ده الكلام

بينما كانت ( نفيسة أم البنات ) تجلس مع جارتها ( محاسن ) و هن يتناولن ( الشاي) و يشاهدن التلفزيون
محاسن: ما سمعتي يا نفيسة الكلام القالوهو ناس الحكومة ؟
نفيسة : كلام شنو ؟ ما كل يوم قاعدين يتكلمو هم عندهم غير الكلام حاجه.
محاسن : لا لا ده كلام تاني ! و بيهمك انتي يا أم البنات

نفيسة: شنو ؟ عاوزين يخفضوا أسعار الكريمات
محاسن: كريمات شنو ؟ عاوزين يجيبوا لي بناتك ديل عرسان
نفيسة : من وين ؟ و الله إلا يستوردوهم ليهن
محاسن : ما أصلوا .. قالو ليك وقعو ليهم إتفاقية مع الصيم ماشين يستوردو بيها عرسان.
نفيسة : الكلام ده جد يا محاسن
محاسن : إنتي قايلا الوفد المشى الصين ده مشي يحل مشكلة (أبحاث الفضاء) ما مشى يحل مشكلاتنا العويصة الما لاقين ليها حل دي
نفيسة : يعني هسه بناتي ديل ( بورتن ) إتفكت ! مما خلصن القراية بس قاعدات ليا كده لا شغلة لا مشغلة
محاسن : لا خلاس يا بت أمي .. المشكلة إتحلت أمشي كلميهم.
نفيسة تغادر منزل جارتها (محاسن) مسرعة و تدخل إلى منزلها حيث تجد بناتها الخمسة جالسات يشاهدن في القناة الفضائية يضعن المساحيق على وجوههن و يمسكن بالمرايات يتطلعن لوجوههن
– ايووووووي يووووووي يوووووووووووووي
البنات : مالك يمه بتزغرتي ؟ حماده أخوي جا من السفر ؟
نفيسة : حماده شنو ؟ ده خبر بي مليون جنيه
البنات : ( في تلهف ) شنو الخبر يا حاجة ما تشحتفي لينا روحنا أكتر من كده.
نفيسة : أيوووي يوووي يووووووي !! خلاس يا بنات بورتكن فكت ! بكرة الخمسة الاقيكن في بيوتكن
البنات : معقولة يمه ؟ لقيتي لينا خمسه عرسان حته واحده…. ده الكلام !
نفيسة : خمست شنو البسيطة دي ؟ أكان عاوزات خمسين أجبيهم ليكن .. إنتن ما سمعتن بالخبر ؟
البنات : خبر شنو ؟ كمان
نفيسة : مش الحكومة وقعت إتفاقية مع الصين تستورد بيها عرسان؟ و الله قالو إستوردو ليكن عرسان يا حلاتم ذي ( حجارة البطارية ) ده من ده ما تفرزيهو.
البنات : أوع بس تكون ذي بضاعتم الفي السوق دي الحاجة تشتغل يومين و تقيف.
نفيسة : و الله غايتو دي مشكلة ناس المواصفات السوق كلو بضاعتو ضاربة يا بناتي.
البنات : و ديل يمه يعني نقدم ليهم وين ؟
نفيسة : و الله الحكومة لسة ما ورتنا الحاصل شنو لكن الظاهر ح يوزعوهم ليكن ذي التموين.

بعد شهر في أحد الأسواق :

تجمهر عدد من المواطنين أمام شخص يصيح بواسطة مايكرفون محمول و هو يضع أمامه عدد من العرسان الصينيين … على عشرة … على عشرة … على عشرة … صيني مية المية و أهو دة الباسبورت … و الواقف هناك داك المأذون … عريس مية المية و أهي دي الشهادة الصحية .. لا بساهر (بره )..لا بجيب ليك( ضرة) علينا جاي.

نفيسة : عليك الله يا ود أمي قول للواقف في النص ده يقبل جاي خلينا النشوفو كويس.. ده اللابس الجينز ده.. الوليد ده شغال شنو ؟
البائع:يا حاجه ده ما وليد ما تشوفيهو ( سغيروني) كده .. ده إسمو ( وانغ يانغ ليو ) و عمرو 39 سنه و شغال فني بتاع تبريد و تكييف.
نفيسة : أريتو عريس الهنا شوف الشعر نازل لي جبهتو كيفن – تلتفت نحو بنتها التي تقف خلفها تعالي يا بت شوفي العريس ده بينفع معاكي.
البنت: تنظر اليه متفحصه … قصير … يا ماما … قصير.
نفيسة : و يجيبوا ليكي صيني طويل من وين ؟ ما ياها دي البضاعة الفي السوق.
البائع : يلتفت نحوها – خلاس يا حاجه ما مشكلة بكرة تعالي جايانا بضاعة جديدة بكره!!

بعد 25 عاما على ظهر ركشة :
شين تشان فو (وترجمتها) – نفسي أقطع الكبري !!
بعد 30 عام (معلومات جواز السفر) :

الطول : 4 قدم وإتنين بوصة
العيون : خضراء بزاوية 45 درجة

كسرة :
يقول المثل الصيني (تشيغ هاو تين يونغ شانغ وي فونغ) ومعناهو : لا تنظر مليئاً إلى الفضاء بل أنظر بتمعن إلى الأرض !! …. قال أيه (أبحاث فضاء) كدي عرسوا لينا للبنات ديل !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

6 تعليقات

  1. السلام عليكم

    1. مقهورين و ساكتين | رد

      و عليكم السلام و رحمة الله و بركاته

  2. وعليكم السلام ورحمة الله وبركاته دكتور ، ومبرووووكة عليك البرنجية .. بس ما وريتنا رأيك في العريس (الصيني) ؟ ودي ذكرتني قصة البريطانية العرست صيني رغماً عن معارضة أبوها وبعد سنة ولدت ، لكن الولد مات بعد شهرين !! فقعدت تبكي وحزنت شديد عليهو ، فأبوها قال ليها : (Why are you sad ? I knew it won’t last long) ههههههههههههههه .. سلاااام ..

  3. تشو جانغ بيغ بيغ ,, سو ما فيت نوووو

  4. ههههههههههههههههه أفووووو بقيت صيني يا ود شمباتي ؟؟ ولا من عاشر قوماً صار منهم ؟؟ .. سلااااام ..

    1. وعليكم السلاااام ورحمة الله ,, انت الوحيد الفهمت كلامى الفوق دا !

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: