شعب الله المحتار

لا حديث للمجتمع وأطيافه المختلفة عبر في الجلسات الخاصة ومواقع التواصل الإجتماعي سوي مسالة السودانيات اللواتي تم إستقدامهن للعمل كخادمات منازل بالمملكة العربية السعودية والذين تم إكتشافهن بالصدفة بعد أن تعرض بعضهن لسؤ المعاملة مما حدا بهن إلى اللجوء إلى السلطات المختصة .

معظم الذين تناولوا الأمر عبر الوسائط الإعلامية والإجتماعية المختلفة (إستهجنوا) أن يكون هنالك (سوادانيات) يعملن في المنازل كخادمات مطالبين بإعادتهن فورا إلى البلاد زاعمين بأن هذه المهنة لا تليق (بالسودانيات) وإن كانت تليق بكل شعوب العالم الأخرى !
حقاً كما قالوا فإن (الجمرة بتحرق الواطيها) فهؤلاء (المرفهون) الذين يتبنون مثل هذا الطرح الساذج الفطير يعلمون بان فطرة الإنسان (السوداني والما سوداني) لا تميل بل لا تهضم مسالة إن يخدم الشخص شخصاً اخر مثله لقاء مال، بل أن تصبح تلك هي مهنتة التي يمتهنها وتكتب له في جواز سفره ، لكنه (الفقر) قاتله الله والمسغبة وقسوة الحياة وفقدان الأمل الذي يجعل الشخص مجبرا لأداء مهمة كهذه .
هؤلاء الذين يتشدقون رافضين لهذا العمل الشريف (رغم هوانه) لم يعطونا البديل الذي من شأنه أن يقيم أود هؤلاء الفتيات اللواتي لم يفضلن الطريق الأسهل و(الأريح) لجلب المال بل فضلن هذا الطريق الشاق المذل المهين ، من منكم (طال عمركم) يجد فرص عمل يمكن لهولاء الفتيات بواسطتها إعالة أنفسهن وعائلاتهن؟
(وللا القصة كلام سااكت؟) !!
إن معظم الذين (يتصايحون) مشفقين على (العرض السوداني) و (النفس الأبية) و الشنو ما عارف هم قوم قد لبثوا في الكهف أكثر من ربع قرن ، هم قوم يتحدثون عن (السودانيين) عندما كانوا شعب الله المختار قبل أن يصبحوا شعب الله (المحتار) .. نعم كان السودانيون شعباً مختاراً بعناية فائقة أدهشت في ذلك الزمان كل العالم .. كل العالم .. شعب كامل لم يكن فيه من يسرق إلا قلة لا تحسب .. ثم بعد أن (إحتار) أصبحت السرقة يتم التحلل منها (زي الما حصلت حاجة) ، شعب كامل كانت (الرشوة) فيه تسمع ولا تري كالغول والعنقاء ثم بعد أن (إحتار) أصبح (الغول) ذاااتو يرتشي خليك من العنقاء .. شعب كامل كان من يدخن فيه البنقو (وهو المخدر الوحيد المعروف أنذاك) الحلة كووولها تعرفوا وهو كالمريض بالجرب يتحاشاه الجميع وتحذر الأسر أبنائها من الإختلاط به ، والآن بعد أن (إحتار) إصبحت معظم شرائح المجتمع تتعاطي المخدرات بكافة أنواعها بحيث يتم إستيرادها له (بالحاويات العظام) عبر المواني الرسمية ، شعب كامل كان (الحي) كووولو (فيهو بت كعبة واااحدة) ، إذا ما خرجت صوب (الزلط) إبتعد الجميع عنها كأنها تحمل فيروساً خطيراً والآن بعد أن (إحتار) أصبحت للفاحشة شققاً مفروشة ومزارع (معروشة) بل أصبح يتم التصدير إلى (الخارج) ، شعب كامل كان الأب فيه يعول كل أبنائه من مرتبه (ويفضل ليهو باقي) ثم بعد أن (إحتار) أصبح دخل الإبناء لا يمكنه أن يعول أباهم ، شعب كامل لم تكن تضطر فيه النساء للخروج إلى الشارع لبيع الشاي أو (الملاح) والتعرض إلى التحرش ثم بعد أن (إحتار) إمتلأت الشوارع بألاف النساء لأن (الجحيم) أهون من (الجوع) ولأن بيع الشاي أهون من بيع أشياء اخرى ، شعب كامل كانت كل الشعوب تحني له رؤوسها أجلالا وإحتراما قبل أن تجبره قسوة الحياة أن تخرج فتياته خادمات في بيوت الغرباء !
ما لم يفهمه ويعيه هؤلاء الذين يتباكون على عمل فتياتنا كخادمات منازل أن (القيم) و (الأخلاق) التي كنا عليها (ورفعة النخرة) عندما كنا (شعب الله المختار) ليست هي جينات في السلالة السودانية بل هي متلازمة (للكفاية والعدل) اللذان ما أن أختفيا حتى أصبحنا شعب الله (المحتار) !

كسرة :
كلما إرتفع الدولار كلما أنخفضت أخلاقنا !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و


كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

Advertisements

20 تعليق

  1. برنجيه هاامله

  2. فعلا نحنا الشعب الملام الاول ..
    اولا لأننا سكتنا علي حكومة كل يوم سايقه البلد لورا .. وثانيا بقينا ما عندنا تكافل اجتماعي زي اول ..

    اما البنات ديل نفسهن وبالذات العايزات يجن يشتغلن في السعودية لأني عايش فيها وبعرف فهم شعبها ونظرتهم للاجنبي مهما كان مؤهله بنظروا ليهو علي انو شخص جاء يخدمهم فما بالك لما الشخص اصلا يجيهم بمهنة خادم او خادمة !!

    بعدين حتي رواتب الخادمات بتتراوح بين 800 الي 1000 ريال ده لو ادوها الراتب اول بأول وساعات الدوام هي حسب نوم الاسرة والاسر السعودية ما بنوموا كلهم سواء ولا بيصحوا سوا يعني حتكون شغالة علي مدار اليوم .. ده غير انو لو الاسرة فيها اولاد مراهقين او الاب نفسه يكون عنده باقي مراهقة !! نحنا كل كم شهر بتجينا حالة ( حمل ) خادمة وبيطلبوا مننا نجهضها وده حالتنا في وسط الرياض يعني ممكن في كل 50 بيت يكون فيهو خادمة واحدة اما شمال الرياض بكون في كل بيت في اكتر من خادمة وقس علي ذلك عدد حالات التحرش .. وبالمناسبة حتي سواقين الاسر بيتعرضوا للتحرش لأنه مجتمع اصلا بهيمي عايز ياكل ويمارس الجنس كان رجال كان حريم !!
    اها البت دي من راتبها ده حتدفع جبايات السفارة وحتشتري منه بطاقات اتصال عشان تكلم اهلها وحتشتري حاجاتها الخاصة جدا ( بالاجنحه او بدون اجنحه ) يعني عايزه ليها اقل شئ 200 او 300 ريال شهريا ده لو اكتفت بأكل باقي الرز الحيفضل من وجبة الاسرة ولا اشتهت شكلاته لا سندوتش شاورما يجيبو ليها السواق وهو راجع !! اها حيفضل من راتبها كم ؟ كل الحا يفضل ما بفوت ما يعادل مليون ونص سوداني يعني ممكن تلقي الراتب ده بنفس مهنتها دي في السودان وتكون معززه مكرمة ودون ما تتعرض لمضايقات ولو اتعرضت حيكون بنسبة 1% …
    مرة الراجل الانا شغال معاه عنده سواق اندونيسي وزوجة السواق نفسها خادمة في البيت يوم الاندونيسي جاني المكتب ومجرد ما دخل قفل الباب وراه ( بيني بينكم انا جهزت بونيتي طوالي ) بس هو والله اتعلق فيني ويبكي ويتخج زي الشفع هديتو وقلت ليه احكي مالك ؟ قال لي : ماما كلام ( وماما دي ست البيت يعني ) ماما كلام انت تاني مافي نوم سوا سوا حرمه عشان مافي يجي بيبي بعدين انا مدام ممكن مافي شغل بيت كويس … اتخيلو بالله المرا عايزة تحرموا من انه يمارس حياته مع زوجته شان ما تحمل وتقصّر في شغل البيت !!
    هسي ديل ناس يجوا يشتغلوا عندهم ؟ والله نحنا الرجال ممشنها خنق معاهم الا الحوجه مطلعة … امنا ياخ .

    1. حسبى الله عليهم ,,, الله لا كسبهم عافية دنيا ولا اخرة

  3. صدقت يا استاذنا وشكرا ياجنوبى على المداخله

  4. والله فعلا مهازل يا استاذ ربنا يكون في عونا

  5. لك الله ياوطن افوضى امرى الى الله والله بصيرا بالعباد

  6. الواحد ما عارف يكتب شنو زاتو خلونا لاقادرين نلم الفضل من عزتنا ولاقادرين نحافظ على الباقى

  7. لا حول ولاقوة الا بالله العلى العظيم ,, جزيت خيرا يا بروف ,, فعلا الناس تغنى وما عارفة العرس حق ناس منو !
    ستر الله عليهن ورد غربتهن سالمات آمنات …

  8. Ustaz Jabra Salam I do acknowledge what you wrote in this article. This happened to our poor sisters in the Gulf countries in general because our Tyrant Regime who practiced ElTamkeen and fired all the good experts in our country and recruited their trash in the name of Islam! Omer ElGashir is responsible for everything that happened for our families in the Sudan and abroad. He and his gang will face our courts when we forced him to step down, and we do believe that in front of Allah when not a single minute particle will be missed in the hereafter, they will not be able to deny their bad deeds! No way any one of our ruling official thieves will get a chance by then to Tahalol or Figh ElSutrah they indoor! Ina Allah Youmhil wa la yahmil!

  9. مبرروكة عليك يا جنوبي البرنجية (الهاملة) , وشفنا أمبارح التحرك على أوسع نطاق لحل المشكلة وبقيادة السفير إلي أن إنحلت والحمد لله وذلك بفضل الله ثم بالنشر الواسع الإنتشار عبر وسائط التواصل الإجتماعي وتناولها لهذا الموضوع المخزي المشين !! ولولا ذلك لراح الموضوع شمار في مرقة وما كان زول سمع بيهو أصلاً زي ما حصل مع الحاجات التانية .. ومن هنا أناشد كل القمرديناب بأن لا يسكتوا على أي شيء يمس قيمنا ومثلنا وأخلاقياتنا وشرفنا (كان فضل فيهم شيء) لأنو ديل ناس يخافوا ما يستحوا !! وعشان كده قالوا حا يعملوا “ضوابط” لهذه الوسائط حتى لا تفضح سؤاتهم .. قاتلهم الله أنى يؤفكون .. ومالك يا أخونا خالد ود عبد الله رجب كاتب مداخلتك بالإنجليزي ؟ مالا لغتنا دي ما سمحه وأكرمها الله بإنزال خير كتبه بها وهي لغة أهل الجنة .. ألا هل بلغت اللهم فأشهد ..

    1. حبيبنا محجوب الله يبارك فيك …
      ود العبيد ليك وحشه والله ..
      يا محجوب السفارة اتحركت اخيرا نعم بس ما تنسي دور الجالية السودانية في منطقة الحدث وانهم مشوا للبنات في قسم الشرطة قبل السفارة تصلهم وبادروا بالبدء بجمع المبلغ الذي يدعي الكفيل انه خسره فيهن رغم انه الظروف هنا بقت زفت ..
      القرار الطلعته السفارة بمنع أي بت تجي تشتغل بمهنة خادمة ده قرار تخازلي جداً ويدل علي عجزها في مقدرتا علي توفير الحماية لمواطنيها وعملت زي النعامه دفنت راسها في الرملة .. بس برضو كويس لحدي ما تجي سفارة تقدر تبسط حمايتها علي مواطنيها !
      هل تعلم انو الفلبين أي كفيل تحصل منه مشكلة زي دي او ياكل حق مواطن فلبيني طوالي السفارة الفلبينية بتخط اسمه في القائمة السوداء عندها وبترسل لمكتب العمل في الفلبين انو ما يسمح لأي مواطن فلبيني يجي من هناك علي اسم الكفيل ده . ده غير الملاحقة القانونية البتتم هنا وعندهم قسم خاص مهمته بس يتولي قضايا مواطنيهم والتمثيل نيابة عنهم امام الجهات الرسمية .
      اقسم بالله انا مره ممرضة عملت مشكلة مع زميلتها خصمت عليها يومين من الراتب جاني مندوب من السفارة يسألني ليه خصمت عليها يومين , وقال لي البت اتصلت علينا وقدمت شكوي ضدكم !! اتخيل اتصلت بس عليهم مش مشت السفارة !!
      ود العبيد … السعودية كفاية تجيها حج وعمرة ع الاقل تحافظ علي دينك ..

      1. وانت ال………….. ليك شنو , تخصم منها يومين
        بعدين الخصم دا في العقد مافي
        جبتو من وين ……………. انتا قايلهم هنود

      2. في قانون العمل باب العقوبات والجزاءات يا مسنوح
        والله البلد دي فيها قانون عمل .. يخلي الكفيل تمسكو ام هلا هلا إلا الثقافة العمالية مافي ..

  10. السلام عليكم يا احباب ومبروك البرنجيه الهامله يا جنوبي
    والله كلامك ده يا جنوبي فعلا مخيف
    وتجربتي مع السعوديه بس حج وعمره ،مسووليه مشتركه الحكومتين وكل سوداني كريم ،عند كل الزيارات للأراضي المقدسه اقعد اشرح لأبنائي ديننا سمح ولكن هؤلاء لا يمثلون الدين،الله المستعان وفعلا يا الفاتح كلام في الصميم ولكنه مخيف جدا

    1. والله يا جنوبي كلكم ليكم وحشه
      وانا فعلا متحير
      اسافر السودان اتحير
      اسافر السعوديه اتحير
      لحج واعتمر اتحير
      يا جماعه الحاصل شنو
      وين حقوق الانسان في بلاد الاسلام
      والله انا بقول فعلا شعب الله المحتار

  11. إنسان ياتو دا يا ود العبيد ؟ هنا حقوق (الشيطان) مكفولة !! بس (الغير سعودي) أبداً ما إنسان ولا عندو حقوق … سلااااام …

  12. مقهورين و ساكتين | رد

    بصراحة نحن زاتنا غلطانين في بت بخلوها تمشي بدون محرم
    ثم كيف تشتغل خادمة عند المتوحشين ديل؟؟؟
    انا قعدت افتش ل بيبي ستر شهرين مالقيت والله قلت بديها 3الف ومالقيت تخيلو بس نسمع بالسعودية ونجري

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: