أوعا يتحللو

ولدنا نزار يعمل طبيباً بيطرياً ويسكن منطقة شمبات ببحري إلتقيتة بالأمس وهو يضع ضمادة طبية على يده فسالته عما به لعلمي بانه رغم بنيته المتماسكة وجسده الرياضي إلا أنه زول متسامح وما بتاع (شبك) .
وحكي لي القصة :

ركبتا العربية من البيت الضهر ماشي ليا مشوار وأنا طالع من الحلة ماشي على ظلط المعونة وعلى بعد حوالي 300 متر شايف ليك (مرا) تشيل وترفع في أيديها وتولول ، لقيت (مرا) قدامي قبل ما أوصل ليها سالتها قالت ليا (المرا دي في إتنين راكبين موتر) خطفو هسه الشنطة بتاعتا ودخلو على الحلة .
(يقول د. نزار مواصلا) : طوالي لفيت رجعتا في إتجاه الحلة بعد ما كنت ماشي على الظلط ، وفتحتا للعربية فتح صاح وأنا بفكر (الحرامية) ديل ح يمشوا وين ؟ طوالي إتذكرتا إنو فسحة فاضية وسط المزارع فمشيت بشارع فرعي ووصلت قبلهم ، وأول ما دخلو الفسحة مشيت بالعربية عليهم وقعد أزنق عليهم وأنا خاتيهم يميني لحدت ما وصلنا ترعة دقيت فرامل وقفتا وهم الموتر بتاعهم طار فوق ووقع وهم وقعوا في الترعة ، واحد فيهم عاوز يطلع من الترععة جريتو لي فوق ولمن وقف (أديتو بونية وااااحدة) وقع ، ولما لقيتو فاتح عيونو عرفتو خشه في غيبوبة عاوز ليهو تاني نص ساعة عشان يفيق منها قلتا أجري وراء التاني ، المهم التاني طلع جراي شديد وما حصلتو ، جيت راجع لي زولنا فكيت الحزام بتاعو بتاع قماش وكتفتا ليهو أيدينو وقعدتو في الواطة وإتصلتا على 999 جوني جارين جري وحكيت ليهم الحاصل وقبضو الزول ، ولقوهو شايل ليهو سكينة طويلة خاتيها في البنطلون من وراء !
ناس الشرطة رفعوا الموتر و(الحرامي) والشنطة المخطوفة في العربية ومشينا القسم أخدوا أقوالي وبياناتي والشنطة لقينا فيها مبلغ 12 مليون (بالقديم) مربوطة ربطة بنك وكمان شوية كم مية تاني ومعاهم موبايل .
رجعتا المكان الكانت واقفة فيهو (الملا) تولول ، وقعدتا أدق في البيوت وأسأل لحدت ما وصفوا ليا بيتها ، بشرتها بانو شنطتا إتلقت بي قروشا وموبايلا ، حكت ليا إنو القروش دي هي عبارة عن المصروفات الجامعية لأحدي بناتها التي تدرس بإحدي الجامعات وقد كانت في طريقها للجامعة لتوريدها !
بعد أن أكمل دكتور نزار الحكاية سألتة :
– والشريط ده لافيهو ليه في أيدك ؟ أوع الزول دي يكون عوقك !
– لا الشريط ده من أثر البونية الأديتا ليهو !
وهنا عرفت لماذا أغمي على ذلك (الحرامي) !
هذه القصة التي حدثت فصولها قبل أيام أضحت تحدث بصورة شبه يومية ، كل حرامية إتنين راكبين موتر ويخطفو شئ يخطفو شنط ستات وشئ موبايلات وشئ سلاسل دهب ومضابط الشرطة تمتلئ بالبلاغات التي تقيد غالبا ضد مجهول نسبة لتعذر القبض على هؤلاء اللصوص .
العبدلله يعتقد بان إنتشار مثل عصابات (الخطف) هذه وتلك العصابات التي تعتدي على المواطنين بالسواطير في عز النهار هو ضعف العقوبة إذ يكتفي القاضي بعقوبة السجن لأشهر قليلة مع الغرامة التي لا تصل في بعض الأحيان إلى 300 جنية على الرغم من أن ما تقوم به هذه العصابات يندرج تحت (حد الحرابة) و (السرقة الحدية) وفق ما تقوله الشريعة الإسلامية.
نحن نعلم يا سادتي بانه لا يمكن لأي شرطة في العالم أن تتواجد في كل شارع وكل (زقاق) لذا فالعقاب الرادع هو العامل الوحيد الوحيد الذي يمكنه الحد من هذه الظاهرة التي تقلق المواطنين وتروعهم .
عليه نناشد مولانا أخونا الدكتور عوض النور الحسن وزير العدل تفعيل مواد القانون المستمدة من (الشرع) في مواجهة مثل هذه العصابات فـلا يمكن أن تكون عقوبة من يقوم بهذه الأعمال المروعة التي تهدد ممتكات وأرواح وأمن وطمأنينة المواطنين شهر سجن وكم سوط كده أو غرامة ؟؟ وبالمره كمان يا مولانا شوف لينا معاك (الواوات) التحت دي !!!!

كسرة :
أوعا (الحرامية) الختفو الشنطة ديل يقوموا يتحللو هههههههه

توجد (واو) جديدة (لنج)

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

Advertisements

7 تعليقات

  1. برنجييييييييه

  2. فعلا ظاهرة تخوّف وبقت منتشره جدا
    وممكن عااادي يضربوك بساطور او يطعنوك بسكين .

  3. حرامية المواتر هينين الكلام الحرامية الجو راكبين دبابة وللان بسرقو ومافي زول اداهم بنية كاربة زي بنية نزار دي وﻻرماهم في الترعة

  4. مبروووكة عليك يا جنوبي تقطعا بي عرق العافية .. ونفس السيناريو دا كان حصل مع بتي ، بس الإختلاف في إنو ناس الموتر بتاعينها هددوها بمسدس ، وركبوا معاها عربيتها ، وشالوا قروشها ودهبها وموبايلها ، ولي يومك دا لا حس ولا خبر !! مع إنو الكلام دا ليهو سنتين ونزلا البروف بعنوان (عزيزي وزير الداخلية) .. أما الحرامية الكبااار دايرين ليهم واحدين زي بتاعين كرواتيا يشيلوهم ويرموهم في حاويات الزبالة ، بس المشكلة الحاويات العندنا ما بتكفي !! دايرين لينا مليون حاوية زبالة عشان يرموهم فيها ويرجموهم بالقمامة والأوساخ البتليق بمقامهم .. وللعلم (المقطع ما زال موجود على اليوتيوب) شوفوهو قبلما يحذفوهو .. سلااااام ..

  5. هم سجونهم ما بدخلوا فيها لا الشرفاء
    اسمع دي يابروف
    قالو في واحد سكران وصارف كلام كتير في الشارع مره من عند
    دار المؤتمر الوطني في الخرطوم انشبك مع حرس الامن
    لما تم القبض عليه قعد يكورك … سير سير يالبشير الرد
    الرد كباري و سد قام شافو واحد من الجماعة قال لرجال
    الامن سيبوه وقام اداه مليون جنيه بالقديم وقال له انت
    رجل وطني وسوداني اصيل صاحبنا علي طول وقف
    ليهو تكسي وركب من الخلف قام سواق التكسي قال ليهو
    علي وين ياود العم ودعليه السكران دار المؤتمر الوطني
    ام درمان !!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: