عاوزة ليها كلام؟

طقس من الطقوس اليومية التى إعتدت عليها منذ سنوات لا أعرف كم عددها .. أن أقوم بعد توصيل الأولاد للمدارس أن أغشى(كشك الجرائد) أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !

درجت جارتنا الحاجة (صفية) على شرب القهوة الصباحية معي بين الحين والآخر طالبة مني أن اقوم بقراءة الأخبار الهامة لها إذ أنها أمية (جيل ما قبل المدارس) ، ما أن حملت فنجانى القهوة ووضعتهما بيننا على التربيزة الحديدية وأمسكت بعدد الأمس من صحيفة التيار والذي يقول ( الإتحادي يطالب بنائب الرئيس ورئاسة البرلمان ووالي الخرطوم) حتي صرخت بصوت عال :
– خلاس الإنتخابات إنتهت وعاوزين يتقاسمو الكيكة !!
– (الحاجة صفيه في إستغراش) : هم عندهم عيد ميلاد وللا شنو؟؟؟
– والله يا حاجه ده مش عيد ميلاد ده مووولد عدييييل !
– مولد النبي محمد؟
– لا لا ده مولد وصلحبو غايب !
– عليك الله أقرأ ليا الخبر :
– الخبر بيقول ليك يا حاجة (علمت التيار من مصادرها إنو الحزب الإتحادي الأصل بزعامة السيد محمد عثمان الميرغني
– (مقاطعة) : ديل مش ياهم ناس (الفتة لو حارة؟)
– (مواصلاً) : طالبو المؤتمر الوطني !
– (مقاطعة) : ديل مش ياهم ناس (أنتا أمشي القصر رئيس وأنا بمشي السجن حبيس؟)
– (مواصلاً) : أها يا حاجه بقولو ليك الجماعة ديل طالبو المؤتمر الوطني يديهم موقع نائب الرئيس ومنصب والي الخرتوم وكمان رئاسة البرلمان !
– إنتا يا أخوي زمااان مش أداهم منصب (مساعد رئيس جمهورية) عملو لينا بيهو شنووو ! تتذكر لمن كنتا بشرب معاك في القهوة ووريتني صورتو !!
– بتذكر يا حاجة بتذكر خلاس أقيفي لحدت هنا …(مواصلاً) : أها يا حاجة بيقولو ليك في مشاورات (سرية) بين (الطرفين) عشان يحددو ناس (الفتة لو حارة؟) يشيلو ياتو (وزارات) وناس (أنا بمشي القصر رئيس وأنا بمشي السجن حبيس؟) يشيلو ياتو وزارات !
– (مقاطعة) : وإشمعني مشارورات (سرية) هي الحاجه دي ما بتهمنا ؟؟ وللا ده سر بيناتم براااهم .. والله ذي ما قلتا يا أستاذ ياهم قاعدين يتقاسمو في الكيكة وبالدس كمان !
– (مواصلا) : أها يا حاجة الخبر بيقول ليك ناس (أنا بمشي القصر رئيس وأنا بمشي السجن حبيس؟) إعترضو على حصة ناس (الفتة لو حارة؟) لكن ناس (الفتة لو حارة؟) قالو ليهم تعترضو شنوووو .. حقو النقولو ليكم تدونا ليهو هسه كان ما أنحنا كان الإنتخابات دي نجحت ؟ ما عملنا ليكم ليها (زخم) وعضضنا ليكم بي مشاركتنا دي (الشرعية) وكده
– يعني معني كلامهم ده عاوزين (التمن) ؟
– بالحيل … والله ياهو ذاااتو يا حاجه عاوزين التمن !
– يعني هسه باقي ليك يا استاذ الناس ديل عاوزين التلاته مناصب دي عشان يطورو البلد !
– يا حاجه تلاته مناصب شنووو البيطورو بيها البلد .. والله دي (ويندوز) ما تطورور
– طيب ما كان واحد فيهم يترشح لرئاسة الجمهورية !
– ههههههه دي يا حاجه ما الفتة الحارة ذاااااتا
– كيفن … هم ما (حزب معارض) !
– شوفي يا حاجه ناس (الفتة لو حارة؟) ديل أنا لا بعرفهم معارضين وللا موالين لكن عمرنا ما سمعنا لينا بي واحد منهم طلع في مظاهرة وللا أخد ليهو سوط سوطين وللا عيونو دمعت من البمبان !
– يعني ما عندهم خطورة على الحكومة ؟؟
– خطورة شنوووو يا حاجة … والله (قرفنا) دي أخطر على الحكومة منهم
– طيب ما عشان كده ح يدوهم (وزارات ومناصب) قدر خطورتهم !!
– ودي يا حاجه عاوزه ليها كلااااام !!

كسرة :
ناس (الفتة لو حارة) ديل لو عملو للواحد (عصابة سوداء) في عيونو وودوهو الحارة 97 وفكوهو هناك وقالو ليهو أرجع (الجنينة) بي (قوقل أيرث) GOOGLE EARTH ما يقدر يرجع !!
– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

17 تعليق

    1. واقف براااااك والهم عصف ,,
      عجبني ليك !

  1. نائب رئيس ووالي الخرتوم ورئيس البرلمان ؟!!
    ما شاء الله حلااااااتن كبروا !! الله يرحم وزارة التجارة
    لاكين معناها التلاتة مناصب دي فيها لحس تمااااااام

    1. امل الامة ,,,,

  2. الناس ديل بكونوا ما قاطعوا الانتخابات عشان خاينه خايفه … خايفين من القوانين الجديدة لأن الفاتح عز الدين قال :
    قوانين جديدة تعاقب أي شخص أساء للبلد بالحرمان من الدفن في ترابه
    يا ربي الفيتوري برضو ؟؟ !ّ!ّ!

    1. نان ناس المؤتمر الوطني ندفنن وين !! ؟
      الشقي ده مااا صعّبا علينا !! نديهم البحر يعني ؟

  3. الله يكون في عون الشعب الفضل والراجع عشان ( يفضل كمان ) !!! سلام !اا

  4. – يعني ما عندهم خطورة على الحكومة ؟؟
    – خطورة شنوووو يا حاجة … والله (قرفنا) دي أخطر على الحكومة منهم
    ____________________
    ما وقعت لي الحتة دي !!!!
    زي ( قرفنا ) دي اضعف الايمان !!!
    مع انو – حسب رأيي المتواضع – قرفنا اخطر على الحكومة من معظم الأحزاب ان لم يكن من كووووولها بما فيهم الشايلين السلاح !!!

    1. اجى اوقعها ليك ؟؟؟

      1. عارفك تموت على الجية !!!!
        وقعها لي ( قريبا من اندك ) !!!!

      2. ههههههههههههههه
        طاااااااااااخ ,,,
        النبي فوقك خلي يجي , طوووول من الرياض .

  5. طيب إفرض أدوهم المناصب التلاته ، حيجيبوا كفاءات من وين

    1. وديل عاوزين كفاءات ؟؟؟ و(سيدنا_ أصلا مؤهلاته شنو؟ بالرغم من إشتغراشي الشديد أن الكثير من الكفاءات و أصحاب الدرجات العلمية العالية يدينون للجماعة ديل بالولاء المطلق!!! هم أصلاً شغالين شنو غير يحلبوا في دم الشعب

  6. يا ابوناجى .. فرضنا أدوهم المناصب الطالبوا بيها دى حيديروها بالريموت كونترول من القاهرة ولا لندن ..؟؟

  7. يوم باسم النبي تحكمك القبور

  8. ههههههههههههه الفتة لو حارة ياربي بتكون مرشوشة كويس ولا العيش ناشف واللحم مكوم بي فوقا ساااااي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: