عنترة ينتحب (لم ينشر)

ما أن عادت عبلة إلى خيمتها من مناسبة زواج أحدي صديقاتها في مضارب قبيلة بني القعقاع حتي تفاجأت بمنظر لم يكن في حسبانها .. لقد وجدت عنترة يجلس في (نص الخيمة) وهو ينتحب ويجهش بالبكاء و(يجعر) ، يضرب بكلتا يديه على الأرض حتي ترتج فيرتفع الغبار حتي يلامس (سقف الخيمة) ثم يقوم بشد شعره حتي يسمع له صوت :
– (وهي تدق بيدها على صدرها) : سجمي أبوالفوارس قاعد يبكي ؟ ووووووب عليا يا عنترة مالك؟ ما خليتك كويس ؟

– (تزداد ضربات عنترة علي الأرض فيتطاير الغبار)
– (وهي مهجومة) : (شيبوب) جابوهو من الأردن (ميت)؟
-( يزاداد عنتره في شد شعره حتي يسمع له صوت)
– يا راجل ما تجنني مات لينا زول في (شارع مدني)؟
– يواصل عنترة الإجهاش بالبكاء !
– نشلوك الماهية؟ – مواصلة- كان نشلوها الينشلوها هي فايدتا شنوووو
– (تزداد ضربات عنترة علي الأرض فيتطاير الغبار)
– يا رااجل هوووي ما تبوظ أعصابنا اصلها بايظه ؟!
– هل أغارت عليكم بني يقظان
– – يا وليه يقظان مين وحلمان مين (ثم يجهش بابكاء)
– طيب شنوووو؟
– (وهو ينتحب) : لقد ضاعت بني عبس .. فلا حاضر لها ولا مستقبل
– والكلام ده داير تكتشفو هسه يعني .. ما ليها ربع قرن ضائعة !
– هذا ما يبكيني يا عبلة ويدمي قلبي .. ربع قرن عرفناها كمان جابت ليها خمسة سنين تااااني
– ويحك يا عنترة .. أتريد أن تقول أن الجماعة فازوا؟
– تتخيلي يا عبلة؟
– (في إستغراش) : فازوا؟ والله دي حاجه تحير .. كيف يفوزون يا عنترة ، ألم تري بأم عينيك كيف كان مركز الإقتراح خاليا .. لحدت ما أديناهم (علبه ضمنة ) يتسلو بيها ؟ كيف لهم الفوز والناس كووولها مقاطعة؟
– (تاخد ليها نفس وتبدو على ملامحها علامات الإرتياح) : يا أبا الفوارس إن البكاء لا يشبهك … يعني كان متوقع يفوز زول غيرهم؟
– كيف لا أبكي إلى متي يحكمنا أبناء (الشيخ زهير) العشرة هؤلاء!
– أتعني شاس، وقيس، ونافع، ومالك، وخداش، وغندور، وكثير، وجندل، وقوش، ونهشل ؟
لقد أذاقنا هؤلاء القوم الذل والمهانة وأورثونا الفقر والجوع أنظري يا عبلة إلى فرسي (الأبجر) كيف نقص وزنه من (عدم الأكل) حتى صار كماكينة الخياطة سنجر!
– أبجر شنو ؟ عبس دي كووووولها رقدت سلطه من أكل فول الحاجات والطعمية !
– (يقوم من مكانه ويشرع في تجهيز نفسه بينما عبلة تراقبه) : إلى أين أنت ذاهب يا عنترة؟
– ويحك أتريدينني أن اسكت على هذه المهزلة ؟ خمسة سنين تاني وما زال بنو (غسان) هاربين بالغنيمة وبنو (بدر) بدنانير (هيثرو) .. وبنو (قطان) ما جاتهم التكتح؟ وأموال بني عبس (تلغف) نهاراً جهاراً ؟ سأمتشق سيفي وأغير على مضاربهم وأقضي عليهم فردا فردا !
– والله ياكا اللحقتا أمات طه … هسه يفكو ليك المليشيات ديك يجيبو خبرك ويطلعوك عايز تحرق ليك طلمبة !
– إذن سوف أجمع حولي فرسان من بني بعث وبني شيوع وبني أنصار وبنى ختم !
– لو منتظر ذي ناس بني (ختم) ديل يغيرو ليك الوضع ده تكون بتحلم هسه حصل شفتا ليك واحد من أولاد بني (ختم) ديل في مظاهرة ؟ ما السنه كووولها قاعدين في مضارب (لندن) و(القاهرة) !
– إذن ما العمل .. شنو الورطه الوقعنا فيها دي !
– العمل عمل ربنا يا عنتر .. كدي أقعد أعمل ليك كباية ليمون باااارده تروق دمك ده إحتمال ناس (مبارك وبرطم) يعملو حاجه !!!

كسرة :
شرب عنترة كوب الليمون وإتكأ متوسداً إحدى يديه وهو يردد (يحلنا الحلا بلة) .. (يحلنا الحلا بلة)

– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

Advertisements

28 تعليق

  1. فعلا عليها وعلينا ان ننتحب

  2. وكت ما قلت برنجية يا عبيد then برنجية انا

  3. بلة ذاااتو فاز يا بروف ، مش طلع من بني (شجرة)؟

  4. بلة جابر ذااااتو ختوهو كنب !!!

  5. بلة الغايب ……….. ممنوع من النشر

  6. مبروووك البرنجية يا ود العبيد بعد غيبة طويييلة .. وهو يا بروف بلة ذااااتو داير الليحلو لأنو ديل سيييك سيييك معلق فيييك !!!وماتتسلبطي ساي يا بتي نونا البرنجية راحت عليك !! إنتو الليلة ويين جنوبي وود الشمباتي ما ظهروا ؟؟ وجنوبي أظنو سفروا خروج نهائي عشان لسانو طويييل قالوا لي تاني ما نشوفك في الشمال ، هههههههههههه ، .. سلاااام ..

    1. هو البروف الليله منزل المقال باسم التوم نعرفو ليك كيف !؟ ههههه
      انا من قبيييل قايلو ياهو حسن لقيتو حسين

  7. كأني سمعت احدهم ينادي بني شيوع ! هلم بنا يا ابن الشمباتي لنري من المستغيث !
    الخت قانون الانتخابات وما خت شرط تصويت نسبة معينة من عدد المسجلين كشرط لقبول النتيجه يخطوهو في نار جهنم ان شاء الله
    واي زول يحكم شعب بدون ارادته يجيهو تبوّل لا ارادي ان شاء الله
    يعني اعلي نسبة تصويت تكون في معسكرات النازحين دي يفهموها كيف ؟.

    1. كـــُـــر ,,,,,
      اللهم آآآآمييييييييييين ،،،

    2. نحن هنا وانتو هنا عاد اللقاء بيننا ,,,
      سامتشق سيفى واتدرع بدرعى واكتب وصيتى ,, فقد ازفت الازفة ,, ليس لها من دون الله كاشفة ,,
      لكن يا جنوبى ياخوى فى نسبة تصويت ,, واقل من 30% تعتبر الانتخابات لاغية ,, الغجر ديل عارفين اللعبة وجابوا نسب مضروبة ,, اتفوووو عليهم

  8. هو وينو ود الشمباتي دا ؟ قاطع موية ونور من زماان أظنو كان مؤازر ود العبيد !! أها ود العبيد ظهر ، يلا أظهر وبان عليك الأمان .. ويا جنوبي ما قدر دا مالك بتدعي على الناس ( ليس المؤمن بطعان ولا لعان ولا فاحش ولا بذئ ) ألا هل بلغت اللهم فأشهد .. سلاااام ..

    1. انا قاااااعد لكن فوق راى يا شيخ نانو !
      بعدين جنوبى دا لا طعن لا لعن ,, مع انهن يستاهلن المطاعنة والملاعنة ,, ووالله لا اجد امرءا مؤمنا يخشى عليهم من الدعوة ,, مع انهم يهود والدعوة ما تمشى فوقهم ,,
      شحدت الله يلقوا فى سماعاتهم ودماعاتهم ,, وفى وليداتهم وجنياتهم ,, لا يصبحوا لا يمسوا , لا يلمسوا لا يحسوا …

      1. عاد يا شيخ نانو اسمح لي معليششش ، آمييييييين يا شمباتي

      2. هيييييييييي سيد الهناي جا
        تاااااني
        كـــُـــر ,,,,,
        اللهم آآآآمييييييييييين ،،،

      3. إنتو كدي تعالوا منو القاعد يكتب لينا بالصينى دا ؟؟ في واحد كل مشاركاتو بتجيني بالصيني !! إنتو معانا صينيين ولا شنو ؟؟ ولا يمكن يا ربي يكونو من الجماعة الدرسو في الصين وفكوهم بتجسسوا علينا !! يلا شيلوا شيلتكم ياجنوبي وشمباتي ونونا .. سلااااام ..

    2. يا نانو الحديث ده كان صحيح 100 % عدد المؤمنين في الدنيا ما بكون اكتر من عدد الناس الصوتت في الانتخابات !
      نان ائمة المساجد ديل ماااالن هارين اليهود والامريكان شتيمة ولعن ؟ ولا الحديث خاص بالمسلمين في ما بينهم !!؟
      شمباتي انت متأكد من الـ 30 % دي ؟

  9. يا إخوان رداً على تساؤلاتكم ، قال أهل العلم فيما يتعلق باللعن :

    الكفار غير المعينين كاليهود والنصارى وغيرهم عموما، قد ورد لعنهم في كتاب الله عز وجل حيث قال تعالى :
    ” لُعِنَ الَّذِينَ كَفَرُوا مِنْ بَنِي إِسْرَائِيلَ عَلَى لِسَانِ دَاوُودَ وَعِيسَى ابْنِ مَرْيَمَ ذَلِكَ بِمَا عَصَوْا وَكَانُوا يَعْتَدُونَ (78) كَانُوا لا يَتَنَاهَوْنَ عَنْ مُنْكَرٍ فَعَلُوهُ لَبِئْسَ مَا كَانُوا يَفْعَلُونَ {المائدة: 78-79} .. وجاء لعنهم في الحديث الشريف ، روى الشيخان من حديث عائشة رضي الله عنها أن النبي صلى الله عليه وسلم قال : ” لعن الله اليهود والنصارى، اتخذوا قبور أنبيائهم مساجد ” وهذا لا يتنافى مع قوله صلى الله عليه وسلم : ( لا يكون المؤمن لعانا ) ، لأن لعاناً هي صيغة مبالغة ، ومعناها كثير اللعن .. أما اللعن لمن ورد لعنه في الكتاب والسنة فلا بأس ولا حرج فيه .. والله أعلم .. سلااااام ..

    1. أفادك الله يا شيخنا!! أها كمّل جميلك و أفتي لينا في الجماعة العندنا ديل كفار و لا مسلمين ؟؟ عشان بعداك نعرف إحنا لعنّا ولا لعّنّا!!!

      1. يا بت ألعني لعنك ! وحات الله تسمعي كلام نانو ده تنشقي مغسه ساااااي !
        ادروب قال : الحديث ده دعيييييييييييييييييييييف .

  10. سوءال فنى يا اخوان،،، نحن لينا زمن كنا بنسال عن (أمات طه) و ما حصل لهن ،، و جاتنا عدد من الإجابات و لكن و لا واحدة فيهن مزبوطة …
    ما علينا ،،، الان ،، ورونا (بلة دة اتحلا) كييببيف؟
    فقط لنستفيد و تعم الفائدة الجميع !! يمكن نعرف نتحلا نحنا زااااتنا !!

    1. بلة دا يا فالوديا ( دي دلع فلاديمير ) , بلة دا – الله يكرمكم – كان ماسكو امساك من النوع ابوكديس ,, شهر ما فكاهو ,, اها يوم لما فيهو خواجة اداهو كيس صغير كدة ( ملح انجليزي ) وشربو واتحلّ جنس حليل !!!!!

      1. هوووى يا ركسونا (دى دلع ركس) ما تزيف الحقايق ! طااااااااااااااااااخ ..
        اجى احلك ؟
        هيييييييييييييييييق

    2. امات طه في الادب القديم قيل اربعة اخوات بايرات واختهن الصغيرة ويقولون ستة اخوات واختهن الضغيرة قل انما علمهن عند حبوباتنا.
      اهن كلللهن بارن وفاتن القطر وقطعن , الا اختهن الصغيرة جاها العدل مع شايب عجوز قعد معاها كم شهر ومات , الا خلي ليها جنا في بطنها والجنا ياهو طه ده , وطه اتربي مع امه وخالاتو ديل وكل واحدة بقت تعامل طه كأنه ولدها هي ودلعنو دلع شديد ودلعن ليهو كان بخلي باقي الشُفع يتتريقو عليهو وطه زهج وحزرن كم مرة لو ما غيّرن معاملتن ليهو بيطفش ويخلي ليهن البلد , الا هن مااا غيّرن تعاملن ويوم باللييييييييل طه صرّ هديماتو في بقجه وطفش , صحن اماتو الصباح وما لقن طه في عنقريبو جقلبن وكوركن وبقن يتجارن في كل اتجاه وكل واحدة مسكت درب تفتش وفي فتيشن طقن الخلا يفتشن لااامن ضهبن في خلاهن وماتن بالعطش .
      ( عن العتالي السابق شوقي بدري بتصرّف جنوبي ) حكمة الله ود بيت العلم يلقب نفسه عتالي سابق ولقب الخبير الوطني تحمله الكلاب !! يلا ما علينا كل واحد واصله وفصله !
      في الادب الحديث :
      طه رمز للشعب السوداني واماتو ياهن حيكومات السجم الحكمننا من الاستغلال ديل ! وقيل ان الحيكومات ديل كان بيعذبن طه ويبهدلنوا لما بقي مضرب مثل بين الشعوب وبقت الشعوب تعيّرو بي مشيهو اللا وراء ده , وطه كل مره يقول لي اماتو كان ما غيرتن معاملتكن لي بطفش واخلي ليكن البلد , وهن ولاااا غيّرن معاملتن ليهو , يجيبن الغداء بالصينية الكبيييرة ياكلن ويدن طه صحن لايوق صغييير بي كسرة بايته , طه زهج من اماتو ومرق يدّور لقمة العيش في بلاد الله الواسعه واماتو بقن يفتشن فوقوا ويلحقنو في كل بلاد الله , ماااااا عشان يرجعلهن ! عشان يقسملهن من لقمة عيشو المرق يفتشلها دي !
      صفقة لي امات طه في الادب القديم وصفعة لي امات طه في الادب الحديث ..
      كمان ماشي جاكرتا ياااا بتاع الكرته !!!؟
      احكي ليكن حقت شيخ بله الهرش وبلّغ سلام امه للخليفة ؟ أبييييييييييت ..

  11. هووووي يا جنوبي هوووي أخير ليك أرعى بي قيدك ما تخليني أوديك (التوج) مش واو بتاعتك ديك !!! مالو كلامي لمن تقول لي بتي نونا ” وحات الله تسمعي كلام نانو ده تنشقي مغسه ساااااي ” !!! وخلي أدروب المفتي بتاعك دا يحلك مش الحلا بله .. سلاااام ..

    1. هههههههههههههه
      ما حميتنا نتفشّ دايرنا ننتحر زي عنترة
      خلينا نشتّم يمكن الشتيمه دي تريحنا شووووووويّه

      1. اشتم عبيرى اناااااااااااااااا

  12. ظالمني شوف من كم سنة (89) ربع قرن | رد

    ههههههههههههههههههه
    والله ياها ذاتا (يحلنا الحلا بلة)
    ههههههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: