بالغتو يا ناس الجمارك

المواطن السوداني (محمد الصديق) المقيم بمدينة لندن بعث لي برسالة ساخطة ومستغرشة وسوف تسخطون وتستغرشون تماماً عندما تلموا بالتفاصيل التي تقول :
قام المواطن المذكور بإرسال طرد بريدي صغير عبر شركة (DHL) المعروفة ببوليصة رقم 606826060 وذلك في يوم 15 /7/2015 ، محتويات الطرد يا سادتي الأفاضل كالآتي :
عدد 2 فتيل دواء شراب أطفال ، عدد 1 صندوق شاي زنة 180 جرام مع (ورقة) تحتوي على (إقرار) وورقة أخرى تحتوي على (توكيل) ..

وصل الطرد إلى مخازن ((DHL بالخرطوم م وقامت الشركة بإخطار المستلم (شقيق زوجة المواطن) ولكن عند ذهابه للإستلام في الساعة العاشرة يوم الثلاثاء 4/8/2015م أخبرته الشركة بأن الطرد (حجزوهو ناس الجمارك) فتوجه في الحال للجمارك حيث أخبروه بأن الضابط المسؤول (مشى ليهو فاتحة) وعليه الإنتظار حتى يعود, إنتظر صاحبنا حتى الساعة الثانية ولم يحضر الضابط من الفاتحة (يكون خرم على البيت) فقالوا ليهو (الضابط بعد ده ما بجي تعال بكرة) !
جاء صاحبنا تاني يوم للجمارك قالوا ليهو الضابط في الفطور ، وعندما عاد الضابط شرح له الموضوع وأعطاه (البوليصة) قال له الضابط :
– شوف قيمة الظرف ده 50 جنيه إسترليني فيهو شاي حب وفتيلين دواء شراب فلازم (نجمركو) وتشوف ليك مخلص
– (في إستغراش) : يا جماعة جمارك شنو ومخلص شنو .. وخمسين جنيه إسترليني بتاعت شنو؟
ده شاي (حب) ودايل فتيلين دواء أطفال وديل ورقتين واحدة توكيل والتانية إقرار لإستخراج جواز لي طفل ماشي القاهرة يتعالج !
– يا شيخنا ده (قانون) ولازم تدفع جمارك على الحاجات دي ما يعادل 50 جنيه إسترليني زي ما مكتوب على الظرف !
– يا جماعة المكتوب على الظرف ده دي قيمة الرسوم الإندفعت في السفرة للتوكيل والإقرار دخلها هسه شنو في الموضوع !
– شوف أنحنا ح نشيل 50 ألف جمارك لصندوق الشاي ، و 280 ألف للورقتين (التوكيل والإقرار) و 50 ألأف لي فتيلين الدواء و 20 ألف رسوم أرضية .. والمخلص بيشيل ليهو 220 ألف جنيه يعني الموضوع كدة 620 جنيه !
– (أعصابو باظت وجاب ليهو كوز فاضي) : مش الشاي ده أهو كبيتو ليكم في الكوز .. ما عايزو .. ومش فتيلين الدواء ديل برضو ما عاوزهم … بس أدوني الورقتين ديل !
– يا شيخنا مافي كلام زي ده .. يا تدفع وتشيلهم كوووولهم يا تخليهم كوووولهم !
لم يكن أمام صاحبنا إلا الإنصياع (للحكومة) ، وكسباً للوقت قام بدفع المبلغ الذي حددته (الحكومة) حتى يستلم الورقتين (التوكيل+الإقرار) ليتمكن الطفل المريض من السفر ..
نقول للمواطن السوداني (محمد الصديق) ياااخ جات سلامة فقد كان من الممكن أن تتم (جمركة) الإقرار والتوكيل عن طريق عدد الأحرف أو الكلمات أو نوعية الطباعة (ليزر ، عادي، خط يد) أو نوعية الورق (مصقول شفاف عادي) أو وزنه (80 جرام ، 90 جرام، 100 جرام) وكمان أسود وللا ملون !
بالطبع هذا مبلغ خرافي لطرد صغير قد لا يصل وزنه (نص كيلو) ولا يحتوي علي أغراض ثمينة وهذا المبلغ بالفعل يدعو للإستغراش ولكن ما يدعو للإستغراش الشديد هو إنو الورقة بتاعت الإقرار والورقة بتاعت التوكيل عليهم جمارك؟ شئ فعلا يدعو للإستغراب والتأمل ؟
دعونا نتساءل وريالة الأطفال في (أفواهنا) ما هي الأسباب المنطقية التي تجعل السلطات تاخد جمارك 120 ألف على ورقة مطبوعة واااحدة ؟ … غايتو يا ناس الجمارك بتباااالغو !!

كسرة :
سؤال غبي : الحكومة بتشيل (جمارك) على الدواء عشان ترجعا للمواطن في شنوووو يعني أحسن من صحتو ؟؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

14 تعليق

  1. برنجية

  2. لاحول ولاقوة إلا بالله وحسبي الله ونعم الوكيل فيهم ،، الظلم ظلمات يوم القيامة ؛؛؛

  3. جمركني – عكرني وتفنن، يا بروف دا كوم وسرقات المطار دي كوم تاني خاااااااااااااااااالص!

  4. إتفوووو علي ضابط الجمارك الغبي ده ,,
    والله سؤالك الغبي ده طلعنا كلنا اغبياء !! صحي شان ترجّعوا لينا في شنو ؟ وليه اصلا بشيلوا ضرايب من شركات الادوية ما يعفوها من الضرايب وترجع لينا رخصة في سعر الدواء !!

  5. كويس انو قالوا ليه التفصيل وعرف الدواء عليهو جمارك كم و الورقة عليها جمارك كم….. ! ولكن في أغلب الحالات يكون الحساب كوااااار

    1. صدقت والله ياا حبيب ,, كوار وكجار

  6. والله صدقوني في واحد رسل شوية ملابس قبل العيد بعشرة ايام ولمن مشي يستلم قالوا ليهو الضابط مشي مشوار وجاي و تاني يوم حيجي وما جاء لأنو ولده بسنن ولمن جاء حصل سوء تفاهم مع المستلم وحلف انو ما يسلمه الا بعد العيد وحصل،،،،

  7. 140 ألف يا بروف علي الورقة الواحدة _ ما 120 ألف ..إنت برضو شلت جمارك 20 الق غلي الورقة الواحدة ولا شنو ؟؟؟ههههههه

  8. لا حول ولا قوة الا بالله العلي العظيم ،، ديل مصاصين دماء ،، انا في زيارتي الاخيرة للسودان قبل رمضان ، جيت شايل معاي تلفزيون شاشة 32 بوصة استعملوهو الأولاد في امريكا ومعاه البلي استيشن الاصلاً كان جابوها معاهم من السودان لقضاء الإجازة ،، المهم وصلنا غرفة الخرطوم اقصد مطار الخرطوم ، ودّوني للضابط قال لي نجمرك التلفزيون قلت ليه التلفزيون دا مستعمل وقعت احلف ليه بالله انو مستعمل المهم الراجل اقتنع لكن شاف ضابط اعلي منو قام فتح الموضوع تاني الضابط التاني قال لي ما بنعرف مستعمل اي حاجة بتصلنا هنا بنجمركها المرة الجاية ، شلت التلفزيون وقمت جاري جري ، ما قالوا ليكم لمن وصلت البيت لقيت التلفزيون مكسور !! والله وصلوني لحد البيت الله لا كسبهم 😥😥😪

    1. ههههههههه ,, تجرى يا كبير ….

  9. ما عندي غير أقول : (حسبي الله ونعم الوكيل)، الحرامية والمهربين بمشوهم ، والناس الغلابة يدفعوهم! لك الله يا وطني .. سلاااام ..

  10. اللعبه كوووولها فى ال 220 الف حقت المخلص ……….عمك داقس

  11. لي تجربة مريرة مع ناس (الجمارك) وهي قصة طويلة ، مرة كان جانا المعتمد زيارة وأجتمع بنا وقال إنو عندهم ناس تحت خط الفقر ما لاقين ياكلوا ولا يلبسوا ، وكمان هناك (أطفال المايقوما) محتاجين دعم وملابس وطلب مننا نجمع الملابس الفائضة عن حاجة أولادنا (مستعملة) عشان يودوها ليهم . شفتها شينة أودي حاجة قديمة !! فأشتريت من محلات الجملة بالدستة ودفعت وزنها وشلتها معاي وكان في رمضان .. وطلبوا مني أوديها التفتيش (عليها علامة)، ومع أول شنطة ضابطة الجمارك قالت لي نزل الشنط دي (8 شنط ) وأمشي أفرشها في الأرض وفرزها كل صنف براه !! قلت ما مشكلة سلعة الله غالية .. وطلبت من عامل يساعدني في الفرز ووعدته بمكافأة مجزية .. وأثناء التفريز في الأرض أشوف ليك (عقيد جيش) ومعه واحد لابس (جناح أم جكو كبيييرة) ووراهم 3 عربات مليانة شنط ضخمة !! ومشى جاب نفس الضابطة الطلبت مني أفرشها في الأرض ولزقت فيها بطاقات فسح وهي في عرباتها وطوالي على البوابة !! المنظر دا إستفزاني ونزل كل شياطين العالم نزلت على رأسي ، وبغضب شديد جريت على العربات ومسكتها وقلت ليهم بطريقة شماسية بتاعة صعلقة :(وين بالشحنة دي) ؟؟ بتاع الجيش نهرني (يا زول أمشي من هنا أحسن ليك) !! قلت ليه بكل قوة وبأسلوب زول فاهم النظام : ( إنت الدخلك هنا شنوأطلع بره ؟ دي حظيرة جمركية مش ميدان حرب ) ، فمشى جاب لي واحد بتاع أمن لابس ملكي وماشي يتبختر رافع صدره وقال لي : (يا زول أحسن ليك أبعد) !ّ! قلت ليه إنت منو ؟ قال لي (أمن) ، قلت ليه وريني بطاقتك ، وفعلاً طلعها فضحكت بسخرية وقلت ليه ( إنت جابوك هنا لمراقبة التهريب والتصرفات المريبة الممكن تهدد أمن الدولة ! مش عشان تساعدهم !! لو جاء عمر البشير هنا الشنط دي ما حا تمر) !! المهم كانت مضاربة وكواريك بأعلى صوتي وحلفت إنو لازم الشنط دي تتفتش أو يضربوني رصاص عشان تطلع من المطار!! والناس إتلمت وصادف أنو مديرعام المطار كان في الموقع ، فجاء ليستطلع الأمر وتفاجأ عندما شافني فقال : ( معقولة سيد فلان .. ) !! هو إنت العامل المشكلة ؟؟ – وهو تلميذ من تلامذتي – وعينك ما تشوف إلا النور بتاع الجيش وبتاع الأمن على صاحب الشنط كلهم فص ملح وداب . وجاني مدير جمارك الصالة قال لي ( يا أخي ما كنت تكلمنا ) ، كان معاي مصحف ومتوضئ للعصر فحلفت عليه قائلاً : ( أقسم بالله العظيم كل الأنت شايفو دا ما فيهو قطعة واحدة للبيع أو لأولادي ) ” هي لله ، هي لله ” – حقتي ما حقتهم – لذلك قلت أدفع جمارك ما مشكلة ، لكن لو في نظام لازم يمشي على الجميع مش على ناس آاااه وعلى ناس لا .. وأترك لكم المجال لتتخيلوا حصل شنو بعد كده .. الله أكبر ( حقتي ) ولا نامت أعين الجبناء .. سلاااام ..

    1. نصرك الله يا طيب ,,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: