بيفرحوا ليه؟

إمتلأت الصحف والأسافير بأسماء و ( صور) تشكيلة حكومة ولاية الخرطوم الجديدة ، وقد لفت نظر العبد لله أن من تم أختيارهم لهذا الأمر (فرحون) بتحمل المسؤولية على عكس الصحابة والتابعين الذين كانوا يهربون منها ويتخوفون من تسنمها ، وأن علامات السرور قد علت وجوههم بل أن بعض أهاليهم قد قاموا بذبح الذبائح وتبادل التهاني ، العبد لله طفق يبحث عن سر هذا السرور فوجد الحاجات التحت دي !

• ح يكون عندو حاشية وهيلمانة … عندو مكتب ومدير مكتب وسكرتيرة وعربية تودي الأولاد المدارس و(بوكس) يجيب الخضار من السوق وعربية تاني تودي المدام الكوافير والأعراس و(الحنانة) ده غير (البرادو) بتاعت سعادتو
• ح يرتاح من قصة كل دقيقة يمشي يعاين للجمرة ويشوف الفضل فيها كام وهل ح تقضي ولا ح تقوم تقطع نص الليل وتجهجه باكاتو .
• أهم حاجة في الموضوع ح يرتاح من (حكايت) يوم خمسة دي وهو اليوم الذي ينتهي فيهو مصروف البيت ويبدأ في عمليات الإستلاف و (الجرورة) وح تختفي من حياتو عبارات مثل (بالله ألاقي عندك سلفة) .. (هسه الشهر ده يتموهو كيف؟) لأنو مخصصاتو الشهرية مع (البدلات) و (السفريات) والشنو ما بعرف ح تكون كفيلة بأنها تقعدو مليون شهر تاني .
• وح تتاح ليهو فرصة يسافر .. طبعن قبلما يكون مسؤول (التذكرة بس كانت بتجهجهو) .. لاااا هسه الوضع ح يختلف .. كل يومين تلاته شنطتو والمطار ..طبعن قبل ما يكون وزير كان بيتبهدل في التفتيش تطلع الحزام الجهاز يقول ليك تيت تيت .. يقوم يطلع النضارة وبرضو الجهاز يقول ليك تيت تيت .. يقوم تطلع الما عارف شنو داك … الكلام ده تاني مش ح يحصل بس يسلم جوازو قبل السفرية لبتوعين العلاقات العامة وورقو وتأشيرتو وتذكرتك كووولها تكون جاهزة ومن صالة كبار الزوار وعلي الطيارة طوااالي
• الأكل بتاع سعادتو أكيد ح يتغير .. معقولة ح يفطرتاني (بوش) ويتغدى (عدس) ويتعشى (فول)؟ .. الحاجات دي بياكلا (الشعب) ، تاني ح ياكل حاجات تانيه خالص .. حاجات طازجة ودسمة وطرية حاجات ذات سعرات حرارية مرتفعة وقيمة غذائية عالية ومش كده وبس القصة ح تكون فيها تحلية ؟ يعني بعد ما يتتغدي ح تجيهو صينية فيها (فواكه مشكلة) وممكن كمان (حلويات) ويااا حليل الموز !
• سعادتو تاني مش ح يمشي (الجزارة) كل يوم جمعة عشان يشتري (نص الكيلو) البقري المجلفط .. لا تاني ح ياكل (بتلو) و(فلتو) و(عجالي لبن) ويوم الجمعة ده بالذات (الخروف) ح يكون الصباح معلق في باب الشارع !
• وح يمشي (الحج) بدون ما يدفع مليم واااحد .. ويجيب معاهو هدايا و(جلاكسيهات) للعيال وأمهم كمان .
• ما ح يكون عندو علاقة برسوم الجامعات والمدارس والأقساط و (فلقة الدماغ) ومافيش تاني واحد من الأولاد ح يطردوهو عشان ما (دفع الرسوم) وأكيد الأولاد مش ح يتعلمو تاني في المدارس الحكومية .. مدارس أجنبية وبس !
• ح تنطلق وراء عربته (المظللة) عدد من عربات الحراسة والتأمين و(موتر) يفسح له الطريق ويييو ويييو ويييو !
• ما ح يكون في أسرتو أي زول (طائر) وما لاقي وظيفة .. كل العاطلين ح يشتغلو … القصة كوولها كارت من سعادتو و (حامله يهمني أمره)
• ما ح يشيل هم للعلاج لأنو تاني مش ح يمشي لمستشفى حكومي يقول ليهو جيب القطن والشاش واللصقات وصبغة يود والحقن الفاضية والحقن المليانة لا الحاجات دي للمواطنين أما سعادتو فلو شعر بأي حاجه (ألمانيا) طوااالي !

كسرة :
وأنا أقول (بيفرحوا ليه) ؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

7 تعليقات

    1. مبروك

  1. وما تنسى يابروف إنو حيثني ويثلث ويربع وكلو المخصصات الفوق دي حتضاعف 3 مرات تاني للبيوت الجديدة الحتفتح دي والنسايب العطالة كلهم حيرطبو ؛؛؛

  2. دا كلو كوم وحكاية وزير الحكم المحلى الجديد / حسن اسماعيل القصته ماليه الدنيا بريحتها العفنة كوم تانى والله يستر من فضيحة تانية فى مكتب الوالى …… متعودة دايييييما

  3. مبروووكة عليك البرنجية ود أونكل سام ، نسيت يا بروف العمارات والفيلل في منتجعات مليزيا والبتتأجر للسواح بالدولار دا غير الشركات والمابعرفوا شنو داك تاني .. وهي أمنا الحكومة دي ما شافت (مقاطع الفيديو حقت وزير الحكم المحلى الجديد حسن اسماعيل) ، ولا دي من شطحات اللمبي القال حا يمشي على نهج سيدنا عمر (لو أن بغلة في العراق تعثرت لسألني الله عنها) !!! .. سلاااام ..

  4. وزير الحكم المحلي ( حسن اسماعيل سيد احمد)
    ﺣﺮﺍﻣﻲ ﻳﺼﺒﺢ ﻭﺯﻳﺮﺍً
    ﺳﻌﺪ ﻋﺒﺪ ﺍﻟﻘﺎﺩﺭ ﺍﻟﻌﺎﻗﺐ ﺳﻌﺪ – ﺗﺒﻮﻙ -23 -8 2015 ﻡ
    ///
    ﻟﻴﺲ ﻣﺴﺘﻐﺮﺑﺎ ﻣﻦ ﺣﻜﻮﻣﺔ ﺍﻹﻧﻘﺎﺫ ﺃﻥ ﺗﺨﺘﺎﺭ ﺣﺮﺍﻣﻴﺎ ﻭﺗﻌﻴﻨﻪ ﻭﺯﻳﺮﺍ، ﻓﺒﻌﺪ ﺍﻟﻔﻀﺎﻳﺢ ﺍﻟﺘﻲ ﻣﻸﺕ ﺍﻟﺪﻧﻴﺎ ﻭﺷﻐﻠﺖ ﺍﻟﻨﺎﺱ ﻛﻔﻀﻴﺤﺔ ﻣﻜﺘﺐ ﺍﻟﻮﺍﻟﻲ ﻭﺍﻟﺴﺎﺑﻖ ﻭﻏﻴﺮﻫﺎ ﻻ ﻳﺘﻮﻗﻊ ﺍﻟﻤﻮﺍﻃﻦ ﺍﻟﺴﻮﺩﺍﻧﻲ ﻣﻦ ﺣﻜﻮﻣﺘﻪ ﻏﻴﺮ ﺇﻳﻮﺍﺀ ﺍﻟﻤﻔﺴﺪﻳﻦ ﻭﺣﻤﺎﻳﺘﻬﻢ ﻭﺗﻮﻟﻴﺘﻬﻢ ﺃﻣﺮ ﺍﻟﻨﺎﺱ
    ﺍﻟﺤﺮﺍﻣﻲ ﺍﻟﺬﻱ ﺃﺗﺤﺪﺙ ﻋﻨﻪ ﻓﻲ ﻫﺬﺍ ﺍﻟﻤﻘﺎﻝ ﻫﻮ ﺍﻟﻤﺪﻋﻮ ﺣﺴﻦ ﺇﺳﻤﺎﻋﻴﻞ ﺳﻴﺪ ﺃﺣﻤﺪ، ﺧﺮﻳﺞ ﺟﺎﻣﻌﺔ ﺍﻟﺨﺮﻃﻮﻡ ﻛﻠﻴﺔ ﺍﻻﻗﺘﺼﺎﺩ ﻋﺎﻡ 1996 ﻡ ﻭﻫﻮ ﺍﻵﻥ ﺻﺎﺣﺐ ﻋﻤﻮﺩ ‏( ﻫﺬﻩ ﻗﻮﻟﻲ ‏) ﺑﺼﺤﻴﻔﺔ ‏( ﺍﻟﺨﺮﻃﻮﻡ ‏) ، ﻭﻛﺎﻥ ﻣﻦ ﻛﻮﺍﺩﺭ ﺣﺰﺏ ﺍﻷﻣﺔ ﺍﻟﻘﻮﻣﻲ ﻋﻨﺪﻣﺎ ﻛﻨﺎ ﻃﻼﺑﺎ ﺑﺠﺎﻣﻌﺔ ﺍﻟﺨﺮﻃﻮﻡ ﺃﻭﺍﺋﻞ ﺍﻟﺘﺴﻌﻴﻨﻴﺎﺕ ﻭﺃﻭﺍﺳﻄﻬﺎ
    ﺃﻣﺎ ﺣﺮﺍﻣﻴﺔ ﺣﺴﻦ ﺇﺳﻤﺎﻋﻴﻞ ﻓﻌﻨﺪﻱ ﻣﻦ ﺍﻟﻤﺴﺘﻨﺪﺍﺕ ﻭﺍﻟﻮﻗﺎﺋﻊ ﻣﺎ ﻳﺆﻳﺪﻫﺎ ﻭﻟﻜﻦ ﺍﺳﻤﺤﻮﺍ ﻟﻲ ﺃﻥ ﺃﺭﻭﻱ ﺍﻟﻘﺼﺔ ﺍﻟﺒﺎﺋﺨﺔ ﺍﻟﻘﺒﻴﺤﺔ ﺍﻟﺘﻲ ﻭﻗﻌﺖ ﺑﻴﻨﻲ ﻭﺑﻴﻦ ﺭﺟﻞ ﺣﻘﻴﺮ ﻛﻨﺖ ﺃﻇﻨﻪ ﺯﻣﻴﻞ ﺩﺭﺍﺳﺔ، ﺣﻴﺚ ﻛﻨﺎ ﻓﻲ ﺟﻴﻞ ﻭﺍﺣﺪ ﻓﻲ ﺟﺎﻣﻌﺔ ﺍﻟﺨﺮﻃﻮﻡ ﻓﻲ ﻛﻠﻴﺘﻴﻦ ﻣﺘﺠﺎﻭﺭﺗﻴﻦ، ﻭﺍﻟﻘﺼﺔ ﻭﻗﻌﺖ ﻗﺒﻞ ﻋﺎﻣﻴﻦ، ﺭﺍﺳﻠﻨﻲ ﺣﺴﻦ ﺇﺳﻤﺎﻋﻴﻞ ﻓﻲ ﺍﻟﻔﻴﺲ ﺑﻮﻙ ﻭﻃﻠﺐ ﻣﻨﻲ ﻣﺒﻠﻎ ﺧﻤﺴﻤﺎﺋﺔ ﺟﻨﻴﻪ ﻟﺤﺎﺟﺘﻪ ﺍﻟﺸﺪﻳﺪﺓ ﺇﻟﻴﻬﺎ، ﻭﺑﺤﻜﻢ ﺍﻟﺰﻣﺎﻟﺔ ﻟﻢ ﺃﺗﺮﺩﺩ ﻓﻲ ﺗﻠﺒﻴﺔ ﺍﻟﻄﻠﺐ ﻓﻮﺟﻬﺘﻪ ﺇﻟﻰ ﺍﺑﻦ ﺃﺧﻲ ﺇﺳﻤﺎﻋﻴﻞ ﺍﻷﺯﻫﺮﻱ ﻋﺒﺪ ﺍﻟﻘﺎﺩﺭ ﺍﻟﻌﺎﻗﺐ ﻓﻲ ﺍﻟﺨﺮﻃﻮﻡ ﻭﻃﻠﺒﺖ ﻣﻨﻪ ﺃﻥ ﻳﻌﻄﻲ ﺣﺴﻦ ﺇﺳﻤﺎﻋﻴﻞ ﻣﺒﻠﻎ ﺧﻤﺴﻤﺎﺋﺔ ﺟﻨﻴﻪ ﻭﺳﺄﺳﺪﺩﻫﺎ ﺑﻨﻔﺴﻲ ﺑﻌﺪ ﺃﻳﺎﻡ .
    ﺫﻫﺐ ﺣﺴﻦ ﺇﺳﻤﺎﻋﻴﻞ ﺇﻟﻰ ﺍﺑﻦ ﺃﺧﻲ ﺇﺳﻤﺎﻋﻴﻞ ﻭﻛﺎﻥ ﺍﻷﺧﻴﺮ ﻣﺸﻐﻮﻻ ﻓﺄﺧﻄﺄ ﻓﻜﺘﺐ ﺷﻴﻜﺎ ﺑﻤﺒﻠﻎ ﺧﻤﺴﺔ ﻋﺸﺮ ﺃﻟﻒ ﺟﻨﻴﻪ، ﻓﺘﻨﺎﻭﻟﻪ ﺍﻟﺤﺮﺍﻣﻲ ﺣﺴﻦ ﺇﺳﻤﺎﻋﻴﻞ ﺑﻜﻞ ﺳﺮﻭﺭ ﻭﺍﻧﺘﻬﺎﺯﻳﺔ ﻭﻟﻢ ﻳﻨﺒﻪ ﺍﺑﻦ ﺃﺧﻲ ﺇﻟﻰ ﺍﻟﺨﻄﺄ ﻓﻲ ﺍﻟﻤﺒﻠﻎ ﺍﻟﻤﻄﻠﻮﺏ !!! ﻭﺑﻌﺪ ﺷﻬﺮ ﺭﺍﺳﻠﻨﻲ ﺍﺑﻦ ﺃﺧﻲ ﻣﻔﻴﺪﺍ ﺃﻥ ﺣﺴﻦ ﺇﺳﻤﺎﻋﻴﻞ ﻟﻢ ﻳﺮﺟﻊ ﺍﻟﻤﺒﻠﻎ، ﻭﺃﻧﻪ ﺃﺧﺬ ﺧﻤﺴﺔ ﻋﺸﺮ ﺃﻟﻒ ﺟﻨﻴﻪ، ﻭﺑﻌﺪ ﺃﻥ ﺍﻛﺘﺸﻒ ﺍﺑﻦ ﺃﺧﻲ ﺍﻟﺨﻄﺄ ﺍﺗﺼﻞ ﺑﺤﺴﻦ ﺇﺳﻤﺎﻋﻴﻞ ﻓﻌﻠﻢ ﺃﻧﻪ ﺃﺭﺟﻊ ﻣﺒﻠﻎ ﺗﺴﻌﺔ ﺁﻻﻑ ﺟﻨﻴﻪ ﻭﺑﻘﻴﺖ ﻋﻨﺪﻩ ﺳﺘﺔ ﺁﻻﻑ ﻟﻢ ﻳﺮﺟﻌﻬﺎ ﺣﺘﻰ ﺍﻵﻥ ﻭﻫﻮ ﺍﻟﺬﻱ ﻛﺎﻥ ﻗﺪ ﻃﻠﺐ ﻓﻘﻂ ﻣﺒﻠﻎ ﺧﻤﺴﻤﺎﺋﺔ ﺟﻨﻴﻪ، ﻭﺃﺧﺬ ﻳﺘﻬﺮﺏ ﻣﻦ ﺍﺗﺼﺎﻻﺕ ﺍﺑﻦ ﺃﺧﻲ ﻭﻳﻐﻠﻖ ﺟﻮﺍﻟﻪ ﺣﺘﻰ ﻭﺻﻠﺖ ﺍﻟﻘﻀﻴﺔ ﺍﻟﺸﺮﻃﺔ ﻭﺍﻟﻘﻀﺎﺀ، ﻭﻫﻲ ﺍﻵﻥ ﺑﻴﺪ ﺍﻟﻤﺤﺎﻣﻲ ﻋﺜﻤﺎﻥ ﺣﺴﻦ ﻋﺒﺪ ﺍﻟﻘﺎﺩﺭ ﺍﻟﺨﺒﻴﺮ، ﻭﻓﻲ ﺁﺧﺮ ﻓﺼﻮﻟﻬﺎ ﺟﺎﺀ ﺣﺴﻦ ﺇﺳﻤﺎﻋﻴﻞ ﺇﻟﻰ ﺍﻟﻤﺤﻜﻤﺔ ﺧﻔﻴﺔ ﻭﻗﺎﻝ ﺃﻧﻪ ﺃﻋﺎﺩ ﺑﻘﻴﺔ ﺍﻟﻤﺒﻠﻎ ﻭﻟﻜﻦ ﺑﺎﻟﺮﺟﻮﻉ ﺇﻟﻰ ﺣﺴﺎﺏ ﺇﺳﻤﺎﻋﻴﻞ ﺍﻷﺯﻫﺮﻱ ﺍﻛﺘﺸﻒ ﺃﻥ ﺍﻟﺤﺮﺍﻣﻲ ﺣﺴﻦ ﺇﺳﻤﺎﻋﻴﻞ ﻟﻢ ﻳﻌﻴﺪ ﺍﻟﻤﺒﻠﻎ، ﻭﻇﻞ ﻣﺨﺘﻔﻴﺎ ﻫﺎﺭﺑﺎ ﺣﺘﻰ ﺗﺎﺭﻳﺦ ﺍﻟﻴﻮﻡ !! ﻓﺎﺿﻄﺮ ﺍﻟﻤﺤﺎﻣﻲ ﺇﻟﻰ ﺭﻓﻊ ﻗﻀﻴﺔ ﺗَﻤَﻠُّﻚ ﺟﻨﺎﺋﻲ ﺿﺪ ﺍﻟﻬﺎﺭﺏ ﺣﺴﻦ ﺇﺳﻤﺎﻋﻴﻞ
    ﻟﻘﺪ ﺻﻤﺖُّ ﻋﻦ ﻫﺬﺍ ﺍﻟﺤﺮﺍﻣﻲ ﻃﻴﻠﺔ ﻋﺎﻣﻴﻦ ﻋﻠﻰ ﺍﻟﺮﻏﻢ ﻣﻦ ﻭﺟﻮﺩﻩ ﻓﻲ ﻣﺠﻤﻮﻋﺔ ﻟﺨﺮﻳﺠﻲ ﺟﺎﻣﻌﺔ ﺍﻟﺨﺮﻃﻮﻡ ﻓﻲ ﺍﻟﻮﺍﺗﺲ ﺍﺏ، ﻭﻛﺎﻥ ﺻﻤﺘﻲ ﻣﺮﺍﻋﺎﺓ ﻟﻠﺰﻣﺎﻟﺔ ﻭﺷﻌﻮﺭ ﺃﻋﻀﺎﺀ ﺍﻟﻘﺮﻭﺏ، ﻭﻷﻥ ﺍﻟﻤﺒﻠﻎ ﺍﻟﺰﻫﻴﺪ ﺳﺮﻗﻪ ﻣﻨﻲ ﺷﺨﺼﻴﺎ، ﻭﻟﻜﻦ ﻻ ﻣﻨﺎﺹ ﻣﻦ ﻓﻀﺤﻪ ﺣﻴﻦ ﺗﺨﺘﺎﺭﻩ ﺍﻟﺤﻜﻮﻣﺔ ﻭﺯﻳﺮﺍ، ﻟﻴﻌﻠﻢ ﺍﻟﻨﺎﺱ ﺃﻥ ﻟﺼﺎ ﺛﺒﺘﺖ ﻟﺼﻮﺻﻴﺘﻪ ﺑﺎﻟﻮﺛﺎﺋﻖ ﻳﺘﻮﻟﻰ ﻭﺯﺍﺭﺓ ﻓﻲ ﺑﻼﺩﻫﻢ، ﻓﺎﻟﺬﻱ ﻻ ﻳﺆﺗﻤﻦ ﻋﻠﻰ ﻣﺎﻝ ﺯﻣﻴﻠﻪ ﺣﺮﻱٌّ ﺑﺄﻥ ﻻ ﻳﺆﺗﻤﻦ ﻋﻠﻰ ﻣﺎﻝ ﺍﻟﺸﻌﺐ ﻭﻣﺼﺎﻟﺤﻪ
    ﻛﺎﻥ ﻻ ﺑﺪ ﻟﻲ ﺃﻥ ﺍﻛﺘﺐ ﻫﺬﺍ ﺍﻟﻜﻼﻡ ﻋﻠﻰ ﺍﻟﺮﻏﻢ ﻣﻦ ﻗﺒﺤﻪ، ﺣﺘﻰ ﺃﻧﺒﻪ ﺍﻟﻨﺎﺱ ﺇﻟﻰ ﺃﻥ ﻭﺯﻳﺮﺍ ﺣﺮﺍﻣﻴﺎ ﻓﻲ ﻃﺮﻳﻘﻪ ﺇﻟﻰ ﺃﻣﻮﺍﻟﻬﻢ ﺍﻟﺘﻲ ﺃﻓﻨﺎﻫﺎ ﺍﻟﺤﺮﺍﻣﻴﺔ ﺃﻣﺜﺎﻟﻪ، ﻭﺣﺘﻰ ﻳﻨﻔﻀﺢ ﺃﻣﺮ ﻫﺬﺍ ﺍﻟﺮﺧﻴﺺ ﻓﻴﻐﻴﺮ ﻋﻤﻮﺩﻩ ﻓﻲ ﺟﺮﻳﺪﺓ ﺍﻟﺨﺮﻃﻮﻡ ‏( ﻫﺬﺍ ﻗﻮﻟﻲ ‏) ، ﺑﻌﺪ ﻧﺸﺮ ﻫﺬﻩ ﺍﻟﻔﻀﻴﺤﺔ ﻓﻴﺠﻌﻠﻪ ‏( ﻫﺬﻩ ﺑﻮﻟﻲ ‏)
    ==
    ﻟﺪﻱ ﺻﻮﺭ ﻣﻦ ﻣﺴﺘﻨﺪﺍﺕ ﺍﻟﻘﻀﻴﺔ ﺍﻟﺘﻲ ﺗﺪﻳﻦ ﻫﺬﺍ ﺍﻟﺮﺧﻴﺺ ﻭﺳﺄﻧﺸﺮﻫﺎ ﻓﻲ ﻭﻗﺘﻬﺎ

  5. والله يابروف من حقهم يفرحو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: