جابت ليها مسدسات

تكررت حالات الإعتداء من قبل مرافقي المرضى بكافة مستشفيات البلاد المختلفة وبخاصة المستشفيات الحكومية وقد تفاوتت حالات الإعتداء بين الشتم والإساءة مروراً (بالبونية) والإشتباك بالأيدي وصولاً إلى ما هو لا يمكن أن يخطر بالعقل وهو (إطلاق الذخيرة الحية) وهذا ما حدث في تمام الساعه التاسعه من مساء يوم الاحد الموافق 30 اغسطس 2015 حيث تعرض المدير الطبي المناوب لمستشفي بحري التعليمي لاطلاق رصاص ومعه اتنين من كادر التمريض داخل عنبر الباطنيه رجال والحمدلله (جات سلامة) ولم يصب أحد بأذي .

من الواضح أن معظم أفراد الشعب الفضل أصبحو شايلين في نفسهم على ابنائنا وأخواننا الأطباء وأضبح الكثيرون ينظرون إليهم وكأنهم (ما من البلد ده) علماً بأنهم أكثر الفئات التي تعطي دون من أو أذي في ظروف بالغة الرداءة وبعائد مادي لا يسد الرمق ولا يكفيهم (مواصلات وشاي) !
للأسف الشديد فإن كثرا بل معظم المواطنين يخلطون خلطاً عجيباً بين واجبات الطبيب وواجبات إدارة المستشفى .. يعني الزول لو مشى ليهو مستشفي مرافق ليهو مريض وقالو ليهو (أسطوانة أوكسجين) مافي او جهاز شفط السوائل (متعطل) أو مافيش جونتيات حقو يعرف إنو الحاجة دي الطبيب ما عندو بيها علاقة لأنو ببساطة شديدة دي من مهام إدارة المستشفي ، فيا سادة يا كرام ما تطلعو (غلكم) وحنقكم في الأطباء ساي .. وعينكم في الفيل ما تطعنو في ضلو والفيل هو (حكومتنا الرشيدة) التي تقوم بالصرف على (مسؤوليها) أضعاف أضعاف ما تصرفه على صحة مواطنيها ودونكم هذا الوضع الردئ والمؤسف لمستشفياتنا حيث تفتقر إلى كل شي ..ابتداء من الكادر البشري مرورا بالمعدات والاجهزة .. تخيلو معى يا سادة يا أفاضل إن مستشفى أم درمان (كمثال) لا يوجد به جهاز أشعة مقطعية (ما قلنا رنين) وثمنه يقل كثيراً عن أي من العربات البرادو المظللة التي ترونها يوميا في الشوارع وأمامها (موتر) ويييو ويييو وييو !!
يا أيها السادة الكرام يجب الإعتراف بأن الخدمات الصحية (الحكومية) في بلادنا متدنية تماماً فلا تجعلوا من الأطباء كبش فداء ، كما مطلوب منك أ تتثقفوا (طبياً) فالأخطاء الطبية لا تشمل التفاعلات الدوائية والاعراض الجانبية للادوية ولا تشمل مضاعفات العمليات التي تحصل بعد اجراء العمليات بنجاح يعني زول إتعملت ليهو عملية (استكشاف) مثلا وبعد فترة جاهو(فتاق) في مكان الجرح معقولة بس دي تكون مسؤولية الطبيب !!

كمان ماممكن تجي مرافق لمريض عندو سرطان رئة منتشر وعنده ضيق تنفس ولمن يموت في الطوارئ تقعد تفرد عضلاتك وتعمل فيها (جون سينا) يعني الطبيب في الحالة دي عايزو يعمل ليك شنوو؟
الطبيب يا جماعة الخير بشر .. وكمان في البشر (بشر سوداني) وقاعد معانا في السخانة دي .. سخانة الجو وسخانة (الجيوب) بيشتري الطماطم (أم خمسين ألف) والعجورة (أم عشرة ألف) بعاين للجمرة الخبيثة فضل فيها كم .. وبجيهو سيد البيت كل أول شهر عايز الإيجار وأولادو كل صباح عاوزين حق الفطور وكل صباح راسو بيكون ضارب يوصل للمستشفي كيف مع الزحمة دي وصعوبة المواصلات وبعد ده كوووولو شغالين في بيئة تفتقر إلى كل شيء ، وبعد ده كوووولو بيصرفو مرتبات (ملاليم) .. وبعد ده كووولو بيبذلوا أقصي جهدهم عشان (يعالجونا) والله أعرف الكثير من أولادنا الأطباء بيعملو (شيرينق) عشان يشتروا دواء لي مريض أو يعملو ليهو فحص !

ما بنقول إنو مافيش (أخطاء) طبية .. وكتبنا في الموضوع ده كتير لكن لو حصل خطأ طبي ناتج عن جهل (طبعن مستحيل يكون عن عمد) حقو الناس تلجأ للأسلوب الحضاري الراقي وتقدم شكوي للمجلس الطبي والقضاء ح يحسم الموضوع بدلاً عن الإشتباك … وكمان القصة جابت ليها (مسدسات)

كسرة :
عملية الزول في الطوارئ يرافقوهو (مية) زول دي إلا عندنا !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

Advertisements

15 تعليق

  1. المر ود شركه زين | رد

    يا عمو الفاتح دايرين لينا كسره جديدة (قديمه و متوسطه وجديده )

  2. المسدسات دي الية ولا عادية

  3. برنجييييييييية

    1. دي قمشة ,, موش برنجية ولا عشان سيد البرنجية ما اعلنها ؟؟؟؟
      عالم انتهازية بشكل !!!!
      طاخ طاخ طاخ

      1. طٌخو يا عويس ,,, جاء الرياض وما جانا ,, عجبتني ليهم الكرونا الجهجهتم دي !!

      2. سُب عليكن ! انا جيت مرضان باكى فاقد ,,,

  4. انصفت يا بروف , وانا مستغرب من كتير من الناس اتعاطفوا مع المرافق وما اتعاطفوا مع الطبيب المجنى عليه ! لييييه ؟؟

  5. يا جماعة الخير كدا خلونا نقول بالإضافة للكلام المع الطبيب دا ..
    نقول حقيقة مهمة … الطبيب عندنا خالق بينو وبين المريض أو المرافق حاجز وكأنو مافي زول بفهم في الدنيا دي غيرو … وأبقى راجل أسألو من حاجة بتخص أبوك العيان أو ولدك، يعتبرك كأنك تكلمت يوم الموقف العظيم … فوق إنو مافي تقدير للحالة البكون فيها الزول لمن يكون حاسي أنو حالة زولو قاعدة تتراجع بسرعة .. بيجي شفقان وحالتو حالة .. يلاقي الطبيب قايم بكل بطء (دا طبعا لو الطبيب قام معاهو أصلا) ودون ما يديهو أدنى احساس إنو مقدر الظرف الهو فيهو .. بل ممكن يتسكع في حاجة فارغة إمعانا في الغيظ … وبكل استهتار يجي يقول ليك البركة فيكم … !!
    حدث مع بنت أختي في الولادة أن تضايقت وجات أمها بكل رعب الدنيا للدكتور … تعال الحق بتي … دون أن يتحرك من مكانو قال ليها دي حبية خوافة ساي … أمشي أنا بجي بعد أكمل كباية الشاي دي .. ! عادت لنسمع بع شوية صرخة أختي وهي تنادي: بتي ماتت … وجاء حضرتو بعد ما جرى الممرض ناداهو ليجد أن الفتاة تلفظ في آخر أنفاسها .. !!
    تفتكر في تلك اللحظة لو كان معي مسدس هل كانسيكون للعقل مكان ؟؟؟؟؟؟؟؟؟؟؟؟؟؟؟؟؟؟؟
    محتاجين ندرب أطبائنا على التعامل مع المريض قبل أن نعلمه كيف يطعن الحقنة …. دي ستظل مأساتنا إلى أن يرث الأرض ومن عليها إن لم نفعل !!

    1. عفواً .. قال الطبيب (دي حلبية خوافة ساي)

      1. مقهورين و ساكتين

        هو اصﻻ ليه ينادوه مفروض يكون قاعد
        الموت والمرض والشفا من اللهةما من طبيب بس هو سبب لكن اﻻطباء الكويسين كلهم غادرو البلد وناس الحيكومة بدربوا في القابﻻت والمساعد الطبي والمعاون الصحي ناسين او متناسين دور الطبيب اﻻساسي

      2. والله يا اب احمد فعلا ده التصرف العادي بتاع الاطباء وبالذات اطباء الطوارئ وده البخلينا نفتكر انو التقصير منهم وهم لو كانوا بقابلوا المريض كويس اكيد كنا انتبهنا لمكان التقصي الفعلي وهي ادارة المستشفي ..

      3. التقصير

  6. مقهورين و ساكتين | رد

    كفيت ووفيت ي استاذنا

  7. اولا يا اخوانا البرنجية دي حقتي انا – ود المهدي
    تانيا : الاطباء زيهم وزي باقي الموظفين ما بدوهم مرتب كافي وبيطالبوهم بعمل كبير وعمل انساني في المقام الاول – وعشان الطبيب يقدر يقوم بهذا العمل لازم تكون عينو مليانة وكذلك جيبو – قارن مرتب الطبيب هنا وفي اي مكان اخر – تعرف السبب – والطب العمل الوحيد الذي لا تنفع فية قصة (نشتغل ليهم علي قدر قروشهم) لانو مرتبط بمسالة حياة او موت
    ومن ناحية تانية لازم الدولة توفر المعينات والضروريات بعد ما تدي الكادر الطبي المرتب الكافي والتدريب الكافي بعد داك اذا قصر او اتكاسل عن عملو يحاسب حساب عسير من قبل الدولة حتي لا يحتاج المرافق ان يحمل معة السلاح وهو ذاهب الي المستشفي
    ود المهدي

    1. هههههههههههههههههه ,, لقيتك حريييص يا حبيب ,,
      خبرك ودنيتك ؟ شنو لابد كدة ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: