بنك الخروف

نقترب يوماً بعد يوم من (عيد الأضحية) وما أدراك ما الأضحية التي أصبح يشكل شراؤها بالنسبة للمواطن مشكلة (عويصة) في ظل الإرتفاع غير المبرر في أسعار الخراف في بلد لديه ما لديه من مراع ومياه ووزارة للثروة الحيوانية .
ما أن يقترب العيد حتي يطالعنا ذلك البيان الذي تصدره (هيئة علماء السودان) وهو بيان من قبيل رفع الحرج والإحراج عن ما آل إليه حال البلاد والعباد (في ظل المشروع الحضاري) والمسغبة التي حلت بمعظم أهل البلاد .
ذلك البيان يشرح فيه (علماء الهيئة) للمواطنين جواز (الإستدانة) و(الأقساط) والما عارف أيه أصبح هذا البيان شيئاً مملاً ومكرراً يحفظه حتى الأطفال الغرض منه تطييب خاطر (المواطن) الغلبان ورفع الحرج عنه .

علماؤنا الأماجد يفتتحون (بيانهم السنوي هذا) بجواز الإستدانة ويختتمونه بأن الأضحية لا تجب على من لا يستطيع شرائها وكان الأجدر ان تكون الآية معكوسة بحيث يستفتحون البيان بعدم الوجوب ويختتمونه بجواز الإستدانة علماً بان من يستدين هو الفقير الذي لا يستطيع شراءها ولكن يبدو أنه فقه (المخارجة) !
طالما إنو مسألة عدم المقدرة على شراء الخروف دي بتتكرر كل عام بالنسبة لكل (أهلنا الغبش) فالعبدلله عندو فكرة جهنمية تريح العلماء من الفتاوى السنوية (المفصلة بالمقاس) كما تريح المواطنين من هذا العبء الثقيل والفكرة نهديها إلى (حكومتنا الرشيدة) وهي إنشاء (بنك الخروف) .. حيث يقوم المواطن بالتسجيل والإشتراك في هذا البنك مع إعطاء رقم موبايله الذي سوف يحول منه الرصيد (واحد جنيه يومياً) لأرقام البنك التى يعلن عنها ، يقوم البنك بتشغيل ما يتلقاه من أموال المشتركين خلال العام ثم عندما تقترب (الأضحية) يتم توزيع الأرباح إضافة إلى مبلغ الـ 360 جنيه (تقريباً) الذي قام المواطن بدفعه وبذلك يستطيع المواطن أن (يضحي) !! وأن ترتاح هيئة علماء السودان من إصدار تلك الفتوى السنوية (المهادنة) !
من مميزات هذه الفكرة إنو مبلغ جنيه يومياً ممكن (مجازفتو) بسهولة وممكن كمان لو وقعت في أيدك عشرة عشرين جنيه ما محتاج ليهم ترسلهم (للبنك) وترتاح ليك كم يوم كده .. وكمان ميزة تانية هي إنو القائمين على أمر (بنك الخروف) سوف يقومون بالشراء بالجملة وأكيد الأسعار ح تكون أقل ، وميزة تالتة هي إنو ممكن الأرباح (لو القروش إشتغلت كويس) تكون أكبر من تمن الخروف وعلى كده تضمن تطلع حق الزيت والفحم والبهارات والرغيف والضباح ذاااتو.
على ذات نهج (بنك الخروف) يمكن إنشاء (بنك التعليم) للإيفاء بأقساط المدارس والجامعات وبنك (إيجار البيت) عشان ما يجدعوا ليك عفشك في الشارع وبنك (الدواء) عشان تشتري كوتة الأدوية المزمنة سنويا خاصة والأدوية بقت كل يوم أسعارا بتزيد (مع إنها مضروبة) وبنك (الخريف) لعمل الترميمات قبل الخريف وبرضو ممكن (بنك الزواج) على الأقل تقدر تطلع حق (تصوير الفيديو) وبنك (النفاس) عشان تقدر تدفع (حق الدايات) وكده وبنك (الطهور) عشان تقدر تطهر الأولاد .. بس المشكلة إنو لو المواطن إشترك في البنوك الفوق دي كوووولها عاوز ليهو يومياً خمسين جنيه تحويل رصيد !! عشان كده خلونا هسه في (بنك الخروف) ده !
ولو الفكرة عجبت (أمنا الحكومة) حقو تبدأ في تنفيذها بعد العيد طوالي وتقوم بتسجيل البنك وتعيين أعضاء مجلس الإدارة والمدير العام ونواب المدير العام ومدراء الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات وكان السنة الجاية (ضحيتو) دي دقني .. !!

كسرة :
نحنا عاوزين لينا بنك (للصبر)

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

12 تعليق

    1. ياها فلاحتكم !

  1. فكرة مدهشة يا بروف وأنا أثني تماما بس بشرط !!
    يتم تعيين مدير ديوان الزكاة مديرا للبنك
    ويُعين أعضاء هيئة الحج والعمرة والأوقاف أعضاء لمجلس الإدارة
    ويتم الإستعانة بولاة الولايات مستشارين للبنك

    1. أجي !! قالولك البنك هو بنك الخروف مااا ادارته يا مسنوح !!

    1. دي فلاحتك ؟؟!!!

  2. هسي نسوي بنك الخروف ده بي قروشنا زااااتن حيشتروا خرفان لي ناس سوريا و غزة يغظهم البلا …
    هو العيد زاااتو شِن طعمه !!؟ ما يخلوا !!

  3. أحيييييي يا مرااارتي ديل ( مرروا فقاعتي ) على قول واحدة إندونيسية متزوجها واحد قريبنا … سلااااام …

  4. يا أستاذ نسيت الكوميشنات مع والأثاثات والكوندشنات

  5. ابو البراء اشرف | رد

    الفكرة جميله ورائعة بس
    لازم يتم خصم الضرائب والزكاه والعتب والنفايات وهلم جرا
    بعد داك يسلمو الناس الباقي عشان الناس تضحي بي مزااااااج

  6. يا سعادة البروف .. إنت أقعد أديهم في اﻻفكار اﻻستثماريه الخطيره دي و تمترس خلف كسراتك و واواتك .. ونحن مابين سندانة اﻻفكار و مطرقة الكسرات و طاتنا اﻻصبحت تصبح تااااااااااااااني

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: