التجهيز بالنظر

إقرأ القطعة الأولى ثم القطعة الثانية ثم أجب مستعيناً بالله على الإسئلة التي تليها :

القطعة الأولى :
أكد اللواء عمر نمر معتمد محلية الخرطوم أن المحلية تعمل الآن في المعالجات الفنية اللازمة للمصارف والمعابر بكافة أرجاء المحلية المتفرقة.
وقال نمر فى تصريح لوكالة السودان للأنباء إن المحلية رصدت مبلغ مليون جنيه للاستعددات للخريف .وأشار المعتمد أن العمل في نظافة المصارف بلغت %95 إلى جانب المصارف الوسطية التي تراوحت نسبة الإنجاز فيها مابين % 90 الي93% ، وقال إن نسبة العمل في صيانة العبارات بلغ 80% والمصارف الرئيسية نسبة 100% .

القطعة الثانية :
كشفت مياه الأمطار بعدم وجود مصارف بشوارع منطقة أم القرى شمال بالريف الشمالي لمدينة بحري بعد أن غرقت الشوارع المنطقة بأكملها مما جعل المواطنين يتذمرون من وقفتهم لتصريف المياه وعدم إستطاعتهم لمزاولة أعمالهم فضلاً عن تضرر عدد كبير من المنازل بسبب إحاطة المياه بها حتى تطوع عدد كبير من شباب المنطقة في محاولات جادة لتصريف المياه .
س1 : ما معني كلمة (الآن) في قول السيد المعتمد المحلية تعمل الآن في المعالجات الفنية اللازمة للمصارف والمعابر بكافة أرجاء المحلية المتفرقة !
1- هسه دي
2- ناو
3- في هذه اللحظة
س2 : هل يعتبر العمل (الآن) في المعالجات الفنية للمصارف نوعاً من الإستعداد لمواجهة الخريف الذي نواجهه (الآن) برضو ؟
1- في الزمن ده أي حاجة ممكنة
2- ما فيها حاجة يمشوا بالتوازي
3- دي ما أدونا ليها

س3 : ما رأئك في تصريح المعتمد بأن نظافة المصارف بلغت 95%؟
1- واسعة شوية نضفوها بالدس ؟
2- لو عكس الأرقام برضو كتيرة ..
3- الخمسة في المية الناقصة دي نسبة (السوق العربي) براهو ؟

س4 : ما رأئك في تصريح المعتمد بأن نسبة العمل والإنجاز في المصارف الوسطية بلغت بين 90% و 93% ؟
1- باين إنو النسبة محسوبة بدقة
2- الوسطية دي تطلع مين؟
3- يعني قول 100% ما فرقت
س5 : ما رأئك في قول المعتمد بأن نسبة العمل في صيانة العبارات بلغ 80% والمصارف الرئيسية نسبة 100% ؟
1- معقولة البلد دي فيها حاجة 100%؟؟
2- السوق العربي داخل في ال 100% دي؟
3- أموت وأعرف العبارات دي شنوو؟

س6 : لو كنت من سكان (أم القري) ماذا كنت ستقول للسيد معتمد محلية بحري؟
1- ما تخليك ذي نمر يااخ !
2- إنتا ما أدوك مليون للإستعدادات وللا شنو؟
3- (نمر) للآن قاعد يجهز … إنتا ما جهزتا مالك؟

س7 : لماذا لم يستطع المواطنون بأم القري مزاولة أعمالهم؟
1- لعدم مقدرتهم على تصريف المياه لعدم وجود مصارف
2- المصارف موجودة لكن لم يتم تزويدهم بكتيب التشغيل
3- يعني يزاولو أعمالهم وللا أعمال (المعتمدية)

س8 : ما هو سبب غرق شوارع منطقة أم القري بأكملها؟
1- الأمطار طبعن؟
2- عدم وجود مصارف؟
3- إمتحان من رب العالمين

س9 : تري على من ينطبق المثل الذي يقول (المية تكضب الغطاس) ؟
1- السيد المعتمد
2- مواطنو منطقة أم القرى
3- السباح سلطان كيجاب

س 10 : هل من نصيحة تسديها للسيد والي الخرطوم والسادة المعتمدين ؟
1- إبتعدو عن حكاية النسب المئوية في التصريحات
2- أدعوا الله ألا تهطل أمطار في العاصمة
3- أعترفوا بالقصور لأنو أي مطرة ح تكشف المستور

كسرة :
ليس أدل على فشل القائمين على أمر مجابهة الخريف بولاية الخرطوم إلا ذلك المقال الذي درج العبدلله على نشرة عند بداية كل خريف منذ تسع سنوات بعنوان (وجاء الخريف فجأتن) ، تسع سنوات لم يستطع فيها مسؤولاً واحداً أن يكذب توقعاتنا والتي تقول بان مسالة اكتمال كافة الترتيبات والتجهيزات الادارية والفنية واللوجستية لاستقبال فصل الامطار (الخريف) التي يتشدق المسؤولون بها ما هي ألا وهم (لا غير) وما هي إلا مطرة مطرتين إلا وينكشف المستور ويتضح أن ما يصرحون به من تجهيز ونظافة للمجاري الكبيرة والفرعية كان مجرد (تجهيز بالنظر) !

كسرة تانية :
ذي ما بنقول ليكم كل سنة .. الخريف ده خلوهو إستعدو من (الآن) للخريف الجاي !!

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

9 تعليقات

  1. واااااااااااااااااو برنجيه !

  2. ياخ عليك الله يا بروف
    البحميك تمرض شنو ؟؟؟!! ما دام انك بتسمع كلام ناس نمر وبقية فصيلته ديل ؟!

  3. وكمان قال (طبعن المعتمد) انو لاول مرة في التاريخ يتم عملية انارة كاملة لشارع الجمهورية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    وقال سفلتة الشوراع ماشة تمام طالما ايدكم في جيبكم ونحن ايدنا في جيبنا (دي عايزة توضيح)… وكل زول يحتفظ بالنفايات جوة بيتو (لمتين) ……والمصارف وووووووووووووووووو ……… والله انا قلت يا ربي الخرتوم دي معقول اتغيرت بالسرعة دي …..
    غايتو …. كنا بنعرف محمود الكذاب وحكايتو مع النمر …. لكن اول مرة اشوف (نمر) بكضب !!!!!!!!

    كسرة بحضر القنوات السودانية غصبا عني…….

    1. سحبوا منك (الدش) ؟؟ وى وى وى

      1. ههههههههههههههه ,, بريييية ,,,
        ينكسر نزيف فى فلانة الماذيانا ,,,

  4. يا الكتلوك ولسه ما متا (هههههه) ، هو إنت فائق ورااائق كدي لمن تحضر القنوات السودانية الما فيها غير الغنا حتى في شهر الخيرات والبركات والنفحات ” شهر رمضان ” .. سلاااام ..

  5. والله يااستاذ مهازل غايتو ربنا يكون في عونا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: