التأنيب برضو حلو !

متى يتم تعامل الدولة مع مختلسي المال العام وسارقي قوت هذا الشعب الطيب بهذه الصورة الناعمة التي لا تخدش (المجرم) بل وفي بعض الأحايين (تستره) حتي لا يتعرف عليه أحد !

لم تكن قضية (مليارات مكتب الوالي) هي الأولى ولن تكن الأخيرة التي تم دفنها وقبرها وكأن شيئاً لم يكن على الرغم من إنها قضية جنائية تخالف عددا لا يستهان به من مواد القانون الجنائي السوداني منها التزوير وخيانة الأمانة وإنتحال الشخصية ، لم تقدم القضية إلى القضاء رغما عن مليارية المبالغ التي تم الإستيلاء عليها بل لم يفتح يها بلاغاً (من أساسو) والعاجبو عاجبو والما عاجبو (اليجي يقلعنا) !
ولأن هذا النهج نهج التستر وعدم المحاسبة وفقه السترة قد أصبح الديدن العام فقد اغري ذلك كل من بيده مال حتى لو كان مال (الله) أن (يغرف) منو .. وخير مثال على ذلك ما حدث في ديوان الزكاة بولاية القضارف … طيب الناس ديل عملوا شنوووو؟ أقول ليكم أولاً كانوا بيصرفوا بمكاتبات سياسية والمعني واااضح يعني بيصرفو في حاجة ما ليها علاقه بل لا تقع ضمن مصارف الزكاة المعروفه ، ثانياً (وده الأخطر) بيصرفوا أموال بدون كشوفات وبدون مستندات ذاااتو .. يعني بيشيلو سااااي !! ومش كده وبس بيخالفوا للوائح المالية الموضوعة لضبط العمل (يعني بالعربي كده شغالين على كيفهم) !!
طيب بعد القصة ما إتعرفت (الحكومة) ممثلة في ديوان الزكاة الإتحادي تربع إيدينا؟ حاشا وكلا فهذه المخالفات أوقعت مدير ديوان الزكاة بالقضارف وبعض مساعديه تحت طائلة المساءلة، فتم إجراء تحقيق رسمي معهم ومحاسبتهم عن طريق لجنة للتحقيق والمحاسبة شكلتها الأمانة العامة لديوان الزكاة الاتحادية
احيث أخضعت هذه اللجنة عددا من مديري الإدارات بديوان الزكاة بالقضارف للمحاسبة حيث وجدت اللجنه أن هؤلاء (المدراء) قد تصرفوا في (مال الله) وذلك عن طريق صرف حوافز(غير مستحقة) كما قاموا بالصرف بدون مستندات مخالفين بذلك اللوائح المالية .. تعالو نشوف (العقاااب) وهل يتناسب مع هذا الجرم الفادح .. العقاب يا سادتي الأفاضل تراوح بين التأنيب ( يعني : تاني ما تعمل كده) والخصم من 7 إلى 15 يوما (كتيره والله) ، دي الأحكام التي أصدرتها لجنة التحقيق وهي أحكام زي ما شايفين (رادعة) تخلي أي زول عاوز (يلهط) يفكر ألف (نانوسكند) قبلما يتجرأ ويعملا !
طيب تعالو نشوف أمين ديوان الزكاة بولاية القضارف (عبد الحاكم وداعة الله) قال عن المخالفات دي شنووو؟ .. سعادتو قال إنو (المخالفات التي وقعت أخطاء إدارية غير مقصودة) .. يعني الزول لما يصرف بدون مستند بيكون (مااا قاصد) !! يعني النشال في الحافلة يدخل أيدو في جيبك ويشيل الموبايل ولمن تقبضو يقول ليك (والله ما قاصد) !!
مش كده وبس ( وقطع بعدم وجود أي مخالفات جنائية في المخالفات التي وقعت ) .. والعبدلله يستفتي أخواننا القانونيين إن كان التلاعب بالمال العام بل (مال الله) يندرج تحت مواد قانون (الإيجارات) أم قانون (العقودات) أم قوانين (الحياة البرية) !
وحتي يبرر أمين ديوان الزكاة (المنهوب) فعلة منتسبيه (الشينة) فقد صرح بعدم وجود مخالفات جنائية بديوان الزكاة بالولاية بالمقارنة (شووووفو بالمقاارنة دي) بالجبايات العالية التي يحققها والتي تتجاوز المائتي مليار جنيه !! وأن العاملين بالديوان يجبون مبالغ ضخمة ولذلك يستحقون التحفيز على ما يبذلونه من جهد يعني بالعربي كده الزول ده بيقول لينا نحنا عامة الشعب الفضل (الناس دي بتجيب قروش كتيره شنو لو شالت ليها شوية قريشات) !!
والله أصبحنا لا نعرف (نضحك) أم (نبكي) علي ما آل إليه حال هؤلاء (الأخوان) وهم يبتغون عرض الحياة الزائل بهذه الصورة (المقززة) التي تفتقر إلى (الحياء) .. بالله عليكم كيف لموظف عام يأخذ (مالاً) دون (مستندات) أن يكون عقابه (التأنيب) !!

كسرة : برضو (التأنيب) حلو .. مش بطال !!

كسرة ثابتة (قديمة) :

– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و

19 تعليق

  1. برنجية بعد اختفاء ،،،

    1. زي سيد اللبن !! متييين اصبحت !!

      1. أصبحت شنو؟؟ انا جازفتها و يادووووووبك خاشى انوم !!
        تصبحوا على خير !!

      2. نوم الفلايت ,,

      3. مبرووووكة ,, ما مشت مننا بعيد !!!
        فيها تخميسة !!

    2. برنجيه مختلسه !!

    3. ياسين شمباتى | رد

      الله يخليكم للزى دا !
      مبروكة (مع عوجة خشم) يا نؤوم الضحى …

  2. أنا إقترح يضيفو مع التأنيب
    أي واحد ( يجضموهو )
    على الأقل بكون في عقاب بدني
    ولا مش كده ؟!
    يا بروف
    هي لله هي لله !! يعني الواحد بسرق من مال الله و في فقه الضرورة والسترة والتحلل هناك مخرج و مندوحه لذلك

    1. يجضموهو ويتفوا ليهو جوووه خشمو !!
      انا يبقي لي ناس الحكومة ديل ياهم نفس الناس الكان بيلعبوا ( الملوص ) ورا سينما الوطنية ام درمان زمان , بس استحموا ولبسوا نضيف !!

      1. ناس الملوص انضف واشرف من ديل !!!!!

      2. ياسين شمباتى

        الملصوهو منو !!؟

  3. ياسين شمباتى | رد

    والله شئ مقزز ومثير للاشمئزاز !
    لكن بتاع زكاة القضارف ما اسوأ من بتاع الخرطوم اللى اتبرع لقناة الضحى بمبلغ 50 الف دولار !
    وما اسوا من بتاع الاوقاف اللى كان بياخد شئ وشويات ,,
    ولا بتاع الحج والعمرة اللى عندو عقد سرى !
    اتفووووووه عليهم فردا فردا …

  4. أنبنى وتفنن ….
    تانيب يفوت ..ولا حد يموت .. شنو يعنى خصم 15 يوم .. ؟ إ‘ن شاء الله يخصموا الشهر كلو… اللهطو يساوى حق 500 شهر لقدام ..

  5. هههههه الله يجازي محنك يا جنوبي إنت ناسي فارق التوقيت ؟ عموما مبروووكة عليك يا ود بوتن تقطعا بي عرق العافية وما تبقي من إييييك وعييييييك … وما تنسى يا بروف إنو في حاجة من مصارف الزكاة إسمها (والعاملين عليها) لو كان برر بيها كان تبقى مبلوعه ، لكن يبدو أن أمين ديوان الزكاة زاااتو ما عندو حتى أبسط مقومات وأبجديات فقه الزكاة !!! … قال أمين قال !! .. سلاااام ..

  6. المرة الجاية التانيب حيكون بحفظ جزء تبارك
    اعملو حسابكم
    قال زكاة قال ………… حق الناس وقالعنو …. تقولو زكاة .. زك …زك

  7. انا لله وانا اليه راجعون…..ديل حق الله بياكلوهو.زي البسكويت

  8. صرح لا فض فوه و لا فوه اللي خلفوه ( بعدم وجود مخالفات جنائية بديوان الزكاة بالولاية بالمقارنة (شووووفو بالمقاارنة دي) بالجبايات العالية التي يحققها والتي تتجاوز المائتي مليار جنيه !! وأن العاملين بالديوان يجبون مبالغ ضخمة ) حلو جدا ……. طيب وين المائتي مليار دي .. مائتي مليار في ولاية القضارف بس ؟!! .. طيب باقي الولايات أكيد مبالغ قربية من دي .. يا اخي بالطريقه دي لو جمعنا زكاة ثلاثة ولايات بس ما ح يكون في فقير او مسكين بالبلد .. إذن … وبهذه الطريقه …. فالنبشر ولنستبشر بولاية جديده بعد الانتخابات و لنطلق عليه ( ولاية الترفيه والنغنغه)

  9. ظالمني شوف من كم سنة | رد

    والله حاجة مؤسفة وموجعة .. ولقد اسمعت لو ناديت حياً .. ولكن لا حياة لمن تنادي .. دي دولة التجنيب الإسلامية

  10. ظالمني شوف من كم سنة (89) ربع قرن | رد

    الرسول ص : قال والله لو سرقت فاطمة بنت محمد لقطع محمد يدها .. بس جماعتنا ديل لقو حتات يخرجوا بيها .. كتلونا بالمغص .. ومن أمن العقوبة أساء الأدب .. .. وسير سير يا بشير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: