فل الفل

كان (عوض) مولعاً بفك وتركيب الأجهزة الكهربائية والأليكترونية منذ صغره مما جعل الجميع يطلقون عليه إسم (ماركوني) مخترع الراديو ، وكما أن ماركوني (سيد الإسم) لم ينل تعليماً منتظماً فإن (عوض) قد شابهه في ذلك أيضاً حيث أكتفي بالتدرب في كثير من الورش الهندسية حتي يسر الله له أن يقوم بفتح محل بسوق أم درمان لتصليح الراديوهات والمسجلات .

في نهار شديد الحرارة وبينما المعلم (عوض ماركوني) داخل المحل يقوم بتجربة أحد راديوهات (الفليبس) القديمة ويدير في مؤشر (الموجة) تناهي إلي سمعة صوت (متحشرج) سرعان ما بدأ في الوضوح بعد أن قام بموالفة الموجة :
– هل تسمعني … هل تسمعني … حول
إعتقد عوض لبرهة ان هذا الإتصال لابد أنه قادم من أحدي عربات (النجده) أو العمليات أو من لاسلكي أحد أفراد الحراسة الذي يقومون بحراسة المنشأىت القريبه من (دكانه) لولا أن قياسه للموجة التي يستقبلها أوضح له بان الإتصال يأتي من مكان جد بعيد
– ألو ألو … (أكسلوز) يتحدث هل تسمعني
– نعم أسمعك .. الأخو من وين؟
– أنا (أكسلوز) من المريخ … هل تسمعني !
– المريخ الواااحد ده ؟
– نعم من المريخ .. نحن نجري أبحاث للإتصال بالكواكب الأخري .. من أي الكواكب أنت
– أنا من كوكب الأرض … وفي الأرض من السودان شفتا كيف؟
– كم درجة الحرارة لديكم الآن
– والله كان قصدك حرارة المواطنين فـ (صفر) بعد الإنتخابات دي .. لكن حرارة الجو زي كم وتلاتين درجة مئوية
– ما معني كلمة (مواطن) التي ذكرتها ؟ جهاز الترجمة الفوري الذي أستخدمه لم يقم بترجمتها لي !
– والله يا مستر (لوز) أنحنا ذااااتو ما عارفين نترجما لكن المواطن ده هو الزول الما عندو موقع مسؤولية .. يعني وزير .. والي … معتمد .. وكده
– على ذلك فأنتم المواطنون تمثلون الأكثرية ..
– تتخيل لا .. البلد فيها مليون مسؤول
– لقد شوقتني لزيارة بلادكم .. هل تستطيع أن تدعوني لزيارة بلادكم !
– ياخ بلادنا دي ما دايره ليها دعوة وللا زيارة أي زول ممكن يدخل ويطلع … بس المركبة بتاعتك البتجي بيها لو ما مرخصة بيقبضوك (و يفكوك) جهز غرامتك !
– وماذا تتنفسون في كوكبكم هذا ؟
– والله يا لوز الناس الفي الكوكب ده كووولهم بيتنفسو أوكسجين لكن نحنا (بالذات) الأوكسجين ده في المستشفيات تلقاهو مافي
– هل تمرضون ؟
– يا لوز إنتا وضح ليا سؤالك ؟ إنتا بتقصد ناس الكوكب وللا أنحنا هنا في بلدنا دي ؟ عشان نحنا كوووم وباقي العالم والكورة الأرضية دي كووولها كوم !
– أنا أقصد سكان الكرة الأرضية !
– سكان الكرة الأرضية ما بيمرضو كتير عشان بياكلو نضيف لكن كان مرضو بيتعالجو وعندهم مستشفيات ذي الفل ومجانن
– طيب وأنتم؟
– أنحنا ؟؟ والله كنا بناكل لكن هسه بقوا ياكلونا !
– هل هنالك من يأكلكم ويتغذي بكم ؟
– هو داب أكل يا لوز والمشكلة الأكلك منو ما تعرفو؟
– وهل انتم اذكياء ؟
– ذكاء حاد .. في التخطيط واللغف .. والله لو في (عطاء) مش لو مقدم من (المريخ) كان مقدم من (الترسانة) ما تفوز بيهو
– أنا مهندس متخصص في أنسجة الإتصالات الكونية هل يمكن أن اجد وظيفة إن حضرت إليكم ؟
– معاك كرت؟
– ماذا تقصد؟
– والله ما يكون معاك كرت توصية من مسؤول لو بقيت جاي من (برشلونة) ومتخصص (ضربات جزاء) ما تلاقي ليك شغل !
ياااخ الناس دي كووولها عاوزه تطلع تتخارج !
– إذن فلتكن زيارة فقط !
– والله يا لوز أخير ليك تقعد في (مريخك) ده وأهو أنا كلمتك … غايتو إنتا تعال وجيب ليك معاك كم شوال قروش؟
– ما هي عملتكم بالمناسبة
– الجنيه؟
– وماذا يمكنني أن اشتري بهذا الجنيه؟
– كبريتة
– وبكم جنيه يمكن أن أبني لي مسكناً
– والله في ناس ببنوهو مجااانن .. لكن إنتا وقدرتك ! …(ينقطع الإرسال) … ألو ألو لوز هل تسمعني
– نعم أسمعك بوضوح
– ياخ ما تشوف لينا فيزا وللا عقد عمل؟
– المواطن هنا يا عزيزي لا يعمل .. لا يوجد لدينا موظفين .. كل الكوكب يعمل بصورة آلية
– يعني شنووو ما هنا ما برضو الموظفين نايمين وبشتغلو بي صورة آلية
– (مواصلا) : ثم لا يمكن لقادم من كوكب آخر أن يعمل حتي أن كانت هنالك وظيفة
– أها دي نحنا عكسكم تمااامن .. تجي من سقط لقط إن شاء الله من (زحل) تشتغل زي السلام عليكم وزول يسالك مافي .. في كافتيريا في طلمبة تفتح مطعم تفتح مغسلة زول يقول ليك تلت التلاته كم مافي
– لقد شوقتني للحضور إليكم ومشاهدة إنسان هذا الكوكب
– والله يا لوز إنتا بس راسك قوي لكن تعال مرحب بيك .. بس في حاجه
– شنوووو
– لمن تجي تنزل بي مركبتك في (كوكبنا ده) … ما تنسي إنك تطفي النووور !

كسرة :
الشي الذي لم يكن يعلمه (عوض ماركوني) أن الرحلة من المريخ إلى الأرض تستغرق خمس سنوات وأن (أكسلوز) عندما يحضر إلى البلد سوف يجد واقعاً مغايرا لما حدثه به فحينها سوف تكون النهضة قد إستكملت والحال ح يكون فل الفل !

إنتبه :
يوجد (واو) جديد في (دورة جديدة) وكده !

كسرة ثابتة (قديمة) :

– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و

14 تعليق

  1. مبروووكة عليك يا ود بوتين تقطعا بي عرق العافية هههههه … سلااااام …

  2. ورحلة المريخ للأرض دايرا ليها خمسة سنين عديييل ، يعني الولاية السادسة تكون إنتهت وصدقوني لا حايكون في نهضة ولا يحزنزن والحال ح يكون زي ما هو في حالو ( لا جديد ) دا ما تشاؤم ولكن ” كل المعطيات تشير بكده ” شفتو كيف !! كلام كبير مش كده ؟؟؟
    … سلاااام …

  3. انتوا ما سمعتوا بي ود الميرغني قال في 181 يوم ح نغير وضع البلد !!!! تقول لي 5 سنين يا جبرا يا مفتري ،، تحياتي للجميع

  4. اكسلوز ده بعد خمسة سنة حيجي يروح روحه !! عوض ماركوني مااااا نسي يوصف ليهو نحنا بنقع علي ياتو خط طول ولا عرض !!
    اتلومّت يا عوض !!

  5. ( لمن تجي تنزل بي مركبتك في (كوكبنا ده) … ما تنسي إنك تطفي النووور !)..
    دى غايتو يا الفاتح قلبت فيها الهوبا ..واكتر جملة ضحكتنى ..
    ياخ كان تقول ليهو تعال بالليل وقت صلاة العشاء..وبعد داك يطفى النور ..

    1. هههههههههههه والله سبقتني بتعليقك دا ،، فعلا الجملة الأخيرة دي هي الزيت والداير يوصليها الأستاذ جبرا وإضافتك كملت الناقص إنو يجي وقت الناس تكون في صلاة العشاء ؛؛؛

  6. الرحلة من المريخ إلى الأرض تستغرق خمس سنوات وأن (أكسلوز) عندما يحضر إلى البلد سوف يجد واقعاً مغايرا لما حدثه به الكلام دا ما صاح لانو ود الميرغني قال 181 يوم فقط سيتغير الحال 180.5 درجه

  7. ألأحقنا يا بروف ا، السودان حيبقى (مملكة شورى!!!!!!!!) كيفن ما بعرفو!!! لكن يا أخزانا أنا بقترح يعملوا لينا نظام كدا يكون customized . على مزاج مزاجهم . الملك قالوا من الغرب و الولي من الشرق و ولي الولي من الغرب !!! ما في مشكلة لكن لو هفّت لي ولدو واحد من ديل نعمل شنوووو؟؟؟ و ياتو ولد من ياتو مرااا؟ طبعاً حنا الشعب الفضل دا البنقدر عليهو بس ، حنشتغل حجازين بس! لكن اليحكومنا بس يخلوا لينا حق البوش

  8. أرسلت من هاتف HTC

  9. انقلاب !!
    اسرائيل زي عادتها !!
    مخبز وانفجر!!
    جسم ضوئي ده شنو كمان ؟!! ايوااااا ياهو النجمه ام ضنب ؟!!
    مره جا حرامي الضهر وسرق تلفزيون جيرانا , ست البيت رجعت من الشغل لقت التلفزيون مسروق ( وهي ساخره خلاص ) بقت تسأل الشفع الفي الشارع لو شافوا زول شايل تلفزيون , جمبنا صيدلية والبت الفي الصيدلية قالت ليها انا قبيلك شفت واحد شايل تلفزيون وجا مارق من شارعكم . قالت ليها شكلو كيف ؟ قالت لابس بنطلون وقميص وكسكته في راسه .
    جارتنا قالت ليها لا خلاص عرفتو ! ده سيف الجامعه .
    جسم ضوئي ؟ يعني ماااا طافي النور !!

    1. هههه يا قول جارتكم ، عرفناهو دا (جسم ضوئي) الجامعة!!هههه
      بعدين مالك ياجنوبي عليهم ، الناس ديل كان واضحيييين معاكم و قالوا ليكم قبل كدا (هم كان رجال اليجونا تحت بالدرب)!!! الكلام دا ما واضح؟ و هم ناس الجسم الضوئي ديل زااتم ما رجال ، يجوا بالسما لشنو؟ يعني نقعد حسي نفتش في بقايا الجسم دا في الحلال؟ و ياشفع ما تهبشوا شي في الشارع؟ أنا والله كان ما أخاف الكضب حيطلع شيتاً بلعبوا بيهو الشفع زي الحاجات البتطير بالريموت دي!!! قال إرتفاع منخفض ٌال!!! و يطلعوا بيان كمان؟ على قول عادل إمام (نفسي في قملة واحدة مفيدة!)

  10. أهل القمردينه. سلام.
    قالو تم التعامل مع الهدف واسقاطه.
    يعمينا .

  11. فل الفل
    ومعا لاستكمال النهضة بمشاركة المؤتمر اللاوطني

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: