واسعة شوية

بينما كنت أقوم بتسخين العربة أمام المنزل في صباح أمس الباكر إذ بجاري الحاج (عبدالمجيد) يهرول نحوي وهو ممسك بإحدي الصحف وهو يخاطبني في حرقة قائلاً :
– بالله ده إسمو كلام يا أستاذ … بالله ده إسمو كلام يا أستاذ
بعد أن هدأ شويه .. فتح باب العربة وجلس إلى جانبي وأعطاني الصحيفة التي كان يمسك بها قائلاً : أقرأ يا أستاذ .. أقرأ وشوف جنس الكلام ده

وقرأت الخبر االذي أشار لي عليه والذي يقول :
(تم مساء اليوم بقصر الشعب بالعاصمة الصينية بكين مراسم التوقيع على اتفاقية للتعاون في مجال الفضاء وأبحاثه ، حيث وقع عن السودان صلاح ونسي وزير رئاسة الجمهورية فيما وقع عن الجانب الصيني وزير التجارة) !!
بعد أن قرأت الخبر تلفت يمنة ويسري خوفا من أن أكون ضحية من ضحايا (الكاميرا الخفية) وبعد أن تأكدت من إنو الكلام (جد جد) إلتفت إلي حاج عبدالمجيد قائلاً :
– وفيها شنووو يا حاج؟
– (في حنق) : فيها شنووو ؟؟ كدي أول حاجة اليلمو لينا (الوسخ) الفي الشوارع دي محل ما تقبل تلاقي ليك (تل) بتاع نفايات ريحتو ضاربة .. وللا يحاربو لينا (البعوض) الكرهنا العيشة ده !
– يعني إنتا يا حاج معترض على حكاية الفضاء دي ؟
– لا أنا ما معترض بس قبل (الفضاء) الينضفو لينا (الواطة)
– تقصد شنوو يا حاج؟
– أقصد بدل إتفاقية أبحاث الفضاء دي والشعر الما عندنا ليهو رقبة ده كان يتعاقدو مع شركة صينية (للنظافة) .. تجيب الأليات والعربات والموظفين والعمال .. بي قرض بي منحة بي زفت بي أي حاجة !! يا أستاذ خليك من ده كوووولو .. مش كان أحسن وأولي يوقعوا لينا عقد لي صيانة المستشفيات الراقدة سلطة دي ويؤهلوها بالأجهزة والمعدات ؟ قال أيه : أبحاث فضاء !!
– والله يا حاج كلامك برضو معقول (الفضاء) والفلك والحاجات دي عندها (ناسا) !
– هس عليك الله يا استاذ (أبحاث الفضاء)؟ ولا تغيير شبكة الموية المن زمن الإنجليز دي ؟ أكان إتعاقدو لينا مع الصينيين ديل على عمل شبكة متكاملة في العاصمة دي (للموية) مش كان أحسن بدل تقطع لينا بالأيام والناس راسا يضرب لا تقدر تغسل وللاا تنضف وللا تستحما
– (مواصلا) : يا أستاذ هو بلد عاصمتو ما فيها شيكة صرف صحي والناس فيها بتقضي حاجتا في (الحفر) و (الإدبخانات) شن أبحاث االفضاء العليها .. هسه بدل عقد (الفضاء) ده كان أخدو منهم تمويل وعملو لينا (شبة صرف صحي) مش كان صحتنا ذاااتا إتحسنت بدل التلوث الحاصل ده؟
– يا حاج ياخ الناس المسؤولين ديل أكيد عارفين مصلحتنا أكتر مننا .. والظاهر مصلحتنا في (الفضاء) .. مش إحتمال يكونو خاتين في بالهم إنو البلد دي (تضيق) نقوم (نوسع) في كوكب تاني !
– البلد دي يا استاذ مش ح (تضيق) .. دي ح (توسع)
– كيف يا حاج ؟
– عشان بالطريقة دي نص السكان مرارتهم ح تنفقع ويروحو (أحمد شرفي) !

كسرة :

أبحاث فضاء ؟؟ لا دي واسعة شوية .. كدي شوفو لينا الموية أم (دود) دي !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

11 تعليق

  1. برنجية فضائية

  2. وشنو حكاية الجانب الصيني وقع عنو وزير التجارة … هي أبحاث فضاء ولا كركدي ؟؟؟

  3. ياخي انتو ما فهمتوهم الناس ديل عايزين يستفيدو من شمسنا الحاااارة دي ويعملوا لينا خلايا طاقة شمسية لانارة كل بيت علي حدة وبي كدة لا تكون في فاتورة موية ولا كهرباء ….. حلم صيني

  4. ديل دايرين يلموكم كلكم في مركبات فضائية ويتخلصوا منكم، عذبتوهم وكرهتوهم في عيشتهم من كترة الشكاوي، الحكومة وفرت ليكم كل شي من تعليم مجاني وعلاج مجاني وكهربا ومويه وما ناقصكم شي، صحي شعب نقناق

  5. بس ياها عريان ولابس سديري !!!
    بس ياها زي الطيارة الام جركم الما قعدت خريفين ديك ,,,

  6. بس حاج عبد المجيد دقسك هو اصلا كان داير يركب ملح ويصل معاك قدام يعني دي الخلعتو ؟ نحنا بقينا لمن عيونا دايرة تتخلع الجفون تقول ليها ارجعي ماشه وين يعني الجديد شنو ؟ اي زول مرق من خلعة اللمبي يبقي والي الخرطوم ما بتخلع تاني ,,,

  7. ههههههههههههه

  8. سلامات كل الفريق
    يا اخوانا انتو الحكومة دي ليها معانا اكتر من ربع قرن وما عارفنها بتسوي في شنو
    الاتفاقية دي لحستا جامدة
    لحدي ما يبدو وتظهر للعلن او نحن نصل لي مرحلة التحيق في ابحاث الفضاااااء يكونو لحقوها هيثروا

  9. عشنا وشفنا وأمانة يا أمنا الحكومة ما عندك محن !!!! سلااااام …

  10. هم خلو واطا عشان يبحثوا فيها – ديل باعوها كلها وخلاص قبلو علي الفضاء يعني احتمال يدفعونا ضرايب علي الفضاء الفوق بيوتنا – مش يمكن يدخل ضمن نطاق الابحاث – عش رجبا تري عجبا – والله بقينا كل يوم نشوف عجبا – لله درهم!

  11. يا أخونا مهدي حكاية رسوم الفضاء دي ما جديدة !! إنت شكلك ما أغتربت ، دي من زمان كان بدفوعنا ليها (رسوم الفضائية) للناس العندهم تلفزيونات ودشوش التقول الأقمار الماشة في الفضاء دي حقت أبوهم ولو ما دفعتها مع الزكاة والضرائب ما بدخوك تأشيرة خروج ، بس لغوها لمن جاهم البترول وهسا كان ما خجلوا برجعوها تاااني ، وعلى قول (أهلنا المصارية) .. ” عيطي يا إنشراح فاللي جاي أوسخ من اللي رااح ” .. سلااااام ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: