إلا نحنا

في كل بلاد العالم تستخدم كلمات مثل: لو سمحت .. شكراً .. متأسف.. إلا نحنا (ليه ما تعرف)؟.
في كل بلاد العالم توجد على الطرق الرئيسة خطوط عبور مشاة .. إلا نحنا (تقطع الشارع وأنت وحظك بقى)
في كل بلاد العالم يوجد ناطق رسمي واحد للحكومة إلا نحنا (أي مسؤول يمكنه النطق)

في كل بلاد العالم يوجهك شرطي المرور إلى أن هذا الطريق اتجاه واحد إلا نحنا( يخليك لمن تدخل) !
في كل بلاد العالم تستخدم الركشات لنقل الأغراض إلا نحنا( عندنا تستخدم لنقل البشر والخمور كمان)!
في كل بلاد العالم لا تتعطل دواوين الحكومة عند مجيء ساعة الإفطار إلا نحنا( الفطور وبعدين الشاي فالصلاة ثم .. تعال بكرة)
في كل بلاد العالم لا يمكن أن يزورك شخص في منزلك فجأة إلا نحنا ويقول ليك( كدى افتح لينا التلفزيون نشوف الكورة)!
في كل بلاد العالم إذا قبض عليك تقود سيارتك دون رخصة قيادة تم إيقافك إلا نحنا .. تدفع الغرامة وتمشي(ما الغرامة أهم من السلامة وكده).
في كل بلاد العالم يوجد هناك أكثر من نادي قوي يتنافسون سنوياً على بطولة الدوري.. ويمكن أحياناً لأندية الحصول على اللقب .. إلا نحنا .. يا الهلال يا المريخ (البقدر على ملايين الدولارات دي منو)؟.
في كل بلاد العالم رقم الإسعاف معروف إلا نحنا ( تفتش ليهو فتيش ولمن تلقاهو يكون المريض موضوعو انتهى)
في كل بلاد العالم يتم تخصيص حصص للموسيقى في المدارس إلا نحنا ( ومع ده عندنا عشرين مليون فنان)
في كل بلاد العالم توجد لافتات توريك إلى أين تفضي بك الشوارع التي تسير فيها إلا نحنا( لو عاوز تمشي حته فعليك الاسعانة بصديق)!
في كل بلاد العالم هناك سلال لوضع النفايات على الشوارع إلا نحنا( ويقولوا ليك هيئة ترقية السلوك الحضري)
في كل بلاد العالم لا يمكنك صرف دواء من غير روشته (من الدكتور) إلا نحنا لأنو مقابلة الدكتور (حكاية)!
في كل بلاد العالم عندما يستوقفك الشرطي فإنه يبتسم لك إلا نحنا فإنك تبتسم له (من الخوف طبعن)!
في كل بلاد العالم توجد بالمدن أماكن لقضاء الحاجة (مجاناً) إلا نحنا فإنك لا تستطيع أن تقضيها (كان ما معاك حاجة)
في كل بلاد العالم لا ينصب شخص في وظيفة دستورية إلا بعد أن يمر مترقياً بعدد من الوظائف إلا نحنا فيمكن أن تكون ( دي أول وظيفة ليك)!
في بلاد العالم تكافيء الحكومات المغتربين لدعمهم الاقتصاد إلا نحنا فالحكومة (تطلع عين أبو أهل الخلفوهم)
في كل بلاد العالم يعتزل السياسيون في سن مبكرة إلا نحنا ( كم وتمانين) ولسه عاوز فرصة يحكم!
في كل بلاد العالم لا توجد شركات حكومية تدخل سوق الله أكبر وتنافس الناس إلا نحنا أكثر من (500 شركة) ده غير (الرايحات)
في كل بلاد العالم يتم فتح ملفات الفساد والتحقيق فيها إلا نحنا (نفتح ليها حفرة) وندفنها!
في كل بلاد العالم لا يسمح للوافد (بدون أوراق) العمل إلا نحنا .. شغالات .. سواقين ركشات.. عمال كافتيريات والمسؤولين عاملين نايمين!
في كل بلاد العالم يستخدم أفراد شركات الأمن لحراسة الشركات والمؤسسات إلا نحنا إذ تجدهم شغالين في الاستقبال( مع أنو ده ما شغلهم ولا مؤهلين ليهو)
في كل بلاد العالم تعمل السفارات على حل مشاكل مواطنيها إلا نحنا فسفاراتنا تعمل على (شربكتها)!
في كل بلاد العالم يستغرق إنشاء جامعة عشر سنوات إلا نحنا ( ممكن نعمل عشرة جامعات في سنة واااحدة)
في كل بلاد العالم الحرامي بعاين في الواطة إلا نحنا (الحرامي بعاين ليك جوة عينك)
في كل بلاد العالم لا يمارس عملية التطبيب إلا من حصل على إجازة علمية وتم تسجيله من الجهات المسؤولة إلا نحنا( ناس الأعشاب والسنو ما بعرف فاتحين ليهم عيادات عديل كده )
وكمان بيعلنوا في الصحف والقنوات!
في كل بلاد العالم يعتبر اغتصاب القاصرين جريمة توقع عليها أقسى العقوبات إلا نحنا .. شهر شهرين سجن وكم سوط كده!
في كل بلاد العالم لن تجد في الصحف إعلانات لمرضى يطلبون من ذوي القلوب الرحيمة التبرع لعلاجهم إلا نحنا (العندنا ديوان زكاة )!
في كل بلاد العالم توجد بين الأحياء مساحات يمارس فيها الأطفال والشباب الرياضية والألعاب إلا نحنا( عملوها كووولها عمارات) عشان كده مش ح نتحصل على ميداليات من صفيح!
في كل بلاد العالم توجد بالأسواق أماكن لإيقاف العربات إلا نحنا ( لأنو المحلية قاعدة تاجرها لبتاعين الطبالي وكده).
كسرة
في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا لمن المسؤول يتسرق.
كسرة ثابتة(قديم)
أخبار ملف خط هيثرو العند النائب العام شنو
(وووووووووووو)+ (وووووووووووو)+ (وووووووووووو)+(وووو)+و
كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو)+(وووو)+و.

Advertisements

19 تعليق

    1. وعليكم السلام
      الا نحنا ……….. برضو

  1. في كل بلاد العالم مافي امطار بتوقف عمل الدواوبن الحكومية , الا نحن عشان الخريف بجينا فجأتن !!!!!!

    1. الليلة نشوف آخرتها ,, البرنجية دي ماني خرمان ليها من زمن !!!!
      زي الزول العامل قعدة مع نفسو ( مرة طويل , مرة شريط ) !!!!!

    2. لو سمحت يا أخوي أقدل فيها برااااك
      أنا مكشف من قبييييل لكن .. شكراً .. و متأسف .. ما عاوز أختفها منك
      زوق وكده !

      1. مشكوووور يا مندهش !!!!!!!!!!

      2. اممممممممممممممممممممممم

      3. الا نحنا !!!

  2. هام و عاجل للاصدقاء و الزملاء فى الموقع و خاصة الصدقاء فى الشرطه و المرور

    تعرضت لعملية احتيال نتج عنها سرقة سيارتى ال سناريكس 2005 بالرقم ج1 – 1854 لون رمادى بعد ان قامت شركة دواء وهميه بطلب لايجار العربه و بعد تردد قمت بمعاينة مقر الشركه امام حدائق امدرمان الكبرى و جدت المكتب و به عينات من الدواء و بعض العملاء فى كامل الاناقه و عربات توزيع اخري بالخارج و عليه قمت بالموافقه و بحسن النيه الذى توفر لدى قمت بتوقيع عقد بينى و بين المدير العام و سلمته شهادة البحث الاصليه لان الصوره لا تفيد مع الشرطه ( حسب كلامه) عند نهاية الشهر ذهبت لمقر الشركه وبالسؤال عن ما اذا يوجد مسئول اجابنى شخص بأن الشركه مغلقه من اسبوعين و اصحابها مختفين و اصحاب العربات المؤجره و الاثاث المكتبى و مالك المكتب و اصحاب العربات كلهم يبحثون عن مستحقاتهم حتى ست الشاى و غسال العربات…
    قمت بفتح بلاغ فى قسم الصافيه و أستلمت أمر قبض على مددير الشركه و طلب حجز العربه حال الترخيص فى مرور الجزيره.
    اخشى ما اخشى ان يكون زور تفويض بالبيع و حول العربه بشهاده بحث جديده و خرج من البلاد
    فماذا ترون ؟؟؟؟ لا اراكم الله مكروها فى شئ عزيز لديكم

    1. الله يجمع ليك يا اب احمد ,,,,

    2. يوم طلبوا منك شهادة البحث الاصلية كان تعمل شخيط وتقيف بعييييد !!
      ربنا يعوضك وينتقم من السارق ومن عاونه ,,

    3. ربنا يعوضك………
      لكن انت المقعدك هتاك شنو
      الناس بعد الخمسيت اتخارجو

  3. كسره الوحيد الطلع مستفيد بتاع السمك الفاتح على المكتب الوهمى ، الجماعه يلهطوا فى السمك سااااى

    1. هههههههههههههههههه ,, بتاع السمك هيييين ,,
      اعثرك الله على سيارتك وانتقم ممن خدع وغش …

  4. السلام عليكم ، ركس مبروووكة عليك البرنجية بعد طول غياب .. ويا أب أحمد الله يجمع ويخلف عليك بالخير .. وفي كل بلاد العالم حاجتك الرايحة بلقوها ليك بسرعة إلا عندنا !! وأنت تمشي تفتش بي نفسك و حتى لو لقيتا ورجعت للشرطة عشان توريهم محل المسروق وعائزهم يمشوا معاك يقبضوا على الجاني ، يقولوا ليك ( ما عندنا عربية ) !! وبعد محاججة معاهم يدوك واحد ” هلفوت ” وبدون سلاح !! وبقول ليك ( طلع لينا حق الفطور) !! طيب كيف دا حا يمشي يواجه مجرم عاااتي لو قال ليهو أفففف يطير !؟!؟!
    … سلااااام يا بلدي يا حبوب …

    1. الله يبارك في ايامك يا ابوأحمد ,,,

  5. ياعمنا أهو نحنا كدا …طيب الحل شنو؟

  6. اللهم اجمع له بسيارته وبارك له في ماله.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: