نتعوض الله؟

جاء في أخبار الأمس بالزميلة الصيحة أن إمام وخطيب المسجد الكبير بالخرطوم، الشيخ إسماعيل حكيم قد شن هجوما شديدا على الحكومة بسبب استئجار مبنى لوزارة العمل والإصلاح الإداري بقيمة 6 مليارات جنيه، بواقع 500 مليون شهريا متعجباً من تصريحات وزير العمل والإصلاح الإداري الذي صرح بذلك في وقت سابق وقد طرح فضيلة الشيخ الأسئلة التالية وليسمح لنا أن نحاول الإجبة عليها ما إستطعنا :

س 1 : ماهي دواعي إيجار مقار للوزارات؟
ج 1 : (طبعن) يا مولانا لازم بعض الوزارات تقوم بتأجير مقار وبنايات لها .. طيب لو (الحكومة) قامت بتشييد المقار دي وما كان في (تأجير) الناس دي (تلهط) فلوس الشعب البائس الفقير ده كيف؟
س 2 : هل المقار والعقارات الحكومية عدمت حتى تضطر الحكومة لاستئجار مقر لوزارة بهذا المبلغ ؟
ج 2 : المقار والعقارات الحكومية يا (مولانا) ما عدمت .. العدمت الأخلاق والنزاهة والخوف من رب العالمين هسه عليك الله يا مولانا ده إسمو كلام ، الناس تعبانة جنس التعب ده ما عارفه تعلم أولادا كيف ولا تتعالج كيف؟ ولا تاكل كيف مع الأسعار البقت في السماء دي ؟ الناس (تلهط) كده بالمفتشر .. والغريبه يا مولانا الحاجات دي تمر مرور السلاااام مافي ولا أيتها جهة سيادية أو عدلية مسؤولة عن (مال) الشعب الغلبان ده بتحقق في الموضوع وللا تشوف القروش دي بتمشي وين ؟
س 3 : أليس في ذلك تبديد للمال العام وإهدار لمكتسبات الشعب السوداني؟
ج 3 : والله يا مولانا إنتا الظاهر (جديد) في حكاية أهدار المال العام ومكتسبات الشعب السوداني الفضل ، ولو تابعت القصة بتاعت إهدار المال دي (االخطب) بتاعتك ح تكون محجوزة (كم سنة جاية) شئ (خط هيثرو) وده عاوزنك تفرد ليهو (خطبة) قريبة ، وشئ (الأقطان) ومسرحية لجنة التحكيم وشئ التحلل وفضيحة (مكتب الوالي) وشئ أموال (الزكاة) وقناة الضحى وشئ (بيت السودان) وشئ (الطرق والكباري) وشئ (المصارف) وشئ (أراضي مدير الأراضي) وشئ (بيع أراضي المدينة الرياضية) و شئ (تجاوزات وزارة الأوقاف) وشئ ( تزوير وتلاعب هيئة نظافة الخرطوم) وشئ (التقاوى الفاسدة) وشئ(بذور القمح الفاسدة) وشئ (وحدة تنفيذ السدود) وشئ (هيئة الحج والعمرة) .. (ما تعدش) كما بيقول أخواننا في شمال الوادي !!
س 4 : ما هو الداعي لإيجار مقر بهذه التكلفة العالية في ظل حكومة رشيدة؟
ج 4 : ده السؤال ذاااتو يا (مولانا) .. معقولة بس يا مولانا (مبنى) إيجارو الشهري يكون 500 مليون جنيه ؟ يعني سطاشر مليون وستمية ستة وستين ألف جنيه في اليوم؟
س 5 : ألا تدل مثل هذه التصرفات والأفعال في هذه الحكومة على الجاهلية التي نهى عنها رسول الله في حجة الوداع؟
ج 3 : والله يا مولانا كان جيت للكلام الجد في الجاهلية ما أظن إنو الكلام ده في عشان الناس في الجاهلية كانوا (كفار) لكن ما (حرامية) .. !!
كسرة (1) :
مش كده وبس قالو متعاقدين ليهم مع جهة عشان تشغل الجنريتر لمن الكهرباء تقطع بي (مليار جنيه) في السنة …. هات الحبوب يااا ولد !!!
كسرة (2) :
هل من يفتح التحقيق في موضوع أيجار العمارة الشهرا بي نص مليار دي ؟ وتشغيل الجنريتر أبو مليار ده ؟ وللا خلاس (كالعادة) نتعوض الله ؟

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

8 تعليقات

  1. برنجية مليارية

  2. برنجية وطارت العوض علي الله

  3. لو كان في عمل واصلاح اداري 6 مليار ما خسارة لكن – حشف وسوء كيلة – لا عمل ولا اصلاح اداري وكمان تبذير – عجبي ؟
    وَآتِ ذَا الْقُرْبَى حَقَّهُ وَالْمِسْكِينَ وَابْنَ السَّبِيلِ وَلاَ تُبَذِّرْ تَبْذِيرًا إِنَّ الْمُبَذِّرِينَ كَانُواْ إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُورًا
    الاسراء 26 و27

  4. يااااا للهول
    المبنى لوزارة العمل والإصلاح الإداري ؟؟؟
    ودي حالتا ما ( منتجه ) وشغالة معانا ( بالخسارة ) جنيه واحد ما بتدخلو !!
    طيب ناس وزارة المالية وناس وزارة الاستثمار وناس الضرائب وناس …… البلهطو في خزينة الدولة و الفي جيوب الناس يستأجرو بي كم ؟؟؟؟

  5. انت ياود جبرا شكلك مع دوله الانقاذ دي لانو لاسمعنا قبضوك ولاحاكموك خاليناك متنفس للناس عشان يقولوا في ديمقراطية انا مرات كتيرة بتصور انك بتدي وبارشد ناس الانقاذ والمؤتمر الوطني لدروب وطرق اضافيه لزيادة وتوسعة مجالات المأكله لكن نسبتك كم ماعارفين واذاخبراتك بتقدمها بمقابل تبقي مصيبة واذا كان بدون مقابل تبقي المصيبه اكبر .

  6. يا بدر النهار ” لو فضل فيها بدر” حرام عليك ، دي هسي بقت ظلام (ودا ما دفاع عن البروف) إنما دفاع عن الحق !! الراجل كتر خيرو شغال يفضح لينا في مساوئ النظام تقول لي إنت معاهم !! وهي خربانه من كبارا وديل يقلعم رب العالمين .. واحد أخونا غلط أجر بيتو لي شركة تابعة ” للمؤتمر الماوطني” ممنياًً النفس بأيجار يريحوا من الصرف على تعليم أولادوومصاريفهم ، لكن النتيجة شنو ؟؟؟؟ لا دايرين أديهو حق الإيجار ولا دايرين يمرقوا ليهو من بيتو !! ولسان حالم يقول {أعلى ما في خيلك أركبوا} !! ما البلد بلدم وهم سيادا ، لكن يمشوا وين من رب العالمين .. اللهم أرنا فيهم آيات قدرتك وعجائب سطوتك فإنهم لا يعجزونك يا قوي يا متين ، آمين .. سلاااام ..

  7. اتعوض يا الماك معوض ! اتعوض

  8. 500 مليون شهريا تعادل ايرادات كم مواطن فى كم محلية..املا فى ان تعود عليه بنفع ؟تروح كدا شمار فى مرقة ساكت .. ولا ايرادات كم لورى ماخد علف ولا لبن؟؟الله فى .. والموت ملاقيكم والحساب منتظركم وكفى بالله وكيلا وحسيبا.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: