهم منو أكيد من العملاء الخائنين لوطنهم ونعدكم بأننا سنعيد النتيجة لوضعها الطبيعي 100% وسير……. سير

      1. 0.01 % بكونوا ناس اتحاد تجار البامبرز ادوها للطفل المعجزة .

  13. حكاية ايوب دي ما وصلتنا لسة

  14. مبروك قالوا نافع ومصطفى عثمان والزبير فازوا …
    لكن أتفاجأنا جنس مفاجأة !!!!!!!!!!!!!!!

    أوع كمان يفاجأونا ويقولوا البشير فاز !!!!!!

    اللهم إنت عالم بما يفعلون .. أرنا دلائل قدرتك فيهم.

    1. واحد مسطول مرتو تعمل حلة طبيخ واااحدة وتختها في التلاجة وكل يوم تسخن ليهو وتديهو يتغدي , اول يوم وتاني يوم وتالت يوم .. رابع يوم سمع المرا بتكركب في المطبخ , اتكيف قال الليلة طبيخ جديد , المرا جابت الغدا بتاع امس زاااااتو و رب ختتو قدامو !
      قال ليها وكت غداك ياهو نفسو عمر البشير ده !؟ كركبة الانتخابات الساواها في المطبخ دي شنو !!!؟

      دلائل قدرتو ما يدي الورانا ليها زول بي مليون صوت يحكم 40 مليون !! بس الحمد لله البجي من الله كله سمح !

  15. ظالمني شوف من كم سنة (89) ربع قرن | رد

    ههههههههههها
    الناس خلت مراكز الانتخابات فاضية
    بس ديل ما بفهموا ناس بني كوز ديل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: